Ikokohọ Ubrotọ “Edhere Uzuazọ Ọghẹnẹ” ọrọ 1998
1 Itẹ 10:29 o kareghẹhọ omai inọ “[edhere] ỌNOWO na họ adhẹzọ.” Ẹvẹ uzoẹme okokohọ enukpe nana o kiehọ te—“Edhere Uzuazọ Ọghẹnẹ”! Ẹvẹ a ti dhesẹ uzoẹme onana vẹ te evaọ ọruẹrẹfihotọ edesa na soso? Mai kpobi ma bi rri kparo gaga kpohọ oware nọ a ruẹrẹ fihọ k’omai. A ti ru eme obọdẹ evaọ ikokohọ na.
2 Ẹsejọhọ imishọnare, idibo ebabọ akpọ-soso, hayo amọfa nọ a bi ruiruo evaọ ekwotọ erara a te jọ okokohọ ra. Ẹsejọhọ whọ te nyaku erara nana jọ. Iyẹrẹ kpahe epanọ Jihova ọ be ghale iruo na evaọ ekwotọ sa-sa e te jọ ọruẹrẹfihotọ okokohọ na.
3 Erere na Ọ Rro te Omodawọ nọ A rẹ rọ Jariẹ: Inievo mai buobu evaọ Africa a ruẹ uye ọbẹwẹ no fiki ẹmo gbe ozighi nọ ọ be roma via evaọ abọ jọ unuakpọ oyena. A riwi ikokohọ ahwo Jihova wọhọ oware nọ o be sẹro uzuazọ rai. Ejọ e rẹ nya ugbothabọ hrọ re a kpohọ okokohọ, ghele na a rẹ gwọlọ re uvumọ ọvo o vo ai hi. Ebrọda ikpe 73 jọ evaọ Democratic Republic of Congo (nọ o jọ Zaire vẹre na) ọ nya ikilomita 450 kpohọ okokohọ jọ. Edẹ 16 o rehọ e riẹ re o te t’obei, avọ awọ riẹ nọ i fu, rekiyọ ọ be were eva inọ ọ jariẹ. Nọ okokohọ na ọ fa no, avọ evawere gbe ẹgba abọ-ẹzi nọ o wo no, ọ tẹ wariẹ nya otọ zihe kpo. Enẹ ọ be hai ru anwọ ikpe buobu!
4 Evaọ Mozambique ọsẹro ubrotọ jọ avọ aye riẹ a rọ owotọ gadiẹ ugbehru ukpehru jọ jẹ fa oria okẹkẹe nọ o wọhọ udhude vrẹ kpohọ okokohọ okogho. Erẹ ọ ikilomita 90 na o rehọ e rai euwa 45. Emamọ oriruo imava-orọo nana o tudu họ ahwo kpobi nọ a kpohọ okokohọ na awọ gaga. Iviuwou buobu nọ e jariẹ a daoma utioye na no re a ruẹse jariẹ. Ọsẹro ubrotọ na ọ n’iyẹrẹ nọ inievo jọ, nọ ọjọ rai ọ kpako te ikpe 60 no, a rọ owotọ nya ikilomita 200!
5 Kọ who koko ugho họ rọkẹ ofa kpohọ okokohọ na gbe araha ọfa no re ahwo uviuwou na kpobi a sae nya? Ofariẹ, Kọ who ru ọruẹrẹfihotọ kugbe ohwo nọ who bi ruiruo kẹ no re who wo uvẹ nọ whọ sae rọ jariẹ evaọ edesa okokohọ na kpobi? Esẹ gbe ini nọ i wo emọ isukulu nọ i ti kpohọ ikokohọ nana jọ yọ a te rehọ ehọlide he a rẹ vuẹ iticha rai avọ adhẹẹ inọ fiki abọ egagọ nana nọ o w’uzou na emọ na e te jọ isukulu evaọ Edisoi-Oka ha. Kọ diẹse okokohọ na ọ jọ kẹle owhẹ? Enẹna okere-obe ukoko ra ọ vuẹ owhẹ kpahe eware nọ i kpomahọ ukoko ra no.
