Jihova Họ Othuru Mai

“ỌNOWO họ oriri [hayo, othuru] mẹ, fikiere oja ovo o sae ruọ omẹ hẹ.”—OLEZI 23:1.

1-3. Fikieme u gbe ro gbunu hu inọ Devidi ọ rehọ Jihova dhesẹ othuru-igodẹ?

A TẸ ta kẹ owhẹ nnọ who dhesẹ edhere nọ Jihova ọ be rọ sẹro ahwo riẹ, oghẹrẹ vẹ who re dhesẹ iẹe? Eme who re ro dhesẹ uvi edhere nọ ọ be rọ rẹrote idibo riẹ nọ i wo ẹrọwọ? Vrẹ ikpe 3,000 nọ i kpemu, Devidi Ovie na ọ jọ olezi jọ rehọ oriruo jọ nọ o kie kpahe iruo riẹ evaọ okenọ ọ jọ ọmoha nabi ro dhesẹ ẹruọsa Jihova.

² Okenọ Devidi ọ jọ ọmoha, othuru-igodẹ ọ jọ, fikiere ọ riẹ epanọ a rẹ rẹrote igodẹ. Ọ riẹ ziezi inọ a te vu igodẹ wa, i re vru no obọnana, iji i ve mu ai rehọ hayo erao ijihẹ i ve kpe ai. (1 Samuẹle 17:34-36) Ababọ othuru-igodẹ ẹruọsa, a rẹ sae ruẹ oria nọ a rẹ jọ re emamọ ẹbe he. Nọ Devidi ọ kpako no, avro ọ riẹ hẹ inọ ọ jẹ hae kareghẹhọ euwa buobu nọ ọ raha je su, thọ, jẹ ko igodẹ.

³ U gbunu hu inọ Devidi ọ kareghẹhọ iruo othuru-igodẹ evaọ okenọ a kẹe ẹgba re o dhesẹ oghẹrẹ nọ Jihova ọ be rọ sẹro ahwo riẹ. Olezi avọ 23, onọ Devidi o kere, o rehọ eme nana muhọ: “ỌNOWO họ oriri [hayo, othuru] mẹ, fikiere oja ovo o sae ruọ omẹ hẹ.” Joma rri oware nọ eme nana i ro fo. Kẹsena, avọ obufihọ Olezi avọ 23, ma vẹ te ruẹ idhere nọ Jihova ọ be rọ sẹro enọ e be gọe wọhọ epanọ othuru-igodẹ ọ rẹ sẹro igodẹ riẹ.—1 Pita 2:25.

A re Riẹ Dhesẹ Ziezi

4, 5. Ẹvẹ Ebaibol na o dhesẹ oghẹrẹ nọ igodẹ e rrọ?

⁴ Ebaibol e rehọ edẹ-ovao buobu se Jihova, rekọ odẹ na “Othuru-Igodẹ” yọ ọvo jọ evaọ usu enọ e mai siuru kpobi. (Olezi 80:1) Re ma gine wo otoriẹ oware nọ u ro fo re a se Jihova Othuru-Igodẹ, eware ivẹ jọ nọ ma rẹ riẹ u re fi obọ họ kẹ omai: orọ ọsosuọ, oghẹrẹ nọ igodẹ e rrọ, orọ avivẹ, ewha-iruo emamọ othuru-igodẹ gbe oghẹrẹ uruemu nọ o re wo.

⁵ Ebaibol e jọ eria buobu ta ẹme fodẹ uruemu igodẹ, dhesẹ ai nnọ, epanọ othuru na o tete i rai te, ere igodẹ na i re bigbae te (2 Samuẹle 12:3), i re thuethu hu (Aizaya 53:7), yọ e goma ha. (Maeka 5:8) Okere-ebe jọ nọ o thuru igodẹ evaọ ikpe buobu ọ ta nọ: “Igodẹ e rẹ sae ‘rẹrote omobọ rai’ hi wọhọ epanọ otujọ a re roro. E gwọlọ ẹruorote ọgaga gbe ẹruọsa vi erao efa kpobi.” Re a sae zọ, erao nana nọ e goma ha na a gwọlọ othuru ẹruọsa.—Izikiẹl 34:5.

