Oware Nọ Ma Wuhrẹ Mi Jesu

Kpahe Epanọ U Fo nọ Ma re Yerikugbe Amọfa

Fikieme U ro Fo re Ma Jọ Wowou?

Kọ whọ be hae jọ wowou nọ ahwo a tẹ maki dhesẹ evega kẹ owhẹ? Ma tẹ gwọlọ raro kele Jesu, o gba omai họ nọ ma rẹ jọ wowou kẹ ahwo nọ a mukpahe omai dede. Jesu ọ ta nọ: “Wha te you enọ i you owhai, [didi] erere wha ja riẹ wo? Makọ erahaizi i you enọ i you rai. . . . Rekọ wha you ewegrẹ rai . . . , wha rẹ te jọ emọ Ologbo Oride na keme o you enọ e riẹ uyere he gbe ahwo yoma.”—Luk 6:32-36; 10:25-37.

Fikieme U je Fo re Ma Hae rọ Vrẹ Amọfa?

Ma tẹ thọ uzi, ma rẹ gwọlọ nọ Ọghẹnẹ ọ rọ vrẹ omai. Jesu o wuhrẹ omai inọ u fo re ma lẹ kẹ erọvrẹ Ọghẹnẹ. (Matiu 6:12) Dede na, Jesu ọ ta inọ epanọ ma rọ vrẹ amọfa te, ere Ọghẹnẹ ọ te rọ vrẹ omai te. Ọ ta nọ: “Wha tẹ rọ vrẹ e nọ iru owhai thọ, Ọsẹ rai nọ ọ rọ obọ odhiwu ọ rẹ rọ iruthọ rai vrẹ owhai re; rekọ wha gbẹ rọ iruthọ ahwo vrẹ ae he, Ọsẹ rai ọ rẹ rọ iruthọ rai vrẹ owhai gbe he.”—Matiu 6:14, 15.

Ẹvẹ evawere e sae rọ jọ uviuwou?

Dede nọ Jesu ọ rọo ho, ma rẹ sai wuhrẹ eware buobu mi ei kpahe oghẹrẹ nọ a re ro ru evawere jọ uviuwou. Ọ rehọ ẹmeunu gbe uruemu riẹ fi emamọ oriruo hotọ kẹ omai. Muẹrohọ iriruo esa nọ e rrọ obotọ na:

1. Ọzae uwou-orọo o re you aye riẹ wọhọ ugboma obọriẹ. Jesu o fi oriruo onana hotọ kẹ ezae uwou-orọo. Ọ ta kẹ ilele riẹ nọ: “Mẹ kẹ owhai uzi okpokpọ, nọ, whai ohwo o you ohwo.” Ẹvẹ ma re you ohwohwo te? Jesu ọ ta nọ: “Wọhọ epanọ me you owhai.” (Jọn 13:34) Ebaibol e rehọ ehri-uzi nana ta ẹme kẹ ezae inọ: “Whai ezae na, wha you eyae rai, wọhọ epanọ Kristi o you ukoko riẹ, ọ jẹ rehọ oma obọriẹ kẹe, Ere re u fo nọ ezae na i re you eyae rai wọhọ oma obọrai. Ọnọ o you aye riẹ o you oma obọriẹ. Keme ohwo ọvo o re mukpahe oma obọriẹ hẹ, rekọ ọ rẹ hẹ kuọ oma riẹ jẹ sẹro riẹ, wọhọ epanọ Kristi o ru ukoko na.”—Ahwo Ẹfẹsọs 5:25, 28, 29.

2. Ọrivẹ orọo rai ọvo imava-orọo a rẹ tẹrovi kẹ ẹgwọlọ owezẹ. Re a wọ isiuru owezẹ kpohọ otafe orọo yọ uziothọ wọso Ọghẹnẹ, yọ o rẹ raha evawere uviuwou. Jesu ọ ta nọ: “Wha ri se . . . ‘Fiki onana ọzae ọ jẹ se ọsẹ gbe oni riẹ ba o ve kuomagbe aye riẹ, ai ivẹ na a vẹ te jọ uwo ovo’? Fikiere a gbẹrọ ivẹ hẹ rekọ ọvo. Fikiere onọ Ọghẹnẹ o kugbe no, a jọ ohwo ọvo ọ hẹriẹ e he. . . . Whaọ mẹ ta kẹ owhai, Kohwo kohwo nọ o siobọno aye riẹ o gbẹrọ fiki ẹnwae-obro ho, ọ jẹ rehọ ọfa, o bruẹnwae.”—Matiu 19:4-9.

3. Emọ a rẹ roma kpotọ kẹ esẹgbini rai. Dede nọ Jesu ọ jọ gbagba yọ ọsẹgboni riẹ a gba ha, o yoẹme kẹ ai evaọ okenọ ọ jọ ọmaha. Ebaibol e ta kpahe Jesu evaọ okenọ ọ jọ ikpe ikpegbivẹ inọ: “Ọ ye avọ ae [ọsẹgboni riẹ] a . . . kpozi obọ Nazarẹt, o te yo ẹme rai.”—Luk 2:51; Ahwo Ẹfẹsọs 6:1-3.

Fikieme u je fo re ma fi ehri-izi enana hiruo?

Jesu ọ ta kẹ ilele riẹ kpahe eware nọ o wuhrẹ i rai na inọ: “Wha tẹ [riẹ] eware nana wha te ru ai, wha re wo oghale.” (Jọn 13:17) Re ma sae jọ uvi Ileleikristi, o gwọlọ nọ ma re fi ehrẹ nọ Jesu ọ kẹ omai kpahe oghẹrẹ nọ u fo nọ ma re ro lele amọfa yeri hiruo. Ọ ta nọ: “Onana ahwo kpobi a jẹ riẹ nọ whai ilele mẹ re whai ohwo o te you ohwo.”—Jọn 13:35.

Rọkẹ evuẹ efa, rri uzou avọ 14 evaọ obe na Eme Ebaibol na

O Gine Wuhrẹ?a

[Oruvẹ-obotọ]

[Uwoho nọ e rrọ ẹwẹ-obe avọ 18, 19]

Ọtadhesẹ Jesu ọrọ ọmọ ogbọfariẹ na u wuhrẹ omai epanọ ẹwo gbe erọvrẹ i wuzou te.—Luk 15:11-32

[Uwoho nọ e rrọ ẹwẹ-obe avọ 19]

U fo re imava-orọo a tẹrovi ọrivẹ orọo rai ọvo kẹ ẹgwọlọ owezẹ