Enọ Ahwo nọ A s’Ebe
Kọ o thọ re ohwo o kpe arakọ hayo ologbo riẹ nọ ọ be mọ gaga hayo nọ ọ kpako gaga no?
Ahwo buobu a ruẹ erao sa-sa wọhọ ehri isiuru gbe omawere. Erao uwou jọ i re fi obọ họ kẹ enọ i wo rai. Wọhọ oriruo, a riẹ erakọ wọhọ nnọ i re yoẹme kẹ jẹ dhẹ whaliẹ enọ i wo rai. Fikiere, o rrọ vevẹ inọ ahwo a re dhesẹ ọdawẹ kẹ erao itieye na gaga, maero arao nọ ọ rria uwou na ikpe buobu no.
Dede na, erao buobu e rẹ rria tọ họ. Erakọ e rẹ sae rria te oware wọhọ ikpe 10 rite ikpe 15, yọ ere o rrọ kẹ ilogbo buobu re. Evaọ oke owho, erakọ hayo ilogbo jọ e sai muhọ ẹmọ jẹ ko fihọ uwou dede, yọ oyena o rẹ sae da enọ i wo rai nọ a tẹ kareghẹhọ ikpe nọ erao nana e jọ emaha nọ i je duola. Kọ o thọ re a kpe erao itieye na no uye nọ e rrọ na?
Oleleikristi ọ rẹ gwọlọ ru lele oreva Ọghẹnẹ evaọ eyerikugbe erao. U mukpahe oreva Ọghẹnẹ re a lahiẹ erao, keme Ẹme riẹ ọ ta nọ: “Ohwo okiẹrẹe ọ rẹ rehọ ẹro te uzuazọ arao riẹ.” (Itẹ 12:10) Dede na, orọnikọ onana u dhesẹ nọ Ọghẹnẹ o rri erao epanọ o rri ahwo-akpọ họ. Okenọ Ọghẹnẹ ọ ma ahwo-akpọ, o dhesẹ nọ ohẹriẹ ulogbo o rrọ udevie rai gbe erao. Wọhọ oriruo, ọ kẹ ahwo-akpọ ẹruore uzuazọ ebẹdẹ bẹdẹ, rekọ ọ kẹ erao ẹruore nana vievie he. (Ahwo Rom 6:23; 2 Pita 2:12) Nọ ọ rrọ Ọnọma na, o wo udu nọ o re ro fi usu nọ u kiehọ fihọ udevie ahwo-akpọ gbe erao.
Emuhọ 1:28 o ta kẹ omai oware nọ usu yena o rrọ. Ọghẹnẹ ọ ta kẹ ahwo ọsosuọ na nọ: “Wha wuzou iyei obọ abade gbe evra obọ ehru gbe eware kpobi nọ i wo uzuazọ nọ e be nya evaọ akpọ na.” Epọvo na, Olezi 8:6-8 o ta nọ: ‘Ọghẹnẹ o fi eware kpobi họ otawọ ohwo, igodẹ gbe iruẹ kpobi, gbe erao ẹwọ nọ e rrọ obọ ẹwọ, erao ora obọ ehru, gbe iyei obọ abade.’
Ọghẹnẹ o ru rie vevẹ inọ ohwo ọ rẹ sae rehọ erao ru emamọ iruo yọ ọ rẹ sai kpe ai. Wọhọ oriruo, a rẹ sae rehọ oviẹ rai ru iwu. Ofariẹ, okenọ Ẹvo edẹ Noa na o ku vrẹ no, Ọghẹnẹ ọ tẹ jẹ kẹ ahwo-akpọ uvẹ re a re arao ro fiba ẹbe nọ a jẹ re vẹre.—Emuhọ 3:21; 4:4; 9:3.
Onana o kẹ ahwo udu nọ a re ro mu erao kpe rọ zaha aro ho. Eva Emuhọ 10:9, Ebaibol na i dhesẹ Nimrọd wọhọ “ozuẹ ologbo.” Rekọ owọ ovona o ta inọ onana u ru rie ‘wọso ỌNOWO na.’
Fikiere, dede nọ ohwo o wo uzou vi erao, ọ rẹ rehọ udu yena ru iruo thọthọ họ rekọ ọ rẹ rehọ iẹe ru iruo nya lele ehri-izi Ẹme Ọghẹnẹ. Onana o sae gwọlọ nọ a rẹ kẹ arao uvẹ hẹ re ọ ruẹ uye tilẹ tilẹ fiki owho, omonwa ologbo, hayo ẹyao nọ o bi kpo ho. O tẹ via ere, o rrọ owha-iruo Oleleikristi re ọ jẹ iroro oware nọ o re ru. Ọ tẹ jẹ iroro nọ o te jọ oware ohrọ re arao na ọ se uye ba ẹruẹ nọ oma riẹ o be te ga ha na, ọ sae salọ nọ o re kpei.