UWOU-EBE ITANẸTE Uwou-Eroro
UWOU-EBE ITANẸTE
Uwou-Eroro
Isoko
Ọ
  • Ẹ
  • ẹ
  • Ọ
  • ọ
  • EBAIBOL
  • EBE GBE EWARE EFA
  • IWUHRẸ
  • mrt uzoẹme 25
  • Ono O ti Siwi Otọakpọ Na?

Ọnana o wo ividio ho.

Eva e dha owhẹ hẹ, ividio na ọ rọwo kporo ho.

  • Ono O ti Siwi Otọakpọ Na?
  • Izoẹme Efa
  • Izoẹme-Esese
  • Onọ O Wọhọ E Riẹ
  • Kọ ahwo-akpọ a te sai ru otọakpọ na woma?
  • Ẹruore nọ ma wo
  • Kọ A te Raha Otọakpọ Na?
    Enọ nọ Ebaibol Ọ Kẹ Iyo Rai
  • Okẹ Ebẹdẹ Bẹdẹ Nọ U No Obọ Ọmemama Na Ze
    Uwou-Eroro Na Nọ U Bi Whowho Uvie Jihova—2007
  • Akpọ Ọkpokpọ Ọ Kẹle No!
    Uwou-Eroro Na Nọ U Bi Whowho Uvie Jihova (Ẹgbede)—2021
  • Uzuazọ U Wo Ẹjiroro Ologbo
    Eme Họ Ẹjiroro Uzuazọ? Ẹvẹ Whọ Sai Ro Duku Ei?
Ruẹ Efa
Izoẹme Efa
mrt uzoẹme 25
Ọmọtẹ ọsese nọ o bi ku ame fihọ eflawa. Evaọ ugbothabọ, iwou ekọmpene i bi kuye iwiri nọ e be nua ofou na.

Ono O ti Siwi Otọakpọ Na?

Ahwo buobu a be ruawa nọ eware nọ ahwo-akpọ a bi ru evaọ akpọ na e te wha uye se otọakpọ na avọ eware nọ i wo uzuazọ nọ e riẹe eva. Ahwo jọ nọ a wuhrẹ kpahe eware nọ e rrọ akpọ na a ta nọ, eware nọ ahwo-akpọ a bi ru enẹna e te whae ze nọ oghoghẹrẹ erao gbe eware sa-sa nọ i wo uzuazọ i ti ro whu muotọ.

Kọ ahwo-akpọ a te raha otọakpọ na no? Hayo kọ a te sai ru eware nọ otọakpọ na o gbẹ te rọ raha ha?

Kọ ahwo-akpọ a te sai ru otọakpọ na woma?

Egba-eriariẹ buobu a roro nọ ahwo-akpọ a sai ru eware nọ otọakpọ na o gbẹ te rọ raha ha. Ahwo jọ a ta nọ re ahwo-akpọ a sai ru ere, a re nwene eware jọ buobu evaọ oke ovona. Eware nọ a re nwene na họ:

  • A re nwene epanọ a be rọ rẹrote otọ na, ewhawho, evo, gbe ebade na.

  • A re nwene oghẹrẹ nọ a be rọ kọ ekakọ a vẹ jẹ rọ idhere sa-sa ru ei. A ve je nwene oghẹrẹ nọ a bi ro wo ọyẹle, ikolu, gbe egase sa-sa na.

  • A re nwene kpohọ oghẹrẹ emuore nọ o rẹ lẹliẹ ahwo mae re ibi-ire gbe eware efa nọ a kọ, a vẹ re umutho erao gbe iyei, a gbẹ jẹ raha emu kufiẹ hẹ.

  • A rẹ rọwo nọ orọnọ ekwakwa eyero akpọ buobu nọ ohwo o re wo oye o rẹ lẹliẹ ohwo yeri emamọ uzuazọ họ.

Kọ ẹvẹ who roro? Kọ who roro nọ o rrọ oware areghẹ re who rẹro nọ egọmeti, egba-ihreki, gbe ahwo sa-sa a te sae ru eware kugbe kpatiẹ vi epaọ anwẹdẹ? Manikọ who roro nọ o te sae lọhọ họ fiki uvou-uthethei, oriobọ ọgaga, gbe obaro nọ ahwo jọ a bi roro kpahe he?—2 Timoti 3:1-5.

