Yọrọ Oma Kẹ Eviẹhọ
‘Wha yọrọ oma re ohwo ọvo ọ siọ ẹghẹ ba ẹ rọ viẹ owhai họ.’—AHWO KỌLỌSI 2:8.
1-3. (a) Iriruo vẹ i dhesẹ nọ eviẹhọ e da ruọ enwenọ kabọ kabọ uzuazọ kpobi no? (b) Fikieme eviẹhọ nọ e rrọ akpọ na i gbe ro gbe omai unu hu?
“BRO ahwo evaọ usu rai a re wọ ẹme bru ze nọ a gu ọruẹ kẹ hẹ?” Evaọ ikpe jọ nọ i kpemu, ọgba ọriẹ-izi jọ ọ nọ onọ yena ro ru ọkiẹriwo jọ. Didi uyo a kẹ riẹ? Ọ ta nọ: “Eva usu elọya idu buobu, omọvo rai ọvo a ri gu ọrue kẹ hẹ.” Fikieme? “Ekọmpene ilogbo jọ e nwane rehọ elọya na iruo obọ, yọ ohwo ọvo ọ re wọ ẹme bru ei ze he.” Ọkiẹriwo nana o dhesẹ oware uyoma nọ o rrọ otọ nẹnẹ—ọrue gbe eviẹhọ e da akpọ inẹnẹ fia.
2 Eviẹhọ e rrọ oghoghẹrẹ yọ u kpomahọ enwenọ kabọ kabọ uzuazọ ọgbọna no. Ma rẹ jọ ekwakwa awhusi ruẹ iriruo buobu—enọ i re hrowo esuo a bi gu erue kpahe iruẹru rai, enọ i re kele igho ekọmpene gbe eriẹ-izi a bi bru okpa họ erere nọ ekọmpene i bi wo, enọ e be jọ ekwakwa awhusi ghoro eware a be viẹ ahwo họ, ahwo nọ a be rehọ ẹme kpohọ ekọto fiki igho nọ a fihọ ekọmpene kẹ araha idudhe a be wha ekọmpene re, enana yọ umutho jọ gheghe ma kele na. Eviẹhọ egagọ e riẹ re. Isu-egagọ a be viẹ ogbotu na họ ẹkwoma iwuhrẹ erue wọhọ ẹwẹ nọ o re whu hu, erae ehẹle, gbe esanerọvo.—2 Timoti 4:3, 4.
3 Kọ u fo re eviẹhọ nana kpobi i gbe omai unu? Vievie. Ebaibol na e vẹvẹ unu kpahe “edẹ urere” na inọ: “Ahwo omuomu [gbe] otu eviẹhọ a re ti no eyoma ruọ onọ o mai yoma, eviẹwẹ [gbe] enọ a viẹhọ.” (2 Timoti 3:1, 13) Wọhọ Ileleikristi, u fo nọ ma re mu ẹro hotọ kẹ iwuhrẹ nọ e rẹ sai si omai no edhere uzẹme na. Enọ ivẹ nọ e rẹ ze iroro mai họ: Fikieme eviẹhọ e jẹ da otọ fia nẹnẹ, kọ ẹvẹ ma sae rọ yọrọ oma nọ a gbẹ rọ viẹ omai họ họ?
Fikieme Eviẹhọ E rọ Da Otọ Fia Nẹnẹ?
4. Ẹvẹ Ebaibol na i dhesẹ oware nọ eviẹhọ e rọ da akpọ na fia?
4 Ebaibol na e ta oware nọ eviẹhọ e rọ da akpọ nana fia. Jọn ukọ na o kere nọ “akpọ na ọsoso ọ rọ obọ ogaga oyoma na.” (1 Jọn 5:19) “Oyoma” yena họ Setan Ẹdhọ na. Jesu ọ ta kpahe iẹe nọ: “Ọ rọ evaọ uzẹme he, epanọ uzẹme ovo orọ eva riẹ hẹ. Nọ ọ ta erue, ọ ta erọ obọ riẹ, keme ọ ye họ ọterue gbe ọsẹ riẹ.” Kọ u re gbe omai unu inọ akpọ nana o bi dhesẹ oghẹrẹ ẹzi, uruemu, gbe iruẹru eviẹhọ osu riẹ?—Jọn 8:44; 14:30; Ahwo Ẹfẹsọs 2:1-3.
