‘Yọrọ Iruo Nọ Who Wo No Obọ Ọnowo Na Ze’

‘Yọrọ iruo nọ who wo no obọ Ọnowo na ze gba.’—KỌL. 4:17.

1, 2. Iruo ilogbo vẹ Ileleikristi a re ru ro fiobọhọ kẹ ahwo?

MA WO iruo ilogbo nọ ma re ru ro fiobọhọ kẹ ahwo nọ e wariẹ omai họ. Oware nọ a salọ enẹna u ti dhesẹ sọ a te zọ hayo a ti whu evaọ ‘uye ulogbo na.’ (Evia. 7:14) Ọnọ o kere obe Itẹ na ọ ta nọ: “Hrou ahwo nọ a bi mu nya e fakpe; mu ahwo nọ a be họrọ ruọ uwhu rehọ.” Nọ ẹme aroza vievie he! Ma gbẹ vẹvẹ ahwo unu kpahe onọ a rẹ salọ họ, azẹ rai ọ te jọ omai uzou. Oria ikere ọvo na o ta haro nọ: “Otẹrọnọ whọ tanọ, ‘Ri, ma riẹ onana ha.’ Kọ ọnọ o bi riwi udu na ọ gbẹ riẹ e? Kọ ọnọ ọ be sẹro ẹzi ra ọ gbẹ riẹ e; kọ gbẹ hwosa kẹ ohwo wọhọ epanọ iruo ohwo e rọ?” O rrọ vevẹ inọ idibo Jihova a rẹ sae ta ha inọ ‘a riẹ’ okpẹtu nọ ahwo a rẹriẹ ova ku hu.—Itẹ 24:11, 12.

² Jihova o rri uzuazọ ghaghae. Ọ be tuduhọ idibo riẹ awọ re a dawo ẹgba rai kpobi ro fiobọhọ kẹ ahwo buobu re a zọ. Odibo Ọghẹnẹ kpobi ọ rẹ ta ẹme Ọghẹnẹ kẹ ahwo hrọ, onọ o rẹ sai siwi uzuazọ rai. Iruo mai e wọhọ iruo ororoke nọ ọ rẹ vẹvẹ ahwo unu nọ ọ tẹ kparo ruẹ okpẹtu. Ma gwọlọ nọ azẹ ahwo nọ a rẹriẹ ovao ku uwhu o jọ uzou mai hi. (Izik. 33:1-7) Fikiere, o roja gaga re ma ruabọhọ ‘ewhowho ẹme na.’—Se 2 Timoti 4:1, 2, 5.

3. Eme ma te jọ uzoẹme nana gbe ivẹ nọ i lele i rie na wuhrẹ?

³ Uzoẹme nana o te ta kpahe epanọ whọ sai ro fi ebẹbẹ nọ whọ rẹ nyaku evaọ odibọgba na kparobọ, gbe epanọ whọ sai ro fiobọhọ kẹ ahwo buobu zọ. Uzoẹme nọ u lele i rie o te ta kpahe epanọ whọ sai ro wo ona nọ who re ro wuhrẹ amọfa ẹme Ọghẹnẹ gbagba. Ma te jọ uzoẹme uwuhrẹ avesa na ruẹ iyẹrẹ uduotahawọ nọ enọ i bi whowho ovuẹ Uvie na evaọ akpọ na soso a bi wo. Rekọ, taure ma tẹ ta ẹme kpahe enana, u re woma re ma kake ta kpahe eware jọ nọ e lẹliẹ edẹ mai na yoma t’enẹ.

Oware nọ Ahwo Buobu A Jẹ Kare Ẹruore

4, 5. Ebẹbẹ vẹ ahwo a rẹriẹ ovao dhe, kọ ẹvẹ i bi kpomahọ uzuazọ rai?

⁴ Eware nọ e rrọ akpọ via i dhesẹ inọ etoke “urere akpọ na” ma be rria na, gbe nnọ ekuhọ uyerakpọ nana o kẹle gaga no. Ahwo-akpọ a be ruẹ eware nọ Jesu avọ ilele riẹ a ta nọ e te via nọ ma te rọ riẹ nọ “edẹ urere” na ma rrọ na. “Uye” o be bẹ ahwo gaga fiki ẹmo, ohọo, etọ nọ i bi nuhu, gbe ebẹbẹ efa. Ahwo nọ a re koko uzi hi gbe ahwo oriobọ a da oria kpobi fia. Makọ ahwo nọ a be daoma koko izi Ọghẹnẹ dede, “oke ẹbẹbẹ” na u bi kpomahọ ae.—Mat. 24:3, 6-8, 12; 2 Tim. 3:1-5.

