Kọ A te Raha Otọakpọ Na?
Uyo nọ Ebaibol na ọ kẹ
Ijo, a te raha otọakpọ na hayo rehọ erae mahe iẹe vievie he. Ebaibol na ọ ta nọ Ọghẹnẹ ọ ma otọakpọ na re a rriae bẹdẹ bẹdẹ.
“Ahwo okiẹrẹe na a te rọ otọakpọ na reuku, yọ a te rriae bẹdẹ bẹdẹ.”—Olezi 37:29.
“[Ọghẹnẹ] ọ rehọ otọakpọ na vi otọhotọ riẹ no kothi; a ti goi no ẹta riẹ hẹ bẹdẹ bẹdẹ.”—Olezi 104:5.
“Otọakpọ na o rẹ jọ bẹdẹ bẹdẹ.”—Ọtausiuwoma Na 1:4.
“Ọnọ ọ ruẹrẹ otọakpọ na họ, Ọnọ ọ ma riẹ, nọ o ru rie dikihẹ gaga, . . . ọ mae gheghe ababọ ẹjiroro ho, rekọ ọ ruẹrẹ iẹe họ re a rriae.”—Aizaya 45:18.
Kọ ahwo-akpọ a te raha otọakpọ na no?
Ọghẹnẹ ọ te kuvẹ re ahwo-akpọ a rehọ enua, ẹmo-ofio hayo oghẹrẹ ofa jọ raha otọakpọ na ha. Ukpoye, Ọghẹnẹ ọ te “raha enọ e be raha otọakpọ na.” (Eviavia 11:18) Oghẹrẹ vẹ o ti ro ru onana?
Ọghẹnẹ ọ te rehọ Uvie obọ odhiwu riẹ nwene egọmeti ahwo-akpọ, enọ e be sae rẹrote otọakpọ na ha na. (Daniẹl 2:44; Matiu 6:9, 10) Ọmọ Ọghẹnẹ, Jesu Kristi họ ọnọ o ti su Uvie yena. (Aizaya 9:6, 7) Okenọ Jesu ọ jọ otọakpọ, o dhesẹ nọ o wo ogaga vi ofou, ẹkporo gbe eware itieye na efa. (Mak 4:35-41) Enẹna nọ Jesu ọ rrọ Ovie Uvie Ọghẹnẹ no na, o wo ogaga nọ o ti ro su akpọ na jẹ ruẹrẹ eware kpobi họ. O ti nwene eware nọ e rrọ otọakpọ na, e vẹ te jọ wọhọ epanọ e jọ evaọ ọgbọ Idẹn.—Matiu 19:28; Luk 23:43.
Kọ Ebaibol na ọ ta nọ a te rehọ erae mahe otọakpọ na?
Ijo, Ebaibol na ọ ta ere he. Ahwo jọ a rẹ ta ere fikinọ a wo otoriẹ ẹme nọ ọ rrọ obe 2 Pita 3:7 na ha, onọ o ta nọ: “A . . . vu idhiwu na gbe otọakpọ nọ e rrọ enẹna wa kẹ erae.” Joma ta kpahe ugogo eware ivẹ jọ nọ i fiobọhọ kẹ omai wo otoriẹ oria ikere yena:
Ebaibol na ọ rẹ rehọ “idhiwu,” “otọakpọ,” gbe “erae” dhesẹ eware efa. Wọhọ oriruo, obe Emuhọ 11:1 o ta nọ: “Otọakpọ na kpobi o jẹ ta ẹvẹrẹ ọvo.” “Otọakpọ” nọ a jọ etenẹ fodẹ na o dikihẹ kẹ ahwo nọ a rrọ akpọ na.
Eme nọ e wariẹ 2 Pita 3:7 na họ i re fiobọhọ kẹ omai riẹ oware nọ idhiwu, otọakpọ, gbe erae nọ a fodẹ evaọ etẹe na i dikihẹ kẹ. A jọ owọ avọ 5 gbe 6 ta kpahe Owhe edẹ Noa. Evaọ oke yena, Ọghẹnẹ ọ raha akpọ na orọnikọ otọakpọ na ọ raha ha. Ukpoye, Owhe na ọ raha “otọakpọ,” koyehọ ahwo nọ a je ru ozighi na. (Emuhọ 6:11) Ọ tẹ jẹ raha “idhiwu” jọ, koyehọ ahwo nọ a je su akpọ na evaọ oke yena. Fikiere, ahwo omuomu na ọvo a raha orọnikọ otọakpọ mai na ha. Noa avọ ahwo uviuwou riẹ a zọ, yọ a rria otọakpọ na nọ Owhe na o ku vrẹ no.—Emuhọ 8:15-18.
Nwane wọhọ epanọ Owhe na ọ raha ahwo omuomu na, ere ọvona ọraha hayo “erae” nọ a fodẹ evaọ 2 Pita 3:7 na ọ te raha ahwo omuomu nọ a rrọ akpọ na orọnikọ otọakpọ na a te raha ha. Ọghẹnẹ ọ ya eyaa “idhiwu ekpokpọ gbe otọakpọ ọkpokpọ” enọ “ẹrẹreokie ọ te jọ.” (2 Pita 3:13) “Idhiwu ekpokpọ” hayo esuo ọkpokpọ, koyehọ Uvie Ọghẹnẹ, u ti su “otọakpọ ọkpokpọ” hayo ahwo-akpọ nọ a wo ọjẹrehọ Ọghẹnẹ. Kẹsena Uvie Ọghẹnẹ u ve ti ru otọakpọ na fihọ aparadase nọ udhedhẹ o te dafia.—Eviavia 21:1-4.