5. Ẹvẹ Setan ọ rọ tua omodawọ eviẹhọ riẹ no evaọ edẹ urere nana, kọ amono ọ mae tẹrovi?
5 Evaọ oke urere nana, Setan ọ tua omodawọ riẹ no. A gele i rie ziọ otọakpọ no. Ọ riẹ nnọ oke riẹ o rẹ kpẹkpẹe, yọ o wo “ofu ọgaga.” Avọ ọtamuo re ọ raha ahwo nọ i te rie obọ kpobi, ọ be “viẹ akpọ kpobi họ.” (Eviavia 12:9, 12) Orọnọ otiẹse jọ ọvo Setan ọ rẹ viẹ ahwo họ họ. Ukpoye, kẹse kẹse o thihigba bi su ahwo-akpọ thọ.a Ọ be rehọ ona eviẹhọ kpobi nọ u te rie obọ ruiruo—onọ o kẹre te ẹghẹ gbe iwhayo—bi ro wuhu iroro ahwo nọ a rọwo ho di je ru ai si oma no Ọghẹnẹ. (2 Ahwo Kọrint 4:4) Ọviẹ-eviaviẹ ologbo nana ọ tẹrovi emulọ otu nọ e be “rọ ẹzi gbe uzẹme” gọ Ọghẹnẹ. (Jọn 4:24; 1 Pita 5:8) O thọrọ owhẹ ẹro vievie he inọ Setan ọ ta nọ: ‘Mẹ sae si ohwo kpobi nọ abọ Ọghẹnẹ.’ (Job 1:9-12) Joma kiẹ ‘eghẹ’ Setan jọ riwi gbe epanọ ma rẹ rọ kẹnoma kẹ ai.—Ahwo Ẹfẹsọs 6:11.
Yọrọ Oma kẹ Eviẹhọ Otu nọ E Siọ Ẹrọwọ Na
6, 7. (a) Eme otu nọ e siọ ẹrọwọ na no a rẹ sae ta? (b) Ẹvẹ Ikereakere na i ro dhesẹ oware nọ otu nọ e siọ ẹrọwọ na no a gwọlọ vevẹ?
6 U kri no nọ Setan ọ be rọ rehọ enọ e siọ ẹrọwọ na ruiruo rọ lẹliẹ idibo Ọghẹnẹ họ. (Matiu 13:36-39) Otu nọ e siọ ẹrọwọ na a sae ta inọ a be gọ Jihova gbe nọ a rọwo Ebaibol na, rekọ a se abọ ukoko Ọghẹnẹ nọ a rẹ rọ ẹro ruẹ. Ejọ i re tube zihe kpohọ iwuhrẹ nọ i re si adhẹẹ no Ọghẹnẹ oma erọ “Babilọn ologbo na,” uvie-ulogbo egagọ erue akpọ-soso. (Eviavia 17:5; 2 Pita 2:19-22) Evaọ otọ ekpakpọ Ọghẹnẹ, enọ i kere Ebaibol na a rehọ eme egaga ro rovie ẹjiroro otu nọ e siọ ẹrọwọ no gbe oghẹrẹ nọ a bi ro su ahwo thọ.
7 Eme enọ e siọ ẹrọwọ no a be gwọlọ ru? Re a no ẹrọwọ nọ a rri fihọ uzẹme vẹre na ọvo o rẹ vọ ibuobu rai eva ha. Ẹsibuobu a rẹ gwọlọ si amọfa lele oma. Ukpenọ a rẹ ruọ otafe nyae gwọlọ ilele obọrai, ibuobu enọ e siọ ẹrọwọ na no a be gwọlọ “si ilele [koyehọ ilele ọ Kristi] lele oma rai.” (Iruẹru 20:29, 30) Kpahe otu-iwuhrẹ erue, Pọl ọ kẹ unuovẹvẹ okpakpata nana inọ: ‘Wha yọrọ oma re ohwo ọvo ọ siọ ẹghẹ ba ẹ rọ viẹ owhai họ.’ (Ahwo Kọlọsi 2:8) Kọ oyena u gbe dhesẹ oware nọ ahwo buobu nọ a vro ẹrọwọ na no a be gwọlọ ru? Wọhọ otho-ahwo nọ o re mu ọnọ o fi ẹro họ otọ họ se uviuwou riẹ ba, otu nọ e siọ ẹrọwọ na no a bi fiẹro họ ahwo nọ a fi eva họ ai evaọ ukoko na, be gwọlọ mu ai no udevie uthuru na.
