Enọ Ahwo nọ A s’Ebe
Evaọ abọ buobu akpọ na, o rrọ uruemu re a kẹ ekẹ evaọ ehaa-orọo. Didi ehri-izi Ikereakere ma re wo họ roro okenọ ma be kẹ hayo mi ekẹ itieye na?
Ebaibol e rọwo kugbe okẹ nọ a rẹ kẹ nọ a tẹ rehọ emamọ eva ru ei gbe evaọ etoke nọ u fo. Evaọ ẹme kpahe okẹ, Ebaibol na e t’udu họ Ileleikristi uzẹme awọ re a raro kele Jihova, Ọkokẹ nọ ọ rẹ kẹ no eva ze. (Jemis 1:17) Pọl ukọ na ọ tudu họ ibe Ileleikristi awọ nọ: “Wha se oware uwoma gbe ọghoruo ba ha, keme iwẹgọ itieye na e rẹ were Ọghẹnẹ gaga.” Fikiere, a ta udu họ Ileleikristi awọ nnọ a ru ọghọ.—Ahwo Hibru 13:16; Luk 6:38.
Kọ ẹvẹ kpahe obe ekẹ nọ a re kere, uruemu nọ o rrọ odode evaọ America? Evaọ England, a re sei obe ekwakwa ehaa-orọo. Oghẹrẹ nọ uruemu na o rrọ họ, imava nọ e gwọlọ rọo na a re kere odẹ rai fihọ obe evaọ uwou-eki nọ a riẹ nnọ eware e vọ, a ve kere ekwakwa nọ e rrọ uwou-eki na nọ a gwọlọ nnọ a rẹ rọ kẹ ai okẹ. Enọ e be te rọo na a ve dhesẹ uwou-eki na kẹ imoni gbe egbẹnyusu rai, a vẹ jọ usu eware nọ a kere fihọ obe ekwakwa ehaa-orọo na dẹ ojọ ro ru ai ọghọ. Who te rri uruemu nana ziezi, u re fi obọ họ kẹ ọnọ ọ gwọlọ ru ọghọ na nọ ọ gbẹ lahiẹ oma gwọlọ oware nọ ọ rẹ dẹ bẹ hẹ, u ve je fi obọ họ kẹ imava-orọo na re a siọ eware nọ a gwọlọ họ ba ezihe kpohọ uwou-eki na.
Jọ imava-orọo na a gwọlọ lele uruemu nana yọ ẹme obọ rai. Dede na, o gwọlọ nọ Oleleikristi ọ rẹ yọrọ oma re ọ whaha uruemu kpobi nọ o rẹ wọso ehri-izi Ebaibol. Wọhọ oriruo, kọ ẹvẹ o rẹ jọ otẹrọnọ imava nọ e gwọlọ rọo a kere eware nọ e ghare gaga? O tẹ via ere, enọ i wo ugho tere he a sae te dẹ uvumọ okẹ kẹ enọ e be rọo na ha, hayo a sai roro nọ a bi dhugbe kpohọ ehaa-orọo na ha re a whaha omovuọ okẹ ukuẹku nọ a rẹ wha ze. Oniọvo-ọmọtẹ jọ o kere nọ: “Uruemu nana u bi fiẹkpo no. Mẹ daoma gaga no re me ru ọghọ, rekọ kẹle na evawere nọ mẹ jẹ hai wo vẹre evaọ ẹkẹ u vru no.” Ẹvẹ u re yoma te otẹrọnọ ehaa-orọo u re zihe ruọ ehri elọhoma!
Evaọ uzẹme, u fo ho re a ru enọ e be kẹ okẹ roro nnọ re a sae jẹ okẹ rai rehọ, a rẹ dẹ okẹ na evaọ oghẹrẹ uwou-eki jọ hayo inọ okẹ na o rẹ jọ umuo unuigho jọ. Whaọ, Jesu Kristi o dhesẹ nnọ oware nọ o mae ghare evaọ aro Ọghẹnẹ họ udu ọkokẹ na, orọnikọ epanọ okẹ na o ghare te he. (Luk 21:1-4) Epọvo na re, kpahe ọghọ ohrọ kẹ enọ e rrọ ọbẹwẹ, Pọl ukọ na o kere nọ: “Ohwo o re ru wọhọ epanọ o roro evaọ eva riẹ, o jọ o rọ obọ okẹkẹ hẹ hayo ọgbahọ họ, keme Ọghẹnẹ o re you ohwo nọ ọ rẹ kẹ okẹ-evawere.”—2 Ahwo Kọrint 9:7.
A te rri rie no Ebaibol ze, o thọ họ re ohwo o dhesẹ oma riẹ inọ ọye ọ rehọ oghẹrẹ okẹ jọ ze, ẹsejọhọ ẹkwoma omobe nọ o re kere lele okẹ na. Dede na, evaọ eria jọ, o rrọ uruemu ẹwho na re a woro odẹ ohwo nọ ọ rehọ okẹ ze. Uruemu nana o sae wha ebẹbẹ ze. Ẹsejọhọ enọ e be kẹ okẹ na a re ru re a se ae ba ẹriẹ re o whaha iroro ahwo nọ a re si bru oma rai. Ahwo otiọye na a re ru lele ehri-uzi nọ o rrọ Matiu 6:3, oria nọ Jesu ọ jọ ta nọ: “Rekọ nọ who ti ru ọghọ-ohrọ ra, who ru re ẹkpẹlobọ ra ọ riẹ onọ obọze ra u re ruo ho.” Amọfa a sai roro nnọ ẹkẹ okẹ yọ ẹme omobọ ohwo, onọ ọkokẹ na gbe ọnọ a be kẹ na ọvo a rẹ riẹ kpahe. Ofariẹ, ewhowho odẹ enọ e kẹ okẹ o rẹ sae lẹliẹ otu jọ rehọ okẹ rai wawo erọ amọfa, nọ o rẹ wha ‘oma-uhrowo’ ze. (Ahwo Galesha 5:26) Ileleikristi a rẹ gwọlọ ru oma vo amọfa ha ẹkwoma ẹgbede nọ a rẹ jọ whowho odẹ ekokẹ.—1 Pita 3:8.
Ẹhẹ, ẹkwoma eru lele ehri-izi nọ e rrọ Ẹme Ọghẹnẹ, okẹ nọ a rẹ kẹ o rẹ jọ ehri evawere ẹsikpobi.—Iruẹru 20:35.