6. Ẹvẹ obe-ofeme Ebaibol jọ u dhesẹ iruo othuru-igodẹ oke anwae?

⁶ Ẹvẹ ithuru-igodẹ oke anwae a jẹ hai ru iruo rai? Obe-ofeme Ebaibol jọ o ta nọ: “Evaọ irioke, o re su igodẹ na no uwou rai, ọ rẹ karo kẹ ae kpohọ oria nọ a te jọ re ẹbe. Ọ vẹ jọ etẹe rẹrote ai okikpo, ruẹ nnọ ọvuọvo o vru hu, yọ otẹrọnọ ọvo jọ o vo othuru na ẹro ọ jẹ nya siọ enọ i kiọkọ ba, othuru na ọ rẹ roma totọ gwọlọ iẹe bẹsenọ ọ rẹ rue riẹ jẹ rehọ iẹe zihe ze. . . . Eva aso, ọ rẹ rehọ igodẹ na zihe ziọ uwou rai, kele ai nọ e be nya otọ ọkpọ nọ ọ rrọ unuẹthẹ na vrẹ na re u mu ei ẹro nnọ ọvuọvo o vru hu. . . . Ẹsibuobu o re rowu uwou rai okioke fiki erao ijihẹ hayo iji.”a

7. Fikieme o rọ gwọlọ nọ othuru-igodẹ o wo odiri jẹ jọ wolẹ gaga ẹsejọ?

⁷ Okejọ o rẹ jariẹ nọ o rẹ gwọlọ nọ a dhesẹ odiri gaga je tete igodẹ na ziezi, maero kọ erọ eyae nọ i dihọ gbe erọ emaha. (Emuhọ 33:13) Obe jọ nọ a kere kpahe Ebaibol na o ta nọ: “Ẹsibuobu igodẹ i re yẹ evaọ eria nọ i thabọ no uwou, kẹle igbehru. Othuru-igodẹ na o re fi ẹro họ oni na gaga evaọ oke nana nọ oma riẹ o ga ha na, kẹsena ọ vẹ wọ ọmọ na kpo obonọ uthuru na o rrọ. Ọ rẹ wọ ọmọ na evaọ unuedẹ jọ bẹsenọ ọ rẹ sae nya.” (Aizaya 40:10, 11) U re vevẹ, emamọ othuru-igodẹ ọ rẹ g’oma, rekọ ọ rẹ jẹ jọ wolẹ.

8. Eware vẹ Devidi o dhesẹ nọ e lẹle riẹ fi udu họ Jihova?

⁸ “Jihova họ Othuru mẹ”—kọ oyena o gbẹ nabi dhesẹ Ọsẹ obọ odhiwu mai na ziezi? Nọ ma be te kiẹ Olezi avọ 23 riwi na, ma te ruẹ epanọ Ọghẹnẹ ọ be rọ sẹro mai wọhọ epaọ othuru-igodẹ nọ ọ goma jẹ rrọ wowolẹ. Evaọ owọ ọsosuọ, Devidi ọ ta evaifihọ riẹ via inọ Ọghẹnẹ ọ te rehọ oware kpobi nọ igodẹ Riẹ e gwọlọ kẹ ae re ‘oja ovo o gbẹ ruọ ae he.’ Evaọ awọ nọ i lele i rie, Devidi ọ fodẹ eware esa nọ e kẹ riẹ udufihọ nana: Jihova o bi su, thọ, jẹ ko igodẹ Riẹ. Joma ta ẹme kpahe enana unọjọ utọjọ.

