Epanọ A re Ro Vuhu Egagọ Uzẹme
EGAGỌ buobu e rẹ ta nnọ obọ Ọghẹnẹ iwuhrẹ rai i no ze. Fikiere, u re woma re ma yo eme ọ Jọn, ukọ Jesu, ọnọ o kere nọ: “Iyoyou mẹ wha fievahọ ẹzi kpobi hi, rekọ dawo izi na sọ a rọ erọ Ọghẹnẹ; keme eruẹaro erue buobu e vaha ruọ eva akpọ na no.” (1 Jọn 4:1) Ẹvẹ ma sae rọ dawo oware re ma ruẹ sọ obọ Ọghẹnẹ u no ze?
A rẹ jọ eware nọ i no obọ Ọghẹnẹ ze kpobi ruẹ oghẹrẹ Ọghẹnẹ nọ ọ rrọ, maero kọ okwakwa riẹ nọ ọ mae rro kpobi, uyoyou. Wọhọ oriruo, ma rẹ ruẹ uyoyou Ọghẹnẹ evaọ ẹgba nọ ma re ro se-ore, onọ o rẹ lẹliẹ omai yo ore ododo hayo ebrẹdi nọ a there obọ. Ma rẹ jẹ ruẹ uyoyou nọ Ọghẹnẹ o wo kẹ omai evaọ ẹgba nọ ma rẹ rọ ruẹ ọre nọ o bi kiediwi, ẹwowo, hayo ohwẹ ọmọfofa. Epọvo na o rrọ evaọ ẹgba nọ ma re ro yo edo emamọ ole, edo ọvra, hayo urru ohwo nọ ma you. Oghẹrẹ nọ a tubẹ ma omai, dede nọ ma gba ha, u dhesẹ uyoyou Ọghẹnẹ. Oye jabọ nọ ma jẹ ruẹ ẹgbagba eme ọ Jesu na nọ o ta nọ: “Ẹkẹ oghale o mae rọ vi emio.” (Iruẹru 20:35) O rẹ were omai re ma dhesẹ uyoyou kẹ amọfa keme “uwoho oma Ọghẹnẹ” a rọ ma omai. (Emuhọ 1:27) Dede nọ ekwakwa-aghae efa buobu e riẹ nọ a re ro dhesẹ Jihova, uyoyou họ okwakwa-aghae riẹ o mae rro.
A rẹ jọ ikere nọ i no obọ Ọghẹnẹ ze ruẹ uyoyou riẹ. Egagọ akpọ na a wo ikereakere anwae buobu. Kọ a sae jọ ikere itieye na ruẹ uyoyou Ọghẹnẹ?
Uzẹme riẹ họ, ikere anwae buobu erọ egagọ e ta ẹme tere he kpahe epanọ Ọghẹnẹ o you omai te hayo epanọ ma sai ro you rie. Fikiere, ima ahwo buobu a be ruẹ uyo na ha nọ a tẹ nọ inọ, “Eme jabọ ma be rọ ruẹ uyoyou Ọghẹnẹ evaọ eware nọ ọ ma kpakiyọ uye-oruẹ gbe emuemu e da oria kpobi fia?” Rekọ evaọ abọdekọ riẹ, Ebaibol na ọvo họ obe anwae ọrọ egagọ nọ o dhesẹ uyoyou Ọghẹnẹ vevẹ. U te je wuhrẹ omai epanọ ma re ro dhesẹ uyoyou.
Obe nọ O Ta Kpahe Uyoyou
Ebaibol na i se Jihova “Ọghẹnẹ uyoyou.” (2 Ahwo Kọrint 13:11) Ebaibol na i dhesẹ epanọ uyoyou o rọ wọ Jihova nọ ọ rọ kẹ ọzae avọ aye ọsosuọ na uzuazọ nọ o kare ẹyao gbe uwhu. Rekọ uye-oruẹ u te ahwo-akpọ oma fikinọ a kpareso udu-esuo Ọghẹnẹ. (Iziewariẹ 32:4, 5; Ahwo Rom 5:12) Jihova ọ j’owọ re ọ kpọ eware vi. Ebaibol e ta nọ: “Ọghẹnẹ o you akpọ na hrọ, ọ jẹ rehọ Ọmọvo riẹ kẹ, re kohwo kohwo nọ ọ rọwo riẹ o gbe vrẹ hẹ rekọ o re wo uzuazọ ebẹdẹ bẹdẹ.” (Jọn 3:16) Ikereakere Efuafo na i dhesẹ uyoyou Ọghẹnẹ haro nọ e ta kpahe epanọ Ọghẹnẹ ọ rọ rehọ egọmeti ọgbagba mu kẹ Jesu no re ọ ruẹse wha udhedhẹ se ahwo-akpọ ẹmeoyo.—Daniẹl 7:13, 14; 2 Pita 3:13.
