Okokohọ Ubrotọ “Ewhovuẹ Udhedhẹ Ọghẹnẹ” ọrọ 1996
1 Ọruẹrẹfihotọ okokohọ ubrotọ ukpe nana o ti ghine fiobọhọ k’omai yọrọ udhedhẹ Ọghẹnẹ mai, yọ u ti dhesẹ ẹkẹ-abọ mai evaọ obufihọ k’amọfa re a duku udhedhẹ utioye na. Wọhọ epanọ a whowho evaọ Odibọgba Uvie Mai ọrọ May 1996, uzoẹme na họ “Ewhovuẹ Udhedhẹ Ọghẹnẹ.” Kọ whọ ma-oma iruo ra no re abọ ọruẹrẹfihotọ ọvo ọ se owhẹ ba evo?
2 Ọruẹrẹfihotọ Edẹ-Esa: Ma riẹ nọ whọ te reawere okokohọ enukpe ọnana muotọ gbe nọ who ti zihe kpo avọ ẹzi ọkpokpọ. (2 Irv. 7:10) Enukpe ọnana ma te wariẹ wo ọruẹrẹfihotọ edẹ-esa. Kọ who ru ọruẹrẹfihọ no re who mi uvẹ no iruo ra re whọ sae jariẹ evaọ etoke na kpobi? A te kaki ru ikokohọ jọ no taure isukulu i te ti wo ehọlide. Otẹrọnọ who wo emọ nọ i gbe bi kpohọ isukulu, kọ whọ vuẹ iticha rai avọ adhẹẹ no inọ emọ ra a te jariẹ hẹ evaọ Edisoi-Oka fiki abọ ewuhrẹ egagọ ọnana nọ ọ r’oja na?
3 Odibọgba Uvie Mai ọrọ May 1996 ọ fodẹ edẹ gbe eria okokohọ 104 evaọ Nigeria. Enẹna okere-obe ukoko ra ọ vuẹ owhai no kpahe ọnọ a fi owhẹ họ. Evaọ okokohọ ubrotọ Ota 7 gbe Uli 7 na, a te fa ọruẹrẹfihotọ na fihọ Obọ rọ t’Ẹme Amerika.
4 Ọruẹrẹfihotọ na o ti muhọ evaọ Edisoi-Oka eva 9:20 a.m. o ve je kuhọ evaọ Ẹdoka oke wọhọ 3:30 p.m. Evaọ Ẹdẹ-Ọmaha gbe Ẹdoka, ọruẹrẹfihotọ na o ti muhọ eva 9:00 a.m. Kọ ma ti dhesẹ ororokẹ rọkẹ enọ ekpako no gbe inievo nọ oma rai o ga ha ẹkwoma ẹseba emamọ egbara ọ oria ẹkeria na? Kareghẹhọ nọ “uyoyou o rẹ guọlọ orọ obọ riẹ hẹ.”—1 Kọr. 13:4, 5; Fil. 2:4.
5 Kọ A Te Thọ Owhẹ Da? Nọ ọ wariẹ eme Itẹ 27:17 nọ o ta nọ, “Utehru a rọ thọ utehru da” ro no, Uwou-Eroro na ọrọ August 15, 1993 (ọrọ Oyibo) ze, o te muẹrohọ nọ: “Ma wọhọ itehru nọ e gwọlọ ẹthọ kẹse kẹse. Nọ edhesẹ uyoyou kẹ Jihova gbe iroro ejẹ no ẹrọwọ mai ze u dhesẹ nọ ma re wo ohẹriẹ no akpọ na, kẹse kẹse ma rẹ gbẹ idhere efa, hẹriẹ no erọ ahwo buobu.” Ẹvẹ ma sae ro fi ohrẹ oyena họ iruo?
6 Ma wo ohẹriẹ yọ ma re gbe wo ohẹriẹ no akpọ na. Omodawọ ekẹse kẹse nọ a re ro ru onana gba a rẹ sẹro riẹ otẹrọnọ ma re wo ajọwha kẹ iruo iwoma. (Taitọs 2:14) Oyejabọ nọ uzoẹme ọ Uwou-Eroro nọ ma wariẹ evaọ obehru na o jẹ gbẹ ta haro nọ: “Okenọ ma tẹ rọ kugbe amọfa nọ i you Jihova, ma rẹ thọ ohwohwo—bọ ohwohwo kẹ uyoyou gbe iruo iwoma.” Okokohọ ubrotọ na yọ eruẹrẹfihotọ Jihova re i fiobọhọ k’omai jọ dada evaọ ẹzi. Ma rẹ kuvẹ re abọ ọruẹrẹfihotọ ọvo ọ vrẹ omai hi.
