Iwhowho Uvie A N’iyẹrẹ

‘Kẹdẹ Kẹdẹ Evaọ Oria Eki’

PỌL ukọ na ọ rehọ uvẹ kpobi vaha ovuẹ Uvie na. Re ọ ruẹse kiẹ enọ i wo ẹgwọlọ via, ọ jiroro ‘kẹdẹ kẹdẹ evaọ uwou-egagọ na kugbe ahwo Ju . . . te enọ avọ iẹ a zere oma eva oria eki kpobi.’—Iruẹru 17:17.

Ọwhọ otiọye na ọ rọ oka egegagọ uzẹme Jihova anwọ ikpe-udhusoi ọsosuọ C.E. ze. (Matiu 28:19, 20) Nẹnẹ, Isẹri Jihova omarai a be rehọ oghẹrẹ sa-sa ta usiuwoma ẹkwoma ọwhọ nọ a bi ro fiobọhọ kẹ ahwo udu oruọzewọ wo eriariẹ egbagba uzẹme. (1 Timoti 2:3, 4) Oware onana nọ o jọ Australia via na u dhesẹ onana.

Edẹ isoi koka koka, Sid avọ Harold a je nwene ohwohwo evaọ ebe Ebaibol nọ a je fihọ ada evaọ oria itreni jọ evaọ Sydney. A whowho emamọ usi Uvie Ọghẹnẹ evaọ edhere ọnana te ikpe isoi no. Sid, ọnọ ọ kpako te ikpe 95 no, ọ ta nọ: “Okenọ mẹ kpako te ikpe 87 no, mẹ gbẹ sae jẹ dhẹ omoto ho. Oyena o k’omẹ idhọvẹ keme usiuwoma ota ẹgbede o rẹ were omẹ oma gaga. Ẹdẹjọ nọ mẹ kẹle oria ughe jọ nọ a re se Echo Point evaọ Katoomba, mẹ tẹ ruẹ ohwo jọ nọ ọ rẹ drọ eware nọ ọ be zẹ iwoho. Me te rri iwoho na ziezi je roro k’oma mẹ nọ, ‘Iwoho nọ e rọ ẹkpa usiuwoma mẹ i woma vi enọ ohwo na o ro dhe na—yọ e rọ kuẹku ziezi!’ Fikiere mẹ tẹ rọ agbada jọ vi, mẹ tẹ rehọ ai dhe eki evaọ oria uvivighi jọ, me te bi dhesẹ iwoho iwoma ebe Ebaibol nọ Isẹri Jihova a be ghale kẹ ahwo nọ a be nya vrẹ.

“Ikpe ene nọ e vrẹ, me go agbada mẹ kpohọ Sydney, yọ Harold o te kuomagbe omẹ. Ma te je nwene ohwohwo evaọ ẹruorote agbada na je ruiruo kugbe ikoko mai.” Harold, ọnọ ọ kpako te ikpe 83 no, ọ tẹ ta nọ: “No Ẹdọvo-Oka rite Edisoi-Oka ahwo a rẹ j’uwou tere he. Fikiere ẹvaha ovuẹ Uvie na evaọ edhere ọnana o be lẹliẹ omai nyate ahwo oma. Ma bi wo emamọ iyẹrẹ. Ebe nọ ma bi fihọ ada i kpehru gaga evaọ orẹwho onana.”

Sid ọ ta nọ: “Dede nọ ma fi oma mai họ eria ene hayo isoi no evaọ ikpe enana, u kri hi ahwo a tẹ te riẹ omai no. Ahwo jọ a rẹ nyabru omẹ ze te rehọ ebe. Efa i wo enọ nọ a gwọlọ nọ. Yọ efa e gwọlọ ẹmẹọta eva iminiti kakao.” Ọ tẹ dina hwẹ h’agba ta nnọ: “Enẹ ọvo me bi ro ru izihebro mẹ.”

Harold o te fibae nọ: “Ahwo buobu a ghine wo isiuru kẹ Ebaibol na. Evaọ amara ọvo imane i te muọ Ebaibol họ ewuhrẹ kugbe Isẹri na fiki ebe nọ a jọ obọ mai dẹ gbe iyo nọ ma kẹ rai no Ebaibol na ze. Iriruo itieye na e rẹ t’udu h’omai awọ gaga.”

Wọhọ Sid avọ Harold—jẹ wọhọ Pọl ukọ na—Isẹri Jihova evaọ oria kpobi a be rehọ oghẹrẹ nọ o lọhọ kpobi vaha ovuẹ obọdẹ rai. Fikiere, a gbẹ be vuẹ “usiuwoma” na kẹ “erẹwho akpọ na kpobi.”—Matiu 24:14.