O re Su Omẹ

9. Oghẹrẹ uyero uwoma vẹ Devidi ọ jọ etenẹ dhesẹ na, kọ ẹvẹ igodẹ a rẹ rọ ziọ oria utioye na?

⁹ Orọ ọsosuọ, Jihova o re su ahwo riẹ. Devidi o kere nọ: “Ọ rẹ te rehọ ẹbe ọrọrọ kuọ omẹ, o ve je su omẹ kpohọ akotọ ame omaosasọ. O re ti ku ẹzi mẹ rẹriẹ. Ọ vẹ rọ omẹ ze eva ada ẹrẹreokie fiki odẹ riẹ.” (Olezi 23:2, 3) Uthuru nọ u kiẹzẹ dhedhẹ evaọ oria nọ ẹbe ọrọrọ ọ vọ—Devidi ọ be rọ eme nana dhesẹ oria nọ a rẹ jọ re eva vọ, nọ o rẹ sasa oma, jẹ kẹ omofọwẹ. Ubiẹme Hibru nọ a jọ etenẹ fa “ẹbe ọrọrọ” na o sai dhesẹ “emamọ oria.” Ẹsejọhọ, a te vu ai wa, igodẹ na ọvo a rẹ sae ruẹ emamọ oria nọ a re kiẹzẹ dhedhẹ hẹ. Othuru-igodẹ na o re su ai kpohọ “emamọ oria” otiọye na.

10. Ẹvẹ Ọghẹnẹ o ro dhesẹ inọ o fi eva họ omai?

¹⁰ Ẹvẹ Jihova o bi ro su omai nẹnẹ? Edhere jọ nọ o bi ro ru ere họ ẹkwoma oriruo. Ebaibol na e ta udu họ omai awọ inọ ma ‘raro kele Ọghẹnẹ.’ (Ahwo Ẹfẹsọs 5:1) Eme nọ e wariẹ oria Ebaibol yena họ e fodẹ ohrọ, erọvrẹ, gbe uyoyou. (Ahwo Ẹfẹsọs 4:32; 5:2) Evaọ uzẹme, Jihova o fi oriruo nọ ọ mai fo hotọ kẹ omai evaọ edhesẹ ekwakwa isiuru itieye na. Kọ oware nọ u kpehru vi omai Ọghẹnẹ ọ be gwọlọ mi omai na inọ ma raro kele iei? Ijo. Eme yena i bi dhesẹ eva nọ o fihọ omai. Evaọ edhere vẹ? A ma omai evaọ uwoho Ọghẹnẹ, koyehọ ma wo ẹgba nọ ma re ro ru ewoma gbe iroro Ọghẹnẹ-ọgọ. (Emuhọ 1:26) Fikiere, Jihova ọ riẹ nọ ghelọ sebaẹgba mai, ma jọ oma mai wo ẹgba nọ ma re ro dhesẹ ekwakwa nọ o fi oriruo riẹ họ otọ kẹ omai na. Dai roro iei—u mu Ọghẹnẹ oyoyou mai ẹro inọ ma rẹ sae jọ wọhọ iẹe. Ma te lele oriruo riẹ, o ti su omai kpohọ oria “omaosasọ,” wọhọ odẹme. Evaọ udevie akpọ ozighi nana, ma ti “wo ufuoma,” wo udhedhẹ nọ ma rọ riẹ nnọ ma wo ọjẹrehọ Ọghẹnẹ.—Olezi 4:8; 29:11.