7 Ohwo Areghẹ Ọ Rẹ Gaviezọ: Ezọgaviẹ yọ ona nọ a rẹ bọ. A ta riẹ nọ ohwo aruro ọ rẹ kareghẹhọ ubro abọ ọvo eme nọ o yo—ọ tẹ maki roro nọ ọ rehọ oma totọ gaviezọ gaga dede. Nọ ma be rria oge ọ iroro-hẹriẹ na, ẹsejọ ma re wo ẹbẹbẹ ezọgaviẹ evaọ etoke thethe. Kọ ma sae daoma ru oke ezọgaviẹ mai theri, maero okenọ ma tẹ keria udevie ogbotu nọ ma be gaviezọ kẹ ohwo nọ ọ be t’ẹme? Otẹrọnọ a se owhẹ re who gbiku kpẹkpẹe kpahe ọruẹrẹfihotọ ẹdẹ ọvuọvo nọ who te zihe no okokohọ te uwou no, kọ whọ sai ru erei? Ẹvẹ mai kpobi a sae rọ nyaharo evaọ ẹgba ezọgaviẹ mai kẹ abọ ọvuọvo nọ a be kẹ evaọ ọruẹrẹfihotọ okokohọ na?
8 Emamọ isiuru o r’oja, keme okẹ Ọghẹnẹ ọrọ ẹvori na o sai ruiruo ziezi ababọ riẹ hẹ. Wọhọ oriruo, epanọ ohwo o wo isiuru kpahe ẹme ga te, erei o rẹ lọhọ ga te re ọ kareghẹhọ igogo-eme ẹme na hayo abọ ọruẹrẹfihotọ na. Ghele, abọ buobu o roma-hwa ezọgaviẹ vi epaọ anwẹdẹ kẹ eme nọ a k’omai uvẹ nọ ma yo evaọ okokohọ ubrotọ na. Isiuru egaga mai gbe ezọgaviẹ kẹ abọ ọvuọvo ọruẹrẹfihotọ okokohọ na u wo obọ kpahe eyero ẹzi ọgbọna mai gbe ẹruore obaro mai. O re bẹbẹ hẹ re a vuhumu nọ ma te gaviezọ ziezi hi otẹrọnọ ma keria obọ iwou nọ ma wohọ nọ e rọ Ogege Okokohọ na be gaviezọ kẹ ọruẹrẹfihotọ na wọhọ epanọ ejọ i ru no evaọ oke nọ u kpemu. Fikiere, u fo re ahwo kpobi a kokohọ obọ ibutu na jẹ nya lele ọruẹrẹfihotọ na ziezi. A bi wuhrẹ omai idhere Jihova evaọ ikokohọ jẹ be k’omai ehrẹ nọ ma re ro ru iruo esiwo uzuazọ gba. (1 Tim. 4:16) Roro kpahe omobọ ra wọhọ okọ nọ o rọ abade nọ ẹkporo o bi fiẹ. Eyaa Jihova họ umu-okọ ẹruore na. Otẹrọnọ ohwo ọ be gaviezọ họ eva eruẹrẹfihotọ Oleleikristi ọ tẹ kuvẹ kẹ iroro riẹ re i reghe, igogo-eme uthubro gbe ehrẹ nọ e sae ruei whaha okọ-zue ẹzi e rẹ sae vrẹ riẹ.—Hib. 2:1; 6:19.
9 Evaọ abọ akpọ na buobu, inievo mai a bi ru omodawọ ulogbo re a kpohọ iwuhrẹ. O rọ oware ezi re a ruẹ nọ a be gaviezọ evaọ okokohọ. Dede, evaọ eria jọ, ahwo jọ a hẹriẹ iroro amọfa no ẹkwoma eghoro wariẹ otọ okokohọ na okenọ a be t’ẹme. Amọfa a rẹ nyaze leti. Evaọ ikokohọ jọ nọ e vrẹ no, o jọ bẹbẹ re a yo eme ọsosuọ iminiti emuhọ ọruẹrẹfihotọ na fikiọ ahwo buobu nọ i je ghoro wariẹ akotọ ogege na họ hayo wariẹ eria ẹkeria na. Enana yọ inievo nọ i bi ruiruo hayo iniemọ nọ e be rẹro te ẹgwọlọ emọ boba rai hi. Ukpokpoma na buobu u bi no obọ ahwo nọ i bi weze bru amọfa ze. Ukpe nana Ẹko-Iruo Eruẹrẹahwohọ na a te rọ ẹghẹ fiẹro họ ẹbẹbẹ ọnana gaga, yọ ma wo ẹruore nọ, ahwo kpobi a te keria no okenọ ohwo-agbara na o te zizie omai nọ ma ru ere. Ẹmeoyo ra evaọ abọ nana o te were omai gaga.