⁵ Rekọ, ahwo-akpọ buobu a riẹ oware nọ ebẹbẹ nọ e rrọ akpọ na i dhesẹ hẹ. Fiki onana ibuobu a be ruawa omarai gbe iviuwou rai. Uwhu ahwo nọ a you gbe idabolo efa e be wha idhọvẹ se ahwo buobu. Fikinọ ahwo nana a riẹ oware nọ o be lẹliẹ eware itieye na via ha, yọ a riẹ oria nọ a sai jọ duku ifue rai hi, o wha riẹ ze nọ a rọ kare ẹruore.—Ẹf. 2:12.

6. Emejabọ nọ “Babilọn ologbo” na ọ gbẹ re sai fiobọhọ kẹ ahwo riẹ hẹ?

⁶ “Babilọn ologbo,” koyehọ uvie-ulogbo egagọ erue akpọ-soso, o re wha uvumọ omosasọ se ahwo-akpọ họ. Ukpoye, “idi ẹnwaeobro riẹ” e lẹliẹ ahwo buobu reghe siọ Ọghẹnẹ ba no. Ofariẹ, bi ru wọhọ ogberẹ, egagọ erue e lẹliẹ “ivie akpọ na” họ no jẹ be kpọ ae, be rehọ iwuhrẹ erue gbe iruẹru imizi rọ bẹbẹ ahwo buobu họ re a wei lele isu rai. Egagọ erue e rehọ edhere utiona wo ẹgba no be kpọ ahwo buobu, yọ evaọ oke ọvona, a siọ iwuhrẹ uzẹme no riẹriẹriẹ.—Evia. 17:1, 2, 5; 18:23.

7. Eme ọ be te via kẹ ibuobu ahwo, kọ ẹvẹ ma sai ro fiobọhọ kẹ ejọ rai?

⁷ Jesu o wuhrẹ inọ ibuobu ahwo a be nya edhere ọkẹkẹe na, onọ u bi su kpohọ ọraha. (Mat. 7:13, 14) Ahwo jọ a rrọ edhere ọkẹkẹe yena fikinọ a keke aro fihọ siọ iwuhrẹ uzẹme nọ e rrọ Ebaibol, rekọ ibuobu nọ e rrọ edhere yena yọ enọ isu egagọ a viẹ họ hayo wuhrẹ thọ no kpahe oware nọ Jihova ọ ginẹ gwọlọ mi ai. Ẹsejọhọ ejọ e rẹ sai kurẹriẹ otẹrọnọ a rehọ Ikereakere na fiobọhọ kẹ ae. Rekọ, enọ e dhẹ no Babilọn Ologbo na ze he, yọ a gbẹ jẹ rọwo inọ a re ru oware nọ Ebaibol e ta ha, a ti whu evaọ etoke ‘uye ulogbo’ na.—Evia. 7:14.

Who “Seri” Usiuwoma Ota Họ Họ

8, 9. Eme Ileleikristi ikpe-udhusoi ọsosuọ a ru nọ a rẹriẹ ovao ku ọwọsuọ, kọ fikieme?

⁸ Jesu ọ ta nọ ilele riẹ a re ti whowho emamọ usi Uvie na je ru ilele. (Mat. 28:19, 20) Fikiere, n’otọ avọ otọ ze, Ileleikristi uzẹme a rri usiuwoma ota na wọhọ ugogo edhere jọ nọ a re ro yoẹme kẹ Ọghẹnẹ, gbe abọ ologbo ọrọ egagọ rai. Agbẹta nọ ilele ọsosuọ Jesu a jẹ rọ ta usiuwoma na, makọ evaọ udevie ọwọsuọ. A rẹroso Jihova re ọ kẹ ae ẹgba, jẹ lẹ inọ o fiobọhọ kẹ ae “wo aruọwha nọ a rẹ rọ ta ẹme” riẹ. Jihova o yo olẹ rai, kẹ ae ẹzi riẹ, a tẹ rehọ aruọwha ta ẹme Ọghẹnẹ.—Iruẹru 4:18, 29, 31.

⁹ Nọ ọwọsuọ na ọ ga thesiwa no, kọ ilele Jesu a siọ usiuwoma na ba ẹta? Vievie. Fiki epanọ usiuwoma nọ ikọ na a jẹ ta u je tu ae oma, isu egagọ ahwo Ju a te mu ai, kpokpa họ ae obọ, jẹ fa ae. Ghele na, ikọ na a “seri uwuhrẹ Jesu Kristi họ họ.” A ruẹ vuhumu inọ a “re yo ẹme Ọghẹnẹ vi o rọ ahwo.”—Iruẹru 5:28, 29, 40-42.

