Uzoẹme Okpokpọ Nọ A Kere Rọkẹ Ẹtohọ Ebe-Iwuhrẹ Ebaibol
1. Uzoẹme okpokpọ vẹ a ti fihọ uvitha ẹgbede orọ Uwou-Eroro Na?
1 Uzoẹme okpokpọ jọ nọ u ti fi obọ họ kẹ omai to ebe iwuhrẹ Ebaibol họ o te hae romavia evaọ Uwou-Eroro ẹgbede na. Evaọ Isoko, onana u ti muhọ evaọ uvitha April-June. A ti sei “Wuhrẹ No Ẹme Ọghẹnẹ Ze.” Dede nọ o te were ahwo jọ re a se eme nọ a ti kere fihọ iẹe kamara kamara, a ru rie re ma rehọ iẹe lele ahwo ta ẹme.
2. Oghẹrẹ vẹ a te hae ruẹrẹ izoẹme nana họ?
2 Oghẹrẹ nọ ọ te jọ: Uzoẹme na gbe izoẹme esese na e te jọ enọ nọ a rẹ sae nọ ohwo nọ ma be ta usiuwoma kẹ. A kere eme ikere buobu via ha, re ohwo na ọ sai wuhrẹ no Ebaibol na ze ovavo. Idhe-eme na e rrọ kpẹkpẹe re a sae jọ makọ unuẹthẹ se ai. A jọ uzoẹme kpobi fodẹ obe ọ Ebaibol Wuhrẹ na re whọ sai nwene uwuhrẹ na kpohọ obe yena nọ o tẹ lọhọ.
3. Nọ ma tẹ be ta usiuwoma nuwou ruọ uwou, ẹvẹ ma sae rọ rehọ uzoẹme okpokpọ na tuọ obe-uwuhrẹ họ evaọ unuẹthẹ?
3 Epanọ A rẹ rọ Rehọ iẹe Ta Usiuwoma: Nọ who te bi fi emagazini họ ada, whọ sae nọ onọ nọ o rẹ lẹliẹ ohwo wo isiuru kpahe uzoẹme emagazini na. Wọhọ oriruo, Uwou-Eroro ọ January 1 o ta kpahe epanọ Ebaibol na u wuzou te. Whọ sae nọ inọ: “Kọ who roro nọ Ebaibol na yọ Ẹme Ọghẹnẹ manikọ obe owoma jọ gheghe? [Kuvẹ kẹ uyo.] Me wo obọdẹ ovuẹ jọ kpahe ẹme nana.” Dhesẹ onọ ọsosuọ na kẹe, who ve se edhe-ẹme ọsosuọ na, je se ikere nọ a fodẹ na. Wariẹ nọ onọ na re ohwo na ọ kpahe ẹme. Epanọ uyero na o rrọ u re dhesẹ unu idhe-eme nọ whọ rẹ ta kpahe, jẹ nọ ohwo na enọ nọ i wo inọmba na. Taure whọ tẹ nya vrẹ, n’onọ nọ o kele ọnọ wha ta kpahe na, re wha je fi oke họ nọ who ti ro zihe. Zihe koka koka re whọ ta kpahe uzoẹme na bẹsenọ uvitha ọfa u re kpozi. Edhere ọfa họ, whọ sae ta kẹ ohwo ovavo kpahe epanọ ma re ru obe-uwuhrẹ kugbe ohwo. Kẹsena whọ vẹ rehọ emagazini na dhesẹ epanọ a re ru ei.
4. Ẹvẹ ma sae rọ rehọ izoẹme nana ruiruo nọ ma te bi ru izihebro?
4 Whọ sae jẹ rehọ uzoẹme okpokpọ nana ta ẹme kugbe ahwo nọ a rọ ejẹ emagazini gbe izihebro ra efa. Whọ sae ta nọ: “Oghẹrẹ uzoẹme okpokpọ jọ o rrọ Uwou-Eroro Na. Jọ me dhesẹ epanọ a re ro wuhrẹ iẹe kẹ owhẹ.” Ma rẹro inọ izoẹme nana i ti fi obọ họ kẹ ahwo buobu “riẹ uzẹme na.”—1 Tim. 2:4.