10 Kọ ezọhọfihọ nọ i w’iruo vẹ i ti fiobọhọ k’omai gaviezọ kẹ ọruẹrẹfihotọ okokohọ na jẹ yọrọ eme nọ a te ta na buobu? Eme nọ a ta evaọ ikpe nọ e vrẹ no na u fo nọ a rẹ wariẹ ae: (a) Tẹro vi ẹjiroro nọ who ro kpohọ okpẹwho okokohọ na. Orọnikọ re a nyae zaharo ho, rekọ re a gaviezọ je wuhrẹ. (Izie. 31:12) Daoma kake wezẹ ziezi kaso kaso. Otẹrọnọ whọ ze okokohọ na avọ oma nọ u bruku no, o te jọ bẹbẹ re whọ gaviezọ. (b) Kẹ omobọ ra oke buobu re whọ dhẹ omoto ra fihọ oria riẹ je te oria ẹkeria taure ọruẹrẹfihotọ na o te muhọ. Re a bru-okpakpa kpohọ oria ẹkeria evaọ iminiti urere o rẹ whae ze nọ abọ emuhọ na ọ jẹ vrẹ owhẹ. (c) Kere igogo-eme kpẹkpẹe fihọ otọ. Eme nọ a re kere bu ga hrọ o rẹ whaha emamọ ezọgaviẹ. Okenọ who te bi kere, jọ u muowhẹ ẹro nọ igogo-eme efa e vrẹ owhẹ hẹ fikinọ whọ tẹrovi obe-ekere ra. (d) Okenọ a te dhesẹ abọ ẹme okokohọ, rri rie avọ ọwhọ. Nọ omobọ ra nọ, ‘Kọ eme mẹ rẹ sai wuhrẹ no abọ ọnana ze nọ u re ru ovuhumuo gbe uyoyou mẹ kẹ Jihova viharo? Ẹvẹ ovuẹ okpokpọ na o sai ro fiobọhọ k’omẹ dhesẹ uruemu ohwo-ọkpokpọ na via vọvọ? Ẹvẹ onana o sae ro fiobọhọ k’omẹ nyaharo evaọ odibọgba mẹ?’
11 Uruemu Nọ U Re Fi Erru Họ Odibọgba Mai: Pọl ọ tudu họ Taitọs awọ re o dhesẹ omobọ riẹ “oriruo uruemu ezi.” Ẹkwoma edhesẹ ababọ ewhariọ evaọ ewuhrẹ riẹ, Taitọs ọ sae fiobọhọ k’amọfa re a rehọ ‘erru kẹ uwuhrẹ Ọghẹnẹ Osiwi mai, evaọ eware kpobi.’ (Taitọs 2:7, 10) K’ukpe k’ukpe, ma re wo emamọ ekareghẹhọ kpahe oware nọ o soriẹ nọ uruemu ohwo Ọghẹnẹ o jẹ r’oja gaga evaọ okenọ ma be j’ofa kpohọ okokohọ je kpozi, gbe okenọ ma tẹ rọ oria nọ ma wohọ gbe evaọ okokohọ na. Ukpe n’ukpo ma wariẹ yo ọkpahe-fihọ nọ e rẹ sasa-udu nọ ma gwọlọ ghale kugbe owhai.
12 Ohwo nọ o wo uwou jọ ọ ta nọ: “O rọ oware omawere ẹsikpobi re a fi Isẹri na họ uwou keme a wo odiri, ọrọwo-kugbe, a rẹ jẹ rẹro te emọ rai.” Ohwo ehọtẹle jọ nọ o re kere edẹ ahwo nọ e ze ehọtẹle na ọ ta nọ u re ru iruo riẹ “lọhọ gaga okenọ Isẹri na a be nyaze jẹ nyakpo eva ehọtẹle na keme, dede nọ a re dhuyehọ hẹrẹ, ẹsikpobi a rẹ jọ wolẹ, wo odiri, avọ ovuhumuo.” Eva ewere aye jọ kpahe uruemu emoha Isẹri jọ nọ e jẹ rria ehọtẹle ọvona kugbei te epanọ ọ rọ yare ebe ukoko mai jọ.
