Raro Kele Jesu—Gọ Ọghẹnẹ Evaọ Edhere Nọ O Rẹ Were Iẹe
Ọghẹnẹ ọ be rehọ uyoyou zizie ahwo no “erẹwho kpobi ze, erua gbe ahwo gbe erọo-unu” re a te gọe. (Evia. 7:9, 10; 15:3, 4) Ahwo nọ e jẹ uzizie nana rehọ a rẹ ruẹ “eru ỌNOWO” na. (Ol. 27:4; 90:17) Wọhọ ọso-ilezi na, a be kpare urru rai kpehru jiri Ọghẹnẹ, be ta nnọ: “[Joma] gọ e, ma kiekpotọ, re ma diguẹ obọ aro ỌNOWO, ọnọ ọ ma omai!”—Ol. 95:6.
Egagọ nọ E Rẹ Were Ọghẹnẹ
Jesu nọ ọ rrọ ọmọ ọvo Ọghẹnẹ, o wo uvẹ lelele nọ o re ro wuhrẹ kpahe oghẹrẹ nọ Ọsẹ riẹ o re roro, ehri-izi riẹ, gbe itee riẹ. Oye jabọ nọ Jesu ọ sae rọ rehọ ududu dhesẹ emamọ edhere nọ a rẹ rọ gọ Ọghẹnẹ. Ọ ta nnọ: “Mẹ họ edhere na, gbe uzẹme, gbe uzuazọ; ohwo ọvo o bru Ọsẹ na ze he, rekọ fiki mẹ.”—Jọn 1:14; 14:6.
Jesu o fi obọdẹ oriruo h’otọ ọrọ epanọ a rẹ rọ gọ Ọghẹnẹ. Ọ ta nọ: “Mẹ be rọ oma obọ mẹ ru oware ovo ho, rekọ epanọ Ọsẹ o wuhrẹ omẹ.” O te fibae nọ: “Me bi ru eware nọ e be were iẹe kẹse kẹse.” (Jọn 8:28, 29) Idhere vẹ Jesu o ro ru eva were Ọsẹ riẹ?
Jesu ọ rehọ oma riẹ kpobi kẹ Ọsẹ riẹ, yọ oye họ oware nọ u dhesẹ re a gọ Ọghẹnẹ. Jesu o dhesẹ inọ ọ rehọ oma mudhe kẹ Ọsẹ riẹ ẹkwoma ẹme nọ o yo kẹe, oreva riẹ nọ o ru, nọ onana o make gwọlọ inọ ọ ruẹ uye. (Fil. 2:7, 8) Abọ ologbo jọ ọrọ egagọ Jesu họ usiuwoma nọ ọ jẹ ta ẹsikpobi, te epanọ enọ e rọwo e riẹ gbe enọ e rọwo e riẹ hẹ a je ro sei Owuhrẹ. (Mat. 22:23, 24; Jọn 3:2) Ofariẹ, Jesu ọ lahiẹ oma kẹ amọfa. Obọ nọ o je fihọ kẹ amọfa o jẹ lẹliẹ iẹe wo uvẹ hẹ, rekọ eva e jẹ were iẹe inọ ọ be gbodibo kẹ amọfa. (Mat. 14:13, 14; 20:28) Dede nọ o je wo uvẹ hẹ, Jesu ọ jẹ ruẹrẹ oke họ nọ ọ rẹ rọ lẹ se Ọsẹ obọ odhiwu riẹ. (Luk 6:12) Ọghẹnẹ o rri egagọ Jesu ghare gaga.
Ma rẹ Daoma re Ma Ru Eva Were Ọghẹnẹ
Jihova o muẹrohọ uruemu Ọmọ riẹ, ọ tẹ ta inọ Ọmọ na ọ were riẹ. (Mat. 17:5) Rekọ Setan Ẹdhọ o muẹrohọ uruemu ẹmeoyo Jesu re. Fikiere, Setan ọ tẹ rọ so Jesu kekeke. Fikieme? Keme ri bọwo oke yena, uvumọ ohwo-akpọ o ri yoẹme kẹ Ọghẹnẹ gbagba jẹ gọe vọvọ họ. Yọ Ẹdhọ ọ gwọlọ whaha Jesu re ọ siọ Jihova ba ẹgọ evaọ edhere nọ ọ rẹ were Ọghẹnẹ.—Evia. 4:11.
Re ọ ruẹse gele Jesu no egagọ Ọghẹnẹ, Setan ọ tẹ kẹe oware ulogbo jọ. Ọ rehọ Jesu kpohọ “ugbehru jọ nọ ukpehru thọ esiwa, o te dhesẹ eria ivie akpọ kpobi kẹe gbe ejiro rai.” Ọ tẹ ta kẹe nọ: “Who te diguẹ gọ omẹ, mẹ rẹ kẹ owhẹ eware nana kpobi.” Eme Jesu o ru? Ọ ta nọ: “Setan, nyawa: keme a kere nọ, ‘Whọ rẹ gọ Ọnowo na Ọghẹnẹ ra, iruo riẹ eye evo who re ruẹ.’” (Mat. 4:8-10) Ẹhẹ, Jesu o vuhumu inọ o te diguẹ kẹ Setan yọ ọ gọ riẹ no makọ erere nọ o wọhọ nọ o ti noi ze kpobi. Ọ gwọlọ nnọ o re tube diguẹ makọ ẹsiẹvo kẹ ohwo jọ họ u te no Jihova no.
