Eme Ọ Be Via Kẹ Ọghọ-Oruo?

NỌ OZIGHI-ỌKPARESUỌ September 11, 2001, evaọ New York City gbe Washington, D.C. na ọ via vrẹ no, ahwo buobu a kwa eware ze re a ro fi obọ họ kẹ otu nọ uye na u te oma. U gbe ikoko ọ ẹruorote unu nọ a ruẹ azọhọ unevaze ₦351,000,000,000.00 (enara ima-idu 351) nọ ahwo a rọ ze re a ro fi obọ họ kẹ iviuwou ahwo nọ uye na u te oma. Fiki epanọ ọraha na ọ da rai te, ahwo kpobi a gwọlọ fi obọ họ.

Dede na, o da ahwo gaga nọ a yo nnọ ikoko ọ ẹruorote nọ a riẹ ziezi a be rehọ igho na ru eware efa. Ahwo buobu a muofu nọ a yo nọ ukoko ọ ẹruorote ulogbo jọ o be gwọlọ rehọ enwenọ abọvo ọ ₦70,980,000,000.00 (enara ima 70,980) nọ a kẹ rai na ru eware efa. Dede nọ ukoko na u ku iroro rẹriẹ je wou unu, ọniyẹrẹ jọ o muẹrohọ nnọ: “Ghelọ enwene iroro na, otu avro a ta nọ evaifihọ nọ ahwo a wo kẹ ukoko na u wo irekọ no,” o gbẹ wọhọ epanọ o jọ taure ozighi na ọ tẹ via ha.” Kọ ẹvẹ whẹ omara? Eva nọ who fihọ ikoko ọ ẹruorote i bi whrehe no?

U Wo Iruo Manikọ Uvrẹvru?

A re rri eware nọ a rẹ rọ kẹ ukoko ọ ẹruorote wọhọ oware ezi. Ghele na, orọnikọ ere o rrọ ahwo kpobi oma ha. Bu vrẹ ikpe 200 nọ i kpemu no, ohwo Oyibo nọ o re kere ebe na, Samuel Johnson, o kere nnọ: “U re mu owhẹ ẹro ziezi inọ who bi ru ewoma eva okenọ whọ tẹ be rehọ ugho kẹ ahwo nọ a ruiruo, wọhọ osowha rai viukpenọ whọ rẹ rehọ iẹe ruọghọ.” Ahwo jọ nẹnẹ a wo iroro evona, yọ iyẹrẹ inọ ikoko ọ ẹruorote e be rehọ eware nọ a zọhọ kẹ ae ru onọ u je rai, o soriẹ ze nọ ahwo a gbe bi ro fi eva họ ae he. Roro kpahe iriruo ivẹ jọ nọ e via kẹle.

A si osu ukoko ọ ẹruorote ọrọ egagọ jọ no iruo, evaọ San Francisco, nọ a ruẹ nnọ ọ yare unuigho jọ mi ukoko ọ ẹruorote na rọkẹ oma-usiwo riẹ gbe ₦65,000.00 wọhọ ugho nọ ọ rọ re emu k’oka k’oka eva etoke ikpe ivẹ dedenọ ọ raha igho itieye na ha. Evaọ Britain, oma o vo ogbẹgwae nọ u se ẹgwae kẹ ẹyare igho rọkẹ iwhrori evaọ etẹlivisiọno, nọ a ruẹ inọ eva ₦1,300,000,000.00 (enara ima-odu ọvo gbe ima egba esa) nọ a vi se ae re a ro fi obọ họ bọ iwou kẹ imiwhrori evaọ Romania, imiwou 12 ọvo a bọ, a sae fodẹ oware nọ a rehọ ima enara buobu ru hu. Iyẹrẹ itiena buobu nọ e rẹ were ezọ họ e lẹliẹ ahwo jọ nọ a hai ti ru ọghọ be yọrọ oma kpahe unuigho nọ a re si obọ no gbe ahwo nọ a rẹ rehọ ae kẹ.

A Kẹ, Manikọ A Kẹ Hẹ

Dede na, o rẹ jọ oware omovuọ re ma kuvẹ kẹ uruemu amọfa jọ hayo ikoko jọ re i kpe emamọ ẹzi ororokẹ gbe ọdawẹ nọ ma wo kẹ amọfa. Ebaibol na e ta nọ: “Egagọ efuafo nọ a rẹ jọ zue-oma obaro Ọghẹnẹ gbe Ọsẹ na ha, ena: nnọ, a re riwẹ imiwhrori avọ eyaukuotọ nọ uye o rẹbẹ.” (Jemis 1:27) Ẹhẹ, eware nọ a re ru kẹ iyogbere na gbe enọ akpọ ọ be bẹ yọ abọ ologbo ọrọ Egagọ-Ileleikristi.

Ghele na, whọ sai roro nnọ, ‘Kọ u gbe fo re me ruọghọ kẹ ukoko ọ ẹruorote, manikọ mẹ ọvo ọ daoma rehọ okẹ mẹ se ahwo na omomọvo?’ Oghẹrẹ ọghoruo vẹ Ọghẹnẹ ọ gwọlọ? Uzoẹme notha na o te ta ẹme kpahe enọ nana.