Whẹ Uruemu Okpokpọ na Họ
1 Ileleikristi a wo ovuhumuo ọrọ ẹriẹ uzẹme na! Ma wuhrẹ no kpahe epanọ ma rẹ rọ rria re ma ruẹse siọ edhere ahwo-akpọ na ba ẹnya. Nọ a “vru [no] uzuazọ nọ Ọghẹnẹ ọ kẹ rae” no, “otoriẹ rai u re biebi.” (Ẹf. 4:18) A wuhrẹ omai re ma kpare iroro mai vrẹ no iroro akpọ na ẹkwoma ẹbano uruemu anwae gbe efihọ uruemu okpokpọ na.—Ẹf. 4:22-24.
2 Uruemu anwae na u re su kpohọ edhere ọwhrẹkpo uruemu, nọ o rẹ wha ogbekuo gbe uwhu ze. Fikiere, ma rẹ yare enọ e rẹ k’ezọ ovuẹ Uvie na re a si ofu kpobi no, evaedha, eyoma, ekela, gbe eme etọtọ. Ahwo nọ a gwọlọ aruoriwo Ọghẹnẹ a re si uruemu anwae na n’oma riẹriẹriẹ—epanọ a rẹ ba ewu ogbegbe n’oma na.—Kọl. 3:8, 9.
3 Ẹgba Ọkpokpọ nọ O bi ru Iroro na Kpokpọ: Ẹwhẹhọ uruemu okpokpọ na o kẹre te erukpokpọ ẹgba nọ o be kpọ iroro na. (Ẹf. 4:23) Ẹvẹ ohwo o re ro ru ẹgba, hayo iroro yena kpokpọ re ọ kpaovao rri afẹ ọgbagba? Onana o rẹ via ẹkwoma ewuhrẹ Ẹme Ọghẹnẹ kẹse kẹse je roro kpahe otofa riẹ. Kẹsena, edhere iroro ọkpokpọ ọ vẹ roma via, ohwo na ọ vẹ ruẹ eware evaọ eriwo Ọghẹnẹ gbe Kristi. Uzuazọ ohwo u re nwene nọ ọ be rehọ ekwakwa buobu nọ e wọhọ erọ Kristi ro zuo na, te ohrọoriọ, ẹwo, omarokpotọ, ewolẹ, uye-oruẹ-krẹkri, gbe uyoyou.—Kọl. 3:10, 12-14.
4 Ẹkwoma ẹwhẹhọ uruemu okpokpọ na, ma hẹrioma mai no akpọ na. Edhere uzuazọ mai o ru omai wo ohẹriẹ. Ma be ta uzẹme jẹ be rehọ eme omokpokpọ bọ amọfa ga. Ma be nyẹ ofu mai, evedha, edo, ekela, gbe eyoma kpobi jẹ be rehọ ẹrẹreokie gbe ekwakwa Ọghẹnẹ ro nwene ai. Ma bi ru vrẹ oware nọ a rẹ gwọlọ mi omai evaọ erọvrẹ. Ma bi ru enana kpobi n’udu ze.—Ẹf. 4:25-32.
5 Whọ ba uruemu okpokpọ na no vievie he. Ma rẹ gọ Jihova ababọ riẹ re ọ jẹ omai rehọ họ. Kẹe uvẹ re u fiobọhọ si ahwo ziọ uzẹme na, jẹ kẹe uvẹ re o wha orro se Jihova, Ọnọma uruemu ugbunu okpokpọ mai na.—Ẹf. 4:24.