8. Ona vẹ otu nọ e siọ ẹrọwọ na no a bi ro le ẹgwọlọ rai te obọ?
8 Ona vẹ otu nọ e siọ ẹrọwọ na no a bi ro ru iruo ro le ute rai t’obọ? Ẹsibuobu a rẹ jẹlẹ eme rai, ta eme nọ e gba re he, je gu erue koikoi. Jesu ọ riẹ inọ a te “ta erue oghẹrẹ eware iyoma kpobi họ uzou” ilele riẹ. (Matiu 5:11) Ahwo ọwọsuọ iyoma itieye na a rẹ ta eme nọ e rrọ uzẹme he re a ruẹse viẹ amọfa họ. Pita ukọ na ọ vẹvẹ unu kpahe ahwo nọ e siọ ẹrọwọ na nọ e te ta “eme erue,” vaha ‘ewuhrẹ eviẹhọ,’ jẹ ‘thahe Ikereakere na’ ro wo ẹgwọlọ rai tobọ. (2 Pita 2:3, 13; 3:16) U yoma kẹhẹ, otu nọ e siọ ẹrọwọ na a “raha ẹrọwọ otu jọ” no.—2 Timoti 2:18.
9, 10. (a) Ẹvẹ ma sae rọ yọrọ oma kẹ eviẹhọ otu nọ e siọ ẹrọwọ na no? (b) Fikieme o gbẹ kẹ omai uye he otẹrọnọ otoriẹ nọ ma wo kpahe ẹjiroro Ọghẹnẹ o gwọlọ enwene jọ?
9 Ẹvẹ ma sae rọ yọrọ oma re otu nọ e siọ ẹrọwọ na no a se omai ba ẹviẹhọ? Ẹkwoma eyo ohrẹ Ẹme Ọghẹnẹ nọ o ta nọ: “Wha fiẹro họ otọ vuhu enọ erẹ wha oma-ohẹriẹ gbe ẹbẹbẹ rọ suọ uwuhrẹ nọ a wuhrẹ owhai, wha sioma no ai.” (Ahwo Rom 16:17) Ma re “sioma no ai” ẹkwoma iroro rai nọ ma rẹ kẹnoma kẹ—te ẹme-unu rai, te ebe nọ a kere, hayo evaọ Itanẹte. Fikieme ma rẹ rọ jẹ oghẹrẹ owọ utioye na? Orọ ọsosuọ, fikinọ Ẹme Ọghẹnẹ ọ ta nọ ma ru ere, yọ ma fi eva họ nọ Jihova o wo ewoma mai fihọ iroro.—Aizaya 48:17, 18.
10 Orọ avivẹ, ma you ukoko nọ u wuhrẹ omai uzẹme oghaghae nọ o hẹriẹ omai thabọ no Babilọn Ologbo na. Eva oke ovona, ma vuhumu inọ eriariẹ mai kpahe ẹjiroro Ọghẹnẹ e gba re he; ikpe na e be dhẹ na ma ru inwene jọ evaọ otoriẹ mai no. O be were Ileleikristi omarokpotọ re a hẹrẹ Jihova rọkẹ inwene itieye na kpobi. (Itẹ 4:18) Evaọ oke ovona, ma re gbabọkẹ ukoko nọ Ọghẹnẹ o bi ro ruiruo ho, keme ma be ruẹ imuẹro ivevẹ inọ Ọghẹnẹ ọ be ghale ukoko na.—Iruẹru 6:7; 1 Ahwo Kọrint 3:6.
