Epanọ Whọ Sai ro Wo Otoriẹ Ebaibol Na
1. Yare Obufihọ mi ọnọ o wo Eme riẹ
Aye jọ nọ a re se Ninfa, nọ ọ be rria Italy ọ ta nọ: “Oke jọ nọ u kpemu, mẹ jẹ hai se Ebaibol na re me te kiẹzẹ. Me je ru ere keme mẹ riẹ nọ Ebaibol na yọ Ẹme Ọghẹnẹ, yọ dedenọ mẹ jẹ nwane reawere isase na ha, mẹ jẹ gwọlọ riẹ oware nọ Ọghẹnẹ o kere fihọ Ebaibol na. O jọ omẹ iroro inọ me re se oma riẹ kpobi. Oke ọsosuọ o jọ lọlọhọ kẹ omẹ, rekọ me te ti se ku eria jọ nọ e jọ gaga, mẹ gbẹ sai se vrẹ ere he.”
KỌ OWARE nọ o via kẹ Ninfa na o via kẹ owhẹ no re? O via ere kẹ ahwo buobu no. Rekọ wọhọ epanọ ma jọ uzoẹme nọ o vrẹ ruẹ na, Ọnọ o wo eme Ebaibol na, Jihova Ọghẹnẹ, ọ gwọlọ nọ who wo otoriẹ Ẹme riẹ. Kọ ẹvẹ whọ sai ro wo otoriẹ riẹ? Oware ọsosuọ họ, whọ rẹ yare obufihọ mi Ọnọ o wo eme na.
Ahwo a rri ilele Jesu wọhọ ahwo “nọ a wuhrẹ hẹ,” enọ e riẹ obe he, fikinọ a kpohọ isukulu egagọ nọ e viodẹ evaọ oke rai hi. (Iruẹru Ikọ Na 4:13) Rekọ Jesu ọ kẹ rai imuẹro inọ a rẹ sai wo otoriẹ Ẹme Ọghẹnẹ. Evaọ oghẹrẹ vẹ? Jesu ọ ta nọ: “Ọthuke na, Ẹzi Ẹri na, ọnọ Ọsẹ ọ rẹ te rehọ odẹ mẹ viẹ, o re ti wuhrẹ owhai eware kpobi.” (Jọn 14:26) Ọghẹnẹ ọ rehọ ẹzi ọfuafo, hayo ogaga iruo nana, rọ ma otọakpọ na gbe eware kpobi nọ e riẹe. (Emuhọ 1:2) Ọ tẹ jẹ rọ ẹkwoma ẹzi nana kẹ ahwo udhuvẹ (40) ẹgba nọ a ro kere iroro riẹ fihọ Ebaibol na. (2 Pita 1:20, 21) Ẹzi ọvo yena o re fi obọ họ kẹ ahwo nọ a ginẹ gwọlọ wo otoriẹ Ebaibol na.
Ẹvẹ whọ sai ro wo ẹzi Ọghẹnẹ? O gwọlọ nọ whọ rẹ yare Ọghẹnẹ avọ ẹrọwọ inọ ọ rehọ iẹe kẹ owhẹ. Ẹhẹ, o sae gwọlọ nọ who dhei ẹyẹyare. Jesu ọ ta nọ: “Yare, a rẹ te kẹ owhai . . . Wha tẹ riẹ epanọ wha rẹ rọ emamọ eware kẹ emọ rai, kẹvẹ Ọsẹ obọ odhiwu rai ọ rẹ rehọ Ẹzi Ẹri kẹ enọ e yare riẹ te re?” (Luk 11:9, 13) Jihova ọ rẹ rehọ ẹzi ọfuafo kẹ enọ e rọ eva rai kpobi yare iẹe. Ẹzi yena ọ rẹ sai fi obọ họ kẹ owhẹ wo otoriẹ eware nọ Ọghẹnẹ ọ kẹ ahwo kere fihọ Ebaibol na oke krẹkri nọ u kpemu. Ẹzi Ọghẹnẹ ọ sae jẹ kẹ owhẹ areghẹ nọ who re ro fi eware nọ e rrọ Ebaibol na họ iruo evaọ uzuazọ ra.—Ahwo Hibru 4:12; Jemis 1:5, 6.
Fikiere, oke kpobi nọ whọ keria bi se Ebaibol na, lẹ se Ọghẹnẹ, yare iẹe inọ ọ kẹ owhẹ ẹzi ọfuafo riẹ re u fi obọ họ kẹ owhẹ wo otoriẹ Ẹme riẹ.