10. Edawọ vẹ Ileleikristi a be rẹriẹ ovao ku nẹnẹ, ghele na eme o rẹ sai no emamọ uruemu rai ze?

¹⁰ Nẹnẹ, ibuobu idibo Ọghẹnẹ a ri thihakọ ukpe-ugbobọ hayo uwou-odi hi fiki iruo usiuwoma ota rai. O make rrọ ere na, Ileleikristi uzẹme kpobi a be rẹriẹ ovao ku edawọ sa-sa. Wọhọ oriruo, obruoziẹ-iroro ra nọ whọ rehọ Ebaibol wuhrẹ no o rẹ sae lẹliẹ owhẹ wo uruemu nọ u wo ohẹriẹ no orọ ahwo buobu. Ibe-iruiruo, ibe emọ-isukulu, hayo erivẹ ra a rẹ sai rri owhẹ wọhọ ohwo oghẹrẹsa fikinọ whọ be rehọ ehri-izi Ebaibol yeri uzuazọ. Rekọ, jọ eme iyoma rai i whrehe owhẹ hẹ. Akpọ na ọ rrọ ebi abọ-ẹzi, rekọ Ileleikristi a re “lo wọhọ ikpẹ.” (Fil. 2:15) Ẹsejọhọ ahwo jọ nọ a wo evezi a ti muẹrohọ iruo iwoma ra a vẹ te rehọ orro kẹ Jihova.—Se Matiu 5:16.

11. (a) Didi uruemu ahwo jọ a rẹ sai dhesẹ kpahe usiuwoma ota na? (b) Ọwọsuọ vẹ Pọl ukọ na ọ rẹriẹ ovao ku, kọ uruemu vẹ o dhesẹ?

¹¹ Re ma ruabọhọ ẹta usiuwoma Uvie na, o gwọlọ nọ ma re wo udu. Ahwo jọ, makọ imoni ra dede, a rẹ sai se owhẹ ẹkoko hayo rehọ idhere efa daoma ru owhẹ whrehe. (Mat. 10:36) A kpe Pọl ukọ na ukpe-ugbobọ vrẹ ẹsiẹvo fiki usiuwoma ota riẹ. Muẹrohọ uruemu nọ o dhesẹ kpahe ọwọsuọ otiọye, nọ o kere inọ: “Nọ ma make ruẹ uye gaga, a te je ru omai omavo . . . ma wo udu eva Ọghẹnẹ mai no ma re ro dhesẹ usiuwoma Ọghẹnẹ kẹ owhai eva evie ẹbẹbẹ na ghele.” (1 Tẹs. 2:2) Evaọ uzẹme, o gwọlọ nọ Pọl o re wo udu re ọ sae ruabọhọ usiuwoma ota na okenọ a mu ei, bẹre iwu dhei oma, rehọ ekpọ fae, je fi ei họ uwou-odi no. (Iruẹru 16:19-24) Eme o kẹ riẹ udu nọ ọ rọ ruabọhọ iruo na? Isiuru egaga nọ ọ rọ gwọlọ ru iruo nọ Ọghẹnẹ ọ kẹ riẹ.—1 Kọr. 9:16.

12, 13. Ebẹbẹ vẹ inievo jọ a rẹriẹ ovao ku no, kọ ẹvẹ a sai ro fi ai kparobọ?

¹² O sae jẹ jọ bẹbẹ re ma yọrọ ajọwha mai evaọ ẹkwotọ nọ a rẹ kaki jo di ahwo họ uwou hu hayo nọ ahwo buobu a rẹ jọ kezọ kẹ ovuẹ Uvie na ha. Ma tẹ rrọ ẹkwotọ otiọye na, eme ma re ru? Ma rẹ ruẹ nọ o gwọlọ aruọwha mi omai gaga re ma sae ta usiuwoma kẹ ahwo evaọ oke gheghe. Ma rẹ sai nwene oke usiuwoma ota mai hayo daoma tẹrovi oria nọ a rẹ mai jo duku ahwo.—Wawo Jọn 4:7-15; Iruẹru 16:13; 17:17.