13 Evaọ abọdekọ riẹ, u fo re ma gbe ru ẹnyaharo evaọ abọ jọ. Ma gwọlọ jẹ owhai riẹ kpahe eware jọ nọ a muẹrohọ nọ a vi se Ukoko-Ulogbo. Ọsẹro ọnyawariẹ jọ ọ n’iyẹrẹ nọ emọ Isẹri Jihova e gbẹ gwọlọ ẹromuhọ. Ma ruẹ ejọ no nọ e jẹ dhẹ-ogborẹ wariẹ je ru edo evaọ oria nọ a wohọ, be rehọ erei kpokpo erara efa. O gwọlọ nọ ma wuhrẹ emọ mai re a w’otoriẹ nọ uruemu Oleleikristi orọnikọ okejọ ọvo a re ro dhesiẹe he. U re kuhọ nọ ma te no ogege okokohọ no ho. U re gbe ruiruo euwa 24 okpẹdẹ na. U fo nọ uruemu mai evaọ eria nọ ma wohọ gbe evaọ iyẹrẹ u wo adhẹẹ wọhọ okenọ ma keria kugbe inievo mai be gaviezọ, nọ Jihova o bi wuhrẹ omai.—Aiz. 54:13; 1 Pita 2:12.
14 O rẹ rehọ igho buobu re a bọ jẹ sẹro ekwakwa Ogege Okokohọ na gbe ẹruorote eware efa. Azọhọ unevaze mai a be rọ rẹrote eware enana. Oniọvo ọmọtẹ jọ avọ emọ-uzoge a wha umutho ugho ze okokohọ. Ghele, ọye avọ emọ na a rehọ umutho azọhọ fiobọhọ. Oware nọ omomọvo ọ jiroro nọ o re ru evaọ abọ nana yọ ẹme obọ ohwo, rekọ ma riẹ nọ who vuhu aghare ekareghẹhọ ọyena mu.—Iruẹru 20:35; 2 Kọr. 9:7.
15 A re Vuhu Omai Ẹkwoma Oghẹrẹ nọ Ma Rọ Gẹgọ: Oghẹrẹ nọ ma gẹgọ u re dhesẹ kpahe omai gbe epanọ ma roro kpahe amọfa. Emuosẹ ọwhọwhọhọ gbe erọ oheri evaọ isukulu hayo oria iruo e wariẹ emọ uzoge gbe ekpako họ. K’ukpe k’ukpe a bi ru eghẹrẹ emuosẹ vrẹta, enọ i re gbe ohwo unu. Ma gbẹ sẹro oma mai hi, o sae jọ lọlọhọ re egbẹnyusu obọ akpọ mai i ru omai re ma gẹgọ wọhọ e rai. Eghẹrẹ ẹgọ buobu i fo enọ a re ku họ evaọ eria ewuhrẹ egagọ họ. Okerefihotọ jọ nọ o te omai obọ nọ okokohọ jọ nọ u kpemu o kuhọ no o kẹ uyere kẹ ọruẹrẹfihotọ na rekọ o fibae nọ: “U je gbe omẹ unu kpahe oware nọ o soriẹ nọ emetẹ buobu a ro fi iwu ekpẹkpẹe họ, enọ a bẹre ighogho họ gbe enọ i re kp’ivie fihọ.” Avọ imuẹro mai kpobi a gwọlọ gẹgọ evaọ edhere nọ o fo egbodibo Ileleikristi te evaọ okokohọ gbe oke gheghe nọ ọruẹrẹfihotọ na o te kuhọ no. Evaọ oke kpobi u fo re ma roro kpahe uthubro Pọl ukọ na kẹ Ileleikristi re ma “gọ umutho-ẹgọ no re fo, avọ omaurokpotọ [gbe iroro fuafo].”—1 Tim. 2:9.
