Izoge—Wha Le Itee Nọ E Rẹ Kẹ Ọghẹnẹ Orro

“Wuhrẹ oma ra fihọ oreva Ọghẹnẹ u ruo.”—1 TIMOTI 4:7.

1, 2. (a) Fikieme Pọl o ro jiri Timoti? (b) Ẹvẹ emoha nẹnẹ a bi ro ‘wuhrẹ oma rai fihọ oreva Ọghẹnẹ uruo’?

“M E WO ohwo ọvo wọhọ iẹ he, nọ rẹ jọ eva riẹ ruawa ewoma rai. . . . Wọhọ ọmọ avọ ọsẹ ere o lele omẹ ru iruo usiuwoma na.” (Ahwo Filipai 2:20, 22) Pọl ukọ na o ku ujiro ezi nana gbe ileta nọ o kere se Ileleikristi ikpe-udhusoi ọsosuọ evaọ obọ Filipai. Ono ọ jẹ ta kpahe na? Timoti, ọmoha nọ o je lele iei evaọ erẹ usiuwoma ota riẹ. Dai roro epanọ oghẹrẹ nọ Pọl o jiri Timoti na o sasa e riẹ udu te!

² Emoha nọ i wo ozodhẹ Ọghẹnẹ wọhọ Timoti a rrọ ghaghae evaọ udevie ahwo Jihova. (Olezi 110:3) Nẹnẹ, ukoko Ọghẹnẹ o wo emoha buobu nọ e rrọ ekobaro, imishọnare, otu ebabọ, gbe ahwo uviuwou Ebẹtẹle. Ma bi je jiri enọ e be rẹrote iruo sa-sa evaọ ikoko rai yọ evaọ oke ovona a be rẹrote eware efa. Emoha itieye na a be ruẹ evawere nọ i re te ohwo nọ o bi le itee nọ e rẹ rehọ orro kẹ Ọsẹ obọ odhiwu mai, Jihova. A bi gine ‘wuhrẹ oma rai fihọ oreva Ọghẹnẹ uruo.’—1 Timoti 4:7, 8.

3. Didi enọ ma te ta ẹme kpahe evaọ uzoẹme nana?

³ Wọhọ ọmoha, kọ who bi le ugogo itee jọ nọ e rẹ kẹ Ọghẹnẹ orro? Diẹse whọ sai jo wo obufihọ gbe uduotahawọ nọ who re ro ru ere? Ẹvẹ whọ sai ro mugba kẹ otunyẹ ọrọ akpọ nana nọ ọ wọ ilale-efe họ uzou na? Didi eghale whọ rẹ sai rẹro rai otẹrọnọ who le itee nọ e rẹ kẹ Ọghẹnẹ orro? Joma gwọlọ iyo kẹ enọ nana ẹkwoma ẹta kpahe uzuazọ nọ Timoti o yeri.

Oghẹrẹ Uzuazọ nọ Timoti O Yeri

4. Gbiku kpẹkpẹe kpahe uzuazọ Timoti wọhọ Oleleikristi.

⁴ Timoti ọ whẹro evaọ Listra, ẹwho ọsese jọ evaọ ubrotọ Galesha, nọ o jọ otọ esuo Rom. O wọhọ nọ ọ riẹ kpahe Egagọ-Ileleikristi nọ ọ jọ ikpe ikpegbọ, okenọ Pọl ọ jọ Listra ta usiuwoma oware wọhọ ukpe 47 C.E. U kri hi inievo nọ e rrọ ẹwho na a tẹ te riẹ Timoti wọhọ uvi ohwo. Nọ ikpe ivẹ e vrẹ no, nọ Pọl o zihe ziọ Listra jẹ ruẹ epanọ Timoti ọ nyaharo te no, ọ tẹ salọ iẹe inọ o lele iei evaọ erẹ imishọnare riẹ. (Iruẹru 14:5-20; 16:1-3) Nọ Timoti o bi t’ọzae na, Pọl ọ tẹ kẹe ewha-iruo ilogbo efa, enọ i kugbe uwou obọdẹ nọ o je vi ei re ọ bọ inievo na ga. Okenọ Pọl o kere ileta se Timoti no uwou-odi ze evaọ Rom oware wọhọ ukpe 65 C.E., yọ Timoti ọ rrọ ọkpako ukoko evaọ Ẹfẹsọs.

