Si Kẹle Ọghẹnẹ
Ọghẹnẹ nọ O Wo Erọvrẹ
“WHẸ, ỌNOWO, whọ vọ avọ ewoma gbe erọvrẹ.” (Olezi 86:5) Ebaibol na e rehọ ẹme omosasọ yena kẹ omai imuẹro inọ Jihova Ọghẹnẹ ọ vọ avọ erọvrẹ. Oware jọ nọ o via kẹ Pita ukọ na u dhesẹ vevẹ nọ Jihova ‘o wo erọvrẹ gaga.’—Aizaya 55:7.
Pita ọ jọ omọvo egbẹnyusu ekpekpe Jesu. Ghele na, eva aso urere taure Jesu o te ti whu, ozodhẹ ohwo-akpọ o lẹliẹ Pita thọ uzi ulogbo jọ. Kẹle oria nọ a jẹ jọ gu Jesu ẹdhọ ekueku na, Pita ọ jọ iraro ahwo vro Jesu—orọnọ ẹsiẹvo ọvo dede he rekọ isiasa soso. Nọ Pita ọ vro thahe thahe orọ avọ isiasa no, Jesu o te “kuomarẹriẹ ri Pita.” (Luk 22:55-61) Kọ whọ sae jọ iroro ra ruẹ epanọ oma o jọ Pita nọ Jesu aviẹe a gbẹro ku ohwohwo? Nọ Pita ọ ruẹ epanọ uziothọ riẹ na u kpehru te, o te “duruọ oviẹ.” (Mak 14:72) Ẹsejọhọ ukọ nọ o da te enwa inọ ọ vro Olori riẹ na ọ jẹ jọ udu roro sọ isiasa soso nọ ọ vro riẹ na u ti ru nọ ọ gbẹ te sai ro wo erọvrẹ Ọghẹnẹ hẹ.
Nọ Jesu ọ kparoma no, o te lele Pita ta ẹme jọ nọ u si avro kpobi noi udu sọ a ginẹ rọ vrẹe. Jesu ọ kpahe ẹme ọgaga ọvuọvo kẹ Pita ha, yọ o brukpei gbe he. Ukpoye, ọ nọ Pita nọ: “Who you omẹ?” Pita ọ tẹ kuyo nọ: “Ere Olori, whọ riẹ nọ me you owhẹ.” Jesu ọ tẹ ta kẹe nọ: “Kuọ imigodẹ mẹ.” Jesu ọ tẹ wariẹ onọ na, Pita ọ tẹ kuyo ovona, ẹsejọhọ avọ ẹgba nọ o fihọ iẹe. Jesu ọ tẹ ta kẹe nọ: “Thuru igodẹ mẹ.” Kẹsena Jesu ọ tẹ wariẹ onọ na orọ avọ isiasa: “[Who] you omẹ?” Fikiere “eva etẹ dha Pita,” ọ tẹ ta nọ: “Olori, [whọ] riẹ eware kpobi; whọ riẹ nọ me you owhẹ.” Jesu ọ tẹ ta kẹe nọ: “Kuọ igodẹ mẹ.”—Jọn 21:15-17.
Eme ọ lẹliẹ Jesu nọ Pita enọ nọ ọye omariẹ ọ riẹ iyo rai no? Jesu ọ rẹ sae riẹ eva ohwo, fikiere ọ riẹ nọ Pita o you rie. (Mak 2:8) Jesu ọ nọ enọ yena re Pita o wo uvẹ nọ ọ rẹ rọ rehọ unu riẹ ta isiasa inọ o gine you Jesu. Ẹme nọ Jesu ọ kpahe kẹ Pita inọ: “Kuọ imigodẹ mẹ. . . . Thuru igodẹ mẹ. . . . Kuọ igodẹ mẹ,” o kẹ ukọ na imuẹro inọ Jesu o gbe fi eva họ iẹe. O ginẹ rrọ ere keme okpoware Jesu o mu họ Pita obọ na—ẹruọsa ilele eghaghae Riẹ nọ e wọhọ uthuru kẹe. (Jọn 10:14, 15) Udu u gine kie Pita vi nọ ọ riẹ nọ Jesu o gbe fi eva họ iẹe!
Avro ọ riẹ hẹ, Jesu ọ rọvrẹ ukọ nana nọ oware nọ o ru thọ o da gaga na. Nọ idhere gbe iruemu aghae Ọsẹ riẹ i dhesẹ oma via evaọ oma Jesu na, ma rẹ sae ta avọ udu inọ Jihova ọ rọvrẹ Pita re. (Jọn 5:19) Ọ rẹ keke obọ erọvrẹ hẹ, Jihova yọ Ọghẹnẹ nọ o wo ohrọ jẹ “vọ avọ . . . erọvrẹ.” Kọ oyena o gbẹ rrọ oware omosasọ?