6 Okokohọ Edesa: Enukpe ọnana ọruẹrẹfihotọ na ọ te jọ ikokohọ 106 evaọ Nigeria. Fiba ọrọ Isoko, a ti ru ikokohọ evaọ evẹrẹ ọ Abua, Obọ rọ t’Ẹme Amerika, Edo, Efik, Gokana, Gun, Hausa, Igbo, Ijaw, Ishan, Kana, Oyibo, Tiv, Urhobo, gbe Yoruba.
7 Evaọ Edisoi-Oka, okokohọ na o ti muhọ eva 9:20 ohiohiẹ o ve kuhọ evaọ Ẹdoka evaọ ole ọ 3:30 uvo. Evaọ Ẹdẹ-Ọmaha gbe Ẹdoka, ọruẹrẹfihotọ na o ti muhọ eva 9:00 ohiohiẹ.
8 Nọ ma be ruọ imoto kpohọ okokohọ je zihe na, u fo re ma gwọlọ uvẹ ọ isẹri-ise ọnyakuo. Ahwo nọ a rẹ zẹ epẹtro, enọ i bi ruiruo evaọ iwou-eki, imiazọhọ edhere, iruiruo ehọtẹle, gbe enọ e rẹ wọ emu k’ahwo a sai wo isiuru kẹ ovuẹ Uvie na. Ruẹrẹ oma fihọ kẹ onana ẹkwoma emebe-evẹvẹ, emagazini ekpokpọ, ibroshọ, hayo ebe efa nọ whọ rẹ wha lele oma re whọ sae rehọ uvẹ nọ u rovie ro se-isẹri kẹ ahwo nọ a hẹ sae rehọ emamọ usi na nya te oma evaọ edhere ọfa ha.—2 Tim. 3:17.
9 “Yọrọ Oma Epanọ Wha Re Yo”: O rẹ jọ oware areghẹ re ahwo nọ a kpohọ okokohọ a yoẹme uthubro nọ o rọ Luk 8:18 na. A tudu họ ahwo kpobi awọ re a wha Ebaibol gbe obe-ole gbe obe nọ a re kere eme fihọ ze. Kezọ ziezi kẹ ugogo eme evaọ ẹme kpobi nọ a te ta, who ve kere eme kpẹkpẹ fihotọ. Nọ omobọ ra epanọ whọ sai ro fi eme na h’iruo. Aso kpobi evaọ etoke okokohọ na, taure who te ti kiẹzẹ, daoma se eme nọ who kere na jẹ kiẹ ziezi epanọ whọ be nya lele edhere Jihova te.—Itẹ 4:10-13.
10 A muẹrohọ no inọ evaọ oke nọ a be t’ẹme na, ahwo jọ a re no ọgwa na a vẹ nyae keria imoto rai, a gbe yo eme ọ okokohọ na ha. A muẹrohọ amọfa nọ a re mu nya kpenẹ avọ enẹ evaọ oke nọ u fo nọ a rẹ keria ọgwa na re a gaviezọ. A ruẹ utu izoge nọ a rẹ nya no okokohọ na evaọ uvo. Idibo Jihova jọ evaọ oke nọ u kpemu a ru iruthọ ilogbo evaọ izuazọ rai fikinọ a kezọ kẹ ekareghẹhọ Jihova ha. Ababọ avro, ma gwọlọ whaha ethobọ itieye na. (2 Iv. 17:13-15) ‘Ọrigbo ẹrọwọ avọ areghẹ na’ ọ ruẹrẹ uthubro nọ mai kpobi ma gwọlọ fihọ no. O mae r’oja re ma ‘yọrọ onọ ma yo na whawha’ evaọ abọ kpobi orọ ọruẹrẹfihotọ okokohọ edesa na. Oware jọ nọ u re si omai kpobi urru gaga o te jariẹ kẹdẹ kẹdẹ, kugbe iyẹrẹ nọ i ti kpomahọ edhere uzuazọ mai wowoma evaọ obaro. Nọ ma tẹ kezọ ziezi jẹ rehọ oware abọ-ẹzi nọ Jihova ọ k’omai eva uhie ikokohọ nọ e be tha na ro ruiruo, ẹruore mai o ti wo owọ gaga, re ‘ma seba ereghe’ no edhere uzuazọ Ọghẹnẹ.—Mat. 24:45; Hib. 2:1.
