Jihova Re Ru Oware Nọ O Gba Ẹsikpobi

“ỌNOWO na o kiẹrẹe eva idhere riẹ kpobi.”—OLEZI 145:17.

1. Ẹvẹ o rẹ jọ owhẹ oma nọ ohwo jọ ọ tẹ jọ emu dhesẹ owhẹ fihọ ohwo oyoma, kọ eme ma rẹ sai wuhrẹ no oware utioye na ze?

KỌ OHWO jọ ọ jọ emu ra dhesẹ owhẹ fihọ ohwo oyoma no ẹdẹjọ, ẹsejọhọ bi vi ẹro ku oware jọ nọ who ru inọ o thọ, dedenọ ọ riẹ uzẹme ẹme na totọ họ? O tẹ rrọ ere o rẹ da owhẹ gaga—ẹhẹ, ohwo ọvo nọ o rẹ da ha ọ riẹ hẹ. Ma sai wo obọdẹ uwuhrẹ jọ no oware nana ze: O thọ re ma nwani ku ẹme họ kpahe ohwo ababọ uzẹme ẹme na nọ ma riẹ totọ.

2, 3. Ẹvẹ o rẹ jọ ahwo jọ oma nọ a te se ikuigbe Ebaibol jọ nọ e nwane robọ kotọ ta eware kpobi te epanọ e sae rọ kẹ iyo enọ mai kpobi hi, dede na eme Ebaibol na ta kẹ omai kpahe Jihova?

² U fo re ma hae kareghẹhọ uwuhrẹ nana ẹsikpobi nọ ma tẹ gwọlọ ku ẹme họ kpahe oghẹrẹ ohwo nọ Jihova Ọghẹnẹ ọ rrọ. Fikieme? Fikinọ oghẹrẹ ikuigbe Ebaibol jọ e riẹ nọ e rẹ sai gbomai unu nọ ma tẹ kaki rri rai ọsosuọ. O sae jọnọ ikuigbe nana—ẹsejọhọ nọ e ta kpahe eware nọ idibo Ọghẹnẹ jọ a ru hayo oziẹobro Ọghẹnẹ evaọ oke anwae—e nwane robọ kotọ ta eware na kpobi te epanọ e sae rọ kẹ iyo enọ mai kpobi hi. U yoma kẹhẹ, ahwo jọ a re si ikẹ kpahe ikuigbe itieye na, tubẹ vro sọ Ọghẹnẹ o kiẹrẹe. Dede na, Ebaibol na e ta kẹ omai nọ “ỌNOWO na o kiẹrẹe eva idhere riẹ kpobi.” (Olezi 145:17) Ẹme riẹ ọ tẹ jẹ kẹ omai imuẹro nọ “o re ru umuomu hu.” (Job 34:12; Olezi 37:28) Dai roro epanọ o rẹ jariẹ oma nọ amọfa a tẹ ta nọ ọ be riẹ eware jọ ru hu!

³ Joma ta ẹme kpahe ẹjiroro isoi nọ ma rẹ rọ rọwo inọ oziẹbro Jihova o gba. Nọ ma tẹ riẹ ẹjiroro yena no, ma vẹ te kiẹ ikuigbe Ebaibol ivẹ jọ nọ ahwo jọ rẹ sae kaki wo otoriẹ rai hi.

Fikieme Ma jẹ Rọwo inọ Oziẹbro Jihova Ọ Gba?

4. Fikieme ma jẹ rọ oma kpotọ nọ ma te bi roro kpahe eware nọ Ọghẹnẹ o ru? Kẹ oriruo.

⁴ Orọ ọsosuọ, fikinọ Jihova ọ riẹ eware kpobi nọ e rrọ emu oware nọ o via yọ ma riẹ rae he na, u fo nọ ma rẹ roma kpotọ okenọ ma te bi roro kpahe eware nọ Ọghẹnẹ o ru. Re a dhesẹ iẹe: “Ma rehọ iẹe nọ emamọ oguẹdhọ jọ nọ ọ rẹ re udi hi notọ avọ otọ ze o bruoziẹ jọ evaọ okọto. Ẹvẹ who re rri ohwo jọ nọ ọ riẹ oware nọ o via totọ họ hayo nọ ọ riẹ uzi nọ a ro bruoziẹ na ha, nọ ọ tẹ ta inọ oguẹdhọ na o bruoziẹ na thọ? O rẹ jọ oware ugheghẹ re ohwo o bruoziẹ ẹme nọ ọ riẹ totọ họ. (Itẹ 18:13) Ẹvẹ o rẹ jọ oware ugheghẹ te re ahwo-akpọ gheghe a fo “obruoziẹ akpọ na”!—Emuhọ 18:25.

