Ru Jihova Họ Ẹrorọsuọ Ra
‘Keme whẹ Ọnowo ỌGHẸNẸ họ ẹruore mẹ gbe ọnọ mẹ rẹro so no emaha ze.’—OLEZI 71:5.
1. Didi use-abọ o rẹriẹ ovao ku Devidi, othuru-igodẹ ọmoha na?
GOLIAT o theri vi irula izii. Agbẹta nọ isoja nọ e rrọ ofẹ Izrẹl kpobi a jẹ rọ dhozọ riẹ na! Ohiohiẹ gbe owọwọ kpobi, evaọ eka buobu, Goliat ọgwara ahwo Filistia na ọ jẹ poviẹ egbaẹmo Izrẹl, bi se ai abọ inọ a vi ọgba rai jọ ze te họre iẹe. Uwhremu na ohwo jọ ọ tẹ fialoma via, orọnikọ osoja ha rekọ uzoge gheghe. Devidi, ọmọzae othuru-igodẹ na, o te oware ovo ho evaọ akotọ Goliat. Uzẹme riẹ họ, ọ tubẹ gbẹdẹ te ẹgọ-ẹmo gbe ekwakwa-ẹmo Goliat he! Ghele na, uzoge na ọ rehọ udu dhe ọgwara na o te zihe ruọ uvi oriruo aruọwha nọ ọ viodẹ.—1 Samuẹle 17:1-51.
2, 3. (a) Fikieme Devidi ọ sae rọ rehọ ovao dhe Goliat avọ udu? (b) Eware ivẹ vẹ nọ u fo nọ ma re ru ro ru Jihova họ evaifihọ mai ma te t’ẹme kpahe?
2 Eme ọ kẹ Devidi udu utioye na? Roro kpahe eme jọ nọ Devidi o kere evaọ okenọ ọ kpako no: ‘Keme whẹ Ọnowo ỌGHẸNẸ họ ẹruore mẹ gbe ọnọ mẹ rẹro so no emaha ze.’ (Olezi 71:5) Ẹhẹ, wọhọ uzoge, Devidi o fi udu kpobi họ Jihova. Ọ rehọ udu dhe Goliat, ta nọ: “Whọ rehọ ọgbọdọ, ozuẹ, gbe adhara ro bru omẹ ze; rekọ mẹ be rehọ odẹ [Jihova, NW ] ogbaẹmo na bru owhẹ tha, Ọghẹnẹ ogbaẹmo ahwo Izrẹl ọ nọ whọ poviẹ na.” (1 Samuẹle 17:45) Dede nọ Goliat o fi eva riẹ họ ẹgba ologbo riẹ gbe ekwakwa-ẹmo nọ o wo, Devidi ọ rẹro so Jihova. Avọ Olori Osu ehrugbakpọ na nọ ọ rrọ abọ riẹ, fikieme Devidi ọ jẹ dhozọ ohwo-akpọ jọ gheghe, makọ epanọ ọ rro je wo ekwakwa-ẹmo te kẹhẹ?
3 Nọ who bi se kpahe Devidi na, kọ who bi roro nọ ẹro nọ whọ rọ so Jihova ọ hae ga viere? O rẹ jọ ibuobu mai oma ere. Fikiere joma t’ẹme kpahe eware ivẹ jọ nọ ma re ru ro ru Jihova họ ẹrorọsuọ mai. Orọ ọsosuọ, u fo re ma fi ọzadhe kẹ evaifihọ itieye na kparobọ. Orọ avivẹ, u fo re ma wuhrẹ kpahe oware nọ o gwọlọ re ma fi eva họ Jihova.
Efikparobọ Ugogo Ọzadhe Jọ kẹ Ẹrorọsuọ Jihova
4, 5. Fikieme o rọ rrọ bẹbẹ kẹ ahwo buobu re a rẹro so Ọghẹnẹ?