Yọrọ Oma kẹ Eviẹhọ Omobọ Ohwo
11. Fikieme ahwo-akpọ sebaẹgba a sae ro viẹ omobọ rai họ?
11 Ahwo-akpọ sebaẹgba a wo omoyẹlẹ jọ nọ Setan o re ro ru iruo vẹrẹ vẹrẹ—eviẹhọ omobọ ohwo. Jerimaya 17:9 o ta nọ: “Udu na u wo ẹghẹ vi eware na kpobi, je wo uruemu ugbogbo.” Yọ Jemis o kere nọ: “Kohwo kohwo o re kie ruọ odawọ okenọ urusio avọ eguọlọ-aguọlọ riẹ e gba riẹ họ.” (Jemis 1:14) Nọ isiuru e tẹ ruọ udu mai, udu na o rẹ sae rehọ uzioraha gẹnyẹ omai, ru ei siuru jẹ wọhọ nọ o kare enwoma. Eriwo otiọye na yọ orọ eviẹhọ, keme oma nọ a rẹ rọ kẹ uzioraha u re su kpohọ ọraha.—Ahwo Rom 8:6.
12. Idhere vẹ eviẹhọ omobọ ohwo e sae rọ jọ agbefẹ kẹ omai?
12 Eviẹhọ omobọ ohwo e rẹ sae jọ agbefẹ kẹ omai lọlọhọ. Udu ẹghẹ o rẹ sai ru ohwo rri uruemu othọthọ nọ o wo jeve jeve hayo rehọ inoma gu uzioraha ulogbo no uzou. (1 Samuẹle 15:13-15, 20, 21) Udu okpakpa mai o sae jẹ gwọlọ idhere nọ o rẹ rọ ta ewoma họ iruemu jọ nọ i fo ho. Wọhọ oriruo, roro kpahe abọ eware ẹkeriotọ omawere. Eware ẹkeriotọ omawere jọ e riẹ nọ i woma nọ e rẹ jẹ kẹ evawere. Dede na, eware buobu nọ akpọ nana o bi dhesẹ—evaọ ifimu gbe ighe etẹlivisiọno gbe oria evuẹ Itanẹte—e vọ avọ ogbekuo jẹ rrọ tọtọtọ. O re lọlọhọ re ma roro nọ ma rẹ sai rri ighe nọ i wo irekọ ababọ enwoma. Ahwo jọ a re tube roro nọ, “U bi kpokpo obroziẹ-iroro mẹ hẹ, kọ eme ọ jariẹ thọ?” Rekọ ahwo otiọye na a be ‘viẹ oma obọrai họ.’—Jemis 1:22.
13, 14. (a) Oriruo Ikereakere vẹ o dhesẹ nnọ orọnikọ ẹsikpobi obroziẹ-iroro mai ọ rẹ kpọ omai kiehọ họ? (b) Ẹvẹ ma sae rọ yọrọ oma kẹ eviẹhọ omobọ ohwo?
13 Ẹvẹ ma sae rọ yọrọ oma kẹ eviẹhọ omobọ ohwo? Orọ ọsosuọ, u fo re ma kareghẹhọ nnọ a re fi eva họ obroziẹ-iroro ohwo-akpọ ẹsikpobi hi. Roro kpahe oware nọ o via kẹ Pọl ukọ na. Taure o te ti zihe ruọ Oleleikristi, o kpokpo ilele Jesu. (Iruẹru 9:1, 2) O sae jọ nọ obroziẹ-iroro riẹ o kpokpo i rie oke yena ha. Dede na, o jọ vevẹ inọ obroziẹ-iroro riẹ o su rie thọ. Pọl ọ ta nọ: “Eva ababọ orọwọ mẹ rọ rehọ ogbori ru oyena.” (1 Timoti 1:13) Fikiere nọ obroziẹ-iroro mai o gbe kpokpo omai evaọ eware ẹkeriotọ omawere jọ họ, oyena ọvo o nwani dhesẹ hẹ inọ owojẹ mai na u kiehọ. Emamọ obroziẹ-iroro nọ a rọ Ẹme Ọghẹnẹ wuhrẹ no ọvo o rẹ sae kpọ omai kiehọ.