5. Eme ọ rẹ thọrọ omai ẹro ho nọ ma tẹ jọ Ebaibol na se kpahe oghẹrẹ nọ Ọghẹnẹ o ro gu ahwo jọ ẹdhọ?

⁵ Ẹjiroro ọfa nọ ma rẹ rọ rọwo inọ oziẹobro Ọghẹnẹ ọ gba họ, Ọghẹnẹ rẹ sae riẹ eva ohwo, rekọ o rrọ ere kẹ ahwo-akpọ họ. (1 Samuẹle 16:7) Ẹme riẹ ọ ta nọ: “Mẹ ỌNOWO na họ ọnọ ọ rẹ kiotọ eva kpobi jẹ dawo udu ohwo, re mẹ hwosa kẹ ohwo epanọ iruo riẹ e rọ, gbe epanọ ibi iruo riẹ e rọ.” (Jerimaya 17:10) Fikiere, nọ ma tẹ jọ Ebaibol se kpahe oghẹrẹ nọ Ọghẹnẹ o ro gu ahwo jọ ẹdhọ, joma kareghẹhọ inọ ọye nọ ọ rẹ ruẹ eware kpobi lafi, o roro kpahe eware nọ i dhere, oware nọ o soriẹ, gbe ẹjiroro efa nọ a gbiku rai fihọ Ebaibol na ha.—1 Iruẹru-Ivie 28:9.

6, 7. (a) Ẹvẹ Jihova o ro dhesẹ nọ ọ rẹ yọrọ itee ikiẹrẹe gbe uvi-oziẹ riẹ o tẹ make rọnọ o rẹ rehọ oware ulogbo jọ mi iei? (b) Eme u fo nọ ma kareghẹhọ nọ ma tẹ jọ Ebaibol na se kpahe oware jọ nọ o be lẹliẹ omai roro sọ Ọghẹnẹ riẹ ru hu?

⁶ Muẹrohọ ẹjiroro avọ esa nọ ma rẹ rọ rọwo inọ oziẹobro Jihova ọ gba: Ọ rẹ yọrọ itee ẹrẹreokie riẹ o tẹ make rọnọ ere oruo o te rehọ oware ulogbo mi iei. Roro kpahe oriruo jọ. Jihova ọ nya lele itee uvi-oziẹ gbe ẹrẹreokie riẹ nọ o si obọ no Ọmọ riẹ wọhọ ẹtanigbo rọkẹ esiwo ahwo-akpọ ẹmeoyo rono uzioraha gbe uwhu. (Ahwo Rom 5:18, 19) Dede na, o jọ oware nọ o da Jihova thesiwa nọ ọ ruẹ Ọmọ oyoyou riẹ nọ ọ ruẹ uye te epanọ o ro whu eva ure oja. Kọ eme onana u dhesẹ kẹ omai kpahe Ọghẹnẹ? Ebaibol na e ta kpahe “ẹta nọ [ọ] rọ eva Kristi Jesu” inọ “re u dhesẹ ẹrẹreokie Ọghẹnẹ.” (Ahwo Rom 3:24-26) Ebaibol ọfa jọ ọ fa Ahwo Rom 3:25 na nọ: “Onana u dhesẹ nọ Ọghẹnẹ o re ru oware nọ o gba je kiete ẹsikpobi.” (New Century Version) Ẹhẹ, epanọ u no Jihova eva ze nọ o ro ru ọruẹrẹfihotọ ẹtanigbo na u dhesẹ nọ o wo osegboja nọ ọ mae ga kẹ eruo “oware nọ o gba je kiete.”

⁷ Nọ o rrọ ere na, ma te se oware jọ evaọ Ebaibol na nọ o rẹ lẹliẹ ahwo jọ vro sọ Ọghẹnẹ ọ riẹ ru hu, u fo re ma kareghẹhọ inọ: Fiki ẹnya lele itee ẹrẹreokie gbe uvie-oziẹ riẹ, Jihova gboke he re Ọmọ riẹ ọ se uwhu oja ba ewhuo. Kọ ma sai rẹro nọ o re gbabọ kẹ itee yena evaọ eware efa? Uzẹme riẹ họ, Jihova o re gbabọ kẹ itee ikiẹrẹe gbe uvi-oziẹ riẹ vievie he. Fikiere, ma wo uvi ẹjiroro nọ ma re ro wo imuẹro inọ o re ru oware nọ o gba je kiete ẹsikpobi.—Job 37:23.