11. Nọ o bi su ahwo riẹ na, eme Jihova o re roro kpahe, kọ ẹvẹ onana u ro dhesẹ oma via evaọ oware nọ ọ gwọlọ mi omai?

¹¹ Jihova ọ be rehọ ẹwolẹ gbe odiri su omai. Othuru-igodẹ o re roro kpahe umutho ẹgba igodẹ riẹ, fikiere o re su ai “ẹrera wọhọ epanọ ẹnyonya erao na e rọ.” (Emuhọ 33:14) Epọvo na re, Jihova o bi su igodẹ riẹ “wọhọ epanọ ẹnyonya” igodẹ na ọ rrọ. O bi roro kpahe umutho ẹgba gbe iyero mai. Koyehọ, o re nwene kpohọ utho ẹgba mai, ọ rẹ jọ obọ mai gwọlọ oware nọ u vi ẹgba mai hi. Oware nọ ọ gwọlọ họ ma rehọ eva kpobi gọe. (Ahwo Kọlọsi 3:23) Kọ ẹvẹ otẹrọnọ whọ kpako no yọ whọ gbẹ be sai ru te epanọ who je ru hu? Hayo kọ ẹvẹ otẹrọnọ who wo ẹyao ọgaga jọ nọ o bi bru owhẹ abọ dhe? Ẹsiẹ whọ jẹ ruẹ areghẹ nọ ọ rrọ oware nọ Ọghẹnẹ ọ gwọlọ mi omai inọ ma rehọ eva kpobi gọe na. Imava evuọvo e rrọ oghẹrẹ ovona dẹe he. Re whọ rehọ eva kpobi gọ u dhesẹ nọ who re fi ẹgba ra kpobi họ iruo Ọghẹnẹ wọhọ epanọ uyero ra o rrọ. Ghelọ ebẹbẹ nọ i re bru omai abọ dhe, o rẹ vọ Jihova eva nọ ma tẹ rehọ eva kpobi gọe.—Mak 12:29, 30.

12. Oriruo vẹ evaọ Uzi Mosis na o dhesẹ nọ Jihova o re su “wọhọ epanọ ẹnyonya” igodẹ riẹ ọ rrọ?

¹² Re ma dhesẹ oghẹrẹ nọ Jihova o bi ro su “wọhọ epanọ ẹnyonya” igodẹ riẹ ọ rrọ, roro kpahe oghẹrẹ idhe iruthọ jọ nọ a fodẹ evaọ Uzi Mosis na. Jihova ọ gwọlọ emamọ idhe nọ i no udu nọ o vọ avọ uyere ze. Eva oke ovona, epanọ obọ ohwo o lọhọ te, ere o re ro dheidhe. Uzi na o ta nọ: “Ọgbẹ sae rehọ ogodẹ dhidhe [he], . . . ọ vẹ rehọ irueruẹ eni ivẹ hayo ilekuku esese ivẹ.” Kọ otẹrọnọ ọ sae tubẹ rehọ ilekuku ivẹ dede ze he? Ọ vẹ rehọ “emamọ eka nọ a wuhu ze.” (Iruo-Izerẹ 5:7, 11) Onana u dhesẹ nọ Ọghẹnẹ ọ gwọlọ oware nọ u kpehru vi ẹgba ọnọ o bi dheidhe na ha. Nọ o rọnọ Ọghẹnẹ o re nwene he na, ma re wo omosasọ evaọ ẹriẹ inọ ọ rẹ gwọlọ oware nọ u kpehru vi omai mi omai hi; ukpoye, o rẹ were iẹe re o mi oware nọ ẹgba mai o te. (Malakae 3:6) O rrọ oware omawere gaga re Othuru-Igodẹ ọdawẹ otiọye na o su omai!

“Mẹ rẹ Dhẹozọ Oware Uyoma Ovo Ho; Keme Who Lele Omẹ Rọ”

13. Eva Olezi 23:4, ono Devidi ọ ta ẹme kẹ dẹẹ, kọ fikieme onana u gbe ro gb’omai unu hu?

¹³ Devidi ọ fodẹ oware avivẹ nọ o ro wo udufihọ: Jihova ọ rẹ thọ igodẹ riẹ. Ma se nọ: “E, mẹ tẹ make be nya eva ukpotọ uwoho uwhu, mẹ rẹ dhẹozọ oware uyoma ovo ho; keme who lele omẹ rọ; ọkpọ gbe umure ra, e rẹ sasa omẹ oma.” (Olezi 23:4) Devidi ọ be jọ etenẹ ta ẹme kẹ Jihova dẹẹ. Onana u gbunu hu keme Devidi ọ be ta kpahe epanọ Ọghẹnẹ o ro fi obọ họ kẹe thihakọ okpẹtu. Devidi ọ nya eria imuozọ buobu vrẹ no—unuẹse buobu uzuazọ riẹ o jọ ọza. Rekọ ọ kuvẹ hẹ re ozọ u mu ei lọ, keme ọ riẹ nnọ Ọghẹnẹ—avọ “ọkpọ” gbe “umure” Riẹ nọ ọ tọlọ họ obọ no—e rrọ emu riẹ. Fikinọ Devidi ọ riẹ nnọ o wo ọthọwẹ nana, o kẹ riẹ omosasọ, yọ ababọ avro, u si rie kẹle Jihova.b