14 Re ma sae whaha eviẹhọ omobọ ohwo, u fo nọ ma rẹ kareghẹhọ iroro-ejẹ jọ nọ i re fi obọ họ. Rehọ oma olẹ kiẹ oma ra riwi. (Olezi 26:2; 2 Ahwo Kọrint 13:5) Nọ whọ tẹ rehọ oruọzewọ kiẹ oma ra riwi, whọ sae ruẹ nọ whọ gwọlọ inwene jọ evaọ idhere hayo eriwo ra. Gaviezọ kẹ amọfa. (Jemis 1:19) Nọ o rọnọ ma rẹ kaki brukpe oma mai hi nọ mai ọvo ma tẹ be kiẹ omobọ mai riwi na, o rrọ oware areghẹ re ma gaviezọ kẹ ibe Ileleikristi nọ e kpako ziezi evaọ okenọ a te bi dhesẹ oghẹrẹ ohwo nọ ma ghinẹ rrọ. Otẹrọnọ iroro-ejẹ ra hayo eware jọ nọ who bi ru i bi kiehọ evaọ aro ibe Ileleikristi nọ e rrọ owowa je wo orimuo ho, whọ sae nọ oma ra nnọ, ‘Kọ o sae jọ nọ me ri wuhrẹ obroziẹ-iroro mẹ ziezi hi, manikọ ubiudu mẹ o be viẹ omẹ họ?’ Hae rehọ Ebaibol na gbe ebe nọ a kere no Ebaibol na ze rọ ko oma ra ẹsikpobi. (Olezi 1:2) Ere oruo u ti fi obọ họ k’owhẹ kpọ iroro, gbe iruemu ra rọwo kugbe ehri-izi Ọghẹnẹ.
Yọrọ Oma kẹ Erue Setan
15, 16. (a) Re ọ ruẹse viẹ omai họ, erue vẹ Setan o bi ro ruiruo? (b) Ẹvẹ ma sae rọ yọrọ oma re erue itieye e se omai ba ẹviẹhọ?
15 Setan o bi gu erue sa-sa rọ daoma viẹ omai họ. Ọ be daoma ru omai roro nọ ekwakwa efe e rẹ kẹ evawere gbe evevọwẹ, dede na o rrọ ere vievie he. (Ọtausiwoma Na 5:10-12) Ọ be gwọlọ ru omai rọwo inọ akpọ omuomu ọnana ọ te jọ ribri, dede nọ imuẹro e riẹ vevẹ nnọ ma be rria evaọ “edẹ urere” na. (2 Timoti 3:1-5) Setan ọ be wha iroro na h’aro inọ oware ovo o jariẹ thọ họ re a yeri uzuazọ ọfariẹ-ogbe, dede nọ ẹsibuobu ahwo nọ a rehọ oma kẹ uzuazọ omawere ọvo a be ruẹ edada noi ze. (Ahwo Galesha 6:7) Ẹvẹ ma sae rọ yọrọ oma re erue itieye na e se omai ba ẹviẹhọ?
16 Wo erere no iruiruo Ebaibol ze. Ebaibol na i wo iriruo unuovẹvẹ erọ ahwo nọ Setan ọ rehọ erue riẹ viẹhọ. A you ekwakwa iwo, a kare orimuo kpahe oghẹrẹ oke nọ a jẹ rria na, hayo rehọ oma kẹ ofariẹ-ogbe—onọ u su kpohọ iyẹrẹ iyoma. (Matiu 19:16-22; 24:36-42; Luk 16:14; 1 Ahwo Kọrint 10:8-11) Wuhrẹ no iruiruo ọgbọna ze. U yoma kẹhẹ, ẹsejọ Ileleikristi jọ a bi gbabọ kẹ ovẹrẹ oke na je bi roro nọ oware uwoma jọ u bi vru mi ai fikinọ a be gọ Ọghẹnẹ. A rẹ sai no ukoko na re a ruẹsi le uzuazọ nọ a bi se akpọriọ na. Dede na, ahwo otiọye na a rrọ “eria nọ e be whra,” keme u je re krẹ, a ti kp’awọ ku iyẹrẹ uruemu ababọ omarọkẹ Ọghẹnẹ rai na. (Olezi 73:18, 19) O rrọ oware areghẹ re ma wuhrẹ no ethobọ amọfa ze.—Itẹ 22:3.