11 Ẹgọ nọ Ọ rẹ Kẹ Jihova Orro: Evaọ edẹ ebẹbẹ enana, u fo re ma kezọ viere re ẹzi akpọ na ọ siọ omai oma ba ekpehọ. (1 Kọr. 2:12) Ẹgọ gbe osẹ mai o rẹ jọ kpatiẹ yọ o re dhesẹ oruaro Ọghẹnẹ nọ ma be gọ na. (1 Tim. 2:9, 10) O gwọlọ iwu eghaghae he re a tẹ te jọ udevie ahwo nọ a be ‘wha erru họ uwuhrẹ Osiwi mai na, Ọghẹnẹ.’ (Tait. 2:10) Muẹrohọ uthubro obọdẹ gbe orọ Ikereakere na evaọ Uwou-Eroro Na, ọrọ July 1, 1997, ẹwẹ-obe avọ 11 gbe 12, edhe-ẹme avọ 14-18. Who rri isẹri ilogbo nọ ma rẹ sai se vo ho ẹkwoma ẹgọ nọ ọ rẹ kẹ Jihova orro.
12 Osẹri ikpe 16 jọ o gbiku inọ evaọ owọwọ jọ nọ abọ okokohọ o kuhọ no nọ ọye gbe oniọvo ọmọzae riẹ a je kpohọ oria nọ a jẹ dẹ emuore, a te muẹrohọ nnọ inievo emetẹ gbe emezae jọ nọ e jọ etẹ a nwene kpohọ iwu nọ i fo ho no. Rekọ, ahwo buobu nọ a kpohọ ehọtẹle na a te dhesẹ emamọ uruemu nọ a ruẹ Isẹri nọ e wha ẹgọ ọkpakpatiẹ họ jẹ wha ebaje rai. Onana u te rovie edhere fihọ kẹ isẹri-ise rọkẹ ahwo na jọ.
13 Uruemu nọ U re Jiri Jihova: Ma riẹ nọ uruemu Oleleikristi mai o rẹ sai kpomahọ epanọ amọfa a re riwi egagọ uzẹme na. Fikiere, oke kpobi ma gwọlọ dhesẹ uruemu nọ u fo emamọ usi na jẹ wha ajiri se Jihova.—Fil. 1:27.
14 Ukpe n’ukpo, a ru okokohọ ubrotọ evaọ orọ ọsosuọ riẹ evaọ ẹkpẹlobọ-ọre ọ Angola. Evaọ ẹdẹ avivẹ okokohọ na, a te vi imava nọ i w’uzou iporisi kpohọ ogege na re a sẹro udhedhẹ. A rria okpẹdẹ na soso. Evaọ oke ekuhọ, a tẹ ta isiuru rai via kpahe oware nọ a yo gbe uruemu okpakpatiẹ nọ a muẹrohọ. Ọjọ ọ ta nọ: “Kọ fikieme a je vi omai ze etenẹ? Ma riẹ nọ Isẹri Jihova a rẹ jọ kpatiẹ evaọ eria nọ a kokohọ.”
15 Ohwo ẹko esuo jọ evaọ orẹwho Africa jọ ọ dhẹ kpohọ Europe evaọ okenọ a kpe ahwo riẹ nọ i kiọkọ kpobi no. Ebẹbẹ buobu i te rie fikiere ọ tẹ kare ẹruore gaga. Uwhremu na ọ tẹ jẹ uwuhrẹ Ebaibol rehọ. Nọ o je kpohọ okokohọ ubrotọ ọsosuọ riẹ, o tẹ were iẹ gaga inọ ahwo nọ a no otọhotọ-uyerakpọ sa-sa ze a kokohọ kugbe evaọ udhedhẹ gbe okugbe. U mu riẹ ẹro nnọ ọ ruẹ uzẹme na no, yọ evaọ okokohọ ọyena ọ tẹ gbae mu nọ o re siobọno abọ esuo kpobi no. Uwhremu na ọ tẹ họ-ame, yọ enẹna ọye gbe emọ riẹ a be gọ Jihova.