5. Wọhọ epanọ 2 Timoti 3:14, 15 u dhesẹ, eware ivẹ vẹ e lẹliẹ Timoti salọ nnọ o re le itee nọ e rẹ kẹ Ọghẹnẹ orro?

⁵ U re vevẹ inọ Timoti ọ salọ inọ o re le itee nọ e rẹ kẹ Ọghẹnẹ orro. Rekọ eme ọ wọ riẹ salọ uzuazọ utioye na? Evaọ ileta avivẹ riẹ se Timoti, Pọl ọ fodẹ eware ivẹ nọ e wọ Timoti. O kere nọ: ‘Ruẹabọhọ umutho nọ who wuhrẹ jẹ rọwo na, whọ vẹ jẹ riẹ ọnọ whọ jọ obọ riẹ wuhrẹ iẹe. Jegbe epanọ whọ riẹ ikere ẹri na nọ anwọ oke emaha ze.’ (2 Timoti 3:14, 15) Joma kake ta kpahe oghẹrẹ nọ Ileleikristi efa a ro kpomahọ oghẹrẹ uzuazọ nọ Timoti ọ salọ.

Wo Erere no Oriruo Ahwo Ezi Ze

6. Ẹvẹ a ro wuhrẹ Timoti notọ ze, kọ ẹvẹ ọ rehọ ewuhrẹ na?

⁶ A yọrọ Timoti evaọ uviuwou nọ ahwo kpobi a jọ rrọ egagọ evona ha. Ọsẹ riẹ ohwo Griki, yọ oni riẹ, Yunisi, avọ oniode riẹ, Lọis, a jọ ahwo Ju. (Iruẹru 16:1) Yunisi avọ Lọis, enọ e jọ egagọ ahwo Ju vẹre, a rehọ Ikereakere Hibru na wuhrẹ Timoti uzẹme na no emaha ze. Nọ a kurẹriẹ ruọ Egagọ-Ileleikristi no, ababọ avro a fi obọ họ tẹzẹ iẹe re ọ rọwo iwuhrẹ Ileleikristi. U re vevẹ, Timoti o wo erere no uwuhrẹ nana ze. Pọl o kere nọ: “A kareghẹhọ o mẹ epa uvi orọwọ ra, utio ẹrọwọ nọ ọ kake jọ eva Lois oniode ra gbe oni ra Yunisi onọ me rẹro nọ o rọ owhẹ oma re.”—2 Timoti 1:5.

7. Didi oghale emoha buobu a wo, kọ ẹvẹ onana o sae rọ jọ erere kẹ ae?

⁷ Nẹnẹ, emoha buobu a wo oghale nọ a ro wo esẹgbini avọ esẹgbini ilogbo nọ e riẹ epanọ ilale itee nọ e rẹ kẹ Ọghẹnẹ orro i wuzou te, wọhọ Lọis avọ Yunisi. Wọhọ oriruo, Samira ọ gbẹ be kareghẹhọ epanọ tei te ọsẹgboni riẹ a jẹ hae keria t’ẹme kri te evaọ okenọ ọ gbẹ jọ ikpe ikpegbọ. Ọ ta nọ: “Ọsẹgboni mẹ a wuhrẹ omẹ epanọ me re ro wo eriwo Jihova evaọ eware kpobi re mẹ jẹ rehọ iruo usiuwoma ota na karo evaọ uzuazọ. A jẹ hae tudu họ omẹ awọ re mẹ jọ ọkobaro.” Samira o gine ru lele uduotahawọ ọsẹgboni riẹ, yọ ma be t’ẹme na, o bi ruiruo evaọ Ebẹtẹle nọ ọ rrọ orẹwho riẹ. Otẹrọnọ ọsẹgboni ra a be tudu họ owhẹ awọ inọ whọ rehọ eware abọ-ẹzi karo, roro kpahe ohrẹ rai ziezi. Ewoma ra a gwọlọ.—Itẹ 1:5.

