Oware Nọ Ma Wuhrẹ Mi Jesu

Kpahe Uzuazọ Uviuwou

Oghẹrẹ eriwo vẹ kpahe orọo u re ru uviuwou wo evawere?

Orọo yọ ọruẹrẹfihotọ nọ u no obọ Ọghẹnẹ ze. Nọ a nọ Jesu sọ u kiehọ re a fa orọo, Jesu ọ kuyo nọ: “Wha ri se nọ, ọnọ ọ ma rae eva emuhọ ọ mae ọzae gbe aye, ọ tẹ ta nọ, ‘Fiki onana ọzae ọ jẹ se ọsẹ gbe oni riẹ ba o ve [kuomagbe] aye riẹ, ai ivẹ na a vẹ te jọ uwo ovo’? Fikiere a gbẹrọ ivẹ hẹ rekọ ọvo. Fikiere onọ Ọghẹnẹ o kugbe no, a jọ ohwo ọvo ọ hẹriẹ e he. . . . Kohwo kohwo nọ o siobọno aye riẹ o gbẹrọ fiki ẹnwae-obro ho, ọ jẹ rehọ ọfa, o bruẹnwae.” (Matiu 19:4-6, 9) Nọ imava-orọo a te bi lele ohrẹ Jesu na je yeri uzuazọ nọ a sai ro fi eva họ ohwohwo, uviuwou na kpobi u re wo evawere gbe ududhomẹ.

Fikieme uyoyou kẹ Ọghẹnẹ o rẹ rọ wha evawere se uviuwou?

Jesu ọ ta nọ: “Whọ rẹ rehọ eva ra kpobi, gbe ẹzi ra kpobi, gbe iroro ra kpobi, you Ọnowo na Ọghẹnẹ ra. Onana họ ujaje ulogbo gbe o nọ o rọ aro.” Ovẹ họ ujaje avivẹ nọ o mae rro? Jesu ọ ta nọ: “You omọfa [te ahwo nọ a mae kẹle owhẹ—ahwo uviuwou ra] epanọ who you oma ra.” (Matiu 22:37-39) Fikiere, ugogo oware nọ o rẹ wha evawere se uviuwou họ emamọ usu nọ a re wo kugbe Ọghẹnẹ, keme uyoyou kẹ Ọghẹnẹ o rẹ wọ omai you amọfa.

Ẹvẹ ọzae-avọ-aye a sai ro ru eva were ohwohwo?

Ezae i re ru eva were eyae rai nọ a te bi lele oriruo Jesu. O you jẹ lahiẹ oma kẹ ukoko na, ọnọ ọ wọhọ aye kẹe. (Ahwo Ẹfẹsọs 5:25) Jesu ọ ta nọ: “Ọmọ ohwo ọ ze re a gba odibo kẹ e he, rekọ ọ rẹ gba odibo.” (Matiu 20:28) Jesu ọ jẹ hai daro ku hayo gba orọ udu riẹ họ ahwo nọ i je lele iei hi, rekọ ọ jẹ hae sasa ae oma. (Matiu 11:28) Fikiere, u fo re whai ezae wha rẹrote uviuwou rai evaọ edhere ẹwo nọ o rẹ wha erere se uviuwou na soso.

Eyae e rẹ sai wuhrẹ no oriruo Jesu ze re. Ebaibol e ta nọ: “Ọghẹnẹ . . . o wo uzou Kristi.” O tẹ jẹ ta nọ: “Ọzae ọye o wo uzou aye riẹ.” (1 Ahwo Kọrint 11:3) Jesu ọ rehọ e riẹ inọ u si ọghọ noi oma ha re ọ romakpotọ kẹ Ọghẹnẹ. O wo adhẹẹ odidi kẹ Ọsẹ riẹ. Jesu ọ ta nọ: “Me bi ru eware nọ e be were iẹe kẹse kẹse.” (Jọn 8:29) Aye nọ ọ rẹ rehọ fiki adhẹẹ gbe uyoyou nọ o wo kẹ Ọghẹnẹ roma kpotọ kẹ ọzae riẹ ọ rẹ wha evawere se uviuwou riẹ.

Eme esẹgbini a rẹ sai wuhrẹ no oghẹrẹ nọ Jesu o rri emaha ze?

Jesu ọ raha oke kugbe emaha, yọ o wo isiuru kpahe iroro gbe ọdawẹ rai. Ebaibol e ta nọ: “Jesu o te se [emọ na] rehọ, anọ, ‘Wha siọ emọ esese na ba re a bru omẹ ze.’” (Luk 18:15, 16) Ẹdẹjọ nọ emaha jọ a je jiri Jesu, ahwo jọ a tẹ whọku ai. Rekọ Jesu o jiri emọ na, ọ tẹ ta kẹ ahwo nọ a jẹ whọku ae na inọ: “Wha ri se he [inọ], ‘Wha rẹ rehọ ejiro nọ o no unu emaha gbe emọ unuevie [ze]’?”—Matiu 21:15, 16.

Eme emaha e rẹ sai wuhrẹ mi Jesu?

Jesu o fi emamọ oriruo ọrọ isiuru kpahe eware abọ-ẹzi hotọ kẹ emaha na. Nọ ọ jọ ikpe ikpegbivẹ, a rue riẹ “evaọ uwou egagọ-ode, ọ keria udevie iwuhrẹ na, be kezọ eme rai, jẹ nọ ae enọ.” Eme o no onana ze? “Ẹriẹ gbe eyo riẹ o te gbe enọ i yo rie i kpobi enu.” (Luk 2:42, 46, 47) Ghele na, Jesu ọ jẹ kpare oma kpehru fiki eriariẹ nọ o wo ho. Ukpoye, u ru nọ ọ jẹ rọ rehọ adhẹẹ kẹ ọsẹgboni riẹ. Ebaibol e ta nọ: “O [je] yo ẹme rai.”—Luk 2:51.

Rọkẹ evuẹ efa, rri uzou avọ 14 orọ obe na Eme Ebaibol na O Gine Wuhrẹ?a

[Oruvẹ-obotọ]