4 Eme ọ be whaha ahwo nọ a gbe bi ro fi eva họ Ọghẹnẹ hẹ? Ẹsibuobu, oware nọ o be lẹliẹ eware iyoma via u bi vẹ ahwo jọ ẹro ho. A bi wuhrẹ ibuobu inọ Ọghẹnẹ ọ be wha uye-oruẹ ze. Okenọ okpẹtu ọ tẹ via, isu-ichọche a rẹ ta nnọ Ọghẹnẹ ọ “rehọ” ahwo nọ i whu na re a jọ kugbei evaọ obọ odhiwu. Ofariẹ, isu egagọ buobu a bi wuhrẹ nnọ Ọghẹnẹ ọ maa omaa eware kpobi nọ e be via evaọ akpọ na fihọ otọ no emuhọ ze—te okpẹtu gbe eware emuemu kpobi. O rẹ jọ bẹbẹ re a rẹro so Ọghẹnẹ ọgeva otiọye na. O rẹ were Setan eva gaga, ọnọ o bi wuhu iroro enọ e rọwo ho di, re ọ wha ‘iwuhrẹ idhivẹri’ itieye na kpobi haro.—1 Timoti 4:1; 2 Ahwo Kọrint 4:4.
5 Setan ọ gwọlọ re ahwo a si eva no Jihova. Ọwegrẹ Ọghẹnẹ ọyena ọ gwọlọ re ma riẹ oware nọ o be ghinẹ wha uye-oruẹ ohwo-akpọ ze he. Yọ otẹrọnọ ma jọ Ikereakere na wuhrẹ kpahe eware nọ e be wha uye-oruẹ ze no, Setan ọ gwọlọ re enana e thọrọ omai ẹro. Fikiere, u re kiehọ re n’oke ruọ oke ma hae kiẹ igogo ẹjiroro esa jọ nọ uye-oruẹ o jẹ rrọ akpọ na riwi. Evaọ ere oruo, ma rẹ sae kẹ oma mai imuẹro viere inọ orọnikọ Jihova ọ be wha idabolo nọ ma be rẹriẹ ovao ku evaọ uzuazọ ze he.—Ahwo Filipai 1:9, 10.
6. Ẹvẹ 1 Pita 5:8 o rọ riobọhọ oware jọ nọ o be wha uye-oruẹ ohwo-akpọ ze?
6 Oware jọ nọ o be wha uye-oruẹ ahwo-akpọ ze họ Setan ọ gwọlọ raha ẹgbakiete ahwo Jihova nọ i wo ẹrọwọ. Ọ daoma re ọ raha ẹgbakiete Job. Setan ọ kparobọ họ, rekọ o re bẹe he. Wọhọ osu akpọ nana, ọ be gwọlọ idibo ẹrọwọ Jihova ‘mu lọ.’ (1 Pita 5:8) Mai omomọvo ọ rrọ usu ahwo yena! Setan ọ gwọlọ ru re ma siọ Jihova ba ẹgọ. Fikiere, ọ be wha ukpokpoma ze ẹsikpobi. Makọ epanọ uye-oruẹ utioye na o rẹ da te kẹhẹ, ma wo emamọ ẹjiroro nọ ma re ro thihakọ. Ẹkwoma ere oruo, ma re fi obọ họ dhesẹ Setan fihọ ọtọrue jẹ rọ ere ru Jihova eva were. (Job 2:4; Itẹ 27:11) Nọ Jihova ọ be k’omai ẹgba thihakọ ukpokpoma na, eva nọ ma fihọ iẹe e rẹ ga viere.—Olezi 9:9, 10.
7. Oware vẹ nọ o rẹ wha uye-oruẹ ze Ahwo Galesha 6:7 u fi obọ họ k’omai vuhumu?
7 A rẹ ruẹ ẹjiroro avivẹ nọ uye-oruẹ o jẹ rrọ evaọ ehri-uzi nana: “Koware koware nọ ohwo ọ kọ e, oye o re vuẹ.” (Ahwo Galesha 6:7) Ẹsejọ ahwo a rẹ kọ ẹkwoma iroro ethọthọ nọ a rẹ jẹ, a vẹ rọ ere vu uye-oruẹ. Ẹsejọhọ a rẹ dhẹ omoto whọhọwhọhọ, nọ u re su kpohọ asidẹnte. Ejọ i re vovo isigareti, a ve wo ẹyao ubiudu hayo ẹyao irue. Enọ i re gbe ọfariẹ a rẹ sae ruẹ uye uviuwou rai nọ o rẹ tahaku, ekufiẹ adhẹẹ ọrọ omobọ ohwo, eyao igberẹ nọ i re vo, gbe udihọ nọ a gwọlọ họ. Ahwo a sae fo Ọghẹnẹ fiki uye-oruẹ utioye na, rekọ uruemu uyoma obọ rai o be wha uye se ai na.—Itẹ 19:3.
