Si Kẹle Ọghẹnẹ

‘Ọnowo Họ Othuru Mẹ’

RRI uwoho nọ o rrọ ẹwẹ-obe nana. Kọ whọ sae jọ iroro ra ruẹ epanọ oma o fọ omogodẹ yena te nọ ọ rrọ igbama othuru-igodẹ na? Evaọ Olezi avọ 23, Ebaibol ọ rọ othuru-igodẹ avọ igodẹ riẹ ro dhesẹ oghẹrẹ nọ Jihova ọ be rọ rẹrote ahwo nọ e be gọe. Jihova ọ gwọlọ nọ ma wo ufuoma nọ u re te ahwo nọ e rẹ sae ta avọ evaifihọ wọhọ Devidi ọso-ilezi na inọ: “ỌNOWO họ oriri mẹ.”a—Owọ 1.

Devidi nọ o kere olezi nana ọ jọ othuru-igodẹ okenọ ọ jọ ọmaha. Ọ riẹ oware nọ igodẹ e gwọlọ gbe owha-iruo othuru-igodẹ. Devidi nọ ọ ruẹ imuẹro ẹruọsa Ọghẹnẹ evaọ uzuazọ, o kere eme nọ ahwo a bi se “olezi evaifihọ hayo imuẹro.” Evaọ ẹvẹrẹ ọsosuọ nọ a ro kere Ebaibol na, odẹ-oma Ọghẹnẹ, Jihova, o romavia evaọ emuhọ gbe ekuhọ olezi nana. (Owọ 1, 6) Eme nọ e rrọ olezi nana i dhesẹ idhere esa nọ Jihova ọ be rọ sẹro ahwo riẹ wọhọ epanọ othuru-igodẹ ọ rẹ sẹro igodẹ riẹ na.—Olezi 100:3.

Jihova o bi su igodẹ riẹ. Igodẹ nọ i wo othuru hu i re ghoro vru. Epọvo na re, re ma sae riẹ edhere nọ u fo ẹnya evaọ uzuazọ, ma gwọlọ obufihọ. (Jerimaya 10:23) Devidi ọ ta nọ Jihova o re su idibo riẹ kpohọ oria “ẹbe ọrọrọ” gbe “akotọ ame omaosasọ.” O re su ai “eva ada ẹrẹreokie.” (Owọ avọ 2, 3) Udhesẹ nana orọ othuru-igodẹ na o kẹ omai imuẹro inọ ma rẹ sai fi eva họ Ọghẹnẹ. Ma te bi lele ekpakpọ ẹzi Ọghẹnẹ wọhọ epanọ o rrọ Ebaibol na, ma rẹ sai yeri uzuazọ nọ o rẹ wha evevọwẹ, udhedhẹ, gbe ufuoma ze.

Jihova ọ be thọ igodẹ riẹ. Othuru-igodẹ ọ gbẹ rrọ kugbe igodẹ riẹ hẹ, ozọ u re mu ae, yọ oware uyoma o sae via kẹ ae. Jihova ọ vuẹ idibo riẹ inọ a du dhozọ họ, makọ okenọ a tẹ be “nya eva ukpotọ uwoho uwhu”—etoke nọ o rẹ sae wọhọ nọ u re kẹ ai no. (Owọ avọ 4) Jihova o bi fi ẹro họ ai, ọ thomavẹrẹ ẹsikpobi re o fi obọ họ kẹ ae. Ọ rẹ sae kẹ enọ e be gọe areghẹ gbe ẹgba nọ a rẹ rọ dadamu kẹ edawọ.—Ahwo Filipai 4:13; Jemis 1:2-5.

Jihova ọ be kuọ igodẹ riẹ. Igodẹ e rẹ rọ ẹro so othuru rai re ọ gwọlọ emu kẹ ae. Ma wo ẹgwọlọ abọ-ẹzi nọ ma rẹ sai wo t’obọ ẹkwoma obufihọ Ọghẹnẹ ọvo. (Matiu 5:3) O rrọ oware evawere inọ Jihova yọ Ọkokẹ ologbo, nọ ọ be ruẹrẹ emẹjẹ emuore buobu họ kẹ idibo riẹ. (Owọ avọ 5) Ebaibol na gbe ebe nọ a bi kere no Ebaibol na ze, wọhọ ọnana nọ who bi se na yọ emu abọ-ẹzi nọ o re fi obọ họ kẹ omai wo otoriẹ uzuazọ gbe ẹjiroro Ọghẹnẹ kẹ omai.

Devidi o wo ufuoma, ọ riẹ nọ ọ tẹ dadamu usu riẹ kugbe Othuru-igodẹ obọ odhiwu riẹ, o ti wo uyoyou-ọriẹruo Jihova “bẹdẹ nọ [o] re whuẹ.” (Owọ avọ 6) Kọ whọ gwọlọ ufuoma utioye? O tẹ rrọ ere, wuhrẹ epanọ whọ sai ro si kẹle Jihova. Enẹ whọ sai ro wo ufuoma evaọ igbama Othuru-igodẹ Ologbo na, ọnọ o bi su, thọ, jẹ kuọ ahwo nọ e romakpotọ kẹe.—Aizaya 40:11.

[Oruvẹ-obotọ]