16 Ẹvẹ uruemu mai evaọ ikokohọ enukpe nana u ti kpomahọ enọ e te nya ze evaọ oke ọsosuọ rai? Kọ a ti muẹrohọ ẹzi ọrọwokugbe nọ a rẹ ruẹ evaọ okenọ ma te bi ruiruo kugbe wọhọ ahwo unevaze? Kọ ẹfuọ oria nọ ma rrọ o ti si ai urru jegbe ẹkwoma ẹromuhotọ inọ taure ma te ti no ogege na, mai gbe emọ mai ma rẹ tọlọ erara kpobi nọ i kokohọ kẹle oria nọ ma keria no? Kọ a ti muẹrohọ uruemu ezi mai evaọ okenọ ma be ruọ imoto kpohọ oria nọ ma kpahe gbe obọ ogege okokohọ na je zihe ze? Kọ a ti muẹrohọ nnọ wọhọ eyewọ, ma rẹ sẹro emọ mai gaga evaọ ẹsikpobi? Joma dao ẹgba mai kpobi re ma ru eva were ahwo kpobi nọ a muẹrohọ omai.
17 Ẹruorote Araha Okokohọ Na: N’otọ avọ otọ ze, Society o wo uzi ọ “oria ẹkeria ọvọvẹ, a re mi ugho ho” eva ikokohọ mai. Kọ ẹvẹ a te rọ hwa araha okokohọ na? Ẹkwoma unevaze ọghoruo ọrọ ahwo nọ a kpohọ okokohọ na. U mu omai ẹro inọ who ti dhesẹ oghẹrẹ ẹzi ọghoruo wọhọ onọ idibo Ọghẹnẹ i dhesẹ evaọ oke anwae evaọ aruorokele Jihova Ọghẹnẹ gbe Jesu Kristi. (2 Kọr. 8:7) A be daoma gaga re a ruẹ nọ unevaze kpobi o te jọ kọkọ, a re kere ai fihotọ, jẹ rehọ ai ru ẹjiroro rai. Unevaze kpobi nọ a ru ẹkwoma echẹke a rẹ hwae kẹ “Watch Tower.”
18 Oria-Ẹkeria: Ọkpọvio nọ a be hae kẹ anwọ ikpe buobu na o ti gbe wo iruo, koyehọ, WHỌ RẸ SAE SE ERIA-ẸKERIA BA KẸ AHWO UVIUWOU RA ỌVO GBE AHWO NỌ A LELE OWHẸ ZE EVA OMOTO RA. U woma nọ ma rọ ruẹ emamọ ẹnyaharo evaọ ẹme ọnana, yọ onana u ru uyoyou nọ a bi dhesẹ via evaọ ikokohọ na rro no. Evaọ eria buobu, eria-ẹkeria jọ e rẹ jọ lọlọhọ ẹnyate vi eria efa. Iviena dhesẹ ororokẹ, jẹ nya siọ eria-ẹkeria nọ e kẹle edhere na ba kẹ ahwo nọ a kpako no gbe enọ eyero rai o gwọlọ e rae. Kareghẹhọ nnọ “uyoyou o rẹ guọlọ orọ obọ riẹ hẹ.”—1 Kọr. 13:4, 5; Fil. 2:4.
19 Ekamẹra, Ekwakwa-Ividio, gbe Itepu: A rẹ sae rehọ ekamẹra gbe ekwakwa nọ a rẹ rọ rekọdo eme ruiruo evaọ ikokohọ. Rekọ, ma rẹ rehọ ae kpokpo amọfa ha. Ma tẹ be nya kpenẹ avọ enẹ bi fi ahwo họ ifoto evaọ etoke ẹmeọta na o rẹ whaha amọfa nọ a be daoma gaviezọ nọ a gbe ro yo ẹme he. A re dhe oware erekọdo fihọ ekwakwa ẹlẹtriki hayo erọ ẹmeọta na ha, yọ okwakwa onana ovuovo u re bru udevie-egbara, edhere, hayo ude amọfa dhe he.
