Oghẹrẹ Ohwo Vẹ Whọ Gwọlọ Jọ?

ỌNỌ o wuzou elakpa evaọ ẹwho jọ nọ ọ rrọ obọ Philippines ọ nọ ọkobaro jọ nọ, “Eme who ru nọ ọzae yena ọ sai ro nwene?” Ọ tẹ riobọhọ ikulu ebe nọ e rrọ ehru emẹjẹ riẹ kẹ ọkobaro na, jẹ ta nọ: “Kọ whọ riẹ inọ ebe yena kpobi yọ enọ ma ro guẹdhọ riẹ no? Uye ulogbo jọ who si no omai uzou na.” Ọzae nọ a be t’ẹme riẹ na yọ ọgba-udi nọ o je thuethu gaga. Eme o nwene ọzae na? Ebaibol.

Ahwo buobu a se ohrẹ Pọl ukọ na gboja gaga inọ ‘a siobọno uruemu anwae nọ a wo vẹre re a wha uruemu okpokpọ na họ oma, onọ a ma tho Ọghẹnẹ.’ (Ẹf. 4:22-24) O tẹ make rọnọ o gwọlọ nọ ma ru inwene ilogbo hayo esese, ohwo nọ ọ gwọlọ zihe ruọ Oleleikristi ọ rẹ whẹ uruemu okpokpọ na họ.

Rekọ inwene nọ ma re ru gbe ẹnyaharo nọ ma re wo re ma sai te kẹ ame-ọhọ yọ emuhọ gheghe. Evaọ oke ame-ọhọ, ma wọhọ ubro-ure nọ a kare zihe ruọ ugogo oware jọ no. Whọ rẹ sai vuhu oware nọ ohwo na ọ kare na, rekọ iruo e gbẹ riẹ nọ o re ru. Ọnọ ọ kare oware na o re gbe ru ona họ iẹe re u wo erru. Okenọ ma họ-ame, ma wo uruemu nọ a gwọlọ mi ohwo nọ ọ rẹ jọ odibo Ọghẹnẹ. Rekọ, uruemu okpokpọ mai na u ri woma te epanọ a gwọlọ họ. Ma re gbe ru ei woma ẹkwoma inwene nọ ma re ru.

Makọ Pọl ọ ruẹ inọ u fo re o ru inwene evaọ uruemu riẹ. Ọ ta nọ: ‘Mẹ tẹ gwọlọ nọ me re ru ewoma, eyoma ọ vẹ rọ oma via.’ (Rom 7:21) Pọl ọ riẹ oghẹrẹ ohwo nọ ọ jọ vẹre, ọ tẹ jẹ riẹ oghẹrẹ ohwo nọ ọ gwọlọ jọ. Kọ mai omamai? Wọhọ Pọl, ma rẹ sae nọ oma mai nọ: ‘Ẹvẹ obeva mẹ ọ rrọ? Oghẹrẹ ohwo vẹ mẹ rrọ? Kọ didi oghẹrẹ ohwo mẹ gwọlọ jọ?’

‘Ẹvẹ Obeva Mẹ Ọ Rrọ?’

Ma tẹ be ruẹrẹ uwou anwae, orọnikọ ma rẹ ralọ uwou na ọvo ho otẹrọnọ ire uwou na i gbo no. Uwou na o rẹ sai kie odẹnotha nọ whọ tẹ nyasiọ ire nọ i gbo no na ba. Epọvo na re, ẹrẹreokie okafe o te he. Ma rẹ kiẹ oghẹrẹ ohwo nọ ma ginẹ rrọ ma ve je vuhu oria nọ ma jọ wo ẹbẹbẹ. Ogbẹrọ ere he, ma ve ti zihe kpohọ uruemu anwae mai na. Fikiere, o gbahọ nọ ma rẹ kiẹ oma mai riwi. (2 Kọr. 13:5) O gwọlọ nnọ ma rẹ riẹ uruemu uyoma nọ ma wo, ma vẹ kpọe vi. Jihova ọ k’omai oware nọ u re fi obọ họ kẹ omai ru onana.

Pọl o kere nọ: “Ẹme Ọghẹnẹ ọ rẹjọ bẹdẹ, avọ iruo, ọ da vi ọpia akọava, nọ o re duwu lafiẹ udevie ẹwẹ gbe ẹzi te ezo-oma, gbe eriare ighogho obọ enwa, gbe eva ekiẹ jẹ riẹ ẹjiroro obọ eva.” (Hib. 4:12) Ẹme Ọghẹnẹ, Ebaibol na ọ rẹ sai duobọte uzuazọ mai. U re duobọte ighogho obọ enwa mai, koyehọ, eria nọ e mai dhere kpobi evaọ oma mai. O rẹ fere iroro mai via, dhesẹ oghẹrẹ ohwo nọ ma ginẹ rrọ, wo ohẹriẹ no oghẹrẹ nọ ma rrọ evaọ okafe hayo oghẹrẹ nọ ma roro nnọ ma rrọ. Ẹme Ọghẹnẹ o re gine fi obọ họ kẹ omai riẹ oria nọ ma jọ wo ebẹbẹ.

