Kọ Erao I re Kpobọ Odhiwu?
Uyo nọ Ebaibol na ọ kẹ
Ebaibol na o wuhrẹ nọ evaọ usu emama nọ e rrọ otọakpọ na, umutho ahwo-akpọ jọ ọvo a ti kpobọ odhiwu. (Eviavia 14:1, 3) A te jọ ivie gbe izerẹ nọ i ti lele Jesu su. (Luk 22:28-30; Eviavia 5:9, 10) A te kpare ahwo-akpọ buobu gbidi gbidi ziọ uzuazọ evaọ otọakpọ na nọ akpọ na o te zihe ruọ aparadase no.—Olezi 37:11, 29.
A jọ oria ọvuọvo evaọ Ebaibol na fodẹ odhiwu nọ erao wọhọ erakọ e rẹ rria ha, yọ u wo ẹjiroro nọ o rọ rrọ ere. O gwọlọ nọ ohwo o re ru eware jọ re ọ sai te kẹ “use obọ odhiwu na,” rekọ erao e sai ru eware nana ha. (Ahwo Hibru 3:1) Eware nana jọ họ, u fo nọ ohwo ọ rẹ riẹ Ọghẹnẹ uzẹme na avọ Ọmọ riẹ, wo ẹrọwọ, je koko izi Ọghẹnẹ. (Matiu 19:17; Jọn 3:16; 17:3) Ahwo-akpọ ọvo a ma re a rria bẹdẹ bẹdẹ.—Emuhọ 2:16, 17; 3:22, 23.
Re emama nọ e rrọ otọakpọ na a sai kpobọ odhiwu, o gwọlọ nọ a rẹ kpare ae zihe ziọ uzuazọ. (1 Ahwo Kọrint 15:42) Ebaibol na ọ fodẹ ekparomatha jọ nọ e via evaọ oke nọ u kpemu. (1 Ivie 17:17-24; 2 Ivie 4:32-37; 13:20, 21; Luk 7:11-15; 8:41, 42, 49-56; Jọn 11:38-44; Iruẹru Ikọ 9:36-42; 20:7-12) Evaọ usu ekparomatha na kpobi, ahwo-akpọ ọvo a kpare zihe ziọ uzuazọ orọnikọ erao ho.
Eme ọ rẹ via kẹ erao nọ a te whu?
Ebaibol na o wuhrẹ nọ te ahwo-akpọ te erao yọ emama nọ e rrọ “uzuazọ,” fikiere oghẹrẹ nọ uzuazọ ohwo o rrọ ere ọrọ erao o rrọ re. Nọ a rọ “ẹkpẹ otọ na” mae no, a te ku “ẹwẹ uzuazọ” ku ae.—Emuhọ 1:24; 2:7; Ikelakele 31:28.
Ebaibol na ọ tẹ jẹ ta nọ te ahwo-akpọ te erao a re whu. (Ọnyano 19:13) Nọ te ahwo-akpọ te erao a te whu, a re zihe kpohọ ẹkpẹ. (Ọtausiuwoma Na 3:19, 20) Otọ ẹme na họ, a rẹ gbẹ jọ uzuazọ họ.
Kọ erao e rẹ raha uzi?
Ijo. Uzioraha họ, nọ ohwo o te roro hayo ru oware jọ nọ o wọso uzi Ọghẹnẹ. Re a ta nọ omama Ọghẹnẹ jọ ọ raha uzi, o gwọlọ nọ omama na o re wo iroro nọ ọ sae rọ riẹ ohẹriẹ nọ o rrọ oware uyoma gbe uwoma, rekọ erao i wo iroro ho. Erao i re ru onọ o sa rai evaọ umutho oke nọ a rọ rrọ uzuazọ na. (2 Pita 2:12) Nọ erao e tẹ rria unuikpe rai no, a ve whu dede nọ a raha uzi hi.
Kọ u kiehọ re a lahiẹ erao?
Ijo. Ọghẹnẹ ọ kẹ ahwo-akpọ udu nọ a sai ro su erao orọnikọ re a lahiẹ ae he. (Emuhọ 1:28; Olezi 8:6-8) Ọghẹnẹ ọ be daezọ erao na kpobi ọvuọvo, makọ evra esese dede. (Jona 4:11; Matiu 10:29) Jihova o jie uzi kẹ ahwo nọ a be gọe inọ, a hae rẹrote erao rai ziezi.—Ọnyano 23:12; Iziewariẹ 25:4; Itẹ 12:10.