8. Wọhọ epanọ Ọtausiwoma Na 9:11 o ta, fikieme ahwo a jẹ be ruẹ uye?
8 A fodẹ ẹjiroro avesa nọ uye-oruẹ o jẹ rrọ eva Ọtausiwoma Na 9:11 (NW ): “Mẹ wariẹ ruẹ evaọ otọ ọre na inọ orọnikọ ọnọ ọ mae dhẹ siawọ ọ rẹ kparobọ evaọ ohrẹ-odhẹ hẹ, hayo egba na e rẹ kparobọ evaọ ẹmo-ofio ho, hayo iwareghẹ na i re wo emu hu, hayo egba-otoriẹ i re wo efe he, hayo makọ ahwo nọ a wo eriariẹ a re wo aruoriwo ho; keme oke gbe eware idudhe e rẹ via kẹ ae kpobi.” Ẹsejọ, ahwo a rẹ faki kp’awọ ku eware iyoma. Makọ epanọ ma wo ẹgba hayo yẹlẹ te, uye-oruẹ gbe uwhu o rẹ sai te ohwo kpobi idudhe eva oke kpobi. Wọhọ oriruo, evaọ oke Jesu uwou-ukpehru jọ u kie evaọ Jerusalẹm je kpe ahwo 18. Jesu o dhesẹ nnọ orọnikọ Ọghẹnẹ ọ kẹ rai uye fiki emuemu nọ a ru vrẹ no ho. (Luk 13:4) Ijo, a rẹ fo Jihova kẹ uye-oruẹ utioye na ha.
9. Didi oware u bi vẹ ibuobu ẹro ho kpahe uye-oruẹ?
9 Ewo otoriẹ eware jọ nọ e be wha uye-oruẹ ze o r’oja. Dede na, abọjọ ẹme na ọ riẹ nọ u bi vẹ ahwo buobu ẹro ho. Ẹme na họ: Fikieme Jihova Ọghẹnẹ ọ jẹ kuvẹ kẹ uye-oruẹ?
Fikieme Ọghẹnẹ Ọ rọ k’Uvẹ kẹ Uye-Oruẹ?
10, 11. (a) Wọhọ epanọ Ahwo Rom 8:19-22 o dhesẹ, eme ọ via kẹ “enama na soso”? (b) Ẹvẹ ma rẹ rọ riẹ ohwo nọ o ru enama na soso ruọ otọ eware ifofe?
10 Abọjọ ọrọ ileta Pọl ukọ na se ahwo Rom o ru okpẹme nana vẹ. Pọl o kere nọ: “Keme ọwhọ ẹruore enama ọ be hẹrẹ odhesẹvia emọ Ọghẹnẹ. Keme enama na e [ruọ otọ] eware ifofe, orọnikọ oreva riẹ hẹ, rekọ fiki epa ọnọ o ru [rie] họ ọtahobọ eva ẹruore; kemena ukpuzou enama na a reti si ei no igbo egbogbo eruọ eva uvẹ oruaro emọ Ọghẹnẹ. Ma riẹ nọ enama na soso i bi dimẹ eva ọyawọ usuovo na rifi enẹna.”—Ahwo Rom 8:19-22.
11 Re ma wo otoriẹ awọ Ebaibol nana, ma rẹ kake za enọ ilogbo jọ. Wọhọ oriruo, Ono o ru nọ enama na e rọ ruọ otọ eware ifofe? Ahwo jọ a rẹ ta nnọ Setan; efa a vẹ ta nnọ Adamu. Rekọ o sae jọ nọ ae a ru re enama na a ruọ otọ eware ifofe he. Eme jabọ? Fikinọ ọnọ o ru enama na ruọ otọ eware ifofe na o ru rie “eva ẹruore.” Ẹhẹ, ọ kẹ ẹruore inọ ẹdẹjọ ahwo ẹrọwọ a ti “no igbo egbogbo.” Adamu hayo Setan ọ rẹ sae kẹ ẹruore ọyena ha. Jihova ọvo ọ rẹ sae kẹ ẹruore otiọye na. Fikiere, o rrọ vevẹ inọ Ọghẹnẹ họ ọnọ o ru enama na ruọ otọ eware ifofe.