8. Fikieme o jẹ o kare iroro re ahwo-akpọ a roro nọ Jihova kare uvi-oziẹ gbe ẹrẹreokie evaọ oghẹrẹ jọ?

⁸ Roro kpahe ẹjiroro avọ ene nọ u je fo re ma rọwo inọ oziẹobro Jihova o gba: Jihova rehọ uwoho Riẹ ma ahwo-akpọ. (Emuhọ 1:27) Fikiere ahwo-akpọ a wo ekwakwa-aghae nọ i tho erọ Ọghẹnẹ, enọ e kẹre te iroro uvi-oziẹ gbe ẹrẹreokie. Kiyọ o kare iroro otẹrọnọ iroro uvi-oziẹ gbe ẹrẹreokie mai o rẹ wọ omai roro nọ ekwakwa-aghae eyena e rẹ sae kare Jihova eva oghẹrẹ jọ. Nọ ikuigbe Ebaibol na jọ e tẹ be kẹ omai idhọvẹ, u fo re ma kareghẹhọ nọ fiki uzioraha nọ ma reuku riẹ, ma wo iroro nọ e gbakiete he nọ ma rẹ rọ riẹ uvi-oziẹ. Jihova Ọghẹnẹ nọ a rehọ uwoho riẹ ma omai ọ gba kiete evaọ ẹrẹreokie gbe uvi-oziẹ. (Iziewariẹ 32:4) O rẹ jọ oware ekela re ohwo-akpọ o roro nọ ọ riẹ uvi-oziẹ je kiẹrẹe vi Ọghẹnẹ!—Ahwo Rom 3:4, 5; 9:14.

9, 10. Fikieme o gbẹ rrọ ọgbahọ kẹ Jihova ha re ọ ta oware nọ o je ru oware jọ kẹ ahwo-akpọ, epaọ ẹsenọ a be nọe unu?

⁹ Ẹjiroro avọ isoi nọ ma rẹ rọ rọwo inọ oziẹbro Jihova o gba họ, ọye họ ọnọ “ọ mai kpehru vi akpọ kpobi.” (Olezi 83:18) Fikiere, o rrọ ọgbahọ kẹe he re ọ ta ẹjiroro nọ o ro ru oware jọ kẹ ahwo-akpọ, epaọ ẹsenọ a be nọe unu. Ọye họ Ọmebẹ Ologbo na, yọ ma wọhọ ọviẹ nọ a rọ ma ebẹ, nọ ọ sai ro ru epanọ u je rie. (Ahwo Rom 9:19-21) Kọ mai yọ ono—ẹbẹ gheghe nọ ọ rọ obọ riẹ ma—nọ a rẹ nọe unu fiki oware nọ o ru? Nọ Job o wo eriwo ọthọthọ kpahe oghẹrẹ nọ Ọghẹnẹ o bi ro yeri kugbe ahwo-akpọ, Jihova tẹ kpọe họ, nọe inọ: “Kọ who roro nọ me re ruthọ? Who re brukpe omẹ re o ra u kiehọ?” Nọ o vuhumu nọ eme nọ ọ ta e jọ ababọ otoriẹ, Job o te kurẹriẹ uwhremuna. (Job 40:8; 42:6) Jọ o thọ omai obọ vievie he re ma ta nọ Ọghẹnẹ o re ruthọ!

¹⁰ U re vevẹ, ma wo uvi iroro nọ ma rẹ rọ rọwo inọ Jihova o re ru oware nọ o gba ẹsikpobi. Avọ otoriẹ nana nọ ma wo kpahe idhere Jihova no na, joma ta ẹme kpahe ikuigbe Ebaibol ivẹ jọ nọ e rẹ sai gbe ahwo jọ unu. Orọ ọsosuọ na o ta kpahe oware nọ odibo Jihova jọ o ru, orọ avivẹ u kie kpahe ẹdhoguo Ọghẹnẹ.