16 Ono o re dhesẹ oware nọ o rọ kpatiẹ, “umutho-ẹgọ”? Re ma jọ kpatiẹ u dhesẹ nọ ma rẹ “wharo hayo omovia ha.” Obe-ofeme o tẹ jẹ fa ẹkpatiẹ wọhọ “ababọ-eviẹhọ.” Ukoko-Ulogbo hayo ekpako ukoko a re j’uzi kpahe osẹ hayo ẹgọ họ. O tẹ make rọ erei, kọ u gbe fo re o jọ vevẹ kẹ Oleleikristi kpahe oghẹrẹ ẹgọ nọ u kiehọ họ hayo onọ o rọ kpatiẹ hẹ? (Wawo Ahwo Filipai 1:10.) U fo re ẹgọ gbe osẹ mai u zihe ruọ ughe-urio kẹ ahwo ho. Ogbahọ nọ ẹgọ mai ọ rẹ jọ wowoma, orọnikọ edhere obọ akpọ hayo onọ o rẹ dheva ha. Wọhọ egbodibo emamọ usi na, ma tẹ s’osẹ jẹ g’ẹgọ nọ u kiehọ evaọ okenọ ma rọ evaọ okpẹwho okokohọ ubrotọ na o rẹ wha adhẹẹ se Jihova jẹ wha emamọ odẹ se ukoko na. Fikiere, esẹ gbe ini a re fi emamọ oriruo họ otọ a ve wo imuẹro inọ emọ rai a gọ emamọ ẹgọ kpohọ oria na. Ogwọlọ nọ ekpako ukoko a rẹ kẹ emamọ oriruo jẹ thoma-kpahe re a kẹ uthubro owowolẹ nọ o tẹ gwọlọ ere.
17 Ekamẹra gbe Ekwakwa Itepu: A k’uvẹ re a rehọ ekamẹra gbe ekwakwa itepu efa ruiruo, thakpinọ ma dhesẹ ororokẹ rọkẹ amọfa nọ e keria na. Otẹrọnọ ma be nya wariẹ rehọ ifoto evaọ okenọ ẹme ọ be nyaharo, orọnọ iroro amọfa nọ e be gaviezọ ọvo ma bi kpokpo ho rekọ abọ ọruẹrẹfihotọ na ọ be vrẹ omai re. Ma re wo erere no okokohọ na ze ẹkwoma obọdẹ ezọgaviẹ kẹ enọ e be t’ẹme na je kere eme nọ i wuzou fihọ otọ. O sae jọ nọ ma bi tepu ẹme kẹ oniọvo ọmọzae hayo oniọvo ọmọte nọ ọ sae nyaze he; ghele, evaọ abọ mai, ma rẹ sae ruẹ nọ ma te kpozi no, oke o rẹ jariẹ nọ ma rẹ rọ gaviezọ kẹ eme ọruẹrẹfihotọ nọ ma rehọ euwa buobu ro tepu na ha. A k’uvẹ re a thuru ufi itepu ọvo fihọ iwhaya ọ ekwakwa ẹlẹtiriki hayo eme-ovuẹ na ha, hayo re ekwakwa i di oria jọ, edhere nọ ahwo a rẹ nya, hayo di ude amọfa ha.
18 Ẹkeria: Ma gbẹ be ruẹ ẹnyaharo evaọ ẹme ọ eria-ẹkeria nọ a rẹ seba k’ahwo. Ukpe n’ukpo, ibuobu rai a nya lele ọkpọvio na nọ: WHỌ RẸ SAE SE ERIA-ẸKERIA BA KẸ AHWO IVIUWOU RA ỌVO GBE AHWO NỌ A LELE OWHẸ ZE EVA OMOTO RA. Ẹsejọhọ whọ ruẹ nọ o wha idhọvẹ ze tere he keme ahwo buobu a jẹ nya lele ekpọvio ivevẹ enana. Tubẹ mai wuzou dede, ẹmeoyo ra o jọ omawere kẹ Jihova gbe ‘odibo ẹrọwo’ na, ọnọ ọ be kẹ emuore ẹzi na.—Mat. 24:45.