12. Iroro vẹ ahwo jọ a wo kpahe “enama na soso,” kọ ẹvẹ a sae rọ za onọ nana?
12 Rekọ eme họ “enama na soso” nọ a fodẹ evaọ oria nana? Ahwo jọ a rẹ ta nọ “enama na soso” họ akpọ na kpobi, kugbe erao gbe ẹbe. O tẹ rrọ ere, kọ erao gbe ẹbe a wo ẹruore ewo “uvẹ oruaro emọ Ọghẹnẹ”? Ijo. (2 Pita 2:12) Fikiere ohwo-akpọ ọvo “enama na soso” u dhesẹ. Enana họ enama nọ uzioraha gbe uwhu u kpomahọ fiki ọkparesuọ evaọ Idẹn, yọ enana họ enọ e gwọlọ ẹruore gaga.—Ahwo Rom 5:12.
13. Eme ọkparesuọ evaọ Idẹn ọ wha se ahwo-akpọ?
13 Didi oware dẹẹ ọkparesuọ ọyena o ru ahwo-akpọ? Pọl ọ rehọ ibiẹme ivẹ dhesẹ iyẹrẹ nọ i no rie ze: eware ifofe.a Wọhọ epanọ obe jọ o ta, ẹme nana o dhesẹ “epanọ oware o rẹ jọ ufofe te nọ u gbe bi ruiruo wọhọ ẹjiroro nọ a ro ku ei hi.” A ma ahwo-akpọ re a rria bẹdẹ bẹdẹ, ruiruo kugbe wọhọ uviuwou okugbe ogbagba evaọ ẹruorote otọakpọ aparadase. Ukpoye, a tẹ be rria uzuazọ okpẹkpẹe, orọ edada, gbe idhọvẹ. Wọhọ epanọ Job o fi rie họ, “ohwo nọ aye o yẹ uzuazọ okpẹkpẹe o wo; o tẹ jẹ vọ avọ uye.” (Job 14:1) Ghinọ ufofe!
14, 15. (a) Imuẹro uvi-ẹdhoguo vẹ ma rẹ ruẹ evaọ oziẹ nọ Jihova o bru kpe ohwo-akpọ? (b) Fikieme Pọl ọ rọ ta nnọ enama na e ruọ otọ eware ifofe ‘orọnikọ fiki oreva riẹ hẹ’?
14 Obọnana ma ziọ onọ ulogbo na no: Fikieme “obruoziẹ akpọ na” soso o je ru ahwo-akpọ ruọ uzuazọ ẹdada orọ idhọvẹ ọnana? (Emuhọ 18:25) Kọ ọ riẹ ru evaọ ere oruo? Whaọ, kareghẹhọ oware nọ ọsẹgboni ọsosuọ mai a ru. Fikinọ a wọso Ọghẹnẹ, a ruọ abọ Setan, ọnọ ọ nọ onọ ulogbo jọ fihọ otọ kpahe esuo Jihova. Ẹkwoma owojẹ rai, a rọwo ẹme na inọ o te mai woma kẹ ahwo ababọ Jihova, nọ a te bi su omobọ rai evaọ otọ ekpakpọ omama ẹzi ọwọsuọ. Evaọ ebrukpe ahwo ọwọsuọ na, Jihova ọ rọ ere kẹ ae oware nọ a gwọlọ. Ọ kẹ ohwo-akpọ uvẹ re o su omobọ riẹ evaọ otọ ekpakpọ Setan. Evaọ otọ iyero eyena, ẹjiroro vẹ o re woma vi ahwo-akpọ nọ a rẹ kuvẹ re a ruọ otọ eware ifofe rekọ avọ ẹruore nọ o rrọ obaro?
