Uzuazọ nọ Ahwo A rẹ Jọ Re Ẹbe, Ibi-Ire, gbe Ibi Ekakọ Ọvo—Eme Ebaibol na Ọ Ta?

Wariẹ akpọ na họ, ahwo buobu a be gwọlọ yeri uzuazọ nọ a rẹ jọ re ẹbe, ibi-ire, gbe ibi ekakọ ọvo, nọ a re se evaọ Oyibo veganism.

• “Veganism yọ oghẹrẹ uzuazọ jọ nọ ahwo a rẹ jọ daoma rai kpobi re a gbe ru oware ovo nọ o rẹ wha uwhu se erao, nwa ae oma, hayo lahiẹ ae he. A rẹ re arao hayo oware ovuọvo nọ u no oma arao ze he. A re ku iwu nọ a rehọ oviẹ-arao hayo eto arao ru họ họ, yọ a rẹ rọ arao ru oware ofa ovuọvo ho.”—The Vegan Society.

Ahwo jọ a riẹ nọ a bi yeri oghẹrẹ uzuazọ utioye fikinọ a bi roro kẹ erao, gbe fiki oghẹrẹ nọ a gwọlọ nọ okegbe rai ọ rẹ jọ, fiki ẹyao, hayo fiki oghẹrẹ egagọ nọ a rrọ.

• “Uzuazọ veganism u wo ohẹriẹ no uzuazọ nọ ahwo a be hae jọ salọ oghẹrẹ emu nọ a gwọlọ re na, keme ahwo a rri rie wọhọ oware nọ ohwo ọ rọwo, iroro nọ ọ jẹ, gbe edhere nọ omomọvo ọ sai ro ru akpọ na woma vi epanọ ọ rrọ na.”—Britannica Academic.

Kọ uzuazọ nọ ohwo ọ rẹ jọ re arao hayo rehọ iẹe ru oware ovuọvo ho na họ oware nọ u ti ku ebẹbẹ akpọ na họ? Eme Ebaibol na ọ ta?

Oghẹrẹ nọ Ọghẹnẹ nọ ọ ma omai na o bi rri ahwo-akpọ gbe erao

Ebaibol na o dhesẹ nọ Jihova Ọghẹnẹa nọ ọ ma omai na o rri ahwo-akpọ kpehru vi erao, ọ tẹ jẹ kẹ ahwo udu nọ a re ro su erao na. (Emuhọ 1:27, 28) U te oke jọ, Ọghẹnẹ ọ tẹ kẹ ahwo-akpọ uvẹ nọ a sae re erao. (Emuhọ 9:3) Rekọ o rẹ were iẹe vievie he re a lahiẹ erao.—Itẹ 12:10.

Ebaibol na o dhesẹ nọ te ohwo ọ gwọlọ re arao hayo ọ gwọlọ re he, yọ ẹme obọriẹ.b Oghẹrẹ iroro kpobi nọ ma jẹ kẹhẹ evaọ ẹme na, u re ru omai woma vi amọfa ha evaọ aro Ọghẹnẹ. (1 Ahwo Kọrint 8:8) Nọ ohwo jọ ọ tẹ salọ nọ ọ rẹ re oghẹrẹ oware jọ hayo ọ rẹ re he, ma rẹ fo ẹe vievie he.—Ahwo Rom 14:3.

Oware nọ o te lẹliẹ akpọ na woma

Ebaibol na o dhesẹ inọ orọnikọ oghẹrẹ uzuazọ nọ ma salọ nọ ma re yeri u ti ku ebẹbẹ akpọ na họ họ. Eware nọ e be wha ebẹbẹ buobu nọ e rrọ akpọ na ze họ, isuẹsu, eware nọ ahwo a bi ru kẹdẹ kẹdẹ, gbe ugho. Yọ ohwo-akpọ ọvuọvo ọ rẹ sai si ebẹbẹ nana no ho. Ebaibol na ọ ta nọ:

• “Oware nọ o gẹle no a rẹ sai ru ei liọ họ.”—Ọtausiuwoma Na 1:15.

Ọghẹnẹ nọ ọ ma omai na o ti ku ebẹbẹ kpobi nọ ma wo na họ. Ebaibol na ọ rọ oghẹrẹ eme sa-sa dhesẹ epanọ Ọghẹnẹ o ti ro ru onana.

• “Mẹ tẹ ruẹ odhiwu ọkpokpọ avọ otọakpọ ọkpokpọ; keme odhiwu anwae na avọ otọakpọ anwae na e vrẹ no, yọ abade na ọ gbẹ riẹ hẹ.”—Eviavia 21:1.

Ọghẹnẹ ọ te rehọ egọmeti obọ odhiwu riẹ nọ o dikihẹ kẹ “odhiwu ọkpokpọ” na ro nwene egọmeti ahwo-akpọ nọ o dikihẹ kẹ “odhiwu anwae” na. Egọmeti riẹ na u ti si “otọakpọ anwae” na no, koyehọ ahwo omuomu, u ve ti su “otọakpọ ọkpokpọ” hayo ahwo nọ a fi omarai họ otọ esuo riẹ.

Okenọ Uvie Ọghẹnẹ u te muhọ esu no ọvo ahwo-akpọ a te sae rọ rria dhedhẹ ziezi kugbe erao, a vẹ jẹ sai ru otọakpọ na fihọ wowoma.—Aizaya 11:6-9.