19 Itikẹte Emuore: Ma be tudu họ ahwo kpobi awọ re a dẹ itikẹte rai taure okokohọ na o te ti te. Eme họ ẹjiroro onana? A tẹ kake zẹ itikẹte emuore na u re ru nọ ugho nọ a rẹ rọ dẹ eware emuore fihọ okokohọ na o jẹ jariẹ. O gwọlọ nọ a rẹ kake dẹ isikapa, elẹ, igari, enama, erifẹ, egua, ẹbe, gbe ekwakwa emuore efa re e jariẹ evaọ etoke ikokohọ ubrotọ na. Wọhọ epanọ eware e rẹ jọ, unuigho emuore e rẹ ghare gaga nọ ezi ehọlide u bi sikẹle evaọ December na. O gwọlọ nọ ọsẹro iruo emuore kẹ okokohọ na ọ kake dẹ ekpa emuore fihọ otọ, yọ o gwọlọ igho re o ro ru onana. Ukoko-Ulogbo o bi wo ẹbẹbẹ ugho nọ ọ rẹ kẹ fiki onana fikiọ ikokohọ buobu nọ a bi ru evaọ orẹwho na. Fikioye ma jẹ be tudu họ owhai awọ re wha kake dẹ itikẹte mi Ogbẹgwae Okokohọ na. A vẹ rehọ igho nana kake dẹ emuore. Who ti ghine wo erere no emuore okuẹku ze evaọ obọ uwou-emu gbe oria oma-uru-sasa evaọ okokohọ na, nọ a tẹ dẹ emuore evaọ okenọ e ghare te erei hi.
20 Fikiere, ma tudu họ esẹro ukoko gbe ikere-obe ukoko kpobi awọ re a ru ọruẹrẹfihotọ kẹ ẹkake dẹ itikẹte emuore. A rẹ sae ru onana ẹkwoma ọnọ ọ be rẹro te eware okokohọ evaọ ukoko kpobi. Iwhowho-uvie a rẹ sae hwosa ugho itikẹte emuore rai nọ a tẹ nwane t’ẹme kpahe ẹme ọnana no evaọ September. A rẹ sẹro obe nọ a kere edẹ rai fihọ. Okenọ a tẹ dẹ itikẹte na mi Ogbẹgwae Okokohọ na ze no, a vẹ ghale enana kẹ iwhowho-uvie nọ e hwosa fihọ otọ vẹre na. Iwhowho-uvie na a rẹ sẹro rai wọhọ igho jẹ roma totọ rẹro te ai. A rẹ sae rehọ itikẹte emuore na dẹ emuore evaọ obọ uwou-emu gbe oria oma-uru-sasa nọ a tẹ nwani te okokohọ na no. Ma tudu họ iwhowho-uvie kpobi awọ nọ a kake dẹ itikẹte o tẹ kawo rọ kẹ edẹ ivẹ ọsosuọ okokohọ na. Ma te ru erei u re fiobọhọ nọ a rẹ rọ dẹ emuore buobu fihọ otọ taure okokohọ na o te ti muhọ.
21 Azọhọ Eware Emuore: Ma tudu họ ahwo kpobi awọ nọ a zọhọ emuore kẹ ikokohọ ubrotọ na. Onana o rẹ sae kugbe egheghẹrẹ emuore nọ a rẹ re, wọhọ elẹ, isikapa, igari, ibierẹ, egua, ibi-iziwo, itomatoso, ibi-ure, ẹbe, enama, erifẹ, gbe eware emuore efa nọ whọ gwọlọ zọhọfihọ. Onana yọ emamọ edhere nọ a re ro fiobọhọ kẹ iruo Uvie na. Ẹko-Iruo Emuore na a te rehọ enana kpobi ruiruo. Azọhọ eware emuore ra u ti fiobọhọ kẹ okokohọ na nyate unu igho-raha riẹ jẹ rehọ emuore ọvọvẹ kẹ ahwo nọ e rọ iruo ọkobaro.
22 U fo re a ru ọruẹrẹfihotọ evaọ ukoko na kẹ azọhọ emuore nọ a tẹ nwane t’ẹme kpahe uzoẹme ọnana no gbe ẹwha emuore na kpohọ Ogege Okokohọ na. Dede, eware emuore nọ e rẹ kake raha u fo re a wha ae ze evaọ ẹruoke re e seba ẹraha taure a te ti ru okokohọ ọsosuọ. Otẹrọnọ Ogbẹgwae Okokohọ na a re kẹ uzedhe ithubro kpahe okenọ a rẹ wha eware emuore ze he, whọ rẹ sae nọ mi ai. Eware emuore kpobi nọ iwhowho-uvie a wha ze evaọ okenọ a te te okokohọ a rẹ nwane rehe ai ovavo kpohọ uwou emuore na.