Ẹruore nọ ma wo

Ebaibol na ọ kẹ omai imuẹro nọ otọakpọ mai na o te jariẹ gbẹsinẹdẹ evaọ obaro. Ọ ta kpahe oware nọ ahwo-akpọ ọvo a sai ro siwi akpọ na ha, gbe eware nọ o ginẹ gwọlọ nọ a re nwene. O tẹ jẹ ta kpahe epanọ a ti ro nwene eware na.

Fikieme ahwo-akpọ ọvo a sai ro siwi akpọ na ha? Jihovaa Ọghẹnẹ họ ọnọ ọ ma otọakpọ na, yọ ọ kẹ ahwo-akpọ iruo inọ a rẹrotei. (Emuhọ 1:28; 2:15) Oware nọ o sai fiobọhọ kẹ ai ru iruo na ziezi ọvo họ nọ a te bi ru lele ehrẹ nọ Ọnọ ọ ma rai ọ kẹ rai. (Itẹ 20:24) Ukpenọ a re ru ere, a tẹ siọ Jihova je bi ru orọ obọrai. (Ọtausiuwoma Na 7:29) Ahwo-akpọ a wo ogaga nọ ae ọvo a sae rọ rẹrote otọakpọ na ha, yọ a tẹ make daoma kẹhẹ, umutho gheghe a rẹ sai ru.—Itẹ 21:30; Jerimaya 10:23.

Eware nọ o ginẹ gwọlọ nọ a re nwene. Ọghẹnẹ ọ te whaha ahwo-akpọ re a gbẹ raha otọakpọ na no ho. (Eviavia 11:18) Orọnikọ Ọghẹnẹ o ti ru egọmeti akpọ na gbe ahwo nọ a be raha otọakpọ na woma ha, ukpoye, o ti si ai no. (Eviavia 21:1) Oyejabọ nọ Jihova ọ rọ ta nọ: “Rri! Me bi ru eware kpobi họ ekpokpọ.”—Eviavia 21:5.

Epanọ a ti ro nwene eware na. Jihova ọ te rehọ egọmeti jọ nọ a re se Uvie Ọghẹnẹ ro nwene egọmeti ahwo-akpọ. Egọmeti yena nọ Jesu Kristi o ti su na u ve ti su otọakpọ na soso.—Daniẹl 2:44; Matiu 6:10.

Uvie Ọghẹnẹ u ti wuhrẹ ahwo epanọ a re ro koko izi ikiẹrẹe Ọghẹnẹ. Nọ ahwo-akpọ a te vuhu Ọnọ ọ ma rai je bi lele eware nọ ọ ta, a te sai ru eware evaọ oghẹrẹ nọ a rẹ rọ raha otọakpọ na ha. (Aizaya 11:9) Ebaibol na o dhesẹ epanọ egọmeti Ọghẹnẹ o ti ro fiobọhọ kẹ ahwo nọ a rrọ otọ riẹ yeri emamọ uzuazọ nọ o te raha otọakpọ na ha. Eware jọ nọ o ti ru ena:

  • O ti ru re emuore o jariẹ kẹ ahwo kpobi.—Olezi 72:16.

  • Ọ te ruẹrẹ otọakpọ na avọ eware nọ e riẹe eva.—Aizaya 35:1, 2, 6, 7.

  • O ti ru re ahwo-akpọ avọ erao a rria kugbe dhedhẹ.—Aizaya 11:6-8; Hosia 2:18.

  • O ti ru re eware okpẹtu wọhọ ofou ọwhibo, erae ọraha hayo eware itieye e gbẹ via ha.—Mak 4:37-41.

Rẹro nọ Uvie Ọghẹnẹ o ti ru eware nana kpobi kẹle. Re who gbe wuhrẹ kpahe onana, se uzoẹme na “Oke Vẹ Uvie Ọghẹnẹ U ti ro Su Akpọ Na?”

a Jihova họ odẹ Ọghẹnẹ.—Olezi 83:18.

Eme ma rẹ sai ru enẹna ro dhesẹ nọ ma be rẹrote otọakpọ na?

O make rọnọ ma bi rẹro nọ Uvie Ọghẹnẹ o ti ku ebẹbẹ kpobi nọ e be raha otọakpọ na họ na, ma sae daoma ru epanọ ma re ro dhesẹ nọ ma be rẹrote otọakpọ na enẹna. Wọhọ oriruo, ma rẹ daoma re ma gbe mu raha eware kufiẹ hẹ, je lele izi sa-sa nọ egọmeti o fihọ kpahe ẹfuọ.—Jọn 6:12, 13; Ahwo Rom 13:1, 5.