14. Didi imuẹro Ebaibol na e kẹ omai kpahe uketha Jihova, kọ eme onana o nwani dhesẹ hẹ?

¹⁴ Ẹvẹ Jihova ọ be rọ thọ igodẹ riẹ nẹnẹ? Ebaibol na e kẹ omai imuẹro inọ uvumọ otu ọwọsuọ—idhivẹri hayo ahwo-akpọ—a rẹ sai si igodẹ riẹ no otọakpọ na ha. Jihova ọ rẹ kẹ uvẹ oyena ha. (Aizaya 54:17; 2 Pita 2:9) Dede na, orọnikọ onana u dhesẹ nọ Othuru mai o re bru ebe ruru omai no okpẹtu kpobi hi. Ma rẹ nyaku edawọ nọ ahwo-akpọ kpobi a be nyaku, yọ ma be ruẹ ọwọsuọ nọ o bi te Ileleikristi uzẹme kpobi. (2 Timoti 3:12; Jemis 1:2) Wọhọ odẹme, okejọ o rẹ sae jariẹ nọ ma rẹ jọ “nya eva ukpotọ uwoho uwhu.” Wọhọ oriruo, ma rẹ sae nya kẹle uwhu fiki ukpokpoma hayo ẹyao. Hayo o sae jọ nnọ ohwo jọ nọ ọ ghare omai obọ gaga ọ nya kẹle uwhu hayo tube whu dede. Evaọ oke utioye nọ o rẹ wọhọ nọ ikpẹ mai i fu no na, Othuru mai ọ rẹ jọ gbe omai, ọ vẹ jẹ thọ omai. Evaọ oghẹrẹ vẹ?

15, 16. (a) Idhere vẹ Jihova o bi ro fi obọ họ kẹ omai thihakọ ezadhe nọ ma be rẹriẹ ovao ku? (b) Kẹ oriruo jọ nọ o dhesẹ epanọ Jihova o re ro fi obọ họ kẹ omai evaọ oke ẹdawọ.

¹⁵ Jihova ọ yeyaa ọthọwẹ igbunu hu.c Rekọ ma rẹ sai wo imuẹro onana: Jihova o ti fi obọ họ kẹ omai fi ọzadhe nọ ma rẹ sae rẹriẹ ovao ku kpobi kparobọ. Ọ rẹ sae kẹ omai areghẹ nọ ma re ro thihakọ “egheghẹrẹ edawọ.” (Jemis 1:2-5) Orọnikọ othuru-igodẹ ọ rẹ rehọ ọkpọ riẹ le erao ijihẹ thabọ ọvo ho rekọ ọ rẹ jẹ rehọ iẹe kpọ igodẹ riẹ fihọ edhere. Jihova ọ rẹ sae rehọ ẹkwoma ibe Ileleikristi mai jọ kpọ omai re ma fi ohrẹ Ebaibol jọ họ iruo nọ o rẹ sai nwene uyero mai. Ofariẹ, Jihova ọ rẹ sae kẹ omai ẹgba nọ ma re ro thihakọ. (Ahwo Filipai 4:13) Ẹkwoma ẹzi ọfuafo riẹ, ọ rẹ sae kẹ omai “ogaga ulogbo nọ othesiwa.” (2 Ahwo Kọrint 4:7) Ẹzi Ọghẹnẹ ọ rẹ sae kẹ omai ẹgba nọ ma re ro thihakọ ẹdawọ kpobi nọ Setan o re ro bru omai ze. (1 Ahwo Kọrint 10:13) Kọ ogbẹrọ oware omosasọ re ma riẹ nnọ Jihova ọ ruẹrẹ oma kpahe ẹsikpobi re o fi obọ họ kẹ omai?