8. Didi erere Timoti o wo fikinọ ọ nyusu kugbe ahwo nọ a kru ga evaọ ukoko na?

⁸ O tẹ jẹ roja re who mu usu kugbe ahwo nọ a rẹ sae b’owhẹ ga evaọ ukoko Ileleikristi na. Ekpako ukoko Timoti gbe ekpako ukoko ọ Aikoniọm, ẹwho nọ ọ rehọ oware wọhọ ikilomita 30 thabọ no ẹwho riẹ, a riẹ Timoti ziezi. (Iruẹru 16:1, 2) O te ti mu usu okpekpe kugbe Pọl, ọnọ ọ jọ uvi Oleleikristi. (Ahwo Filipai 3:14) Ileta ọ Pọl i dhesẹ inọ Timoti ọ rẹ jẹ ohrẹ rehọ gbe nnọ o rẹ vẹrẹ iẹe obọ re ọ raro kele ahwo nọ a wo ẹrọwọ. (1 Ahwo Kọrint 4:17; 1 Timoti 4:6, 12-16) Pọl o kere nọ: ‘Who vuhu hayo lele ewuhrẹ gbe uruemu mẹ no, avọ oma uzuazọ mẹ, gbe ẹrọwọ avọ akothihi mẹ, gbe uyoyou avọ odikihẹga mẹ.’ (2 Timoti 3:10) Ẹhẹ, Timoti o lele oriruo ọ Pọl kpekpekpe. Epọvo na re, who te sikẹle ahwo nọ a jọ ukoko na kru ga, a ti fi obọ họ kẹ owhẹ le itee nọ e rẹ kẹ Ọghẹnẹ orro.—2 Timoti 2:20-22.

Wuhrẹ “Ikere Ẹri Na”

9. U te no ẹsalọ emamọ egbẹnyusu no, eme who re ru hrọ re whọ sai wuhrẹ oma ra fihọ oreva Ọghẹnẹ uruo?

⁹ Kọ emamọ egbẹnyusu nọ whọ rẹ salọ ọvo o rẹ nwani fi obọ họ k’owhẹ le itee abọ-ẹzi? Ijo. Wọhọ Timoti, u fo inọ whọ rẹ roma totọ kiẹ “ikere ẹri na” riwi. Ẹsejọhọ o rẹ were owhẹ anwẹdẹ hẹ re whọ tọlọ obe inọ who bi se, rekọ kareghẹhọ inọ Timoti o ‘wuhrẹ oma riẹ fihọ oreva Ọghẹnẹ uruo.’ Enọ e rẹ dhohrẹ a re wuhrẹ oma rai emerae buobu re a ruẹsi le ute rai t’obọ. Epọvo na re, re whọ sai le itee abọ-ẹzi t’obọ o gwọlọ iruo gbe omodawọ. (1 Timoti 4:7, 8, 10) Whọ rẹ sae nọ inọ: ‘Ẹvẹ ewuhrẹ Ebaibol na o sai ro fi obọ họ kẹ omẹ nyate itee mẹ?’ Joma t’ẹme kpahe idhere esa.

10, 11. Fikieme Ikereakere na e te rọ kẹ owhẹ ọwhọ le itee abọ-ẹzi? Kẹ oriruo.

¹⁰ Orọ ọsosuọ, Ikereakere na e te k’owhẹ ọwhọ. I dhesẹ oghẹrẹ ohwo igbunu nọ Ọsẹ obọ odhiwu mai ọ rrọ, uyoyou ulogbo nọ o dhesẹ kẹ omai, gbe eghale ebẹdẹ bẹdẹ nọ e rrọ obaro kẹ idibo ẹrọwọ riẹ. (Emọs 3:7; Jọn 3:16; Ahwo Rom 15:4) Nọ eriariẹ ra kpahe Jihova e be rro na, ere uyoyou ra kẹe gbe isiuru nọ whọ rẹ rọ rehọ uzuazọ ra mudhe kẹe e rẹ rro re.

¹¹ Emoha Ileleikristi buobu a ta no inọ ewuhrẹ Ebaibol omobọ ohwo u fi obọ họ kẹ ai gaga no ru uzẹme na họ orai. Wọhọ oriruo, a yẹ Adele fihọ uviuwou Ileleikristi rekọ o je fi uvumọ itee abọ-ẹzi họ kẹ oma riẹ hẹ. Ọ ta nọ: “Mẹ jẹ hai lele ọsẹgboni mẹ kpohọ obọ Ọgwa Uvie na, rekọ me je wuhrẹ kẹ omobọ mẹ hẹ hayo gaviezọ eva iwuhrẹ na ha.” Nọ oniọvo ọkpako riẹ ọ họ-ame no, Adele o te ti se ukoko na gboja. Ọ ta nọ: “Me te fi ute họ inọ me re se Ebaibol na n’oka duoka. Me te se umutho no me ve kere eme jọ kpahe oware nọ me se na fihọ otọ. Obe nọ me kere eme yena kpobi fihọ o gbẹ riẹ. Me se Ebaibol na n’oka duoka evaọ ukpe ọvo.” Fikiere, oma o tẹ wọ Adele re ọ rehọ uzuazọ riẹ mudhe kẹ Jihova. Dede nọ ọ rrọ oma kọkọ họ, ma be t’ẹme na ọ rrọ ọtausiuwoma oke-kpobi.

