Ma Wo Erere no Ikokohọ “Edhere Uzuazọ Ọghẹnẹ” na Ze
1 Emerae kakao nọ i kpemu, ma jẹ m’omaa re ma kpohọ Ikokohọ Ubrotọ “Edhere Uzuazọ Ọghẹnẹ” ọrọ 1998. Enẹna i zihe ruọ oware ekareghẹhọ no evaọ ikuigbe uvie orọ ukoko na. Ma reawere obọdẹ emu abọ-ẹzi nọ a k’omai evaọ ikokohọ eyena.
2 Abọ kpahe iruo akpọ soso nọ ọ jọ ikokohọ enukpe nana o ghine siuru. Makinọ imishọnare hayo amọfa nọ a no erẹwho efa ze a jọ ekokohọ mai hayo a jariẹ hẹ, mai kpobi ma yo iyẹrẹ iwoma evaọ ẹme uvo ọrọ Edisoi-Oka nọ uzoẹme riẹ o rọ “Iruo Evaọ Eria Iruo Imishọnare.” “Iyẹrẹ Kpahe Ẹnyaharo Iruo Ivuẹvu Na” wariẹ akpọ na họ e kẹ uduotahawọ gaga.
3 Ebe Iwoma nọ A Siobọno: Ẹme urere evaọ Edisoi-Oka o kẹ uyo onọ nọ ahwo buobu nọ a riẹ uzẹme na ha a be nọ: “Kọ Uzuazọ nọ U re Lele Uwhu O Rrọ?” Evaọ ekuhọ ẹme ọyena nọ o siuru gaga na a siobọno ibroshọ ọkpokpọ jọ, Eme Ọ rẹ Via k’Omai Okenọ Ma te Whu? Ababọ avro enẹna ma se rie no yọ ma ruẹ epanọ u ti woma te evaọ obufihọ kẹ ahwo re a ruẹ uzẹme na kpahe uyero ọ iwhuowhu na gbe evaọ omosasa enọ e rrọ uweri ẹkwoma ẹruore ẹkparomatha na.
4 Omaa ọ uvo orọ Ẹdẹ-Ọmaha na o rehọ ẹme na kuhọ “Ọnọma na—Ekwakwa Riẹ gbe Idhere Riẹ.” O lẹliẹ omai ku ei họ avọ iroro inọ Ọnọma ọ rẹ jọ hrọ. Re u fiobọhọ k’omai tha amọfa uke re a vuhu uzẹme onana mu, a te siobọno obe na Is There a Creator Who Cares About You? Nọ o rẹ bọ ẹrọwọ mai gbe ovuhumuo mai kẹ Jihova avọ idhere riẹ ga na a ru obe na maero rọkẹ ahwo nọ a reobe ziezi rekiyọ a rọwo Ọghẹnẹ hẹ.
5 Ọtamuo nọ O no Udu Ze: Ẹme urere ọ okokohọ na o fiẹgba họ ẹgwọlọ nọ mai kpobi ma rẹ rọ “Ruabọhọ Onya Evaọ Edhere Jihova.” Ẹvẹ u fo te nọ omomọvo mai ọ rọ jọ ọtamuo na dhesẹ ẹgwọlọ mai re ma hai lele, whowho, jẹ kpare ewoma edhere uzuazọ Ọghẹnẹ kpehru! (Aizaya 30:21) Enẹna ma rẹ gbae mu hrọ re ma rria te ọtamuo ọnana. Ẹvẹ ọbọga abọ-ẹzi nọ ma wo evaọ Okokohọ “Edhere Uzuazọ Ọghẹnẹ” na ọ rro te!