Muẹrohotọ kẹ Eduku Ahwo nọ A Diezọ Evaọ Ẹkwotọ Ra
1 Jihova ọ be kẹ uzizie na inọ: “ ’Nyaze.‘ . . . Wha mi ame uzuazọ na, okẹ ọvọvẹ rọ kẹ ahwo nọ a guọlọ e riẹe.” (Evia. 22:17) Unu buobu ahwo nọ a diezọ a rọ usu ahwo nọ a be j’owọ kpahe use onana. Fikiere, evaọ etoke ikpe isoi nọ e vrẹ na, a rehọ ẹko obọ rọ t’ẹme jọ ro mu no evaọ Nigeria.
2 Dede nọ ẹko obọ rọ t’ẹme a be kpọ omodawọ usiuwoma ota rai kpobi fihọ eduku ahwo nọ a diezọ gbe enọ i re yo ẹme te he evaọ ẹkwotọ ukoko nọ a fi rai họ, ahwo buobu itieye na e gbẹ riẹ nọ a ri ti duku je se isẹri kẹ evaọ orẹwho nana ha.
3 Ẹvẹ Whọ Sai Ro Fiobọhọ? Evaọ eria ẹgbede, kọ whọ ruẹ ahwo nọ a be rọ obọ t’ẹme no? Kọ whọ riẹ ohwo jọ evaọ oria iruo ra hayo eva isukulu ra nọ o wo ohwo jọ nọ o diezọ evaọ uviuwou riẹ? Muẹrohotọ kẹ eduku enọ i diezọ nọ who bi ru iruẹru ekẹdẹ kẹdẹ ra na. Kọ ẹvẹ o sai ro mu owhẹ ẹro nnọ a ti se isẹri Uvie na kẹ ae?
4 Se Isẹri: Dhesẹ oria nọ ohwo nọ o diezọ na ọ be rria kẹ ẹko obọ rọ t’ẹme nọ ọ mae kẹle etẹe. Ahwo buobu nọ a diezọ a re ru ẹnyaharo kpata viere evaọ ewuhrẹ uzẹme na evaọ okenọ a tẹ sai kuomagbe Isẹri nọ i diezọ eva ukoko nọ a be jọ fa abọ sa-sa iwuhrẹ na kpohọ ẹvẹrẹ Obọ rọ t’Ẹme America. Fikiere, otẹrọnọ ẹko obọ rọ t’ẹme o rọ okogho ra, okere-obe ukoko ra o re vi evuẹ kpahe ahwo kpobi nọ a diezọ evaọ ẹkwotọ ra se ukoko nọ ẹko na o rọ.
5 Kọ otẹrọnọ ohwo nọ ọ rẹ kẹ ahwo nọ a diezọ obufihọ abọ-ẹzi ọ kẹle ẹwho ra ha? Ẹvẹ whọ sai ro fiobọhọ? Eme jabọ who gbe ru ozihebro re whọ t’ẹme kẹ ahwo uviuwou na jọ nọ i re yo ẹme he? Ta nọ whọ gwọlọ dhesẹ ividio obọ rọ t’ẹme re o kpare isiuru ohwo nọ o diezọ na. Iwhowho-uvie jọ i tube wuhrẹ Obọ rọ t’Ẹme America no re a sae nyate enọ i diezọ na oma ziezi viere. (Iruẹru 16:9, 10) A ru Ibroshọ Gwọlọ na gbe obe Eriariẹ na fihọ ividio Obọ rọ t’Ẹme America. Eruo iwuhrẹ Ebaibol ẹkwoma ekwakwa enana o wha emamọ iyẹrẹ buobu ze no.
6 Ẹkwoma ẹromuhotọ kẹ eduku ahwo nọ a diezọ evaọ ẹkwotọ ra, whọ rẹ sae kẹ ae uvẹ na re a rehọ ame uzuazọ ọvọvẹ.—Mat. 10:11.