Ma tẹ be ruẹrẹ uwou anwae, re ma nwene eware nọ e jọ uwou na raha ọvo u te he. Ma tẹ riẹ oware nọ o lẹliẹ oria uwou na raha u re fi obọ họ kẹ omai ru oware nọ o rẹ whaha ọraha otiọye na evaọ obaro. Epọvo na re, ma tẹ riẹ uruemu uyoma nọ ma wo gbe oware nọ o lẹliẹ omai woi u re fi obọ họ kẹ omai riẹ oma mai su. Eware buobu e riẹ nọ e rẹ sae lẹliẹ omai wo oghẹrẹ uruemu jọ. Ejọ rai họ ahwo nọ ma bi kuomagbe gbe epanọ akpọ ọ lọhọ hayo ga te k’omai, oria nọ ma be rria, uruemu ẹwho mai, esẹgbini mai, egbẹnyusu mai, gbe oghẹrẹ egagọ nọ ma jọ whẹro. Eware nọ ma bi rri evaọ etehe-ughe gbe eware-ẹkeriotọ omosasọ efa i re kpomahọ uruemu mai. Ma tẹ riẹ eware nọ e rẹ sae raha uruemu mai u re fi obọ họ kẹ omai whaha enwoma nọ i re no eware itieye na ze.

Ma tẹ kiẹ oma mai riwi no, ẹsejọhọ ma sae viẹ oma mai họ ta nọ, ‘Ere mẹ rrọ n’otọ ze.’ Onana yọ iroro ethọthọ. Pọl ọ ta kpahe enọ e jọ ukoko Kọrint nọ e jọ igberedia, ibruẹnwae, egbidi, gbe ahwo itieye na inọ: “Ere otu rai jọ ọ jọ. Rekọ a họ owhai, je ru owhai fo . . . eva Ẹzi Ọghẹnẹ mai.” (1 Kọr. 6:9-11) Wọhọ ahwo Kọrint na, ẹzi ọfuafo Jihova o rẹ sai fi obọ họ kẹ omai ru inwene nọ i fo.

Rehọ oriruo ọzae jọ nọ a re se Marcos,a nọ ọ be rria obọ Philippines. Okenọ ọ jẹ ta kpahe uzuazọ nọ o yeri, Marcos ọ ta nọ: “Kẹse kẹse ọsẹgboni mẹ a jẹ hae whọ. Oye jabọ nọ mẹ rọ dhẹ n’uwou okenọ mẹ jọ ikpe 19.” Marcos o te ti mu edhọ họ efi, mu uji họ etho, je zihe ruọ ogbulegbu. Tei te amọfa jọ a tubẹ gbẹgwae inọ a rẹ ruọ arupre a vẹ rọ ọgbahọ ta kẹ ọnọ ọ be dhẹe na re ọ dhẹ kpohọ obonọ a te ta kẹe, re a sae rọ ere yare oware jọ mi enọ i wo arupre na, rekọ a ru epanọ o jarai udu hu. Eware iyoma nana i no Marcos obọ họ nọ ọ make rọo no. Ọ rehọ eware kpobi nọ o wo ro fi edhọ. Uwhremu na Marcos o te kuomagbe uwuhrẹ Ebaibol nọ Isẹri Jihova a je ru kugbe aye riẹ. Evaọ oke ọsosuọ, o roro nnọ o te ohwo nọ ọ rẹ jọ Osẹri hi. Rekọ efihiruo eware nọ o je wuhrẹ gbe iwuhrẹ nọ ọ jẹ nya i fi obọ họ kẹ Marcos siobọno eware iyoma nọ o je ru. Enẹna o zihe ruọ Oleleikristi nọ ọ họ-ame no nọ o bi wuhrẹ amọfa ẹsikpobi kpahe epanọ ae omarai a re ro nwene.

Oghẹrẹ Vẹ Whọ Gwọlọ Jọ?

Didi oghẹrẹ inwene u fo nnọ mai Ileleikristi ma re ru re uruemu mai u dhe ewewoma? Pọl ọ hrẹ Ileleikristi nọ: “Wha si eware nana kpobi no unu rai no: evaedha, ofu, egrọẹjẹ, ẹwhọ gbe eme igbegbe eta. Je ohwo ọ ta uzẹme kẹ ọrivẹ riẹ, no wha ruẹ nọ wha se uruemu anwae ba no na.” Ukọ na ọ ta haro nọ: “Wha whẹ uruemu okpokpọ họ oma onọ Ọghẹnẹ ọ jọ eva ẹriẹ dhesẹ uwoho emama riẹ.”—Kọl. 3:8-10.