Ebaibol e rehọ eme nana gba owha-iruo nọ ohwo-akpọ o wo ekru: “Whọ rẹ rehọ eva ra kpobi, gbe ẹzi ra kpobi, gbe iroro ra kpobi, you Ọnowo na Ọghẹnẹ ra. Onana họ ujaje ulogbo gbe o nọ o rọ aro. O rọ avivẹ o wọhiẹ e re nọ, You omọfa epanọ who you oma ra. Eva ijaje ivẹ enana uzi na soso gbe eruẹaro na ehwa e.” (Matiu 22:37-40) Ebaibol e ta nnọ ẹzi Ọghẹnẹ a ro kere ei. Nọ o rọnọ ekwakwa Ọghẹnẹ e vọ eva riẹ na, o rẹ sai mu omai ẹro inọ obọ “Ọghẹnẹ uyoyou” na u no ze.—2 Timoti 3:16.
Ma rẹ riẹ ikereakere anwae nọ i no obọ Ọghẹnẹ ze otẹrọnọ e ta kpahe uyoyou Ọghẹnẹ. A rẹ jẹ rọ uyoyou ro vuhu uvi eg’Ọghẹnẹ, keme a be raro kele Ọghẹnẹ evaọ edhesẹ uyoyou.
Epanọ Ma re Ro Vuhu Enọ I You Ọghẹnẹ?
Enọ i gine you Ọghẹnẹ a re wo ohẹriẹ, maero kọ enẹna nọ ma be rria etoke nọ Ebaibol i se “edẹ urere” na. Vi epaọ anwẹdẹ, ahwo a bi “you oma-obọrai, je you igho, . . . yowọ enu-awere siọ Ọghẹnẹ ba.”—2 Timoti 3:1-4.
Ẹvẹ who re ro vuhu ahwo nọ a you Ọghẹnẹ? Ebaibol e ta nnọ: “Uyoyou Ọghẹnẹ ona, nnọ ma re koko ijaje riẹ.” (1 Jọn 5:3) Uyoyou kẹ Ọghẹnẹ o rẹ wọ ahwo rọ adhẹẹ kẹ itee uruemu nọ e rrọ Ebaibol na. Wọhọ oriruo, Ebaibol i wo izi nọ e ta kpahe owezẹ ọzae-avọ-aye gbe orọo. Imava nọ e rrọ orọo ọvo a rẹ wezẹ kugbe, yọ orọo o rẹ jọ ribri. (Matiu 19:9; Ahwo Hibru 13:4) Okenọ aye jọ evaọ obọ Spen ọnọ o wuhrẹ kpahe iwuhrẹ-egagọ o kpohọ ewuhrẹ nọ Isẹri Jihova a bi jo wuhrẹ kpahe itee uruemu ezi nọ e rrọ Ebaibol na, ọ ta nọ: “Me wo ọbọga no ewuhrẹ na ze, orọnọ fiki eme nọ a ru vevẹ no Ikereakere na ze ọvo ho, rekọ fiki okugbe nọ ọ rrọ udevie ahwo nana gbe uruemu ezi rai.”
U te no Ọghẹnẹ nọ a re you no, o re lọlọhọ re a vuhu uvi Ileleikristi ẹkwoma oghẹrẹ nọ a bi ro dhesẹ uyoyou kẹ erivẹ rai. Iruo rai nọ e mai wuzou họ amọfa nọ a be ta kẹ kpahe ẹruore ọvo nọ ahwo-akpọ a wo, Uvie Ọghẹnẹ. (Matiu 24:14) Oware nọ o rẹ mae wha erere okrẹkri se erivẹ rai họ obọ nọ a re fihọ kẹ ai wo eriariẹ Ọghẹnẹ. (Jọn 17:3) Uvi Ileleikristi a re je dhesẹ uyoyou rai evaọ idhere efa. A re fi obọ họ kẹ enọ uye o be bẹ. Wọhọ oriruo, okenọ otọ nọ u nuhu o raha eware evaọ Itali, obe-usi ẹwho na jọ o niyẹrẹ inọ Isẹri Jihova “a jẹ kẹ ahwo eware nọ a ginẹ gwọlọ, a je fi obọ họ kẹ enọ uye o jẹ bẹ, a daezọ oghẹrẹ egagọ nọ ahwo a rrọ họ.”
