Whọ Te Gwọlọ Nọ O Vrẹ Owhẹ Hẹ!
EME ọ rẹ vrẹ owhẹ hẹ? Okokohọ Ubrotọ “Ewhovuẹ Udhedhẹ Ọghẹnẹ” ọrọ Isẹri Jihova nọ ọ be tha kpata kpata na! Evaọ eria buobu, okokohọ na o ti muhọ 9:20 eva ohiohiẹ Edisoi-Oka avọ ikporakporo. Nọ whọ tẹ gaviezọ kẹ ọkiẹriwo ọbọga no evaọ abọ “Eyo mi Enọ E be rọ Ajọwha Whowho Udhedhẹ,” whọ te reawere ẹme ọbọga nọ o ta nọ “Eme Ọghẹnẹ Ọ Gwọlọ Mi Omai?”
Obọdẹ ẹme jọ evaọ uvo Edisoi-Oka ọ rẹ te jọ ẹme ovuẹ ọsogba na “Ẹkẹ-Abọ Mai Wọhọ Ewhovuẹ Udhedhẹ Ọghẹnẹ.” U je no ere no abọ “Obufihọ kẹ Amọfa re A Wuhrẹ Ẹgwọlọ Ọghẹnẹ” ọ rẹ te kẹ ẹjiroro nọ a re ro wuhrẹ ahwo ekpokpọ. Ẹme-ọzọhọkugbe nọ o ta nọ “Rri Otọ Mu Kpahe Egbefẹ Arozaha ọ Omawere nọ I Dhere” o ve lele onana. Ọruẹrẹfihotọ Edisoi-Oka o re ti kuhọ avọ eme na “Mudhe kẹ Ẹdhọ—Whọ Kuvẹ kẹ Ehrowo Ho” gbe “Ẹkpare Kpehru Ekiete Ẹme Ọghẹnẹ avọ Omurokpotọ.”
Ọruẹrẹfihotọ ohiohiẹ Ẹdẹ-Ọmaha o re ti fiẹgba họ epanọ iruo a ru ilele u wuzou te evaọ ẹme-ọzọhọkugbe abasa “Ewhovuẹ nọ E be Wha Emamọ Usi Udhedhẹ Ze.” Abọ ọyena ọ te rọ izoeme enana kuhọ “Okẹ Evawere Evaọ Udevie Ukoko Jihova” gbe “Uzuazọ gbe Udhedhẹ Ẹkwoma Omarọkẹ gbe Ame-Ọhọ,” u je no oye no uvẹ o rẹ te jariẹ kẹ ilele ekpokpọ re a họ-ame.
Ẹme uvo Ẹdẹ-Ọmaha “Muẹrohọ Iroro Jihova Evaọ Eme” o rẹ te k’iyo enọ wọhọ ‘Kọ Ileleikristi a bi wo abọ evaọ iruo ẹhẹriẹ nẹnẹ?’ gbe ‘Eme họ eriwo Ebaibol kpahe obrukpe uwhu?’ Whọ te jẹ reawere ẹme-ọzọhọkugbe ọjaja nọ o ta nọ “Ọghẹnẹ Udhedhẹ Ọ be Sẹro Ra” yọ maero ẹme urere na o ta re nọ “Le Udhedhẹ Ọghẹnẹ Evaọ Uzuazọ Uviuwou.”
Ọruẹrẹfihotọ ohiohiẹ Ẹdoka o ti kugbe ẹme-ọzọhọkugbe abasa “Evuhu Emamọ Oghẹrẹ Ewhovuẹ Na” gbe ẹme na “Gaviezọ kẹ je y’Ẹme kẹ Ẹme Ọghẹnẹ.” Ọruẹrẹfihotọ ohiohiẹ na o ti kuhọ avọ odhesẹvia ẹgọ-obọdẹ nọ u ti dhesẹ uvi uwuhrẹ no ikuigbe Ebaibol na ze kpahe Gidiọn Obruoziẹ na.
Abọ urere okokohọ na evaọ uvo Ẹdoka o re ti wo ovuẹ ogbotu nọ uzoẹme riẹ o rọ “Eva Ukuhọ Udhedhẹ Uzẹme!—Ehri Vẹ U no Ze?” Evaọ urere riẹ, ẹme ọjaja na “Ẹnyaharo Wọhọ Ewhovuẹ Udhedhẹ Ọghẹnẹ” ọ vẹ rọ okokohọ na te ekuhọ.
Jiroro enẹna re whọ jọ etẹe. Re whọ riẹ oria okokohọ nọ o kẹle oria ra, nya kpohọ Ọgwa Uvie Isẹri Jihova nọ o rọ oria ra hayo kere se enọ iwhowho emagazini ọnana.