Enọ I bi Se Ebe Mai A Nọ Inọ

Otẹrọnọ Adamu Ọ Jọ Gbagba, Kọ Ẹvẹ Ọ Sae Rọ Raha Uzi?

O lọhọ re Adamu ọ thuzi keme Ọghẹnẹ ọ kẹ riẹ ufuoma iroro-ejẹ. Inọ Adamu ọ rrọ gbagba u ru nọ ọ gbẹ sai ro wo okẹ yena ha ha. Uzẹme, Ọghẹnẹ ọvo ọ gba re. (Iziewariẹ 32:3, 4; Olezi 18:30; Mak 10:18) Ẹgbagba nọ omọfa kpobi o wo u wo umuo. Wọhọ oriruo, amagha yọ okwakwa ogbagba nọ whọ tẹ be rehọ iẹe bru arao, rekọ whọ sae rehọ iẹe jẹ izuwo da ha. Nọ okwakwa u te bi ru ẹjiroro nọ a rọ fiki riẹ ro ku ei gba ọvo a sae rọ ta nọ o rrọ gbagba.

Ẹjiroro vẹ Ọghẹnẹ ọ rọ ma Adamu? Ẹjiroro Ọghẹnẹ họ re Adamu o yẹ emọ, re ahwo-akpọ nọ a wo areghẹ avọ ufuoma iroro-ejẹ a vọ otọakpọ na. Ahwo nọ a gwọlọ dhesẹ nọ a you Ọghẹnẹ gbe idhere riẹ, a re ru onana ẹkwoma unevaze nọ a re ro koko izi riẹ. Fikiere, ẹmeoyo o rrọ oware nọ a ro kugbe ohwo-akpọ ma ha, wọhọ oware nọ oma o rẹ sa ohwo ru, ukpoye o rrọ oware nọ u re no ohwo eva ze. (Iziewariẹ 10:12, 13; 30:19, 20) O hẹ jọnọ Adamu ọ rẹ sae salọ aghẹmeeyo ho, kiyọ ọ gba ha. Kpahe epanọ Adamu ọ rehọ ufuoma iroro-ejẹ riẹ ru iruo riwi, Ebaibol e vuẹ omai nọ o yoẹme aye riẹ, aimava a tẹ ghẹmeeyo kẹ uzi Ọghẹnẹ kpahe “ure ẹriẹ ewoma gbe eyoma na.”—Emuhọ 2:17; 3:1-6.

Kọ ma sae ta nọ Adamu o wo epe evaọ iroro nọ Ọghẹnẹ ọ mae, nọ ọ gbẹ sai vuhu oware nọ u fo gbe onọ u fo ho hayo nọ ọ gbẹ sai ro fi odawọ kparobọ họ? Taure Adamu ọ tẹ ghẹmeeyo, Jihova Ọghẹnẹ ọ kiẹ emama otọakpọ riẹ kpobi riwi, te ọzae avọ aye ọsosuọ na jẹ ruẹ nọ omarai kpobi e jọ “wowoma.” (Emuhọ 1:31) Fikiere nọ Adamu ọ thuzi, u du gwọlọ oware ovo nọ Ọghẹnẹ ọ rẹ kpọvi evaọ oma riẹ hẹ, ukpoye ọ fo Adamu inọ o ruthọ. (Emuhọ 3:17-19) Adamu ọ kuvẹ hẹ re uyoyou nọ o wo kẹ Ọghẹnẹ gbe ehri-izi ikiẹrẹe Riẹ o wọe yo ẹme kẹ Ọghẹnẹ vi oware ofa kpobi.

Kareghẹhọ re inọ, okenọ Jesu ọ jọ otọakpọ, ọ jọ ohwo ọgbagba wọhọ Adamu. Yọ, wo ohẹriẹ nọ emọ Adamu efa kpobi, ẹkwoma ẹzi ọfuafo a ro di eva Jesu họ, fikiere ọ reuku epe ọvuọvo nọ u re ru ei kie kẹ odawọ họ. (Luk 1:30, 31; 2:21; 3:23, 38) Jesu ọ rehọ iroro obọriẹ roma kpotọ kẹ Ọsẹ riẹ ghelọ itunyẹ ilogbo nọ ọ rẹriẹ ovao ku. Adamu ọ rehọ ufuoma iroro-ejẹ riẹ ru iruo thọ, rọ aro koko ghẹmeeyo kẹ uzi Jihova.

Kọ eme o ru Adamu ghẹmeeyo kẹ Ọghẹnẹ? Kọ o je roro nọ ere oruo u ti ru uzuazọ riẹ woma evaọ edhere jọ? Ijo, keme Pọl ukọ na o kere nọ “orọnọ Adam a viẹhọ họ.” (1 Timoti 2:14) Dede na, Adamu o ru lele ẹgwọlọ aye riẹ, ọnọ ọ salọ nọ ọ rẹ re ubi-ure aghọ na. Eva nọ o re ru were aye riẹ o jariẹ oja vi ẹme nọ o re yo kẹ Ọnọ ọ ma riẹ. Ẹhẹ, nọ aye riẹ ọ kẹe ubi-ure na, Adamu ọ hai dhizu roro kpahe oghẹrẹ nọ aghẹmeeyo u ti ro kpomahọ usu riẹ kugbe Ọghẹnẹ. Fikinọ Adamu o wo uyoyou udidi kẹ Ọghẹnẹ hẹ, o te kie kẹ otunyẹ, te ẹgwọlọ aye riẹ.

Adamu ọ raha uzi no taure o te ti mu emọ họ eyẹ, fikiere emọ riẹ kpobi a wo epe sebaẹgba. Ghele na, ma wo ufuoma iroro-ejẹ wọhọ Adamu. Ajọ ma roro didi kpahe ewoma Jihova avọ edẹro, jẹ tua uyoyou mai kẹ Jihova, keme o te ọnọ ma rẹ gọ je yo ẹme kẹ.—Olezi 63:6; Matiu 22:36, 37.