Rọkẹ Enọ I Bi Se Uwou-eroro Na

EVA e were omai nọ ma be rọ j’owhai riẹ inọ muhọ no uvitha nana vrẹ, ma ti ru inwene jọ evaọ emagazini Uwou-Eroro Na. Re ma tẹ ta kpahe inwene nọ ma te jariẹ ru, joma kake fodẹ eware nọ e te gbẹ jọ epaọ anwẹdẹ.

Odẹ emagazini na, Uwou-Eroro Na Nọ U Bi Whowho Uvie Jihova, u ti nwene he. Fikiere, Uwou-Eroro Na o te gbẹ rọ oruaro kẹ Jihova wọhọ Ọghẹnẹ uzẹme jẹ rehọ emamọ usi Uvie riẹ sasa enọ i bi sei oma. Izoẹme nọ e rrọ ẹwẹ-obe avọ 5 rite orọ avọ 9 evaọ uvitha nana e ta kpahe Uvie yena gbe oke nọ o te rọ ze. U te no ere no, Uwou-Eroro Na u ti gbe fi obọ họ kẹ ahwo fi ẹrọwọ họ Jesu Kristi, dhesẹ uzẹme Ebaibol via, jẹ rehọ ẹkwoma eruẹaruẹ Ebaibol kẹ otofa eware nọ e rrọ akpọ via, wọhọ epanọ o be hai ru anwọ ikpe buobu ze na.

Kọ inwene vẹ e be te jariẹ? Joma ta kpahe emamọ eware ekpokpọ jọ nọ e te hae romavia evaọ uvitha emagazini nana nọ ma te hai wo isiane ẹgbukpe evaọ ẹvẹrẹ Isoko na.a

Oghẹrẹ izoẹme sa-sa nọ i re ru ohwo roro didi e te romavia evaọ uvitha nana. Uzoẹme na “Kọ Whọ Riẹ?” o te ta kpahe eware sa-sa nọ i ti fi obọ họ kẹ omai wo otoriẹ uvevẹ ikuigbe Ebaibol sa-sa. Uzoẹme na “Si Kẹle Ọghẹnẹ,” u ti fi elo họ eware nọ ma rẹ sae jọ igogo eria Ikereakere na jọ wuhrẹ kpahe Jihova. Uzoẹme na “Enọ I bi s’Ebe Mai A Nọ Inọ,” o te hae kẹ iyo enọ kpahe Ebaibol na nọ ahwo a rẹ nọ ẹsikpobi. Wọhọ oriruo, u re gbe ahwo buobu unu inọ, “Kọ Uvie Ọghẹnẹ o rrọ udu ra?” Whọ te ruẹ uyo onọ nana evaọ ẹwẹ-obe avọ 13.

A ti fi izoẹme sa-sa họ iẹe nọ i ti fi obọ họ kẹ iviuwou. Uzoẹme na “Igogo Eware nọ E rẹ Lẹliẹ Uviuwou Wo Evawere,” o te hae jariẹ. O te ta kpahe ebẹbẹ sa-sa nọ e rẹ romavia evaọ uviuwou je dhesẹ epanọ ehri-izi Ebaibol e sai ro fi obọ họ ku ai họ. Uzoẹme na “Wuhrẹ Emọ Ra” o te jariẹ re nọ esẹgbini avọ emọ rai a re se kugbe. Uzoẹme uwoma ofa jọ họ “Rọkẹ Izoge Na,” onọ a ru kẹ izoge na nọ a rẹ rọ kiẹ Ebaibol na riwi.

Izoẹme efa jọ e te hae romavia re. Evaọ uzoẹme na “Raro Kele Ẹrọwọ Rai,” a te ta udu họ omai awọ re ma lele oriruo ahwo nọ a ti gbiku rai no Ebaibol ze. Wọhọ oriruo, evaọ ẹwẹ-obe avọ 18 rite 21 ọrọ uvitha nana, who ti se iku ejaja jọ kpahe Eleaja ọruẹaro na jẹ ruẹ epanọ ma sae rọ raro kele ẹrọwọ riẹ. Evaọ uzoẹme na, “Ileta nọ I No Obọ . . . Ze,” ma ti yo mi imishọnare gbe amọfa wariẹ akpọ na soso họ nọ a gbiku omarai. Uzoẹme na “Oware nọ Ma Wuhrẹ mi Jesu,” o te rehọ edhere ọlọlọhọ dhesẹ igogo iwuhrẹ Ebaibol via.

U mu omai ẹro inọ, Uwou-Eroro Na o te gbẹ were ahwo nọ a bi sei nọ a wo adhẹẹ kẹ Ebaibol na jẹ gwọlọ riẹ oware nọ Ebaibol i gine wuhrẹ. Ma rẹro nọ emagazini nana u ti ru ẹgwọlọ ra kẹ uzẹme Ebaibol gba.

ENỌ I KERE I RIE

[Oruvẹ-obotọ]