Isẹri-ise Evaọ Eki

OKENỌ Pọl ukọ na ọ jọ okpẹwho Athẹns, kẹdẹ kẹdẹ ọ jẹ hai kpohọ obọ eki re ọ ta usiuwoma kpahe Jesu. (Iruẹru 17:17) Pọl ọ jẹ jọ eki ta usiuwoma keme obei ahwo Athẹns a jẹ hae mae jọ.

Nọ enwenọ ikpe idu ivẹ (2,000) e ruọ emu no, yọ idibo Jihova a gbẹ be jọ eki whowho ovuẹ Uvie Ọghẹnẹ. Fikieme? Keme a rẹ jọ eki ruẹ ahwo buobu. Nẹnẹ, eki ọ rẹ sae jọ iwou nọ a rẹ kare ethẹ rai hayo enọ i kpe fihọ. Nọ Isẹri jọ a te kpohọ oria eki, a rẹ kaki mi ọnọ o wo uwou-eki na hayo ohwo nọ o fihọ etẹe uvẹ re a ruẹse fi ebe mai họ ehru emẹjẹ nọ ahwo a rẹ ruẹ.

Wọhọ oriruo, eva uwou-eki jọ nọ o rrọ New Jersey, evaọ obọ America, a ruẹrẹ ebe mai họ oria nọ a kere fihọ nọ “Ẹvẹ A Sai ro Dhesẹ Uruemu Ezi Evaọ Uviuwou?” Eme o no rie ze? Evaọ ẹdẹ ọvo, a fi ebe udhuhrẹ gbe ikpegbesa (153) evaọ evẹrẹ ezeza họ ada.

Aye jọ nọ ọ nya kẹle oria nọ a fi ebe na họ ọ gaviezọ ziezi kẹ eme nọ Osẹri na jọ ọ jẹ ta kpahe ebe na. Aye na ọ tẹ rọwo inọ o roja re ma rehọ Ọghẹnẹ karo evaọ uzuazọ gbe uviuwou mai. Ọ tẹ rehọ ebe na Wuhrẹ Mi Owuhrẹ Ologbo Na, Edidi Evawere Uviuwou, gbe Questions Young People Ask—Answers That Work.

Evaọ uvo ẹdẹ yena, ọzae jọ ọ tẹ nya akotọ emẹjẹ nọ a fi ebe na họ vrẹ nọ ọ jẹ gwọlọ nya ruọ uwou-eki jọ nọ ọ kẹle riẹ. O te gbẹro ku obe Young People Ask na. Oniọvo-ọmọtẹ nọ o dikihẹ kẹle ebe na ọ tẹ ruẹ nnọ ọzae na o wo isiuru kpahe obe na. Ọ tẹ nọ ọzae na nọ, “Kọ obe jọ o si owhẹ uru evaọ usu ebe na?” O te fi uzou jẹ riobọhọ obe Young People Ask na. Epanọ ọzae na ọ be nwane rọ riobọ tọlọ obe na, oniọvo na ọ tẹ rehọ iẹe kẹe. Ọzae na ọ tẹ ta kẹe nọ o yẹ emọ esa. Nọ a gbẹ be ta ẹme na, ọ tẹ ta kẹe inọ ẹsiẹvo ẹkpoka o re se emọ na kpobi keria t’ẹme. Emọ ivẹ ọsosuọ na a gbẹ rrọ emoha. Nọ o bi rovie obe na riwi na, ọ tẹ ta nnọ u ti woma gaga re a jọ uviuwou rai wuhrẹ obe na. Oniọvo na ọ tẹ jẹ kpọ iroro riẹ kpohọ obe na Edidi Evawere Uviuwou, ta kẹe inọ tei te aye riẹ a te jọ obe na ruẹ obọdẹ ohrẹ nọ a re kugbe rọ jiroro kpahe uviuwou rai. Eme nọ oniọvo na ọ ta na e were ọzae na oma, o te ru okẹ unevaze, ọ tẹ jẹ rọwo inọ osẹri jọ ọ hai weze bru ai.

Eme inievo na e ta kpahe usiuwoma nọ a jọ uwou-eki na ta evaọ ẹdẹ ọyena? Oniọvo-ọmọtẹ jọ ọ ta nnọ: “O were gaga. Mẹ re ruẹ obọ usiuwoma ota utionana ha!” Oniọvo-ọmọtẹ ọfa ọ ta nọ: “Jihova ọ ta inọ a rẹ te vuẹ emamọ usi na rite ọnyaba akpọ na. Nẹnẹ, evaọ oria nọ a re se Paramus evaọ New Jersey, emamọ usi na u duobọte udu ahwo evẹrẹ sa-sa. U woma gaga nọ me ro w’obọ evaọ isẹri-ise nana. Eva e were ohwo kpobi nọ ọ jariẹ w’obọ. Nọ oke u kpo no, ma jẹ gwọlọ kpo dede he.”

Kọ whọ sae gwọlọ idhere efa nọ who re ro whowho emamọ usi na? Ugogo edhere nọ ma be rọ ta usiuwoma na họ n’uwou ruọ uwou. (Iruẹru 20:20) Dede na, kọ who gbe roro kpahe isẹri-ise evaọ eki?