20 Obufihọ Ọsosuọ: Ẹko-Iruo Obufihọ Ọsosuọ na o rọ kẹ oware idudhe ọvo. Iviena wha imu ọ uliaro obọra ze, eware nọ i re fiobọhọ kẹ emu daruoma, ebadeji, ipini, gbe eware itieye na, keme eware itieye na e te jọ evaọ okokohọ na ha. Ahwo nọ a riẹ nọ a re kiewawa, eguegue, ebẹbẹ ubiudu, gbe itieye, a rẹ wha imu nọ a gwọlọ lele oma. Ohwo uviuwou na jọ hayo ohwo ukoko na ọ rẹ jọ kugbei nọ ọ riẹ kpahe uyero rai ọ vẹ jẹ sae dhogbo evaọ okenọ oware idudhe o tẹ via. Ebẹbẹ e roma via no eva ikokohọ evaọ okenọ a nyasiọ ahwo nọ a wo ebẹbẹ eyao egaga ọvo ba nọ eyao rai e jẹ kọ ze. Otẹrọnọ ahwo jọ a wo obọdẹ ẹgwọlọ ẹyao jọ a gbe wo ahwo uviuwou nọ e rẹ sai fiobọhọ kẹ ae he, u fo nọ a rẹ jẹ ekpako ukoko rai riẹ kpahe uyero na a vẹ m’oma obufihọ nọ u fo. O lọhọ họ re a ru ọruẹrẹfihotọ kẹ iwou obọdẹ nọ ahwo nọ a wo ẹyao hayo eghaghọ otafe a rẹ kpahe evaọ okokohọ na.
21 Emuore eva Okokohọ Na: Ohwo kpobi ọ rẹ wha emu obọriẹ ze ukpenọ a re no ibutu na nyae dẹ evaọ etoke eriosehọ ọkpẹkpẹ uvo na. Ẹsejọhọ obọdẹ emu ovovo nọ ọ rẹ lọhọ ẹwha ọ te jariẹ. Uko-obeva ọ Odibọgba Uvie Mai ọrọ September 1997, edhe-ẹme avọ 18, o k’omai ẹjiroro oware nọ a rẹ wha ze. A kuvẹ ọ ekwakwa egalase gbe idi nọ i re muẹ evaọ ogege okokohọ na ha. Ikula hayo ekpa ọ emuore e rẹ jọ kakao re e sae ruọ otọ oria nọ whọ keria na. A muẹrohọ ahwo jọ no evaọ ogbotu na nọ a rẹ re emu jẹ da udi evaọ oke nọ a gbẹ be t’ẹme na. Onana u dhesẹ ababọ-adhẹẹ kẹ okokohọ na.
22 Ẹvẹ eva e were omai te inọ Okokohọ “Edhere Uzuazọ Ọghẹnẹ” na o bi ti muhọ kẹle! Kọ who ru ọruẹrẹfihotọ nọ whọ rẹ rọ nya reno? Jọ ẹnya vrẹ ra ọ jọ omakọkọ re who je zihe kpozi avọ oma-sasa, avọ ọtamuo re whọ nya haro evaọ iruo eghaghae Jihova re who gbe le edhere uzuazọ Ọghẹnẹ haro rọkẹ oghale ibẹdẹ ra.
[Box on page 6]
Ekareghẹhọ Okokohọ
▪ Ame-Ọhọ: Ahwo nọ a te họ-ame a rẹ keria eria nọ a seba kẹ ae na taure ọruẹrẹfihotọ na o te ti muhọ evaọ ohiohiẹ Ẹdẹ-Ọmaha. Ohwo kpobi nọ ọ ma-oma nọ ọ te họ-ame ọ rẹ wha ẹgọ ame-ọhọ nọ ọ rọ kpatiẹ gbe okpa lele oma. Okenọ u kpemu ahwo jọ a wha ẹgọ nọ o kiehọ họ je si ọghọ no ẹjiroro ọruẹrẹfihotọ na. Ekpako nọ i bi ru ọkiẹkpemu enọ nọ e rọ evaọ obe Our Ministry na kugbe ahwo nọ a be te họ-ame na a re wo imuẹro inọ omomọvo o wo otoriẹ igogo-eme enana. Ame-ọhọ evaọ oka omarọkẹ ohwo yọ ẹme omobọ ohwo evaọ udevie ohwo ọyena gbe Jihova. Fikiere u kiehọ họ re ahwo buobu nọ a be họ-ame a gbaloma hayo kru ohwohwo obọ rọ họ-ame.
