Kọ A Sai Wo Otoriẹ Ebaibol Na?

“Uviuwou mai o jẹ hai se Ebaibol na k’Ẹdoka k’Ẹdoka. Mẹ jẹ hae reawere isase na tere he. Mẹ riẹ nọ Ebaibol na yọ Ẹme Ọghẹnẹ, rekọ mẹ jẹ sai wo otoriẹ eware buobu nọ me je se he.”—Ọzae jọ nọ a re se Steven, evaọ obọ Britain.

“Nọ mẹ jọ ikpe 17, mẹ jẹ daoma se Ebaibol na. O jọ bẹbẹ kẹ omẹ re me wo otoriẹ riẹ, fikiere mẹ tẹ siẹe ba ese.”—Aye jọ nọ a re se Valvanera, evaọ obọ Spain.

“U wo oke jọ nọ me ro se Ebaibol na re keme mẹ rehọ iẹe inọ wọhọ ohwo ichọche Kathọlik, o gwọlọ nọ me re sei. Ikpe esa me ro sei re! Rekọ eware nọ mẹ jariẹ wo otoriẹ rai i tulo ho.”—Aye jọ nọ a re se Jo-Anne, evaọ obọ Australia.

EBAIBOL na họ obe nọ o mae viodẹ evaọ akpọ na soso. O rrọ obe nọ a be mae dẹ vi ebe efa kpobi, oye họ obe nọ ahwo a mai wo, nọ a mae fa fihọ evẹrẹ buobu no, yọ a ru rie fihọ ekwakwa ikporakporo buobu vi epaọ anwẹdẹ kpobi no. Dede na, ahwo buobu nọ a wo Ebaibol na a be sai wo otoriẹ riẹ hẹ. Kọ ere o rrọ kẹ owhẹ re?

Kọ Ọnọ O Wo Eme Ebaibol na Ọ Gwọlọ nọ Ma Wo Otoriẹ Eme Riẹ?

Ebaibol na e ta nọ: “Ọghẹnẹ o gie ẹwolo ku ikereakere na kpobi.” (2 Timoti 3:16) Ẹhẹ, Jihova Ọghẹnẹ họ Ọnọ o wo eme Ebaibol na. Kọ ọ gwọlọ nọ ma wo otoriẹ Ẹme riẹ? Manikọ o ru eme riẹ gaga re umutho ahwo jọ ọvo a sai wo otoriẹ rai, wọhọ isu-egagọ gbe egba-uwuhrẹ nọ e rẹ kiẹ kpahe Ebaibol na?

Rri eme nana nọ a rehọ no Ebaibol ze na:

“Uzi onana nọ me je kẹ owhai nẹnẹ na o rẹ gaga kẹ owahi hi, hayo u theri abọ họ.”—Iziewariẹ 30:11.

“Eme ra nọ i rovie fihọ e rẹ kẹ elo; e vẹ jẹ rehọ otoriẹ rọ kẹ enọ e riẹ ovuovo ho.”—Olezi 119:130.

“Eva oke oyena, [Jesu] ọ tẹ ghọghọ eva Ẹzi Ẹri anọ, ‘Ọsẹ Ọnowo Odhiwu gbe akpọ, me yere owhẹ epanọ who ku eware enana dhere iwoareghẹ gbe erieriariẹ, whọ tẹ rehọ ae via kẹ emọ-efofa.’”—Luk 10:21.

Ọnọ o wo eme Ebaibol na ọ ginẹ gwọlọ nọ who wo otoriẹ Ẹme riẹ! Rekọ uzẹme riẹ họ, o rrọ bẹbẹ kẹ ahwo buobu nọ a bi se Ebaibol na re a wo otoriẹ riẹ. Eme ọ rẹ sai fi obọ họ kẹ ae? Izoẹme nọ e rrọ aro na e ta kpahe eware esa jọ nọ e rẹ sai fi obọ họ kẹ owhẹ wo otoriẹ Ebaibol na.