23 Ma gwọlọ tudu họ owhẹ awọ re re whọ gbẹ hae fiobọhọ kẹ ọruẹrẹfihotọ emu othere evaọ okokohọ na. Oware nọ ma be hae ru vẹre họ ma re zizie ikoko nọ e rọ okokohọ ọyena ha re a there emu na. Okenọ a te se ukoko ra kẹ iruo enana, u fo nọ iwhowho-uvie kpobi nọ e rọ ukoko na a daoma re a fiobọhọ vọvọ.
24 Fiba ọruẹrẹfihotọ emuore nọ a ru evaọ uwou-emu gbe oria oma-uru-sasa emuore kpobi na, otẹrọnọ iwhowho-uvie a gwọlọ re emu nọ a wha no obọ uwou ze evaọ ibutu na evaọ oke eriosehọ, a rẹ sai ru erei. Erei re, otẹrọnọ ahwo jọ a gwọlọ dẹ emuore fihọ imidhe obọ rai no uwou-emu hayo oria oma-uru-sasa emuore kpobi ze re a re-emu evaọ ibutu na, a rẹ sae k’uvẹ kẹ oyena. Oware nọ o mae r’oja họ omomọvo o re ru oria riẹ fuafo nọ ọ tẹ re-emu no. Ọruẹrẹfihotọ okokohọ na o re fi ikete nọ iwhowho-uvie na a re ku eware ezuzu rai họ fihọ eria sa-sa, yọ eware nọ a re ro ru orufuọ e rẹ jariẹ ziezi. Otẹrọnọ itehe emuore esese e r’oja, ma re ru uvẹ kẹ ae otẹrọnọ e rẹ gba otọ agbara ra. Ghele, a rẹ wọ itehe ilogbo hayo idi egaga ze oria ogbotu na ha. U fo re a whaha emuọriọ hayo eware ivovo eriọ evaọ etoke ọruẹrẹfihotọ na. Onana u re dhesẹ ababọ adhẹẹ kẹ emuore ẹzi nọ a be kẹ na.
25 Okokohọ Ubrotọ ọsosuọ “Ewhovuẹ Udhedhẹ Ọghẹnẹ” o ti muhọ kẹle. Kọ whọ ruẹrẹ oma họ no nọ whọ te rọ nya, kọ whọ ruẹrẹ oma họ no re whọ reawere okugbe oghọghọ edẹ esa gbe eware iwoma ẹzi na? O rọ olẹ nọ u no udu mai ze inọ Jihova ọ te ghale omodawọ ra re who kpohọ okokohọ enukpe ọnana.
[Box on page 6]
Ojọriẹ Okokohọ Ubrotọ
Ame-Ọhọ: Ahwo nọ e rẹ te họ-ame a rẹ keria eria nọ a seba kẹ ae taure ọruẹrẹfihotọ na o te ti muhọ evaọ ohiohiẹ Ẹdẹ-Ọmaha. A muẹrohọ no nọ ahwo jọ a be g’ẹgọ nọ ọ kare adhẹẹ nọ u re si ọghọ no oria na. Ohwo kpobi nọ ọ ma-oma nọ ọ te họ-ame ọ rẹ wha ẹgọ ame-ọhọ nọ ọ rọ kpatiẹ gbe okpa lele oma. Ekpako ukoko nọ e be kiẹ enọ nọ e rọ obe ọ Our Ministry kugbe ahwo nọ e be te họ-ame a re wo imuẹro nọ omomọvo o wo otoriẹ igogo-eme enana. Okenọ ọnọ o bi ru ẹme na o te ku ẹme ame-ọhọ na gbe olẹ họ no, ohwo-agbara abọ yena ọ te kẹ ahwo nọ e be te họ-ame na ithubro ekpẹkpẹe o ve se ole nọ a te so. Nọ a tẹ so abọ urere ole na no, eruẹrẹahwohọ na a ve su enọ e be te họ-ame na kpohọ oria ame-ọhọ na. Nọ o rọnọ ame-ọhọ yọ oka omarọkẹ omobọ ohwo na nọ o rọ udevie ohwo ọyena gbe Jihova na, uvẹ o rọ kẹ onọ a re se ame-ọhọ kugbe ọrivẹ nọ imava hayo bu vi ere nọ e be họ-ame a rẹ jọ gbaloma hayo kru ohwohwo obọ họ. Iviena muẹrohọ nọ ẹgwọlọ Ikereakere ọvo ọ riẹ hẹ nọ o gwọlọ nọ inievo emetẹ a rẹ fa uzou rai hayo a re kpei fihọ evaọ okenọ a be họ-ame. A rẹ jẹ eghẹrẹ ivẹ na rehọ.