¹³ Ebẹbẹ efa nọ ahwo buobu a be rẹriẹ ovao ku họ owho gbe ẹyao, onọ o rẹ whae ze nọ a gbẹ sai ro w’obọ ziezi evaọ iruo usiuwoma ota na ha. Otẹrọnọ ere o rrọ kẹ owhẹ, jọ udu u no owhẹ awọ họ. Jihova ọ riẹ ẹbẹbẹ ra yọ utho nọ whọ rẹ sai ru o rẹ dae ẹro. (Se 2 Ahwo Kọrint 8:12.) Oghẹrẹ ẹbẹbẹ kpobi nọ whọ be rẹriẹ ovao ku, o make rrọ ọwọsuọ, ababọ isiuru ahwo, hayo ẹyao—rọ utho ẹgba ra ta usiuwoma na kẹ ahwo.—Itẹ 3:27; wawo Mak 12:41-44.

‘Yọrọ Iruo Odibọgba Ra’

14. Oriruo vẹ Pọl ukọ na o fihọ otọ kẹ ibe Ileleikristi, kọ ohrẹ vẹ ọ kẹ?

¹⁴ Pọl ukọ na o se odibọgba riẹ gboja gaga, ọ tẹ jẹ tuduhọ ibe Ileleikristi awọ re a ru epọvo na. (Iruẹru 20:20, 21; 1 Kọr. 11:1) Ohwo jọ nọ Pọl ọ kẹ obọdẹ uduotahawọ họ Akipọs, Oleleikristi ọrọ ikpe-udhusoi ọsosuọ. Evaọ ileta riẹ se ahwo Kọlọsi, Pọl o kere nọ: “Wha ta kẹ Akipọs re ọ yọrọ iruo nọ wha wo no obọ Ọnowo na ze gba.” (Kọl. 4:17) Dede nọ ma riẹ oghẹrẹ ohwo nọ Akipọs ọ jọ gbe uyero riẹ hẹ, ma riẹ inọ ọ jẹ iruo odibọgba na rehọ. Otẹrọnọ whẹ yọ Oleleikristi nọ ọ rehọ oma mudhe no, whọ jẹ iruo odibọgba na rehọ re. Kọ whọ be yọrọ odibọgba na re who ru ei gba?

15. Eme omaromudhe Oleleikristi o gwọlọ, kọ enọ vẹ onana o wha ze?

¹⁵ Taure ma tẹ te họ-ame, ma rehọ oma mudhe kẹ Jihova evaọ olẹ. Onana u dhesẹ inọ ma gba riẹ mu no re ma ru oreva riẹ. Fikiere, u fo re ma nọ oma mai enẹna inọ, ‘Kọ eruo oreva Ọghẹnẹ họ oware nọ o mai gine w’uzou evaọ uzuazọ mẹ?’ Ewha-iruo sa-sa e rẹ sae jariẹ nọ Jihova o rẹro rai mi omai—wọhọ ẹruorote uviuwou mai. (1 Tim. 5:8) Rekọ eme ma be rehọ oke gbe ẹgba mai nọ o kiọkọ ro ru? Didi eware ma be rọ karo evaọ uzuazọ?—Se 2 Ahwo Kọrint 5:14, 15.

16, 17. Uvẹ sa-sa vẹ izoge Ileleikristi hayo enọ ewha-iruo i bu uzou tere he a rẹ sai roro kpahe?

¹⁶ Kọ whẹ yọ uzoge Oleleikristi nọ o nwrotọ no isukulu nọ ọ gwọlọ nya no hayo omojọ u kiọkọ re who nwrotọ? Ẹsejọhọ who ri mu ewha-iruo egbẹgbẹdẹ erọ uviuwou họ ẹwọ họ. O tẹ rrọ ere, eme whọ gwọlọ nọ who re ru evaọ uzuazọ? Eme whọ te salọ nọ who re ru nọ o te k’owhẹ uvẹ ru oreva Jihova wọhọ epanọ whọ ya eyaa kẹe? Ibuobu a ruẹrẹ oke rai họ no re a sai ru iruo ọkobaro, yọ onana o wha evawere gbe evevọwẹ se ai no.—Ol. 110:3; Ọtausi. 12:1.

¹⁷ Ẹsejọhọ whẹ yọ ovrawha. Who wo iruo nọ who bi ru, rekọ u te no oma ra nọ whọ be rẹrote no, ewha-iruo e nwani bu owhẹ uzou tere he. Ababọ avro whọ be reawere iruo nọ whọ be jọ ukoko na ru wọhọ epanọ oke ra o k’owhẹ uvẹ te. Kọ o lọhọ re who wo evawere nọ e rro vi ere? Kọ who roro kpahe epanọ who re ro ru odibọgba ra kẹre no? (Ol. 34:8; Itẹ 10:22) Ekwotọ jọ e gbẹ riẹ nọ a jọ gwọlọ ahwo gaga re a sae rehọ ovuẹ uzẹme nọ o rẹ kẹ uzuazọ na nyate ahwo kpobi oma. Kọ whọ sai ru inwene jọ evaọ uzuazọ ra re whọ sai kpohọ oria nọ a mae jọ gwọlọ iwhowho Uvie?—Se 1 Timoti 6:6-8.