15 Dede na, onana orọnikọ “oreva” enama na ha. A yẹ omai wọhọ erigbo kẹ uzioraha gbe egbogbo ababọ udu nọ ma wo kpahe ẹme na. Rekọ Jihova evaọ ohrọoriọ riẹ ọ kẹ Adamu avọ Ivi uvẹ re a rria omojọ je yẹ emọ. Dede nọ mai, emọ rai, ma rrọ otọ eware ofofe orọ uzioraha gbe uwhu, ma wo uvẹ nọ ma re ro ru oware nọ Adamu avọ Ivi a sai ru hu. Ma rẹ sae gaviezọ kẹ Jihova je wuhrẹ nnọ esuo riẹ o kiẹrẹe je kiehọ, gbe nnọ esuo ohwo-akpọ ababọ Jihova o rẹ wha edada, idhọvẹ, gbe eware ifofe tha. (Jerimaya 10:23; Eviavia 4:11) Okpomahọ Setan o be lẹliẹ eware yoma viere. Ikuigbe ohwo-akpọ i dhesẹ uzẹme nana via no.—Ọtausiwoma Na 8:9.
16. (a) Ẹvẹ o sai ro mu omai ẹro inọ Jihova họ ọnọ ọ be wha uye-oruẹ nọ ma be jọ akpọ na ruẹ nẹnẹ ze he? (b) Didi ẹruore Jihova ọ rehọ uyoyou kẹ ahwo ẹrọwọ no?
16 O rrọ vevẹ, Jihova o wo emamọ ẹjiroro nọ o ro ru ohwo-akpọ ruọ otọ eware ifofe. Kọ oyena o nwani dhesẹ nnọ Jihova họ ọnọ ọ be wha eyoma gbe uye-oruẹ nọ e be lahiẹ omai omomọvo nẹnẹ ze na? Whaọ, dai roro kpahe obruoziẹ nọ o brukpe ogbulegbu. Ogbulegbu na ọ sae ruẹ uye gaga evaọ uwou-odi nọ a fi rie họ na, rekọ ọ sae ghinẹ fo obruoziẹ na nnọ ọye ọ wha uye-oruẹ riẹ ze? Kakaka! Ofariẹ, orọnikọ Jihova ọ wha emuemu ze vievie he. Jemis 1:13 o ta nọ: “A sae rehọ eyoma dawo Ọghẹnẹ hẹ, yọ ọyomariẹ ọrẹ dawo ohwo ọvo ho.” Yọ ma rẹ jẹ kareghẹhọ inọ Jihova o bruoziẹ nana “eva ẹruore.” Ọ rehọ uyoyou gbẹ edhere kẹ emọ ẹrọwọ erọ Adamu avọ Ivi no re a ruẹ ekuhọ eware ifofe jẹ ghọghọ evaọ “uvẹ oruaro emọ Ọghẹnẹ.” Evaọ bẹdẹ bẹdẹ, ahwo-akpọ ẹrọwọ a gbẹ te ruawa ha inọ enama kpobi a te ruọ uye eware ufofe. Edhere okiẹrẹe nọ Jihova o ro ku ẹme na họ o ve ti dhesẹ ẹgbagba esuo riẹ bẹdẹ bẹdẹ.—Aizaya 25:8.
17. Ẹvẹ ẹkiẹriwi ẹjiroro nọ uye-oruẹ o rọ rrọ akpọ na u re kpomahọ omai?
17 Nọ ma kiẹ ẹjiroro nana nọ o wha uye-oruẹ ohwo-akpọ ze riwi no na, kọ ma ruẹ oware jọ nọ ma rẹ rọ fo Jihova kẹ emuemu nọ ọ rrọ akpọ na hayo siọ eva ba efihọ iẹe? Ukpoye, uwuhrẹ utioye o k’omai ẹjiroro nọ ma rẹ rọ wariẹ eme Mosis na: “Utho na, iruo riẹ i kiete, keme idhere riẹ kpobi i re wowoma. Ọghẹnẹ ọtẹruo nọ ọ kare eyoma, nọ o re wowoma je kiete.” (Iziewariẹ 32:4) Ẹkwoma eroro kpahe eme nana, jọ ma ru otoriẹ mai kpahe ae kpokpọ n’oke ruọ oke. Evaọ edhere ọyena, nọ ma tẹ rẹriẹ ovao ku edawọ, ma re mudhe kẹ omodawọ Setan nọ ọ rẹ gwọlọ rọ kọ avro họ iroro mai. Kọ ẹvẹ kpahe owojẹ avivẹ nọ ma jọ emuhọ fodẹ na? Eme o gwọlọ re a fi eva họ Jihova?
