Uvitha Uwuhrẹ Okpokpọ orọ Uwou-eroro Na
EMAGAZINI nọ who bi se na họ orọ ọsosuọ uvitha uwuhrẹ orọ Uwou-Eroro Na. Ma gwọlọ dhesẹ eware jọ nọ e be te jọ uvitha okpokpọ orọ emagazini nana.
A kere uvitha uwuhrẹ na kẹ Isẹri Jihova gbe emọ uwuhrẹ Ebaibol nọ i bi wo ẹnyaharo. A te hai kere iei ẹsiẹvo amara, yọ izoẹme ene hayo isoi nọ a ti wuhrẹ e te jariẹ. A ruẹrẹ omaa nọ a ti ro wuhrẹ izoẹme nana fihọ uke emagazini na. Wo ohẹriẹ no uvitha ẹgbede orọ Uwou-Eroro Na, oghẹrẹ ovona uke uvitha uwuhrẹ na o te jọ kamara kamara, nọ orọnọ a be te hai fi iei họ ada ha na.
Evaọ ẹwẹ-obe avọ 2 emagazini na, whọ te jariẹ ruẹ eme nọ i ti fiobọhọ k’owhẹ nọ a kere kpẹkpẹe kpahe ẹjiroro uzoẹme uwuhrẹ ọvuọvo hayo izoẹme uwuhrẹ nọ e t’ẹme kpahe enwenọ oware ovona, gbe izoẹme efa. Ahwo nọ a re ru Uwuhrẹ Uwou-Eroro na a te ruẹ nọ onana u ti fiobọhọ kẹ ae gaga nọ a tẹ be ruẹrẹ oma kpahe kẹ epanọ a ti ro ru uwuhrẹ na eva obọ ewuhrẹ.
Who ti muẹrohọ nọ izoẹme uwuhrẹ na e dina kpẹre vi epanọ e jẹ hae jọ vẹre. Fikiere, oke o te jariẹ nọ a rẹ rọ tẹme kpahe ikereakere nọ i wuzou evaọ etoke Uwuhrẹ Uwou-Eroro na. Ma tuduhọ owhẹ awọ re whọ hai se eria ikereakere kpobi nọ a fodẹ evaọ uzoẹme uwuhrẹ. A kpoka họ ikereakere jọ nọ “se” yọ a re se jẹ tẹme kpahe ae evaọ etoke Uwuhrẹ Uwou-Eroro na. A rẹ sai je se ikereakere efa nọ oke o tẹ riẹ. Whọ te jọ izoẹme jọ ruẹ ikereakere nọ a kpoka họ inọ “wawo.” Nọ orọnọ ikereakere itieye na e nwani duobọte ugogo oware nọ edhe-ẹme na o be ta kpahe he na, o nwane gwọlọ nọ a se ai evaọ etoke uwuhrẹ na ha. Ghele na, ikereakere nọ a kpoka họ nọ “wawo” na i wo evuẹ jọ nọ i wo obọ kpahe ẹme nọ a be jọ edhe-ẹme na ta. Ma tuduhọ owhẹ awọ re who se ai nọ whọ tẹ be ruẹrẹ oma kpahe kẹ Uwuhrẹ Uwou-Eroro na. Whọ sai fi ai ba uyo nọ whọ te kẹ.
A ti gbe fi iyẹrẹ ẹgbukpe họ Uwou-Eroro Na ha. No umuọ ukpe 2008 vrẹ, a te hai fi iyẹrẹ na họ uko-obeva orọ Odibọgba Uvie Mai gbe Yearbook na. Rekọ, wọhọ epanọ ma ta no vẹre na, izoẹme efa e te jọ uvitha uwuhrẹ na. Dede nọ a te hai wuhrẹ enana evaọ obọ ewuhrẹ hẹ, ma tuduhọ owhẹ awọ re whọ roma totọ se ai. Enana yọ emu abọ-ẹzi re nọ i no obọ ‘ọrigbo nọ o wo ẹrọwọ avọ areghẹ na’ ze.—Mat. 24:45-47.
Orọ urere, uvitha uwuhrẹ na yọ emagazini ọfa jọ họ wo ohẹriẹ no uvitha ẹgbede na. Ai ivẹ na yọ Uwou-Eroro Na Nọ U Bi Whowho Uvie Jihova. I wo edhe-ẹme jọ evaọ ẹwẹ-obe avọ 2 nọ o bi dhesẹ ẹjiroro Uwou-Eroro Na. Evaọ Uwou-Eroro nọ a be hae gba kugbe kukpe kukpe na, ivẹ na e te hae jariẹ. A te hae rehọ eme no ivẹ na ze fihọ uzoẹme na “Kọ Whọ Kareghẹhọ?,” onọ o te hae jọ uvitha uwuhrẹ na.
Anwọ 1879, Uwou-Eroro Na o bi ro whowho uzẹme na kpahe Uvie Ọghẹnẹ makọ evaọ etoke ẹmo, ọbẹwẹ, gbe ukpokpoma. Ma lẹ nọ avọ obufihọ Jihova o te gbẹ jọ ere evaọ oghẹrẹ nọ a nwene i rie fihọ na. Ma tẹ jẹ lẹ nọ Jihova ọ ghale owhẹ nọ who bi se ei na, re who wo erere no uvitha uwuhrẹ orọ Uwou-Eroro Na ze.