18. Inwene vẹ ọzae avọ aye jọ nọ a rọo obọ a ru, kọ eme o no rie ze?

¹⁸ Roro kpahe oriruo Kevin avọ Elena, enọ e rrọ ahwo America.a Wọhọ epanọ ahwo nọ a rọo no obọ a re ru evaọ oborai, a jiroro nọ a rẹ dẹ uwou. Aimava a jẹ rehọ oke rai kpobi ruiruo, fikiere o lọhọ kẹ ae re a yeri uzuazọ ọdafe. Rekọ okọ rai gbe iruo uwou rai e jẹ rehọ oke rai kpobi te epanọ a gbe je ro wo oke kẹ usiuwoma ota ha. A tẹ te ruẹ inọ a be raha enwenọ oke gbe ẹgba rai kpobi kẹ omobọ rai. Rekọ nọ a muẹrohọ uzuazọ edẹro nọ ọzae avọ aye jọ nọ e rrọ ọkobaro a bi yeri, Kevin avọ Elena a tẹ jiroro inọ a re nwene eware nọ a be rọ karo evaọ uzuazọ. Nọ a lẹ se Jihova no kẹ ọkpọvio, a tẹ zẹ uwou rai no jẹ kwa kpohọ ighẹ jọ nọ a jọ rehọ uwou. Elena o te bru oke nọ o je ro ruiruo kpẹre, o te mu iruo ọkobaro họ. Iku awere nọ aye riẹ ọ jẹ hai gbe kpahe eware nọ ọ nyaku evaọ usiuwoma, e kẹ Kevin uduotahawọ nọ ọ rọ gwọlọ iruo ubroke, o te mu iruo ọkobaro họ. Nọ oke jọ o vrẹ no, a tẹ kwa kpohọ orẹwho ekẹloma jọ nọ a jọ gwọlọ etausiuwoma gaga. Kevin ọ ta nọ: “Ma jẹ jọ orọo mai wo evawere anwẹdẹ vẹre, rekọ nọ ma rehọ iruo Ọghẹnẹ karo, evawere mai u te vi epanọ o jọ vẹre.”—Se Matiu 6:19-22.

19, 20. Fikieme ewhowho emamọ usi na o rọ rrọ iruo nọ e mai wuzou nẹnẹ?

¹⁹ Ewhowho emamọ usi na họ iruo nọ e mai wuzou nọ a be jọ otọakpọ na ru nẹnẹ. (Evia. 14:6, 7) U bi fiobọhọ evaọ erufuọ odẹ Jihova. (Mat. 6:9) Kukpe kukpe, ovuẹ Ebaibol na o bi fiobọhọ kẹ idu ahwo buobu si obọ no eware iyoma, yọ onana o rẹ sae lẹliẹ ai wo esiwo. Rekọ Pọl ukọ na ọ nọ inọ: “Ẹvẹ a re ro yo ababọ ọtusiuwoma?” (Rom 10:14, 15) O sae ginẹ jọ bẹbẹ. Kọ whọ gbẹ dawo ẹgba ra kpobi re who ru odibọgba ra gbunu?

²⁰ Edhere ọfa nọ whọ sai ro fiobọhọ kẹ ahwo riẹ oware nọ oke obẹbẹ nana u dhesẹ gbe epanọ iroro nọ a jẹ i ti kpomahọ ai te họ emamọ owuhrẹ nọ whọ rẹ jọ. Uzoẹme nọ o rrọ aro na o te ta kpahe epanọ whọ sai ro ru onana.

[Oruvẹ-obotọ]

Ẹvẹ Whọ te k’Uyo?

• Iruo vẹ Ileleikristi a re ru ro fiobọhọ kẹ ahwo?

• Ẹvẹ ma re ro thihakọ ebẹbẹ nọ ma be nyaku evaọ iruo usiuwoma ota mai?

• Ẹvẹ ma sae rọ yọrọ odibọgba nọ ma jẹ rehọ no na?

[Uwoho nọ e rrọ ẹwẹ-obe avọ 5]

O gwọlọ udu re ma ta usiuwoma evaọ etoke ọwọsuọ

[Uwoho nọ e rrọ ẹwẹ-obe avọ 7]

Eme whọ rẹ sai ru whọ tẹ be ta usiuwoma evaọ ẹkwotọ nọ ahwo a rẹ jọ kake jọ uwou hu?