Si Kẹle Ọghẹnẹ
Ọnọ O bi Rri Omai Ghaghae
“EVA mai [e sai] brukpe omai.” Ebaibol e rọ ẹkwoma ẹme yena dhesẹ inọ ẹsejọ udu mai o sae wọ omai rri omobọ mai inọ ma fioka ha. Evaọ uzẹme, udu na o rẹ sai ru omai roro ẹsikpobi inọ ma te ahwo nọ Ọghẹnẹ o re you hayo rẹrote he. Rekọ Ebaibol e kẹ omai imuẹro nọ: “Ọghẹnẹ ọ ro vi eva mai, ọ tẹ jẹ riẹ oware kpobi.” (1 Jọn 3:19, 20) Ọghẹnẹ ọ riẹ omai vi epanọ ma riẹ oma mai. Oghẹrẹ nọ o rri omai o sai wo ohẹriẹ gaga no oghẹrẹ nọ ma re rri oma mai. Kọ ẹvẹ ma ginẹ ghare te evaọ aro Jihova Ọghẹnẹ, ọnọ eriwo riẹ o muẹme na? Ma rẹ sae ruẹ uyo na evaọ ọtadhesẹ jọ nọ Jesu o ro ruiruo isiava.
Evaọ ojọ, Jesu ọ ta nọ a rẹ “zẹ emevra ivẹ ẹnini.” (Matiu 10:29, 31) Wọhọ epanọ o rrọ Luk 12:6, 7, Jesu ọ ta re nọ: “A be zẹ emevra isoi ikọpa ivẹ hẹ? Ae ọvuọvo ọ [rẹ] thọrọ ẹro eva aro Ọghẹnẹ hẹ. . . . Wha dhozọ họ; wha ghare vi emevra buobu.” Ọtadhesẹ ọkpẹkpẹe nana o wuhrẹ omai oghẹrẹ nọ Jihova o rri omomọvo idibo riẹ.
Evaọ ẹvẹrẹ Griki, ọvra nọ a re se omuedi ọye Jesu ọ fodẹ evaọ ọtadhesẹ nana, yọ e jọ usu evra nọ e mai ku nọ a jẹ hai ro there emu. U muẹro nọ Jesu ọ jẹ hae jọ eki ruẹ eyae nọ e rrọ iyogbere—ẹsejọhọ te oni obọriẹ dede—nọ e jẹ hae dẹ evra esese nana kẹ emu othere. Nọ ohwo o te wo ubigho nọ a je se assarion, onọ o kawo vi enaira ezeza oke mai na, ọ rẹ sae dẹ imuedi ivẹ. Evra nana i ku te epanọ ohwo ọ sae rọ rehọ ibigho assarion ivẹ dẹ imuedi isoi orọnikọ ene ọvo ho, a rẹ rọ ọrọ avọ isoi na ru ufihọ gheghe.
Jesu ọ ta nọ omuedi ọvuọvo ọ rẹ “thọrọ ẹro eva aro Ọghẹnẹ hẹ” hayo kiotọ obọ “emu Ọsẹ” na ha. (Matiu 10:29) Oke kpobi nọ omuedi o kiotọ, ẹsejọhọ fikinọ ọ nwa oma hayo be gwọlọ emu soro, Jihova ọ rẹ riẹ. Jihova nọ ọ ma evra nana, dedenọ ahwo a se rai gboware he na, o rri rai nọ e kawo vi eware nọ o re muẹrohọ họ. Uzẹme riẹ họ, o rri rai ghare gaga. Kọ who wo otoriẹ oware nọ o lẹliẹ Jesu kẹ ọtadhesẹ nana?
Jesu ọ jẹ hae kẹ oriruo eware jọ ro dhesẹ efa, rọ oriruo oware osese ro dhesẹ ulogbo. Wọhọ oriruo, Jesu ọ ta re nọ: “Ekọlọbe na: a rẹ kọ họ, hayo ẹkọrọ họ, a wo oho ho, hayo eru hu, rekọ Ọghẹnẹ ọ rọ ae ẹkuọ. Kọ wha gbẹ ghare vi emevra na?” (Luk 12:24) Oware nọ Jesu ọ rọ oriruo imuedi wuhrẹ na u re vevẹ: Otẹrọnọ Jihova ọ be rẹrote evra esese nana, kọ ẹvẹ ọ rẹ ginẹ rẹrote ahwo-akpọ nọ i you rie jẹ be gọe te!
Wọhọ epanọ eme Jesu i dhesẹ vevẹ na, u du fo ho re ma roro nọ ma te ahwo nọ Ọghẹnẹ nọ “ọ ro vi eva mai” na o bi muẹrohọ jẹ sẹro rai hi. Kọ o gbẹ rrọ oware omosasọ nọ ma rọ riẹ inọ Ọnọ ọ ma omai na ọ rẹ sae jọ oma mai ruẹ abọ owoma nọ ẹsejọhọ ma rẹ jọ oma mai ruẹ hẹ?
[Oria Enọ i wo Ifoto nọ e rrọ ẹwẹ-obe avọ 15]
Imuedi: © ARCO/D. Usher/age fotostock