Inwene Obọdẹ Evaọ Emagazini Uwou-Eroro Na!
1 Evaọ omoke jọ nọ u kpemu na, owhowhovia obọdẹ jọ o te ikoko kpobi obọ: Muhọ no January 2008 vrẹ, Uwou-Eroro Na u ti wo uvitha ivẹ oghẹrẹ sa, ọjọ rọkẹ ẹgbede, ọnọ o kiọkọ rọkẹ ahwo nọ a rrọ ukoko na! Ẹsejọhọ whọ rrọ udu ra roro nọ: ‘Ẹvẹ emagazini ivẹ na i ti ro wo ohẹriẹ? Irere vẹ e rrọ Uvitha Ẹgbede gbe Uvitha Uwuhrẹ na nọ ma re wo? Kọ eware ekpokpọ jọ e riẹ nọ ma re rẹro rai?’
2 Epanọ I ro Wo Ohẹriẹ: Uvitha ọsosuọ amara na a ti sei Uvitha Ẹgbede. A ti kere izoẹme uvitha nana kpobi kẹ ahwo nọ a rrọ ukoko ho. Uvitha avivẹ Uwou-Eroro na o te jọ Uvitha Uwuhrẹ yọ ma ti fi ọnana họ ada ha. Izoẹme uwuhrẹ erọ amara na e te jariẹ eva gbe izoẹme efa nọ i fo kẹ idibo Jihova nọ e roma mudhe no. Uvitha Ẹgbede Uwou-Eroro Na u ti si Isẹri Jihova urru, rekọ o te mae jọ oware isiuru kẹ ahwo nọ a rrọ Isẹri Jihova ha nọ e rẹ sae rọwo eme Ebaibol na. Evaọ abọdekọ riẹ, a ti gbe kere Awake! kẹ oghẹrẹ ahwo kpobi, makọ egba-avro gbe ahwo nọ a rrọ oghẹrẹ egagọ efa kpobi.
3 Irere nọ E Riẹ: Evaọ Uvitha Uwuhrẹ na, o gbẹ te gwọlọ nọ ma rẹ fotọ eme wọhọ “ọkobaro” ho evaọ oghẹrẹ nọ ahwo nọ a rrọ ukoko ho a re ro wo otoriẹ rai. Eme nọ e te jọ uvitha uwuhrẹ na kpobi e te jọ rọ kẹ Isẹri Jihova gbe emọ-uwuhrẹ Ebaibol nọ i bi wo ẹnyaharo abọ-ẹzi. Kọ ẹvẹ kpahe Uvitha Ẹgbede na? Nọ izoẹme nọ e te jariẹ gbe oghẹrẹ nọ a ro kere iei o te jọ kẹ ẹgbede na, ohwo nọ ọ rrọ Osẹri Jihova ha o ti wo omaweromẹ nọ o re ro sei no oka toka. Rekọ Osẹri Jihova kpobi o ti wo erere no ese uvitha kpobi ze. Fikinọ Uwou-Eroro ovo ma te hai fihọ ada kugbe Awake! evaọ amara kpobi, ma ti wo uvẹ ziezi nọ ma rẹ rọ ruẹrẹ ona họ nọ ma ti ro fi ai họ ada.
4 Eware Ekpokpọ: U wo eware ekpokpọ jọ nọ a ruẹrẹ họ kẹ Uvitha Ẹgbede ọrọ Uwou-Eroro Na. A ti ru abọ jọ họ iẹe nọ a te hae jọ ru igogo iwuhrẹ Ebaibol na vẹ evaọ edhere ọlọlọhọ. Abọfa riẹ o ti dhesẹ epanọ Ebaibol na ọ sai ro fiobọhọ kẹ iviuwou. Abọ jọ nọ u ti fiobọhọ kẹ izoge na kiẹ Ebaibol na ziezi ọ te jariẹ re. Ukere kpobi u ti wo uzoẹme nọ o te ta kpahe ugogo eria Ebaibol jọ nọ u ti wuhrẹ omai kpahe ekwakwa-aghae Jihova.
5 Ma be lẹ se Jihova re ọ ghale ọruẹrẹfihotọ ọkpokpọ ọrọ Uwou-Eroro Na. Ajọ emagazini Uwou-Eroro Na gbe Awake! i fiobọhọ kẹ ahwo udu-oruọzewọ efa buobu yo emamọ usi na.—Mat. 10:11.