Okẹ Ebẹdẹ Bẹdẹ Nọ U No Obọ Ọmemama Na Ze

KỌ U gb’owhẹ unu inọ a jọ uzou ọsosuọ Ebaibol na fodẹ eware nọ ekiotọ-eriariẹ e ta nnọ e r’oja re uzuazọ o sae jọ okogho-akpọ na? Didi eware ye?

Re uzuazọ o sae jọ, ame ọ rẹ jariẹ buobu, wọhọ epanọ a ta eva Emuhọ 1:2 na. O gwọlọ nọ okogho-akpọ na o re dhẹ hrọ họ re ame na ọ seba edhẹmu. Onana o gwọlọ inọ akpọ na ọ rẹ kẹle hayo thabọ no ọre na hrọ họ. Obe Emuhọ o fodẹ ọre na unuẹse buobu gbe erere nọ o wo kẹ otọakpọ na.

Re ahwo a sae rria okogho-akpọ, o gwọlọ nnọ oghẹrẹ ofou sa-sa e rẹ jariẹ. A fodẹ okwakwa obọdẹ nana eva Emuhọ 1:6-8. Ẹbe nọ ọ be dhẹ no otọ ze, nọ a dhesẹ eva Emuhọ 1:11, 12 na, oye ofou-ẹwẹ o bi no ze. Okogho-akpọ nọ emama buobu nọ e rrọ uzuazọ e rẹ jọ o gwọlọ otọ oyaya, wọhọ epanọ a dhesẹ eva Emuhọ 1:9-12 na. Orọ urere, re o seba ẹroro hayo edhẹ ga hrọ, o rẹ jọ oria nọ u fo o vẹ jẹ dọmu oria ovo—rọkẹ otọakpọ na, ẹgba nọ o bi no ọvẹre na ze u kru rie daji oria nọ o gbẹ rọ roro hayo dhẹ hrọ họ. A jọ Emuhọ 1:14, 16 ta kpahe ọvẹre gbe irere riẹ jọ.

Ẹvẹ Mosis, ọnọ o kere obe Emuhọ na, nọ o wo ekwakwa otọkiẹ-eriariẹ inẹnẹ hẹ, ọ rọ riẹ kpahe eware nọ ma jọ obehru fodẹ na? Kọ Mosis o wo eriariẹ oghẹrẹsa jọ nọ ọ rọ riẹ kpahe eware nana kpakiyọ ahwo oke yena a riẹ kpahe ae he? Uvevẹ ẹme na họ Ọnọ ọ ma idhiwu gbe otọakpọ na họ ọnọ ọ kẹ riẹ ẹgba dhesẹ eware nana. Ma rẹ sae ta ere fiki epanọ obe Emuhọ u ru eware nana vẹ te.

Ebaibol na i dhesẹ inọ orọnikọ gheghe a rọ ma eware igbunu nọ e wariẹ omai họ na ha. Olezi 115:16 o ta nọ: “Ihru na e rọ ỌNOWO, rekọ akpọ na ọ rehọ iẹ kẹ emọ ahwo.” Olezi ọfa ọ ta nọ: “Who fi etọhotọ akpọ na họ, re e seba ekpoho.” (Olezi 104:5) Otẹrọnọ Ọmemama jọ họ ọnọ ọ ma je ru ona họ okogho-akpọ owowoma mai na, o ga hrọ họ re ma rọwo inọ o wo ẹgba nọ ọ rẹ rọ sẹro rai. Onana u dhesẹ inọ whọ rẹ sae rehọ udu kpobi rẹro orugba eyaa igbunu na: “Ikiẹrẹe e rẹ te rehọ otọ na reuku, a vẹ jẹ ria ae bẹdẹ.” (Olezi 37:29) Uzẹme riẹ họ, Ọghẹnẹ ‘ọ ma akpọ na re o jọ ufofe he,’ rekọ “ọ ma ae” re ahwo-akpọ nọ i wo ovuhumuo nọ i bi jiri ei kẹ iruẹru riẹ a “ria ae.”—Aizaya 45:18.

Wọhọ epanọ Ikereakere na i dhesẹ, Jesu ọ ziọ otọakpọ na re o wuhrẹ omai kpahe Ọghẹnẹ gbe ẹjiroro Riẹ nọ ọ be te rọ kẹ ahwo-akpọ ẹmeoyo uzuazọ ebẹdẹ bẹdẹ. (Jọn 3:16) Ma wo imuẹro inọ kẹle na Ọghẹnẹ ọ te “raha erọ ọ raha akpọ na,” rekọ ahwo-akpọ kpobi nọ i you udhedhẹ nọ e jẹ ọruẹrẹfihotọ riẹ kẹ esiwo rehọ a te zọ. (Eviavia 7:9, 14; 11:18) Ẹvẹ uzuazọ u ti gbunu te nọ ahwo-akpọ a bi ti wuhrẹ kpahe jẹ reawere emama igbunu Ọghẹnẹ bẹdẹ bẹdẹ na!—Ọtausiwoma Na 3:11; Ahwo Rom 8:21.

[Ọnọ o wo uwoho nọ o rrọ ẹwẹ-obe avọ 6]

Ifoto NASA