Oware nọ U Dhesẹ re A Fi Eva Họ Jihova
18, 19. Eme vẹ Ebaibol na e rọ tuduhọ omai awọ nnọ ma fi eva họ Jihova, rekọ evaọ abọ ọyena, iroro ethọthọ vẹ ahwo jọ a wo?
18 Ẹme Ọghẹnẹ ọ tuduhọ omai awọ nọ: “Rehọ ẹroọrọsuọ ra kpobi kpahe ỌNOWO na whọ rehọ eva kpahe ẹriẹ omobọ ra ha. Eva idhere ra kpobi ọ thọrọ owhẹ ẹro ho, o ve ti ruọ idhere ra kpọvi.” (Itẹ 3:5, 6) Eme eyena i siuru gaga, jẹ vọ avọ imuẹro. Evaọ uzẹme, uvumọ ohwo ọ rrọ ehrugbakpọ na nọ a rẹ sai fi eva họ vi Ọsẹ obọ odhiwu oyoyou mai na ha. Ghele na, ese eme eyena nọ e rrọ obe Itẹ na o lọhọ vi efihiruo rai.
19 Ahwo buobu a wo iroro ethọthọ kpahe oware nọ u dhesẹ re a fi eva họ Jihova. Ahwo jọ a re rri evaifihọ itieye na wọhọ oware iroro gheghe, iroro evawere nọ e rẹ jọ udu ohwo. Amọfa a re roro nnọ re a fi eva họ Ọghẹnẹ u dhesẹ nọ ma re rẹro nnọ ọ te thọ omai no uye kpobi, ku ebẹbẹ mai kpobi họ, ru akpọ lọhọ k’omai—nẹnẹ họ inẹnẹ! Rekọ iroro itieye na e thọ. Evaifihọ orọnikọ oware iroro gheghe he, yọ o nwane rọnọ Ọghẹnẹ o re bru emu họ omai unu hu. Rọkẹ ekpako, evaifihọ o gwọlọ ẹjẹ iroro nọ a ma te ziezi.
20, 21. Eme o gwọlọ re a fi eva họ Jihova? Kẹ oriruo jọ ro dhesẹ iẹe.
20 Wariẹ muẹrohọ oware nọ Itẹ 3:5 o ta. U fi ohẹriẹ họ eva nọ a re fihọ Jihova gbe ẹro nọ a rẹ rọ so otoriẹ obọ mai, onọ u dhesẹ nọ ma rẹ sai ru ivẹ na ẹsiẹvo ho. Kọ oyena u dhesẹ nọ a k’omai uvẹ nọ ma rẹ rọ rehọ ẹgba iroro mai ruiruo ho? Ijo, keme Jihova, ọnọ ọ k’omai ẹgba ọyena, ọ gwọlọ re ma rehọ iẹe ruiruo nọ ma be gọe na. (Ahwo Rom 12:1) Rekọ eme ma re fievahọ? Iroro mai e gbẹ rọwo kugbe erọ Jihova ha, kọ ma te jẹ areghẹ riẹ rehọ, nọ o rọnọ areghẹ riẹ o kpehru vi ọmai thethabọ na? (Aizaya 55:8, 9) Re ma fi eva họ Jihova u dhesẹ nọ ma rẹ kẹ iroro riẹ uvẹ re e kpọ iroro mai.