12, 13. (a) Didi inwene uwuhrẹ Ebaibol u re fi obọ họ kẹ ọmoha ru, kọ evaọ oghẹrẹ vẹ? (b) Kẹ iriruo ọrọ uvi areghẹ nọ ọ rrọ Ebaibol na.

¹² Orọ avivẹ, Ebaibol na i ti fi obọ họ kẹ owhẹ ru inwene evaọ uruemu ra. Pọl ọ ta kẹ Timoti inọ “ikere ẹri na” e rrọ “erere rọ kẹ ewuhrẹ gbe ozọ-usio, avọ ọkpọvio gbe odhesẹkẹ eva ẹrẹreokie. Re ohwo Ọghẹnẹ na ọ ruẹse gba kiete, ọ vẹ jẹ thomavẹre kẹ iruo iwoma i ruo kpobi.” (2 Timoti 3:16, 17) Who te bi roro kpahe eware nọ i kpomahọ Ẹme Ọghẹnẹ ẹsikpobi je bi fi ehri-izi Ebaibol họ iruo, yọ whọ be kẹ ẹzi Ọghẹnẹ uvẹ re o ru uruemu ra woma. U ti ru owhẹ wo uruemu ezi, wọhọ omarokpotọ, ithihakọ, osegboja evaọ iruo, gbe uvi uyoyou kẹ ibe Ileleikristi. (1 Timoti 4:15) Timoti o wo iruemu yena gba, yọ i ru rie jọ ghaghae kẹ Pọl jẹ kẹ ukoko nọ Timoti ọ jọ.—Ahwo Filipai 2:20-22.

¹³ Orọ avesa, eme nọ e rẹ kẹ ohwo uvi areghẹ e vọ Ebaibol na. (Olezi 1:1-3; 19:7; 2 Timoti 2:7; 3:15) I ti fi obọ họ kẹ owhẹ rọ areghẹ salọ egbẹnyusu ra, salọ aroza ẹkeriotọ nọ i fo jẹ sae rehọ udu dhe iroro-ejẹ nọ e rrọ bẹbẹ. (Emuhọ 34:1, 2; Olezi 119:37; 1 Ahwo Kọrint 7:36) Iroro areghẹ nọ whọ rẹ jẹ enẹna e roja kẹ ẹnyate itee abọ-ẹzi ra.

“Họre Uvi Ohọre Orọwọ Na”

14. Fikieme ele itee abọ-ẹzi o gbẹ rọ lọhọ tere he?

¹⁴ Re ohwo ọ rehọ itee nọ e rẹ wha orro se Jihova karo o mae rrọ owojẹ areghẹ evaọ uzuazọ, rekọ o nwane lọhọ tere he. Wọhọ oriruo, whọ tẹ gwọlọ salọ oware nọ whọ gwọlọ ru evaọ uzuazọ, imoni, egbẹnyusu, gbe iticha nọ i roro inọ isukulu ikpehru gbe iruo ilogbo họ eware nọ e rẹ lẹliẹ ohwo wo obokparọ gbe evawere a rẹ sae tudu họ owhẹ awọ inọ eware yena who re le. (Ahwo Rom 12:2) Wọhọ Timoti, o te gwọlọ inọ whọ “họre uvi ohọre orọwọ na” re whọ sae “yọrọ uzuazọ ebẹdẹ bẹdẹ” nọ Jihova ọ yeyaa riẹ k’owhẹ na.—1 Timoti 6:12; 2 Timoti 3:12.

15. Didi ọwọsuọ o rẹ sae jọnọ Timoti ọ rẹriẹ ovao ku?

¹⁵ Otẹrọnọ imoni ra nọ e rrọ ukoko na ha a wo evawere kpahe oware nọ whọ gwọlọ rọ karo evaọ uzuazọ họ, onana o sae jọ odawọ ulogbo. Ẹsejọhọ Timoti ọ rẹriẹ ovao ku ẹbẹbẹ otiọye na, rekọ o fi ẹbẹbẹ na kparobọ. Wọhọ epanọ obe jọ o ta, o wọhọ nnọ uviuwou Timoti yọ uviuwou nọ “ahwo riẹ a jọ riobe je wo ugho.” Ẹsejọhọ ọsẹ riẹ ọ hae gwọlọ inọ o kpohọ isukulu ilogbo re ọ jẹ rẹrote okọ uviuwou na.a Dai roro epanọ o jọ ọsẹ Timoti oma nọ o yo inọ uzuazọ nọ Timoti ọ salọ họ onọ o re ro lele Pọl evaọ iruo imishọnare nọ o re jo fi uzuazọ riẹ họ ọza, onọ a re jo fe he!