Ebaje: Iviena sa ebaje ọ 1996 ra mu ewu eva okokohọ na gbe okenọ whọ be ro imoto kpohọ je no ogege okokohọ ze. Ẹsibuobu onana u re ru ei lọhọ nọ ma je se emamọ isẹri evaọ okenọ ma rọ imoto. Dẹ ebaje gbe um’uwou riẹ evaọ ukoko ra, keme e te jariẹ evaọ obọ okokohọ họ. Whọ hẹrẹ te umutho edẹ nọ okokohọ ọ kẹle no taure whọ tẹ te yare ekade kẹ omobọ ra gbe iviuwou ra ha. Kareghẹhọ wha ekade ọ Advance Medical Directive/Release ra lele oma.
Iwou: Ma be jẹ yare ẹmeoyo ohwo kpobi kpahe iwou-ewohọ nọ okokohọ na ọ te kẹ. Otẹrọnọ ma lavrẹ ọruẹrẹfihotọ Ukoko-Ulogbo jẹ rehọ uwou nọ okokohọ na ọ rehọ no vẹre, yọ ma rri iruo egaga inievo mai nọ a rọ ta emamọ unuigho nọ a rẹ hwa fihọ otọ vo no. OTẸRỌNỌ WHO WO ẸBẸBẸ KPAHE UWOU-EWOHỌ JỌ, iviena who si enẹ h’emu re whọ vuẹ ọsẹro Ẹko-Iruo Uwou evaọ okokohọ na ha re a sai fiobọhọ k’owhẹ ku ẹbẹbẹ na họ ovavo. U re mu ikere-ebe ukoko ẹro nọ ebe ọ Room Request ọ Ẹgwọlọ Obọdẹ a vi rai evaọ ẹruoke kpohọ ọvuọvuọ adrẹse okokohọ riẹ. Otẹrọnọ whọ gbẹ gwọlọ uwou nọ a rehọ ẹgwọlọ obọdẹ ruẹrẹhọ họ, u fo re who vi ovuẹ kpatakpata se ọnọ o wo uwou na gbe Ẹko-Iruo Iwou ọ okokohọ na re a sae fi amọfa họ uwou na.
Iruo Unevaze: Kọ whọ sae ru uvẹ jọ evaọ okokohọ na re who fiobọhọ evaọ ẹko-iruo jọ? Iruo ru kẹ inievo mai, o tẹ make rọ umutho euwa dede, o sae jọ oware obufihọ jẹ wha edẹro ze. Otẹrọnọ whọ rẹ sae fiobọhọ, iviena nya bru Ẹko-Iruo Unevaze evaọ okokohọ na. Emọ nọ i ri te ikpe 16 ha a rẹ sae zọhọ emamọ abọ fihọ ẹkwoma iruo evaọ otọ ẹruọsa esẹ gbe ini rai hayo kugbe ekpako efa nọ i wo owha-iruo.
Eme Uthubro: Jaja arovi kẹ eware nọ e rẹ sae wha idhọvẹ ze re a sae whaha ebẹbẹ nọ i fioka ha. Ẹsibuobu iji gbe ahwo ugbarugba a re zere ahwo nọ i no oria iwou rai no. Jọ u muowhẹ ẹro nọ whọ kare omoto ra oke kpobi, yọ whọ nyase oware ovo nọ a rẹ ruẹ ba nọ o rẹ lẹliẹ ohwo kpare ẹthẹ na ha. Iji gbe enọ e rẹ tọlọ-obọ a rẹ rẹriẹ ova rai ku eria nọ ahwo buobu a kokohọ. O rọ oware areghẹ re whọ nyase eware eghaghae ba oria ẹkeria ha. Whọ rẹ sae wo imuẹro nọ ohwo kpobi nọ ọ keria gb’owhẹ yọ Oleleikristi hi. Fikieme who je fi ẹdawọ họ kẹ ahwo? Iyẹrẹ i t’omai obọ no kpahe omodawọ nọ ahwo obọ otafe jọ a ru re a bẹbẹ emọ vrẹ. FI EMỌ RA HỌ ORIA NỌ WHỌ JẸ RUE RAI OKE KPOBI.