  • Brett.

    Ọzae jọ nọ a re se Brett yọ ohwo nọ o wuhrẹ kpahe akpọ na avọ eware nọ e riẹe eva. Eware nọ ọ riẹ kpahe akpọ na u ru rie rọwo nọ Ọmemama jọ ọ riẹ nọ o ti siwi otọakpọ na. Se iku riẹ

  • Iruiruo ivẹ nọ i bi rri iwou ekpokpọ nọ a bọ evaọ Oria nọ U Wuzou Iruo Isẹri Jihova.

    Isẹri Jihova a bi dhesẹ nọ a wo adhẹẹ kẹ Ọnọ ọ ma rai. Edhere jọ nọ a bi ro ru ei họ, evaọ okenọ a te bi ru iruo ebabọ ilogbo rai, a rẹ bọ hayo ru eware nọ a gbẹ rọ raha okegbe na ha. Re whọ ruẹ eware jọ nọ a ru no, rri ividio na Oria nọ A Ru Malẹ O Wha Ujiro Se Jihova.

Eria Ebaibol sa-sa nọ e ta kpahe otọakpọ na

Emuhọ 2:15: “Jihova Ọghẹnẹ ọ tẹ rehọ ọzae na o te fi ei họ ọgbọ Idẹn na re ọ hae ruẹrẹ iẹe jẹ rẹrotei.”

Otofa riẹ họ: Ọghẹnẹ ọ kẹ ahwo-akpọ iruo nọ a rẹ rọ rẹrote otọakpọ na nọ ọ rrọ uwou rai na.

Emuhọ 1:28: “Ọghẹnẹ ọ tẹ ghale ae, Ọghẹnẹ ọ tẹ ta kẹ ae nọ: ‘Wha vihọ re wha jọ buobu, wha vọ otọakpọ na je woi, je su iyei abade na gbe emama nọ e rẹ rra evaọ obọ ehru na gbe omama nọ o rrọ uzuazọ kpobi nọ o rẹ nya evaọ otọakpọ na.’”

Otofa riẹ họ: A kẹ ahwo-akpọ iruo nọ a rẹ rọ rẹrote erao na.

Aizaya 45:18: “Enẹ Jihova ọ ta, Ọmemama nọ ọ ma idhiwu na, Ọghẹnẹ uzẹme na, Ọnọ ọ ruẹrẹ otọakpọ na họ, Ọnọ ọ ma riẹ, nọ o ru rie dikihẹ gaga, Ọnọ ọ ma riẹ, orọnikọ ọ mae gheghe ababọ ẹjiroro ho, rekọ ọ ruẹrẹ iẹe họ re a rriae: ‘Mẹ họ Jihova, yọ omọfa ọ rrọ họ.’”

Otofa riẹ họ: Ẹjiroro Ọghẹnẹ kpahe otọakpọ na u ri nwene he. Ahwo-akpọ nọ a ti ru ẹjiroro ọsosuọ riẹ na gba a te rria otọakpọ na.

Olezi 37:29: “Ahwo okiẹrẹe na a te rọ otọakpọ na reuku, yọ a te rriae bẹdẹ bẹdẹ.”

Otofa riẹ họ: Ahwo nọ a bi koko izi Ọghẹnẹ a ti wo uvẹ nọ a te rọ rria bẹdẹ bẹdẹ evaọ otọakpọ na.

Olezi 98:6-8: “Wha bo ubo obokparọ evaọ aro Jihova, Ovie na. Jọ abade na avọ eware kpobi nọ e rrọ eva riẹ i ru edo egbrara, te otọakpọ na avọ enọ e be rriae. Jọ ithẹ na e tehe abọ rai; jọ igbehru na i kuomagbe bo ubo oghọghọ.”

Otofa riẹ họ: Isuẹsu Ọghẹnẹ i ti ru otọakpọ na fihọ wowoma.

    Ebe Isoko Kpobi (1992-2025)
    Noi No
    Rueva
    • Isoko
    • Vi Ei Se Omọfa
    • Ru Ei Fihọ Oghẹrẹ nọ O Were Owhẹ
    • Copyright © 2025 Watch Tower Bible and Tract Society of Pennsylvania
    • Izi Kpahe Eroruiruo Evuẹ Na
    • Izi Oria Evuẹ Omobọ Ra
    • Esẹtini Oria Evuẹ Omobọ Ra
    • JW.ORG
    • Rueva
    Vi Ei Se Omọfa