21 Re ma dhesẹ iẹe: Roro kpahe ọmaha nọ ọ keria obemu omoto, nọ ọsẹgboni riẹ a rrọ obaro. Ọsẹ riẹ ọ be dhẹ omoto na. Okenọ ẹbẹbẹ ọ tẹ roma via evaọ etoke erẹ na—ma rehọ iẹe nnọ a te idhere ivẹ yọ a riẹ onọ a rẹ dhẹ hẹ hayo oso ọ be rrọ hayo edhere na o wo egọdọ—ẹvẹ ọmọ ẹmeoyo nọ o fievahọ ọsẹ riẹ o re ru? Kọ ọ rẹ jọ oria nọ ọ keria na kpọ ọsẹ na, ta kẹ ọsẹ na oghẹrẹ nọ ọ rẹ dhẹ omoto na? Kọ o re wo avro kpahe ẹjiroro ọsẹgboni riẹ hayo veghe uzou okenọ a tẹ ta kẹe inọ ọ keria oria ovo? Ijo, o re fi eva họ nnọ ọsẹgboni riẹ a te jẹ iroro egbagba, dede nọ a gba ha. Jihova yọ Ọsẹ nọ ọ rrọ gbagba. Kọ ma gbe fi eva kpobi họ iẹe, maero nọ ma tẹ rẹriẹ ovao ku iyero ebẹbẹ?—Aizaya 30:21.
22, 23. (a) Fikieme ma je fi eva họ Jihova okenọ ma tẹ rẹriẹ ovao ku ebẹbẹ, kọ ẹvẹ ma sai ro ru ere? (b) Eme ma te ta kpahe evaọ uzoẹme n’otha na?
22 Dede na, Itẹ 3:6 u dhesẹ nnọ ‘evaọ idhere mai kpobi ma jọ Jihova ọ thọrọ omai ẹro ho,’ orọnikọ okenọ ma tẹ rẹriẹ ovao ku iyero ebẹbẹ ọvo ho. Fikiere iroro nọ ma be jẹ kẹdẹ kẹdẹ i re dhesẹ eva nọ ma fihọ Jihova. Okenọ ebẹbẹ e tẹ roma via, ma rẹ jọ ọkora ha, guegue, hayo siọ uketha Jihova ha kpahe emamọ edhere nọ a re ro ku ebẹbẹ na họ. U fo re ma rri edawọ wọhọ uvẹ nọ ma rẹ rọ tha esuo Jihova uke, fi obọ họ dhesẹ Setan fihọ ọtọrue, jẹ bọ ẹmeoyo gbe ekwakwa efa nọ e rẹ were Jihova.—Ahwo Hibru 5:7, 8.
23 Ma rẹ sai dhesẹ eva nọ ma fihọ Jihova ghelọ ezadhe nọ ma rẹriẹ ovao ku kẹhẹ. Ma re ru ere evaọ elẹ mai gbe edhere nọ ma be rọ rẹro so Ẹme Jihova gbe ukoko riẹ kẹ ọkpọvio. Rekọ, maero, ẹvẹ ma sai ro dhesẹ nnọ ma fi eva họ Jihova okenọ ma tẹ rẹriẹ ovao ku ebẹbẹ nọ e rẹ roma via evaọ akpọ inẹnẹ? Uzoẹme mai n’otha o te ta viere kpahe ẹme ọyena.
[Oruvẹ-obotọ]
a Ubiẹme Griki nọ Pọl o ro ruiruo onọ a fa fihọ “eware ifofe” na họ ubiẹme ovona nọ a ro ruiruo evaọ Septuagint ọrọ Griki ro dhesẹ ubiẹme nọ Solomọn ọ rọ ta ẹme unuẹse buobu evaọ obe Ọtausiuwoma Na, wọhọ oriruo, eva ẹme na ‘eware kpobi ifofe.’—Ọtausiwoma Na 1:2, 14; 2:11, 17; 3:19; 12:8.
Ẹvẹ Whọ te k’Uyo?
• Ẹvẹ Devidi o ro dhesẹ nnọ o ru Jihova họ evaifihọ riẹ?
• Eware esa vẹ e be wha uye-oruẹ ohwo-akpọ ze nẹnẹ, kọ fikieme u je fo nọ ma rẹ kiẹ ai riwi n’oke ruọ oke?
• Oziẹ vẹ Jihova o bru kpe ahwo-akpọ, kọ fikieme oziẹ na u je fo?
• Eme o gwọlọ re a fi eva họ Jihova?
[Iwoho nọ e rrọ ẹwẹ-obe avọ 20]
Devidi o ru Jihova họ evaifihọ riẹ
[Uwoho nọ o rrọ ẹwẹ-obe avọ 22]
Jesu o dhesẹ nọ okenọ uwou-ukpehru jọ u kie evaọ Jerusalẹm, orọnikọ Jihova ọ so riẹ hẹ