Nyaze Ọ Okokohọ Ubrotọ Ọrọ “Ẹrọwọ Fihọ Ẹme Ọghẹnẹ” Na!
IMA ahwo buobu a ti kokohọ eria udhusoi ẹko buobu eva akpọ na soso. Evaọ Nigeria ọvo, a ruẹrẹ ikokohọ 110 họ. Ọrọ ọsosuọ ọ te jọ October 10-12, 1997, yọ ọrọ urere ọ te jọ, January 16-18, 1998. Ẹsejọhọ ekokohọ edẹ esa enana jọ—no Edisoi-Oka rite Ẹdoka na—ọ te jọ okpẹwho jọ nọ u thabọ no uwou ra ha.
Who ti wo erere no efe ithubro Ebaibol buobu ze. Ọruẹrẹfihotọ na ọ te rehọ ikporakporo muhọ evaọ ohiohiẹ Edisoi-Oka evaọ ighọjọ 9:20. Eva ohiohiẹ Ẹdẹ-Ọmaha gbe Ẹdoka ọruẹrẹfihotọ na ọ te rehọ ikporakporo muhọ eva ughọjọ 9:00. Ohiohiẹ Edisoi-Oka o ti wo ọkiẹriwo iminiti 25 ọrọ ahwo nọ ẹrọwọ fihọ Ẹme Ọghẹnẹ o kpomahọ izuazọ rai gaga no. Ovuẹ ọsogba o ti ku abọ ọsosuọ ọyena họ, onọ uzoẹme riẹ o rọ, “Ẹnya Evaọ Ẹrọwọ, Orọnikọ Udeoruẹ Hẹ.”
Ẹme ọsosuọ eva uvo Edisoi-Oka o te t’ẹme kpahe abọ ologbo nọ izoge na a re wo evaọ ukoko Ileleikristi. Ẹme ọzọhọkugbe abasa nọ o ti lele iei o te t’ẹme kpahe abọ nọ uruemu Ileleikristi evaọ ẹmeọta, uruemu-ezi, gbe osẹ u re wo kpahe ute Ebaibol. Eme efa nọ i ti lele iei na “Yọrọ Oma kẹ Ababọ Ẹrọwọ” gbe “Ẹme Ọghẹnẹ Ọ rọ Uzuazọ” e te tẹro vi ithubro nọ e rọ obe Ahwo Hibru izou 3 gbe 4. Ọruẹrẹfihotọ Edisoi-Oka o ti kuhọ avọ ẹme na “Obe rọ kẹ Ahwo Kpobi.”
Ẹme ọsosuọ eva ohiohiẹ Ẹdẹ-Ọmaha họ “Ẹrọwọ Nọ O Kare Iruo U Whu No.” Ẹme ọfa nọ u wuzou eva ohiohiẹ ọyena, “Dikihẹ Ga jẹ Dadamu Uzẹme Na,” o te t’ẹme kpahe epanọ a re ro le ute ẹzi t’obọ. Abọ ọyena o ti kuhọ avọ abọ jọ nọ ọ rẹ jọ okokohọ kpobi na, “Ẹrọwọ Fihọ Ẹme Ọghẹnẹ O re Su Kpohọ Ame-Ọhọ,” kẹsena a vẹ te họ ilele ekpokpọ ame.
Ẹme emuhọ uvo Ẹdẹ-Ọmaha na, “Họre Gaga kẹ Ẹrọwọ Na,” ọ te t’ẹme te ohrẹ nọ o rọ obe Ebaibol Jud na. Ẹme ọzọhọkugbe nọ o te rehọ auwa ọsoso nọ uzoẹme riẹ o rọ “Joma Kpohọ Uwou Jihova” o te t’ẹme kpahe irere iwuhrẹ Oleleikristi. Ọruẹrẹfihotọ ẹdẹ ọyena o ti kuhọ avọ uzoẹme na “Uvi Ẹrọwọ Ra Na—A be Dawo Iẹe Enẹna.”
Ọruẹrẹfihotọ ohiohiẹ Ẹdoka o ti wo ẹme ọzọhọkugbe abasa nọ o te t’ẹme kpahe obe Ebaibol Joẹl, kugbe efihiruo riẹ evaọ oke mai na. Edrama Ebaibol u ve ti lele iei, onọ uzoẹme riẹ o rọ “Ru Ẹro Ra Lọlọhọ.” Abọ ologbo ọrọ okokohọ na họ ovuẹ ogbotu uvo na, “Ẹrọwọ gbe Obaro Ra.”
Uzẹme riẹ họ who ti wo erere ẹzi gaga otẹrọnọ whọ nyaze. A ti dede owhẹ rehọ ziezi evaọ ẹkeria na kpobi. Jọ enẹna muọ iroro ẹnya họ ẹjẹ. Rọ kẹ oria nọ o mae kẹle uwou ra, kpohọ Ọgwa Uvie Isẹri Jihova nọ o kẹle owhẹ hayo kere se enọ i bi kporo emagazini ọnana. Whọ sae jẹ ruẹ eria ikokohọ Nigeria evaọ Uwou-Eroro Na ọrọ May 1, 1997.