Fikieme Lọt Ọ jẹ Tanọ Ọ rẹ Rọ Emetẹ Riẹ kẹ Otu-Ugbarugba?

11, 12. (a) Gbiku oware nọ o via okenọ Ọghẹnẹ o vi ijẹle ivẹ jọ nọ i zihe oma ruọ ahwo-akpọ kpohọ Sọdọm. (b) Enọ vẹ ikuigbe nana e lẹliẹ ahwo jọ nọ no?

¹¹ Evaọ obe Emuhọ uzou avọ 19, ma rẹ ruẹ ikuigbe oware nọ o via okenọ Ọghẹnẹ o vi injẹle ivẹ nọ i zihe oma ruọ ahwo-akpọ kpohọ Sọdọm. Lọt o sikẹ nọ erara na a jọ uwou riẹ. Dede na, evaọ aso ọyena ezae ugbarugba jọ a te no okpẹwho na ze wariẹ uwou na họ je bo nọ a rehọ erara na ze re a lele ai wezẹ. Lọt daoma tẹzẹ ezae-ugbarugba na rekọ a se. Re ọ ruẹse thọ erara riẹ, Lọt ọ tẹ ta nọ: “Imoni, mẹ lẹ owhai, wha ru umuomu utioye he. Ri, me wo emetẹ ivẹ nọ e riẹ ọzae he; jọ omẹ rehọ ae kẹ owhai, re wha ru ae epanọ uje owhai; thakpinọ wha ru ezae enana oware ovo ho, keme uwou mẹ a kpahe na.” Ezae-ugbarugba na a gaviezọ họ, omojọ u kiọkọ re a bẹre ẹthẹ na. Ukuhọ riẹ, ijẹle nọ e kpahe Lọt na a te ru ezae-ugbarugba na tuaro.—Emuhọ 19:1-11.

¹² Ahwo jọ a nọ enọ kpahe ikuigbe nana no. U bi gbe ai unu nọ: ‘Emejabọ nọ Lọt ọ jẹ ta nọ ọ rẹ rọ emetẹ riẹ kẹ ezae-ugbarugba urusio uyoma nana fikinọ ọ gwọlọ thọ erara nọ e kpahe riẹ? Kọ oware nọ o ru na o gbẹ thọ, tube dhesẹ ozodhẹ?’ Nọ a gbiku nana kpahe iẹe no na, fikieme Ọghẹnẹ rọ kẹ Pita ẹgba-ẹzi ro se Lọt nọ “ohwo okiẹrẹe”? Kọ Ọghẹnẹ jẹ oware nọ Lọt o ru na rehọ? (2 Pita 2:7, 8) Joma kiẹ ẹme nana riwi re ma seba eroro thọ.

13, 14. (a) Eme u fo nọ ma re muẹrohọ evaọ ikuigbe Ebaibol kpahe oware nọ Lọt o ru na? (b) Eme o dhesẹ nọ Lọt ọ jọ ọdhozọ họ?

¹³ Orọ ọsosuọ, ma rẹ kareghẹhọ inọ Ebaibol na i gbiku oware nọ o via na ọvo, orọnikọ e ta nọ oware nọ Lọt o ru na u woma hayo u yoma ha. Ebaibol na e vuẹ omai oware nọ Lọt o je roro ho yọ e vuẹ omai oware nọ o wọ riẹ ru ere gbe he. Nọ ọ tẹ kparoma ze evaọ “ẹkparomatha enọ ikiete” na, ẹsejọhọ ọ te ta eme buobu kpahe oware nọ o via na kẹ omai.—Iruẹru 24:15.

¹⁴ Lọt ọ jọ ọdhozọ họ. Uyero na u ku bae. Ẹme nọ ọ ta inọ erara na “uwou mẹ a kpahe na,” u dhesẹ nọ o jọ oware osegboja kẹe re ọ thọ jẹ sẹro erara na. Rekọ onana o jọ oware olọlọhọ họ. Ogbiku ahwo Ju na, Josephus ọ niyẹrẹ nọ ahwo Sọdọm a je “kienyẹ ahwo, yọ a riẹ Ọghẹnẹ hẹ . . . A mukpahe erara, a te je wo uruemu ezae-duezae.” Ghele na, Lọt dhozọ ahwo ugbarugba na ha. Ukpoye, ọ ruọ otafe jẹ daoma tẹzẹ ezae egeva yena. O tube “wuhu ẹthẹ” nọ ọye omariẹ ọ ruọ otafe bru ahwo na.—Emuhọ 19:6.