16. Eme uzoge jọ o ru kpahe ọwọsuọ ọsẹ riẹ?

¹⁶ Emoha nọ e rrọ Ileleikristi nẹnẹ a rẹriẹ ovao ku oghẹrẹ ebẹbẹ evona. Matthew, ọnọ o bi ruiruo evaọ uwou ogha Isẹri Jihova ọ ta nnọ: “Okenọ mẹ ruọ iruo ọkobaro, eva e dha ọsẹ mẹ gaga. O roro inọ mẹ ‘raha’ isukulu nọ mẹ nya kufiẹ fikinọ mẹ rehọ iruo ugbotọ jọ nọ mẹ sae rọ rẹrote oma mẹ evaọ odibọgba mẹ. Ọ jẹ hae rehọ omẹ s’ẹkoko, kareghẹhọ omẹ unuigho nọ mẹ hai wo o hae jọnọ mẹ ruọ emamọ iruo.” Eme Matthew o ru kpahe ọwọsuọ yena? Ọ ta nọ: “Mẹ ruabọhọ isase Ebaibol jẹ hae lẹ ẹsikpobi, maero evaọ oke nọ o hae jọ lọlọhọ re mẹ vare ku ọsẹ mẹ.” Uruemu nana nọ Matthew ọ dadamu na o wha erere ze. Uwhremu na, tei te ọsẹ riẹ a te ti muhọ eyeri kugbe ziezi. Matthew o si kẹle Jihova ziezi no re. Ọ ta nọ: “Jihova ọ rẹro te omẹ, ọ kẹ omẹ uduotahawọ, jẹ thọ omẹ no ekpehre iroro ejẹ. Mẹ hae ruẹ eghale nana kpobi hi me gbe le itee abọ-ẹzi hi.”

Tẹrovi Itee Abọ-Ẹzi

17. Ẹvẹ otujọ a sai ro whrehe amọfa nọ e gwọlọ ruọ iruo ọkobaro? (Matiu 16:22)

¹⁷ Ibe Ileleikristi dede a sae rehọ orithọ ru ei bẹbẹ kẹ owhẹ re who le itee abọ-ẹzi. Ejọ e rẹ sae nọ inọ: ‘Eme whọ be rehọ iruo ọkobaro ru? Whọ rẹ sai yeri uzuazọ nọ otu ra a bi yeri jẹ jọ owhowho-uvie ghele. Gwọlọ emamọ iruo re who wo ugho fihọ obọ je dikihẹ ziezi.’ Whọ rẹ sai roro nnọ onana yọ emamọ ohrẹ, ghele na, kọ whọ rẹ sae ta inọ who bi wuhrẹ oma ra fihọ oreva Ọghẹnẹ uruo who te lele ohrẹ yena?

18, 19. (a) Ẹvẹ whọ sae rọ tẹrovi ilale abọ-ẹzi? (b) Whọ tẹ rrọ uzoge, fodẹ idhere jọ nọ whọ be rọ lahiẹ oma hayo si obọ no eware jọ fiki Uvie na.

¹⁸ O wọhọ nọ Ileleikristi jọ evaọ oke Timoti a wo iroro itieye na. (1 Timoti 6:17) Re o fi obọ họ kẹ Timoti tẹrovi itee abọ-ẹzi, Pọl ọ tudu họ iẹe awọ inọ: “Alakpa-ẹmo ọvuọvo o re kielele eware akpọ diodi hi, keme ọ rẹ guọlọ re o ru orọ eva ọnọ ọ sane riẹ gba.” (2 Timoti 2:4) Alakpa-ẹmo nọ ọ rrọ iruo ọ rẹ kuvẹ hẹ re ilale eware efa e rehọ iroro riẹ. Uzuazọ riẹ gbe uzuazọ amọfa o rehọ oma hwa ezọ nọ ọ rẹ gaviẹ ẹsikpobi kẹ ọnọ o wuzou riẹ. Wọhọ alakpa-ẹmo nọ ọ rrọ otọ Kristi, whọ rẹ jọ iroro evo re, whọ rẹ kuvẹ hẹ re ilale efe e rehọ oke nọ who re ro ru odibọgba ra nọ who bi ro siwi uzuazọ amọfa.—Matiu 6:24; 1 Timoti 4:16; 2 Timoti 4:2, 5.