17. Fikieme Setan ọ be rọ wha ọrue na haro inọ Jihova o you omai hayo rri omai ghaghae he?
17 Ọrue ọfa jọ ọ riẹ nọ Setan o bi ro ruiruo gaga—inọ Jihova o you omai hayo rri omai ghaghae he. Setan ọ rehọ ikpe idu buobu ro wuhrẹ kpahe ahwo-akpọ sebaẹgba no. Ọ riẹ nọ elọhoma e rẹ sai whrehe omai. (Itẹ 24:10) Fikiere, ọ be wha ọrue na haro inọ ma fioka ha evaọ aro Ọghẹnẹ. Oma o tẹ ‘lọhọ omai’ nọ ma jẹ ghinẹ rọwo inọ Jihova ọ be daezọ mai hi, oma o sae rrọ omai nọ ma je kie kpemu. (2 Ahwo Kọrint 4:9) Uzedhe oye họ oware nọ Ọviẹahwohọ ologbo na ọ gwọlọ! Nọ o rrọ ere na, ẹvẹ ma sae rọ yọrọ oma nọ Setan ọ gbẹ rọ rehọ ọrue nana viẹ omai họ họ?
18. Ẹvẹ Ebaibol na e rọ kẹ omai imuẹro uyoyou Jihova?
18 Roma totọ roro ẹme nọ Ebaibol na e ta kpahe uyoyou nọ Ọghẹnẹ o wo kẹ omai. Ẹme Ọghẹnẹ ọ rehọ emamọ eme jọ nọ i re duobọ te ohwo udu rọ kẹ omai imuẹro inọ Jihova o bi mu ẹro họ omai je you omai omomọvo. O bi fi irui-oviẹ ra họ “ololo” riẹ, onọ u dhesẹ nọ ọ be ruẹ jẹ kareghẹhọ irui-oviẹ nọ i bi no owhẹ aro ze evaọ omodawọ nọ whọ be rọ yọrọ ẹrọwọ ra. (Olezi 56:8) Ọ riẹ okenọ who “wo edada iroro” yọ ọ rẹ jọ kẹle owhẹ eva etoke utioye na. (Olezi 34:18, NW ) Ọ riẹ oware kpobi kpahe owhẹ, te unu ‘egẹ-eto uzou ra kpobi.’ (Matiu 10:29-31) Maero, Ọghẹnẹ ọ “rehọ Ọmọvo riẹ kẹ” fiki ra. (Jọn 3:16; Ahwo Galesha 2:20) Eva ẹsejọ, o sae jọ bẹbẹ kẹ owhẹ re whọ rọwo nnọ ikereakere itieye na e be ta kpahe owhẹ dẹe. Dede na, ma rẹ rọwo ẹme nọ Jihova ọ ta hrọ. Ọ gwọlọ re ma rọwo inọ o you omai omomọvo orọnikọ wọhọ utu ọvo ho.
19, 20. (a) Fikieme u ro wuzou re who vuhu jẹ se ọrue Setan na inọ Jihova o you owhẹ hẹ? (b) Ẹvẹ ọsẹro ọnyawariẹ jọ o ro fi obọ họ kẹ ahwo nọ a rrọ ọkora no?
19 Vuhu ọrue na mu jẹ se iẹe. Whọ tẹ riẹ nọ ohwo jọ ọ be ta ọrue, whọ rẹ thọ oma re ọ se owhẹ ba ẹviẹhọ. Epavo na re, ẹriẹ nnọ Setan ọ gwọlọ nọ whọ rọwo ọrue na inọ Jihova o you owhẹ hẹ o rẹ sai fi obọ họ gaga. Kpahe uzoẹme Uwou-Eroro jọ nọ o vẹvẹ unu kpahe eghẹ Setan, Oleleikristi jọ ọ ta nọ: “Me vuhumu vievie vẹre he inọ Setan ọ be daoma rehọ iroro obọ mẹ fi ewhrehe họ omẹ oma. Ẹriẹ onana u fi obọ họ kẹ omẹ fi iroro nana kparobọ.”
