“Edhere Uzuazọ Ọghẹnẹ” Okokohọ 1998-1999 O Kẹlino!
EVAỌ Nigeria ọvo, a ruẹrẹ ikokohọ 108 họ no October 1998 rite January 1999. Ẹsejọhọ, ọvo jọ evaọ ikokohọ edẹ esa nana ọ te jọ eva okpẹwho nọ o kẹle ẹwho ra. Evaọ eria buobu, ọruẹrẹfihotọ na o ti muhọ evaọ Edisoi-Oka avọ ikporakporo eva 9:20 a.m. Evaọ Ẹdẹ-Ọmaha gbe Ẹdoka, ọruẹrẹfihotọ na o ti muhọ avọ ikporakporo eva 9:00 a.m.
Ọruẹrẹfihotọ ohiohiẹ Edisoi-Oka o te t’ẹme te iyẹrẹ ẹnyaharo usiuwoma ota Uvie na evaọ abọ sa-sa akpọ na. Ovuẹ ọsogba na u ti fielo họ uzoẹme okokohọ na, “Ẹtanigbo Kristi—Edhere Esiwo Ọghẹnẹ.”
Evaọ oke uvo ẹme-ọzọhọkugbe na, “Esẹ gbe Ini—Wha kọ Edhere Ọghẹnẹ Fihọ Emọ Rai,” o te jiroro epanọ a re ro ru emaha na re a you jẹ gọ Jihova. Ọruẹrẹfihotọ uvo na o ti kuhọ avọ ẹme na “Kọ Uzuazọ nọ U Re Lele Uwhu O Rrọ?”
Ọruẹrẹfihotọ ohiohiẹ Ẹdẹ-Ọmaha o te riobọhọ iruo aru-ilele ọ Isẹri Jihova evaọ abasa, “Obufihọ kẹ Ahwo re A Nya Ruọ Edhere Uzuazọ Na,” “Use-Abọ Ẹnyate Ahwo Oma,” gbe “Ewuhrẹ Ilele Kpahe Eware nọ Kristi O j’Uzi Rai Kpobi.” Eva ekuhọ ọruẹrẹfihotọ ohiohiẹ na, uvẹ o te jariẹ kẹ ilele ekpokpọ re a họ-ame.
Ẹme emuhọ uvo Ẹdẹ-Ọmaha na, “Ẹgọ avọ Irẹro Uzuazọ nọ U w’Oba Ha,” o te tudu họ omai awọ re ma rọ oma olẹ roro kpahe ẹjiroro nọ ma be rọ gọ Ọghẹnẹ. Eme na “Ovuhumuo kẹ ‘Ekẹ Ahwo’ Enọ I Bi Wuhrẹ Edhere Ọghẹnẹ” gbe “Uruemu—Ba orọ Anwae No re Whọ Whẹ Okpokpọ Họ” i ti fielo họ ọkiẹriwo n’owọ t’owọ ọrọ Ahwo Ẹfẹsọs uzou 4. Ofariẹ, a te kẹ ohrẹ obọdẹ Ikereakere evaọ ẹme na “Ru Oma Ra Kare Epe no Akpọ Na” gbe evaọ ẹme-ọzọhọkugbe abasa na “Izoge—Wha Lele Edhere Ọghẹnẹ.” Ọruẹrẹfihotọ uvo na o ti kuhọ avọ ẹme na “Ọnọma Na—Uruemu gbe Idhere Riẹ.”
Ọruẹrẹfihotọ ohiohiẹ Ẹdoka o wo eme-ọzọhọkugbe abasa nọ e te t’ẹme kpahe izou urere Ebaibol obe Izikiẹl jegbe otofa eruẹaruẹ rai. A vẹ te rehọ edrama ẹgọ ekọlọ sa-sa ẹrọwọ izoge Hibru esa ku abọ ohiohiẹ na họ. Okpẹme jọ evaọ uvo na họ ovuẹ ogbotu na, “Edhere Ọvo Kpohọ Uzuazọ Ebẹdẹ Bẹdẹ Na.”
Ababọ avro, who ti wo erere abọ-ẹzi gaga nọ whọ tẹ riẹ edẹ esa na kpobi. Ma rovie abọ zizie owhẹ ziọ abọ na kpobi, aikpobi ọvọvẹ. Re whọ riẹ oria nọ o kẹle oria ra, kpohọ Ọgwa Uvie Isẹri Jihova oria ra hayo kere se enọ i kporo emagazini ọnana.