¹⁶ Ẹhẹ, ma tẹ make ruẹ oma mai evaọ ukpotọ uwhu, ma riẹ nnọ mai ọvo ma rrọ usu hu. Othuru mai ọ rrọ gbe omai, o bi fi obọ họ kẹ omai evaọ idhere nọ ma rẹ kaki rri mu ẹsejọ họ. Dae rehọ oware nọ o via kẹ ọkpako ukoko jọ ọnọ o wo ẹyao ọta evaọ ẹvori. “Uzẹme riẹ họ evaọ oke ọsosuọ me je roro sọ Jihova ọ be dheva kẹ omẹ hayo sọ o tube you omẹ hẹ. Rekọ mẹ gba riẹ mu inọ me re si oma no Jihova ha. Ukpoye, mẹ ta idhọvẹ mẹ kẹe. Yọ Jihova o fi obọ họ kẹ omẹ, rehọ inievo abọ-ẹzi mẹ sasa omẹ oma. Ibuobu i fi obọ họ kẹ omẹ ẹkwoma ikuigbe epanọ ae omarai a sai ro thihakọ ẹyao ọgaga. Eme ezi nọ a ta avọ eriwo owowa rai e kareghẹhọ omẹ inọ orọnikọ omẹ u re no ho. Obufihọ nọ a kẹ omẹ, gbe eware ẹwo buobu nọ a ru kẹ omẹ, e kẹ omẹ imuẹro inọ orọnikọ Jihova ọ be dheva kẹ omẹ jabọ uye nana u je te omẹ hẹ. Me gbe bi lele ẹyao mẹ muabọ, yọ mẹ riẹ epanọ ẹyao na o ti ro kuhọ họ. Rekọ u mu omẹ ẹro inọ Jihova ọ rrọ gb’omẹ gbe nnọ o ti gbe fi obọ họ kẹ omẹ evaọ odawọ nana.”

‘Whọ Ruẹrẹ Emẹjẹ Emuore kẹ Omẹ’

17. Ẹvẹ Devidi o dhesẹ Jihova eva Olezi 23:5, kọ fikieme onana u ro kiehọ ọtadhesẹ othuru-igodẹ?

¹⁷ Devidi ọ tẹ fodẹ oware avesa nọ o ro fi udu họ Othuru riẹ: Jihova ọ rẹ ko igodẹ riẹ, yọ ọ rẹ ko ai eva vọ ziezi. Devidi o kere nọ: “Whọ rẹ te jọ eva aro enọ i bi kpokpo omẹ ruẹrẹ emẹjẹ emuore kẹ omẹ; whọ rọ ewhri wholo uzou mẹ, egho mẹ ọ te vọ hwẹ.” (Olezi 23:5) Evaọ owọ Ebaibol nana, Devidi o dhesẹ Othuru riẹ wọhọ ọnọ ọ rẹ rẹrote ahwo riẹ ziezi, ọnọ ọ rẹ rehọ emuore gbe udi kẹ ahwo riẹ. Etadhesẹ ivẹ na—Othuru ẹruọsa gbe ọsẹro nọ ọ rẹ rẹrote ahwo riẹ—i kiehọ ohwohwo ziezi. Whaọ, emamọ othuru-igodẹ ọ rẹ riẹ oria nọ ọ rẹ jọ ruẹ emamọ ẹbe gbe ame buobu, re oware ovo ‘o gbẹ kare’ uthuru riẹ hẹ.—Olezi 23:1, 2.

