Iwhowho Uvie A n’Iyẹrẹ

Ughe Etẹlivisiọne Jọ O Wọ Riẹ Jiri Ọghẹnẹ

PỌL ukọ na ọ ta nọ ‘ahwo jọ a be rọ ihri avọ oma-uhrowo ta usiuwoma Kristi, rekọ amọfa kọ emamọ eva.’ (Ahwo Filipai 1:15) Evaọ ẹsejọ, makọ enọ e gwọlọ raha odẹ ahwo Jihova dede a rehọ ogbori ru ahwo udu oruọzewọ kurẹriẹ ziọ ukoko na no.

Evaọ November 1998, ughe etẹlivisiọne jọ nọ a jo dhesẹ Ebẹtẹle, uwou ogha Isẹri Jihova evaọ Louviers, France, o roma via evaọ etẹlivisiọne orẹwho France. Dede nọ ahwo a rehọ ughe na oghẹrẹ sa-sa, o wha emamọ iyẹrẹ ze evaọ idhere igbunu.

Usu enọ i rri ughe na họ Anna-Paula, ọnọ ọ be rria ikilomita 60 no Ebẹtẹle. Anna-Paula, oni emọ ivẹ nọ orọo riẹ o fa no, ọ jẹ gwọlọ iruo. Fikiere ohiohiẹ okiokiọ riẹ, ọ tẹ rehọ ifonu se Ebẹtẹle sọ ọ sae jọ obei ruẹ iruo. Ọ ta nọ: “O jọ omẹ iroro nnọ oria na u woma gaga gbe nnọ iruo nọ a rọ obei ru i woma gaga.” U gbe rie unu gaga nọ o yo nnọ enọ e be jọ Ebẹtẹle ru iruo kpobi yọ egbodibo nọ e rehọ oma rai kẹ! Nọ a dina t’ẹme no kpahe iruẹru Isẹri Jihova, ọ tẹ rọwo re Osẹri jọ ọ ziọ uwou riẹ.

Okenọ Léna, ọgbodibo oke-kpobi evaọ ukoko ẹwho na ọ ziọ uwou riẹ, a ta ẹme oke krẹkri, uwhremu na Anna-Paula o te mi obe na Eriariẹ Nọ I Re Su Kpohọ Uzuazọ Ebẹdẹ Bẹdẹ.a Nọ ọ wariẹ weze nya, Anna-Paula o se obe na duoka no avọ enọ buobu nọ o wo. Ọ rehọ evawere jẹ uwuhrẹ Ebaibol rehọ. Anna-Paula ọ ta nọ: “Rọ k’omẹ, o jọ uvẹ nọ mẹ rọ riẹ Ẹme Ọghẹnẹ. Me ri kru Ebaibol ẹdọvo vẹre he.”

Evaọ January, Anna-Paula o te weze kpohọ Ebẹtẹle, oka nọ u lele i rie, o te kpohọ ewuhrẹ Ileleikristi ọsosuọ riẹ. U kri hi, o te mu Ebaibol họ ewuhrẹ kugbe emọ riẹ je mu usiuwoma họ ẹta kẹ egbẹnyusu riẹ. Ọ ta nọ: “Mẹ sae fa eware nọ me je wuhrẹ yaoma ha. Mẹ jẹ gwọlọ vuẹ amọfa kpahe uzẹme Ebaibol na re mẹ jẹ sasa ae oma.” Nọ ọ daoma fi ebẹbẹ riẹ jọ kparobọ no, Anna-Paula o te muọ iwuhrẹ họ ẹnya ẹsikpobi. Ọ nyaharo kpata kpata jẹ họ-ame evaọ May 5, 2002.

Fibae, fiki emamọ oriruo Anna-Paula gbe ajọwha riẹ evaọ usiuwoma ota, oni riẹ o te muọ Ebaibol họ ewuhrẹ, u kri hi ọ tẹ họ-ame. Anna-Paula ọ ta nọ: “A re gbiku oghọghọ mẹ hẹ. Me bi yere Jihova kẹdẹ kẹdẹ nọ ọ rọ ziọ uzuazọ mẹ avọ eghale riẹ kpobi nọ ọ k’omẹ no.”

[Oruvẹ-obotọ]

[Iwoho nọ e rrọ ẹwẹ-obe avọ 3]

Obehru: Anna-Paula

Obotọ: Unu ighẹ ọ uwou ogha ọ France