Wuhrẹ Emọ ra
Jẹhoash O Kiuke ku Jihova Fiki Ekpehre Usu
O JỌ etoke imuozọ evaọ Jerusalẹm, okpẹwho nọ etẹmpol Ọghẹnẹ o jọ. A nwani kpe Ahazaya ovie na obọ. Oware nọ Atalia, oni Ahazaya, o ru u gbo gaga. O kpe emezae Ahazaya—iruọmọ obọriẹ! Kọ whọ riẹ oware nọ o lẹlie riẹ ru ere?—a Re ọyomariẹ ọ ruẹse jọ ovie ukpọ emọ na.
Dedena obọ riẹ u te ọjọ họ, odẹ ọnana họ Jẹhoash, yọ Atalia oniode rai na ọ riẹ nọ ọ vabọ họ. Kọ whọ gwọlọ riẹ oghẹrẹ nọ ọ rọ vabọ?— Ọsẹ Jẹhoash o wo oniọvo-ọmọtẹ jọ nọ a re se Jẹhoshẹba, ọye ọ wọ riẹ nyai sino họ etẹmpol Ọghẹnẹ. Ọ sai ru onana keme ọzae riẹ Jehoiada ọ jọ Ozerẹ Okpehru. Fikiere, tei te ọzae na a dawo oma kpobi ruẹ nọ oware ovo u ru Jẹhoash he.
A ko Jẹhoash dhere ikpe ezeza evaọ etẹmpol na. A jọ etẹe wuhrẹ iẹe kpahe Jihova Ọghẹnẹ gbe izi riẹ. Nọ Jẹhoash o te ikpe ihrẹ no, Jehoiada ọ tẹ gbẹ edhere nọ a rẹ rọ rehọ Jẹhoash mu ovie. Kọ whọ gwọlọ riẹ epanọ Jehoiada o ro ru onana gbe oware nọ o via kẹ Atalia ọgeva na, oniode Jẹhoash nọ o ru omariẹ họ ovie na?—
Jehoiada ọ lẹlẹ se ẹgwae egba nọ i re rroro ivie evaọ Jerusalẹm. Ọ tẹ vuẹ ai epanọ ọyomariẹ avọ aye riẹ a ro siwi uzuazọ ọmọ Ahazaya ovie na. Kẹsena Jehoiada o te dhesẹ ọmọ na, Jẹhoash kẹ egba na, enọ i vuhumu inọ ọmọ nana ọ rẹ ginẹ jọ ovie na. A tẹ jiroro oware nọ a bi ti ru.
Jehoiada ọ tẹ rọ Jẹhoash lahwe, a te ku etu-uvie họ iẹe. Kẹsena, ahwo na “a tẹ tehe abọ rai, a tẹ ta nọ, ‘Uzuazọ obọ ovie mai.’” Yọ egba nọ i re lele ivie na e wariẹ Jẹhoash họ re obọ ohwo ọvo o siẹe ba ete. Whaọ nọ Atalia o yo edo oghọghọ na ọ tẹ dhẹ ruọ otafe bi bo nọ, Iyẹ yo, Iyẹ yo. Rekọ Jehoiada ọ tẹ ta kẹ egba na inọ a kpe Atalia, a te kpei.—2 Ivie 11:1-16.
Kọ who roro nọ Jẹhoash ọ ruabọhọ ezọgaviẹ kẹ Jehoiada jẹ ruabọhọ oware uwoma uruo?— Ee, o ru ere evaọ etoke nọ Jehoiada ọ gbẹ jọ uzuazọ? Jẹhoash o tube ru nọ ahwo a rọ rehọ igho ze kẹ aruẹrẹ etẹmpol Ọghẹnẹ, onọ ọsẹ riẹ Ahazaya, gbe ọsẹ-ode riẹ Jehoram a gbabọkẹ vẹre. Rekọ joma ruẹ oware nọ o via nọ Jehoiada, Ozerẹ Okpehru na o whu no.—2 Ivie 12:1-16.
Oke nana yọ Jẹhoash ọ jọ oware wọhọ ikpe 40. Ukpenọ ọ ruabọhọ usu ahwo nọ a be gọ Jihova, Jẹhoash o te mu usu kugbe ahwo nọ a be gọ eghẹnẹ erue. Zekaraya ọmọzae Jehoiada, ọ jọ ozerẹ Jihova oke yena. Eme who roro nọ Zekaraya o ru nọ ọ riẹ kpahe ikpehre eware nọ Jẹhoash o muhọ eru no?—
Zekaraya ọ vuẹ Jẹhoash nọ: ‘Epanọ wha kiuke ku ỌNOWO na, o ti kiuke ku owhai re.’ Eme yena e lẹliẹ eva dha Jẹhoash gaga, te epanọ ọ rọ ta nọ a rọ itho fi Zekaraya kpe. Dai roro kpahe oyena—a siwi Jẹhoash no obọ ohwo nọ o je ti kpei, rekọ enẹna ọyomariẹ o te zihe ruọ ojihẹ, nọ ọ ta nọ a kpe Zekaraya!—2 Iruẹru-Ivie 24:1-3, 15-22.
Kọ who muẹrohọ eware jọ nọ ma rẹ sai wuhrẹ no ikuigbe nana ze?— Ma gwọlọ jọ wọhọ Atalia ha, ọnọ ọ jọ eva gaga je mukpahe amọfa. Ukpoye, ma re you ibe Ileleikristi mai gbe ewegrẹ mai dede, wọhọ epanọ Jesu o wuhrẹ omai nọ ma ru na. (Matiu 5:44; Jọn 13:34, 35) Kareghẹhọ re inọ ma te bi ru oware uwoma wọhọ epanọ Jẹhoash o ro muhọ na, u fo nọ ma rẹ ruabọhọ usu kugbe ahwo nọ a you Jihova, enọ e rẹ ta udu họ omai awọ gọe.
[Oruvẹ-obotọ]
a Who te bi se onana kugbe emaha, usi nana — o rẹ kareghẹhọ owhẹ inọ who s’unu họ jẹ ta udu họ ae awọ re a kpahe ẹme.
Enọ:
○ Ẹvẹ a ro siwi Jẹhoash no uwhu, kọ ono ọ jẹ gwọlọ kpei?
○ Ẹvẹ a rọ rehọ Jẹhoash mu ovie wọhọ epanọ u fo, kọ didi eware iwoma o ru?
○ Eme ọ lẹliẹ Jẹhoash mu eyoma họ eruo, kọ ono o kpe?
○ Eme ma rẹ sai wuhrẹ no ikuigbe Ebaibol nana ze?
[Uwoho nọ o rrọ ẹwẹ-obe avọ 27]
A siwi Jẹhoash