U te no Ọghẹnẹ gbe ọrivẹ nọ a re you no, uvi Ileleikristi a re you ohwohwo. Jesu ọ ta nọ: “Mẹ kẹ owhai uzi okpokpọ, nọ, whai ohwo o you ohwo wọhọ epanọ me you owhai, re whai ohwo o you ohwo. Fiki onana ahwo kpobi a jẹ riẹ nọ whai ilele mẹ re whai ohwo o te you ohwo.”—Jọn 13:34, 35.
Kọ ahwo a bi muẹrohọ uyoyou nọ uvi Ileleikristi a wo kẹ ohwohwo? Ọmọtẹ jọ nọ a re se Ema ọ ruẹ nọ o rrọ ere. O bi ruiruo evaọ La Paz, Bolivia, oria nọ edafe gbe iyogbere nọ i no uyẹ sa-sa ze a re jo ru oware ọvo kugbe he. Ọ ta nọ: “Oke ọsosuọ nọ me kpohọ iwuhrẹ Isẹri Jihova, mẹ ruẹ ọmoha jọ nọ ọ gẹgọ ziezi nọ o bi lele aye India jọ ta ẹme. Mẹ re ruẹ oware otiọye ẹdọvo ho. Evaọ okioke yena mẹ tẹ riẹ nnọ ahwo Ọghẹnẹ ana.” Epọvo na re, uvovo-aye obọ Brazil jọ nọ a re se Miriam ọ ta nọ: “Mẹ riẹ oware nọ a re se evawere vẹre he, makọ evaọ uviuwou mẹ. Oke ọsosuọ nọ mẹ rọ ruẹ ahwo nọ a bi dhesẹ uyoyou họ evaọ udevie Isẹri Jihova.” Evaọ obọ United States, ọnọ o wuzou iyẹrẹ-enẹ evaọ oria etehe-ughe jọ ọ ta nọ: “Amọfa buobu a te bi yeri uzuazọ wọhọ ahwo egagọ rai na, orẹwho nana o rẹ jọ enẹ hẹ. Mẹ yọ ohwo nọ ọ riẹ inọ ukoko rai u bi wuhrẹ ahwo re a wo uyoyou kẹ Ọmemama na re a je fi ẹrọwọ ọgaga họ iẹe.”
Gwọlọ Egagọ Uzẹme
Uyoyou yọ oware nọ a re ro vuhu egagọ uzẹme. Jesu ọ rehọ ẹgwọlọ egagọ uzẹme ro dhesẹ ẹgwọlọ emamọ edhere, ohwo ọ vẹ jẹ salọ inọ ọ rẹ nya evaọ edhere yena. Edhere yena ọvo o re su kpohọ uzuazọ ebẹdẹ bẹdẹ. Jesu ọ ta nọ: “Wha rehọ unu ohwahwa ruọ eva; keme edhere ọraha ọ rẹ kẹkẹe o riama fihọ, enọ e rehọ e riẹ ruọ eva a re buobu. Keme edhere nọ a re ro kpohọ uzuazọ ọ rẹ kekeke, unu riẹ ọ rẹ hwahwa, enọ e ro riẹ e rẹ kakao.” (Matiu 7:13, 14) Ẹko Ileleikristi uzẹme ọvuọvo ọ be rehọ okugbe lele Ọghẹnẹ nya evaọ edhere egagọ uzẹme. Fikiere, egagọ nọ whọ salọ u muẹme. Whọ tẹ sai duku edhere na jẹ be nya evaọ eva riẹ, yọ edhere nọ ọ mai woma kpobi who duku no na keme oye họ edhere uyoyou.—Ahwo Ẹfẹsọs 4:1-4.
Oghọghọ nọ who re wo o rro kẹhẹ nọ whọ tẹ be nya evaọ edhere egagọ uzẹme. O wọhọ ẹsenọ who bi lele Ọghẹnẹ nya. Whọ rẹ sae jọ obọ Ọghẹnẹ wuhrẹ areghẹ gbe uyoyou re whọ sae reawere emamọ usu kugbe amọfa. Whọ rẹ sae jọ obọ riẹ wuhrẹ ẹjiroro uzuazọ, yọ whọ rẹ sai wo otoriẹ eyaa Ọghẹnẹ je wo ẹruore kpahe obaro. Whọ tẹ sai duku egagọ uzẹme, eva ọvo e te were owhẹ.
[Uwoho nọ o rrọ ẹwẹ-obe avọ 3]
Evaọ usu ebe anwae erọ egagọ, Ebaibol ọvo u dhesẹ uyoyou Ọghẹnẹ via
[Iwoho nọ e rrọ ẹwẹ-obe avọ 5]
Uyoyou a re ro vuhu uvi Ileleikristi