15. Fikieme a sae rọ ta inọ o wọhọ nọ ẹrọwọ ọ wọ Lọt ru epanọ o ru na?

¹⁵ Ahwo jọ a rẹ sae nọ inọ ‘Dede na, eme ọ lẹliẹ Lọt rehọ emetẹ riẹ kẹ otu-ugbarugba na?’ Ukpenọ whọ rẹ nwani roro nọ oware nọ o ru na o thọ, kọ eme who gbe roro kpahe eware jọ nọ o rẹ wọhọ nọ e lẹle riẹ ru epanọ o ru na ha? Orọ ọsosuọ kpobi, o sae jọnọ ẹrọwọ ọ wọ riẹ ru ere. Ẹvẹ ma rọ ta ere? Ababọ avro, Lọt riẹ kpahe epanọ Jihova rọ thọ Sera, aye oniọvo-ọsẹ riẹ Abraham. Kareghẹhọ nọ fikinọ Sera jọ ẹghele aye nọ o wo erru gaga, Abraham ọ tẹ yare nọ jọ ọ ta inọ aimava inievo, ogbẹrọ ere he a ve ti kpe ọyomariẹ Abraham no re a ruẹse rehọ iẹe.a Fikiere, a tẹ rehọ Sera kpohọ uviuwou Fẹro. Rekọ Jihova ọ tẹ jowọ rọ whaha Fẹro re ọ se Sera ba elele wezẹ. (Emuhọ 12:11-20) O sae jọ nọ Lọt o wo ẹrọwọ inọ a te rehọ oghẹrẹ ovona thọ emetẹ riẹ re. Jihova ginẹ rehọ ẹkwoma ijẹle riẹ dhomahọ uyero na, obọ u gbe te emetẹ na ha.

16, 17. (a) Ẹvẹ o sae rọ jọnọ Lọt ọ jẹ gwọlọ fi ọwhewhe họ ahwo Sọdọm na oma hayo fi ozighi họ udevie rai? (b) Ghelọ oware nọ o lẹliẹ Lọt ru oware nọ o ru na kẹhẹ, eme ma rẹ sai wo imuẹro riẹ?

¹⁶ Roro kpahe oware ofa nọ o rẹ sae lẹliẹe ru epanọ o ru na. O sae jẹ jọ nọ Lọt ọ jẹ gwọlọ fi ọwhewhe họ ezae na oma hayo fi ozighi họ udevie rai. Ẹsejọhọ o je roro nọ ogbotu na a ti wo isiuru kpahe emetẹ riẹ hẹ fiki urusio uruemu ezae-duezae orọ ahwo Sọdọm na. (Jud 7) U te no ere no, ezae okpẹwho na jọ a sa emetẹ enana hotọ, fikiere imoni, egbẹnyusu, hayo ibe-iruiruo ezae nọ e be te jọ egọ riẹ na a sae jọ udevie ogbotu na. (Emuhọ 19:14) O sae jọ irẹro Lọt inọ fiki oghẹrẹ usu utioye na, ezae jọ evaọ udevie otu-ugbarugba na a te thọ emetẹ riẹ. Nọ ozighi ọ tẹ rọ udevie otu-ugbarugba, a re gbe muozọ ga tere he.b

¹⁷ Dede nọ ma riẹ oware nọ Lọt o roro gbe ẹjiroro nọ o ro ru oware oyena fiotọ họ, ma rẹ sai wo imuẹro inọ: Nọ Jihova o re ru oware nọ o gba ẹsikpobi na, o wo uvi ẹjiroro nọ o ro rri Lọt wọhọ “ohwo okiẹrẹe.” Nọ ma te roro kpahe oware nọ otu-ugbarugba ahwo Sọdọm a je ru na, kọ ma sae vro inọ Jihova riẹ ru hu nọ o ro kpe ahwo okpẹwho omuomu yena?—Emuhọ 19:23-25.

Fikieme Jihova Ọ rọ Tehe Uza Kpe?

18. (a) Eme ọ via okenọ Devidi jẹ gwọlọ rehọ etehe ọvọ na ziọ Jerusalẹm? (b) Onọ vẹ ahwo jọ a rẹ sae nọ kpahe ikuigbe nana?