Orọnikọ Setan ọ te nwane kẹ omai ivie akpọ na kpobi gbe oruaro rai re ma ruẹse diguẹ kẹe he. Rekọ ọ gbẹ be daoma raha egagọ uvi Ileleikristi. Ẹdhọ ọ gwọlọ re ma gọ ohwo hayo oware ofa jọ.—2 Kọr. 4:4.
Kristi Jesu o kru ẹrọwọ riẹ makọ rite uwhu. Fiki ẹgbakiete riẹ nọ o kru, Jesu ọ rehọ oruaro kẹ Jihova evaọ edhere nọ ohwo-akpọ ọvo o ri ru hu. Rọkẹ omai uvi Ileleikristi nẹnẹ, ma rẹ daoma lele uvi oriruo Jesu ẹkwoma egagọ Ọghẹnẹ nọ ma rẹ rọ karo. Evaọ uzẹme, emamọ usu kugbe Ọghẹnẹ ọ ghare omai obọ vi oware ofa jọ kpobi.
Eghale nọ I re no Egagọ Uzẹme Ze
“Egagọ efuafo nọ a rẹ jọ zue-oma obaro Ọghẹnẹ” hẹ o rẹ wha eghale buobu ze. (Jem. 1:27) Wọhọ oriruo, ma be rria etoke nọ ahwo buobu a bi jo “you oma-obọrai, je you igho, . . . heri-oheri,” jẹ rrọ “ababọ uyere-ọghọ.” (2 Tim. 3:1-5) Rekọ evaọ uviuwou Ọghẹnẹ, ma wo uvẹ-ọghọ nọ ma rọ rrọ usu kugbe ahwo nọ e rrọ fuafo, enọ e be daoma nyate itee nọ Ọghẹnẹ o fihọ nnọ a rẹ rọ gọe. Kọ oyena o gbẹ rrọ oware omosasọ?
Ma tẹ jọ akpọ na kare epe, ma re wo obroziẹ-iroro ọfuafo. Ma gwọlọ wo obroziẹ-iroro ọfuafo ẹkwoma ẹnyate itee ikiẹrẹe Ọghẹnẹ gbe ẹmeoyo kẹ izi Siza nọ e wọso izi Ọghẹnẹ hẹ.—Mak 12:17; Iruẹru 5:27-29.
Egagọ nọ i no udu ze e rẹ jẹ wha eghale efa ze. Ma tẹ tẹrovi eruo oreva Ọghẹnẹ viukpọ ọrọ obọ mai, ma ti yere emamọ uzuazọ. Ukpenọ ma rẹ ta nnọ: “Jo ma da ma re, keme odẹ ma re ti whuẹ,” ma wo uvi ẹruore ọrọ uzuazọ ebẹdẹ bẹdẹ evaọ aparadase otọakpọ.—1 Kọr. 15:32.
Obe Eviavia o fodẹ etoke nọ enọ i wo emamọ edikihẹ evaọ aro Jihova a ti ro no ‘uye ulogbo na ze.’ Oria ikere na e ta inọ “ọnọ ọ keria akaba uvie na ọ rẹ te rehọ uwoho riẹ ruru ai.” (Evia. 7:13-15) Ọnọ ọ keria akaba-uvie riẹ na họ Jihova Ọghẹnẹ, Ọnọ ọ mai wo ọghọ kpobi evaọ ehrugbakpọ na. Dai roro kpahe epanọ oghọghọ riẹ o te rro te re o zizie owhẹ wọhọ ọrara, bruẹbe ruru owhẹ re enwoma ọvo ọ siọ owhẹ ba ete! Yọ ma rẹ sae tubẹ reawere ọthọwẹ gbe ẹruọsa riẹ nẹnẹ.
Ofariẹ, a dhesẹ enọ e be gọ Ọghẹnẹ ziezi wọhọ enọ a bi su “kpohọ oria eyeri ame uzuazọ.” Eyeri ame nana họ eruẹrẹfihotọ kpobi nọ Jihova o ru no re ma ruẹsi wo uzuazọ ebẹdẹ bẹdẹ. Ẹhẹ, ẹkwoma idhe ẹtanigbo Kristi, “Ọghẹnẹ o ve ti ririe irui rai no.” (Evia. 7:17) A re ti fi obọ họ kẹ ahwo-akpọ re a jọ gbagba, onọ o te wha oghọghọ buobu se enọ i ti wo ẹruore ẹrria bẹdẹ bẹdẹ evaọ otọakpọ. Makọ enẹna, enọ e be rehọ evawere gọ Ọghẹnẹ a bi bo ubo oghọghọ, bi yere Jihova je bi lele enọ e rrọ obọ odhiwu gọe, enọ e be suile nọ: “Oruaro gbe igbunu eye họ iruo ra, O Ọnowo Ọghẹnẹ Erumeru! Ẹrẹreokie avọ uzẹme họ idhere ra, O Ovie ebẹdẹ bẹdẹ! Ono ozọ u re ti muẹ re o jiri odẹ ra ha, O Ọnowo? Keme whẹ ọvo họ ọrẹri. Erẹwho kpobi e rẹ te gọ owhẹ, keme a dhesẹ oziẹobro ra via no.”—Evia. 15:3, 4.
[Uwoho nọ e rrọ ẹwẹ-obe avọ 27]
Eme Setan ọ be rọ ghrẹ omai re ma diguẹ kẹe?