¹⁹ Ukpenọ whọ rẹ gbẹ edhere nọ who re ro yeri uzuazọ ariakpọ-kuoma, wo ẹzi omolahiẹ kẹ amọfa. “Kpairoro vrẹ eware akpọriọ uzuazọ, wọhọ alakpa-ẹmo Kristi Jesu.” (2 Timoti 2:3, The English Bible in Basic English) Timoti ọ jọ oma ọ Pọl wuhrẹ epanọ ohwo o re ro wo edẹro makọ evaọ otọ ọbẹwẹ ọgaga. (Ahwo Filipai 4:11, 12; 1 Timoti 6:6-8) Whọ rẹ sai ru epọvo na re. Kọ u n’owhẹ eva ze nnọ whọ rẹ lahiẹ oma hayo si obọ no eware jọ fiki Uvie na?

Eghale Enẹna gbe Erọ Obaro

20, 21. (a) Dhesẹ eghale jọ nọ i re te ohwo nọ o le itee abọ-ẹzi. (b) Eme whọ gba riẹ mu inọ who re ru?

²⁰ Timoti ọ talamu Pọl oware wọhọ ikpe 15. Timoti ọ ruẹ ikoko kpobi nọ a ro mu nọ emamọ usi na o be vaha ruọ ofẹ ẹkpẹlobọ ovatha-ọre unuakpọ yena. Uzuazọ evevọwẹ nọ o yeri o were gaga vi oware nọ ọ hai wo o hae jọnọ o yeri uzuazọ nọ otu riẹ a yeri. (2 Ahwo Kọrint 11:26, 27) Ẹkwoma ele itee abọ-ẹzi, who ti wo eghale Ọghẹnẹ nọ a rẹ sai gbiku rai hi. Who ti si kẹle Jihova yọ ibe Ileleikristi ra a ti you owhẹ jẹ rehọ emamọ ubiẹro rri owhẹ. Viukpọ edada gbe idhọvẹ erọ ilale efe, whọ te ruẹ uvi evawere nọ u re no omarọkẹ iruo Ọghẹnẹ ze. Maero, “uzuazọ nọ o ghine rọ uvi uzuazọ” na, koyehọ uzuazọ ebẹdẹ bẹdẹ evaọ otọakpọ aparadase, u ti t’owhẹ obọ.—1 Timoti 6:9, 10, 17-19; Iruẹru 20:35.

²¹ Otẹrọnọ who ri ru ere no ho, ma be tudu họ owhẹ awọ inọ who mu ei họ enẹna re who wuhrẹ oma ra fihọ oreva Ọghẹnẹ uruo. Si kẹle ahwo nọ a rẹ sai fi obọ họ kẹ owhẹ le itee abọ-ẹzi evaọ ukoko na, re who je bikẹle ai rọkẹ uthubro. Hai se Ebaibol na ẹsikpobi. Gbaemu inọ whọ rẹ whaha ẹzi ilale efe ọrọ akpọ na. Yọ hae kareghẹhọ ẹsikpobi inọ Ọghẹnẹ “ọnọ ọ be rehọ eware kpobi nọ e rẹ kẹ evawere kẹ omai” na, ọ yeyaa k’owhẹ inọ whọ sai wo eghale buobu enẹna gbe evaọ obaro otẹrọnọ who le itee nọ e rẹ kẹe orro.—1 Timoti 6:17.

[Oruvẹ-obotọ]

Kọ Whọ Kareghẹhọ?

• Amono a rẹ sai fi obọ họ kẹ emoha le itee abọ-ẹzi?

• Fikieme uwuhrẹ Ebaibol osegboja u ro wuzou?

• Ẹvẹ emoha a sae rọ whaha ẹzi ilale efe akpọ nana?

• Didi eghale i re te ohwo otẹrọnọ o le itee abọ-ẹzi?

[Uwoho nọ o rrọ ẹwẹ-obe avọ 26]

Timoti o le emamọ itee

[Iwoho nọ e rrọ ẹwẹ-obe avọ 27]

Amono a fi obọ họ kẹ Timoti le ute riẹ t’obọ?

[Iwoho nọ e rrọ ẹwẹ-obe avọ 28]

Kọ who bi le itee abọ-ẹzi?