18. Eme o dhesẹ nọ Jihova ọ rẹ ginẹ rẹrote ahwo riẹ?

¹⁸ Kọ Othuru mai na ọ rẹ ginẹ rẹrote ahwo riẹ? Yọ ẹme nọ a re du ta ha! Dai roro kpahe oghoghẹrẹ obọdẹ emuore abọ-ẹzi nọ ma be reawere riẹ nẹnẹ. Ẹkwoma ọrigbo nọ o wo ẹrọwọ avọ areghẹ na, Jihova ọ kẹ omai ebe nọ i re fi obọ họ kẹ omai no gbe obọdẹ iwuhrẹ gbe ikokohọ—enana kpobi ma be jọ re eva vọ avọ abọ-ẹzi. (Matiu 24:45-47) Emuore abọ-ẹzi ọ kare omai vievie he. ‘Ọrigbo nọ o wo ẹrọwọ avọ areghẹ na’ ọ kẹ omai Ebaibol ima buobu gbe ebe sa-sa no, yọ whọ rẹ sae ruẹ ebe itieye na evaọ evẹrẹ 413. Jihova ọ rehọ emuore abọ-ẹzi nana kẹ buobu no—no “ame-ivie,” ugogo iwuhrẹ Ebaibol, te “emu ọgaga,” iwuhrẹ ididi erọ Ebaibol na. (Ahwo Hibru 5:11-14) Fikiere, nọ ma tẹ rẹriẹ ovao ku ebẹbẹ hayo iroro-ejẹ, ma rẹ sai duku oware nọ ma gwọlọ dẹẹ. Diẹse ma hae jọ ababọ emuore abọ-ẹzi otiọye na? Othuru mai họ ohwo nọ ọ rẹ mai ru ọghọ kpobi!—Aizaya 25:6; 65:13.

“Mẹ rẹ te Ria Uwou ỌNOWO Na”

19, 20. (a) Eva Olezi 23:6, udufihọ vẹ Devidi ọ ta via, kọ ẹvẹ ma sai ro wo udufihọ ovona? (b) Eme ma te ta kpahe evaọ uzoẹme nọ o rrọ aro na?

¹⁹ Nọ o roro kpahe idhere Othuru riẹ gbe Ọnọ ọ be rẹro tei no, Devidi o te kuhọ nọ: “Rekọ uyoyou ọ riẹruo gbe ohrọ ra i re lele omẹ bẹdẹ nọ me re whuẹ; mẹ rẹ te ria uwou ỌNOWO na bẹdẹ.” (Olezi 23:6) Devidi ọ be ta ẹme no udu nọ o vọ avọ uyere gbe ẹrọwọ ze—uyere fiki eware nọ e via vrẹ no nọ ọ kareghẹhọ gbe ẹrọwọ nọ o bi ro rri kpohọ obaro. Devidi, ọnọ ọ jọ othuru-igodẹ vẹre na, o wo imuẹro nnọ thakpinọ o tilẹmu Othuru riẹ nọ ọ rrọ obọ odhiwu, wọhọ ẹsenọ ọ be rria uwou Riẹ, Jihova ọ te rẹro tei ziezi.

²⁰ Ẹvẹ eva e rẹ were omai te fiki eme ezi nọ a kere fihọ Olezi avọ 23 na! Eme nọ e mai woma kpobi Devidi o ro dhesẹ oghẹrẹ nọ Jihova o bi ro su, thọ, jẹ ko igodẹ riẹ. A rawo eme isiuru Devidi na re e kẹ omai udu inọ ma rẹ sai fi eva họ Jihova re wọhọ Othuru mai. Ẹhẹ, thakpinọ ma tilẹmu Jihova, ọ te sẹro mai wọhọ Othuru-Igodẹ oyoyou ‘bẹdẹ bẹdẹ.’ Dede na, wọhọ igodẹ riẹ, ma wo owha-iruo orọ ẹnya lele Othuru ologbo mai, Jihova. Ma te ta ẹme kpahe oware nọ onana o gwọlọ evaọ uzoẹme nọ o rrọ aro na.

[Oruvẹ-obotọ]

Kọ Whọ Kareghẹhọ?

• Ẹvẹ u ro fo inọ Devidi ọ rehọ Jihova dhesẹ othuru-igodẹ?

• Ẹvẹ Jihova o bi ro su omai avọ ọdawẹ?

• Idhere vẹ Jihova o bi ro fi obọ họ kẹ omai thihakọ edawọ?

• Eme o dhesẹ nọ Jihova ọ rẹ ginẹ rẹrote ahwo riẹ?

[Uwoho nọ o rrọ ẹwẹ-obe avọ 22]

Wọhọ othuru-igodẹ evaọ Izrẹl, Jihova o bi su igodẹ Riẹ