Iwhowho Uvie A n’Iyẹrẹ

A bi “Yo” Ovuẹ Uvie na Evaọ Brazil

RE A ruẹsi whowho emamọ usi Uvie na evaọ udevie enọ i di ezọ, Isẹri Jihova buobu evaọ Brazil a jẹ use-abọ na rehọ no re a wuhrẹ Ẹvẹrẹ Obọ rọ t’Ẹme Brazil. Omodawọ rai o be wha emamọ iyẹrẹ ze, wọhọ epanọ ikuigbe eware nọ e via nọ e rrọ obotọ na i dhesẹ.

Eva,a aye jọ nọ o diezọ evaọ São Paulo, o muọ ẹvẹrẹ obọ rọ t’ẹme họ ewuhrẹ okenọ tei te emọ esa riẹ a kwa bru ọzae jọ nọ o di ezọ je lele ie rria. Eva avọ ọse riẹ a nya ku ẹko Isẹri jọ nọ i diezọ eva oria eki, a te zizie ai kpohọ ewuhrẹ eva Ọgwa Uvie. A jẹ uzizie na rehọ, avọ iroro nọ epati a bi zizie ae kpohọ na.

Fikinọ ọ riẹ kpahe ẹvẹrẹ obọ rọ t’ẹme te ere he, Eva o wo otoriẹ eme nọ a jọ ewuhrẹ na ta ziezi hi. Nọ ewuhrẹ na ọ fa no, Isẹri jọ a te zizie ie kpohọ uwou rai re a rọ omoware te unu. Ẹkwoma iwoho nọ e rrọ ibroshọ Reawere Uzuazọ Otọakpọ Bẹdẹ Bẹdẹ!, a te ru eyaa Ọghẹnẹ ọrọ aparadase otọakpọ obaro vẹ kẹe. Eware nọ Eva o wuhrẹ e were riẹ, fikiere o te muọ iwuhrẹ na họ ẹnya ẹsikpobi.

U kri hi, Eva ọ tẹ kwa siọ ọzọ riẹ ba re ọ sae rria lele itee Ebaibol. Dede nọ uviuwou riẹ o wọso ẹe gaga, ọ ruabọhọ ru ẹnyaharo abọ-ẹzi, ọ tẹ họ-ame evaọ 1995. Emerae ezeza e ruọ emu no, Eva o te fi obe họ wọhọ ọkobaro, owhowho Uvie oke-kpobi. No anwọ oke yena ze, o fi obọ họ kẹ imane nọ i diezọ nyate omarọkẹ gbe ame-ọhọ no.

Carlos o diezọ no eva ze. No emaha ze, o du oma họ imu egaga erehọ, ọfariẹ-ogbe, gbe ujitho. Fikinọ ahwo jọ evaọ ẹgba riẹ a y’obọ kẹe, ọ tẹ dhẹ kpohọ São Paulo, o te lele João rria evaọ ubroke. João, wọhọ Carlos, o diezọ je bi yere uzuazọ ofogori.

Ikpe jọ e vrẹ no, Carlos o te wuhrẹ kpahe ovuẹ Uvie na, o te nwene uzuazọ riẹ je kere obe orọo riẹ. Nọ ọ nya te itee Ikereakere na no, Carlos ọ tẹ họ-ame evaọ oka oma nọ ọ rọ kẹ Jihova. Evaọ oke nana kpobi, Carlos ọ riẹ hẹ inọ a ta usiuwoma kẹ João no re, gbe nọ o ru inwene gaga no evaọ uzuazọ riẹ. Nọ o wuhrẹ nọ Jihova ọ ghọ emema nọ a rẹ rọ gọ, João o te gbolo emema “erezi” riẹ fiẹ. Nọ o kiuke ku uzuazọ ọsosuọ riẹ no, João ọ tẹ họ-ame re.

Ẹvẹ eva e were Carlos avọ João te okenọ a ruẹ oma eva Ọgwa Uvie jẹ ruẹ inwene nọ aimava a ru no! Obọnana aimava a rrọ esẹ nọ e be rọ ẹro te uwou rai ziezi jẹ rrọ iwhowho Uvie ajọwha.

Evaọ obọnana a jọ Brazil wo ikoko ẹvẹrẹ obọ rọ t’ẹme 30 gbe itu 154, enọ iwhowho-uvie nọ i bu vrẹ 2,500 e rrọ, yọ usu enana 1,500 a diezọ. Evaọ Okokohọ Ubrotọ “Otu-Iwuhrẹ Ẹme Ọghẹnẹ” nọ a jọ Brazil ru kẹ enọ i diezọ evaọ 2001, enọ e jariẹ a bu vi 3,000, ahwo 36 e họ-ame. Avọ oghale Jihova, ma rẹro nọ amọfa nọ i diezọ a te jẹ ovuẹ Uvie na rehọ.

[Oruvẹ-obotọ]