▪ Ebaje: Iviena sa ebaje ọ 1998 na mu ewu ra ẹsikpobi nọ whọ rọ evaọ okpẹwho okokohọ na gbe okenọ whọ be ro imoto nya je zihe kpo. Ẹsibuobu onana u re ru uvẹ k’omai re ma se emamọ isẹri. Jọ obọ ukoko ra dẹ ebaje gbe urọba riẹ, keme e te jariẹ evaọ obọ okokohọ họ. Whọ hẹrẹ te umutho edẹ nọ okokohọ ọ kẹle no taure whọ tẹ te yare ekade kẹ omobọ ra gbe uviuwou ra ha. Kareghẹhọ wha ekade ọ Advance Medical Directive/Release ra lele oma.
▪ Iwou: Ma be jẹ yare ẹmeoyo ohwo kpobi kpahe iwou nọ okokohọ na ọ te kẹ. Otẹrọnọ ma lavrẹ ọruẹrẹfihotọ Society jẹ rehọ uwou nọ okokohọ na ọ rehọ no vẹre, yọ ma rri iruo egaga inievo mai nọ a rọ gwọlọ iwou ikuẹku vo no. OTẸRỌNỌ WHO WO ẸBẸBẸ JỌ KPAHE UWOU JỌ, iviena whọ siọ ọsẹro Ẹko-Iruo Iwou okokohọ na ba ẹvuẹ hẹ re ọ sai fiobọhọ k’owhẹ ku ẹbẹbẹ na họ ovavo. U re mu ikere-obe ukoko ẹro nọ a vi ebe ọ Room Request erọ Ẹgwọlọ Obọdẹ na evaọ ẹruoke kpohọ ọvuọvuọ adrẹse okokohọ riẹ. Otẹrọnọ whọ be siọ uwou nọ a rehọ ẹgwọlọ obọdẹ ruẹrẹ họ ba, u fo re who vi ovuẹ kpatakpata se ọnọ o wo uwou na gbe Ẹko-Iruo Iwou ọ okokohọ na re a sae fi amọfa họ uwou na.
▪ Iruo Unevaze: Kọ whọ sai ru uvẹ jọ evaọ okokohọ na re who fiobọhọ evaọ ẹko-iruo jọ? Iruo rọ kẹ inievo mai, o tẹ make rọ umutho euwa jọ ọvo dede, u ti fiobọhọ gaga yọ o rẹ wha evevọwẹ se ohwo. Otẹrọnọ whọ sai fiobọhọ, iviena nya bru Ẹko-Iruo Unevaze evaọ okokohọ na. Emọ nọ i ri te ikpe 16 ha a rẹ sae kẹ obọdẹ uketha ẹkwoma iruo evaọ otọ ẹruọsa esẹ gbe ini rai hayo kugbe ekpako efa nọ i te.
▪ Ẹme ọ Unu-Ovẹvẹ: Jọ u muowhẹ ẹro nnọ whọ kare omoto ra oke kpobi, yọ whọ nyase oware ovo nọ a rẹ ruẹ ba nọ o rẹ lẹliẹ ohwo kpare ẹthẹ na ha. Iji e rẹ rẹriẹ ovao rai ku eria nọ ahwo buobu a kokohọ. O rọ oware areghẹ re whọ nyase eware eghaghae ba oria ẹkeria ra ha. O rẹ sai muowhẹ ẹro ho inọ ohwo kpobi nọ ọ keria gb’owhẹ yọ Oleleikristi. Fikieme whọ jẹ dawo ahwo! Iyẹrẹ i t’omai obọ no kpahe omodawọ nọ ahwo obọ otafe jọ a ru no re a bẹbẹ emọ vrẹ. FI EMỌ RA HỌ ORIA NỌ WHỌ JẸ RUE RAI OKE KPOBI.
Ughe etẹlivisiọne gbe ividio nọ e rẹ jọ ehọtẹle buobu i re dhesẹ ifoto ahwo nọ a rọ ẹbẹba ẹsibuobu. Whọ kẹ emọ ra uvẹ re ae ọvo a riwi etẹlivisiọne eva uwou hu.