¹⁸ Ikuigbe efa nọ e rẹ sai gbe ahwo jọ unu họ orọ okenọ Devidi ọ jẹ rọ gwọlọ rehọ etehe ọvọ na ziọ obọ Jerusalẹm. Etehe na ọ jọ ehru akẹkẹ nọ Uza avọ oniọvo riẹ a je su. Ebaibol na e ta nọ: “Nọ a zi te okpareka Nakon, Uza ọ tẹ riẹ obọ kru etehe Ọvọ Ọghẹnẹ na, fiki epanọ iruẹ na i je zoruẹ. Ọghẹnẹ o te mu ofu kpahe Uza; Ọghẹnẹ ọ tẹ tehe iẹe kpe eva etẹe, fiki epanọ ọ rehọ obọ te etehe Ọvọ Ọghẹnẹ na; o te whu fihọ akotọ etehe Ọvọ Ọghẹnẹ na.” Emerae jọ nọ i lele i rie, a wha Etehe na te oria nọ a ruẹrẹfihọ kẹe okenọ a wọe eva edhere nọ Ọghẹnẹ ọ gwọlọ, nọ emọ Kohat nọ e rrọ ahwo Livai a wọe fihọ ikoko. (2 Samuẹle 6:6, 7; Ikelakele 4:15; 7:9; 1 Iruẹru-Ivie 15:1-14) Ahwo jọ rẹ sae nọ inọ: ‘Eme Jihova rọ nwane dheva tere? Uza jẹ gwọlọ kpọ etehe na vi ọvo.’ Re ma seba ẹta thọ, u fo re ma muẹrohọ eware efa nọ i ti fi obọ họ kẹ omai wo eriwo owowa kpahe oware nọ o via na.

19. Eme jabọ Jihova gbẹ sai ro ru oware okienyẹ hẹ?

¹⁹ U fo re ma kareghẹhọ inọ Ọghẹnẹ o re kienyẹ ohwo ho. (Job 34:10) Re o ru ere yọ u dhesẹ nọ o wo uyoyou ho, yọ rono eware nọ ma wuhrẹ no Ebaibol na soso ze, ma riẹ nọ “Ọghẹnẹ họ uyoyou.” (1 Jọn 4:8) U te no ere no, Ikereakere na e vuẹ omai nọ “ẹrẹreokie gbe oziẹ-uzẹme obro erọ otọhotọ uvie [Ọghẹnẹ].” (Olezi 89:14) Nọ o rrọ ere na, kọ ẹvẹ Jihova sai ro ru oware okienyẹ? Re o ru ere kiyọ o bi dhesẹ orivo kẹ otọhotọ esuo-okpehru riẹ.

20. Fikieme a jẹ sae ta nọ Uza ọ riẹ izi nọ i kpomahọ etehe ọvọ na?

²⁰ Kareghẹhọ nọ Uza ọ riẹ Uzi na. Etehe ọvọ na o dikihẹ kẹ ẹjọkugbe Jihova. Uzi na o ta vevẹ inọ ohwo nọ a kẹ udu hu o re dhobọ tei hi, jẹ vẹvẹ unu gbiae inọ a re kpe ohwo nọ ọ thọ uzi yena. (Ikelakele 4:18-20; 7:89) Fikiere, re a wọ etehe ọvọ na no oria ruọ oria o jọ oware evere he. Uza ọ jọ ohwo Livai (dedenọ ọ jọ ozerẹ hẹ), fikiere ọ riẹ Uzi na ziezi. U te no ere no, ikpe jọ nọ i kpemu a wọ etehe ọvọ na fihọ uwou ọsẹ riẹ nọ a jẹ jọ sẹro riẹ. (1 Samuẹle 6:20–7:1) Etẹe Etehe na ọ jọ oware wọhọ ikpe 70 taure Devidi tẹ te wọe. Fikiere, o wọhọ nọ Uza ọ riẹ izi nọ i kpomahọ etehe ọvọ na no emaha ze.