Ugogo utee mai họ epanọ ma rẹ rọ ba uruemu anwae na no oma re ma whẹ okpokpọ na họ. Iruemu-aghae vẹ i re fi obọ họ kẹ omai ru onana? Pọl ọ ta nọ: “Wha whẹ ọrẹri gbe eyowo họ oma, eva ehrọ, ọriẹruo, iroro idhedhẹ iwo, oma-urokpotọ, odiri, whai ohwo o thi-akọ kẹ ohwo, re ohwo jọ o te wo eguago kpahe ọrivẹ riẹ, jọ ọrọ vrẹe; wọhọ epanọ Ọnowo na ọ rọ vrẹ owhai na ere wha rẹ rọ vrẹ re. Rekọ onọ omae ro vi enana kpobi, wha whẹ uyoyou họ oma, onọ orọ ọwhẹgbe eware kpobi.” (Kọl. 3:12-14) Uruemu-aghae enana nọ ma rẹ daoma wo u re fi obọ họ kẹ omai “wo aruoriwo obọ Ọghẹnẹ gbe ahwo.” (1 Sam. 2:26) Okenọ Jesu ọ jọ otọakpọ, o dhesẹ ọkpọ uruemu Ọghẹnẹ. Ma te bi wuhrẹ kpahe oriruo riẹ jẹ raro kele iei, ma rẹ sae jọ wọhọ Kristi jẹ jọ ‘enọ e be raro kele Ọghẹnẹ.’—Ẹf. 5:1, 2.

Oware ofa nọ u re fi obọ họ kẹ omai riẹ inwene nọ u fo nọ ma re ru họ ewuhrẹ kpahe uruemu ahwo nọ Ebaibol e ta kpahe, eroro kpahe oware ezi nọ a ta kpahe ae gbe oria nọ a jọ yoma. Wọhọ oriruo, roro kpahe Josẹf, ọmọzae Jekọp. A rọ uye bẹe dede nọ o ru oware uyoma ọvo ho, ghele na Josẹf o wo emamọ eva. (Emu. 45:1-15) Evaọ abọdekọ riẹ, Absalọm, ọmọzae Devidi ovie na, o ru wọhọ ẹsenọ o wo ọdawẹ kẹ ahwo riẹ a te je jiri ei kẹ erru riẹ. Rekọ, uzẹme riẹ họ ọ jọ ohwo ovivie gbe ojihẹ. (2 Sam. 13:28, 29; 14:25; 15:1-12) Orọnikọ ohwo o te wo erru je bi ru wọhọ ẹsenọ ọ rrọ emamọ ohwo oye u re gine ru ei họ emamọ ohwo ho.

Ma rẹ Sae Kparobọ

Re ma siobọno uruemu uyoma jẹ jọ emamọ ahwo evaọ aro Ọghẹnẹ, u re fo re ma roro kpahe oghẹrẹ ohwo nọ ma ginẹ rrọ. (1 Pita 3:3, 4) Ma tẹ gwọlọ ru inwene evaọ uruemu mai o gwọlọ nọ ma rẹ riẹ uruemu uyoma nọ ma wo gbe eware nọ e be wha uruemu itieye na ze, ma ve je wo ọkpọ uruemu Ọghẹnẹ. Kọ u mu omai ẹro inọ ma rẹ sai nwene otẹrọnọ ma daoma?

Ẹhẹ, avọ obufihọ Jihova ma rẹ sai ru inwene nọ i fo. Wọhọ ọso-ilezi na, ma rẹ sae lẹ nọ: “O Ọghẹnẹ, kẹ omẹ eva efuafo, re whọ rehọ uvi ẹzi ọkpokpọ kẹ omẹ.” (Ol. 51:10) Ma rẹ sae yare ẹzi Ọghẹnẹ re o ru iruo evaọ oma mai, re u fi obọ họ kẹ omai yeri uzuazọ nọ o rọwo kugbe oreva riẹ ziezi. Evaọ uzẹme, ma rẹ sae jọ emamọ ahwo evaọ aro Jihova!

[Oruvẹ-obotọ]

[Uwoho nọ e rrọ ẹwẹ-obe avọ 4]

Kọ u te re a ralọ otafe uwou nana nọ u nwo rẹrẹ no na?

[Uwoho nọ e rrọ ẹwẹ-obe avọ 5]

Kọ uruemu ra o wọhọ orọ Kristi no?