20 Roro kpahe oware nọ ọsẹro ọnyawariẹ jọ evaọ orẹwho Obọze Ovatha-Ọre America jọ ọ rọ ẹro ruẹ. Nọ ọ tẹ rrọ iweze ẹruorote bru ibe enọ e rọwo nọ e rrọ ọkora, ọ rẹ nọ ai nnọ, ‘Whọ rọwo uwuhrẹ Esanerọvo na?’ Fikinọ a riẹ nọ oyena yọ ọrue jọ nọ Setan ọ be wha haro, enọ udu u whrehe na a vẹ nwane kẹ uyo nọ, ‘Ijo, vievie.’ Kẹsena ọsẹro ọnyawariẹ na ọ vẹ wariẹ nọ inọ, ‘Kọ whọ rọwo erae ehẹle?’ A vẹ kẹ uyo ovona, ‘Ijo, vievie!’ Kẹsena ọsẹro ọnyawariẹ na ọ vẹ vuẹ ae nọ, ọrue Setan ọfa jọ ọ riẹ nọ a rẹ kaki vuhumu wọhọ ọrue he. Ọ vẹ kpọ iroro rai kpohọ ẹwẹ-obe avọ 249, edhe-ẹme avọ 21 ọrọ obe na Si Kẹle Jihova,b onọ o fere ọrue na inọ Jihova o you omai wọhọ omomọvo ho via. Ọsẹro ọnyawariẹ na ọ nẹ emamọ iyẹrẹ kpahe oghẹrẹ utioye na nọ o ro fi obọ ho kẹ enọ udu u whrehe no vuhumu jẹ se ọrue Setan nana.
Thọ Oma Ra Mukpahe Eviẹhọ
21, 22. Fikieme ma gbẹ rrọ ogbori kẹ eghẹ eviẹhọ Setan he, kọ eme u fo nọ o rẹ jọ ọtamuo mai?
21 Eva abọ ekuhọ ọrọ edẹ urere nana, ma rẹro nọ Setan ọ te gbẹ wha erue gbe eviẹhọ buobu haro. U woma gaga inọ Jihova o vu omai wa ogbori hi kpahe ẹghẹ eviẹhọ Setan. Ebaibol na gbe ebe nọ ‘ọrigbo nọ o wo ẹrọwọ avọ areghẹ na’ o kere no Ebaibol na ze, e fere eghẹ imuemu Ẹdhọ via. (Matiu 24:45) Ure nọ o kpọ via no u re zue okọ họ.—2 Ahwo Kọrint 2:11.
22 Nọ o rrọ ere na, joma yọrọ oma kẹ iroro otu nọ e siọ ẹrọwọ na no. Jọ o jọ ọtamuo mai re ma whaha agbefẹ eviẹhọ omobọ ohwo nọ a rẹ kaki riwi mu hu. Yọ joma vuhu jẹ se erue Setan kpobi. Ẹkwoma ere oruo, ma te thọ usu mai kugbe ‘Ọghẹnẹ uzẹme na,’ ọnọ ọ ghọ eviẹhọ na.—Olezi 31:5; Itẹ 3:32.
[Oruvẹ-obotọ]
a Kpahe ẹme na ‘ọnọ ọ rẹ viẹ ahwo họ’ eva obe Eviavia 12:9 na, obe jọ o ta nọ u “dhesẹ oghẹrẹ uruemu ikẹse kẹse nọ u zihe ruẹ ẹkoma ohwo no.”
b Onọ Isẹri Jihova a kere.
Kọ Whọ Kareghẹhọ?
• Fikieme eviẹhọ e rọ da otọ fia evaọ akpọ na nẹnẹ?
• Ẹvẹ ma sae rọ yọrọ oma re enọ e siọ ẹrọwọ na no a se omai ba ẹviẹhọ?
• Ẹvẹ ma sae rọ yọrọ oma kẹ iroro kpobi nọ i re su kpohọ eviẹhọ?
• Eme ma re ru re Setan ọ se omai ba ẹviẹhọ?
[Uwoho nọ o rrọ ẹwẹ-obe avọ 15]
Whọ rehọ eware ẹkeriotọ omawere viẹ oma ra họ họ
[Iwoho nọ e rrọ ẹwẹ-obe avọ 16]
Evaọ oma oyọrọ kẹ eviẹhọ omobọ ohwo, rọ oma olẹ kiẹ oma ra riwi, gaviezọ kẹ amọfa, re whọ jẹ rehọ Ẹme Ọghẹnẹ ko oma ra ẹsikpobi