21. Evaọ oware nọ o via kẹ Uza na, fikieme u je wuzou re ma kareghẹhọ inọ Jihova rẹ riẹ oware nọ o rrọ eva ohwo?

²¹ Wọhọ epanọ ma ta no vẹre na, Jihova rẹ sae riẹ eva ohwo. Nọ Ẹme riẹ ọ ta nọ fikinọ Uza “ọ rehọ obọ te etehe Ọvọ” nọ uzi o ta inọ ohwo nọ a kẹ udu hu ọ rẹ kaobọ te he na, o sae jọnọ Jihova ọ ruẹ uruemu oriobọ hayo orivo jọ eva oma riẹ nọ a tẹme te evaọ ikuigbe na ha. Kọ o sae jọnọ Uza ọ jọ ohwo nọ o re fu uke, nọ ọ riẹ ọnyaba riẹ hẹ? (Itẹ 11:2) Kọ o sae jọnọ oheri ọ jẹ gwọlọ ro iẹe uzou fikinọ ọ be jọ iraro ahwo kpobi su etehe ọvọ na nọ a sino họ uviuwou rai anwọ oke jọ ze na? (Itẹ 8:13) Kọ Uza ọ kare ẹrọwọ te epanọ o je ro roro inọ Jihova ọ kpẹlẹ obọ te epanọ ọ gbẹ te sae rọ thọ etehe ọvọ nọ o dikihẹ kẹ ẹjọkugbe Riẹ hẹ? Oghẹrẹ kpobi nọ o rrọ, o rẹ sai mu omai ẹro nọ oware nọ Jihova o ru na o gba. O wọhọ nọ ọ jọ udu Uza ruẹ oware jọ nọ o lẹle riẹ brukpei kpata kpata.—Itẹ 21:2.

Obọdẹ Otọhotọ kẹ Udufihọ

22. Nọ Ẹme riẹ o re gbiku eware jọ fuafo ho na, ẹvẹ oyena u ro dhesẹ areghẹ Jihova via?

²² Ma rẹ ruẹ areghẹ Jihova nọ o wo ibe he keme eva ẹsejọ Ẹme riẹ o re gbiku eware kpobi fuafo ho. Jihova be rehọ ere kẹ omai uvẹ nọ ma re ro dhesẹ nọ ma fi eva họ iẹe. Rono eware nọ ma ta ẹme kpahe na ze, kọ u gbe mu omai ẹro nọ ma wo obọdẹ ẹjiroro nọ ma rẹ rọ rọwo inọ oziẹobro Jihova ọ gba? Ee, nọ ma tẹ roma totọ rehọ eva efuafo wuhrẹ Ẹme Ọghẹnẹ, ma rẹ riẹ eware buobu kpahe Jihova te epanọ u re ro mu omai ẹro nọ ẹsikpobi o re ru oware nọ o gbakiete. Fikiere, nọ ikuigbe Ebaibol jọ e tẹ lẹliẹ omai wo enọ jọ nọ ma rẹ sae ruẹ uyo rai ziezi ẹsiẹsiẹ hẹ, joma fi eva kpobi họ inọ Jihova o ru oware nọ o gba.

23. Udufihọ vẹ ma rẹ sai wo kpahe eware nọ Jihova o ti ru evaọ obaro?

²³ Ma rẹ sai wo udufihọ ovona kpahe eware nọ Jihova o ti ru evaọ obaro. Fikiere, o rẹ sai mu omai ẹro inọ eva oke ẹdhoguo riẹ evaọ uye ulogbo nọ o be tha na, ọ te “raha ikiẹrẹe na kugbe iru-umuomu” hu. (Emuhọ 18:23) Uyoyou nọ o wo kẹ ẹrẹreokie gbe uvi-ẹdhoguo o te kẹe uvẹ ru ere he. Ma rẹ sai fi udu kpobi họ re inọ evaọ akpọ ọkpokpọ nọ ọ be tha na, o ti ru ẹgwọlọ mai kpobi gba evaọ edhere nọ ọ mai woma.—Olezi 145:16.

[Oruvẹ-obotọ]

Kọ Whọ Kareghẹhọ?

• Ẹjiroro vẹ ma rẹ rọ rọwo inọ oziẹobro Jihova ọ gba?

• Eme ọ rẹ sai fi obọ họ kẹ omai nọ ma gbẹ rọ ta thọ họ kpahe oware nọ o lẹliẹ Lọt ta nọ ọ rẹ rọ emetẹ riẹ kẹ ezae-ugbarugba egeva na?

• Eme ọ rẹ sai fi obọ họ kẹ omai riẹ otọ oware nọ o soriẹ nọ Jihova rọ tehe Uza kpe?

• Udufihọ vẹ ma rẹ sai wo kpahe eware nọ Jihova o ti ru evaọ obaro?