Epanọ Whọ Sai ro Wo Otoriẹ Ebaibol Na

2. Sei Wọhọ Ohwo nọ ọ Ginẹ Gwọlọ Riẹ

Kọ ogbẹnyusu ra jọ o gbiku iyoma kẹ owhẹ no ẹdẹjọ kpahe ohwo jọ nọ whọ re ruẹ vẹre he? Nọ whọ ruẹ ohwo na uwhremu na, kọ eware nọ ogbẹnyusu ra ọ vuẹ owhẹ kpahe iẹe na u ru nọ whọ gbẹ jẹ sae ruẹ emamọ iruemu ohwo na ha? O rẹ sae via ere kpahe Ebaibol na re.

PỌL ukọ na ọ vẹvẹ unu kpahe oware nọ o rẹ sae via nọ ma gbe rovie eva mai kpobi ro se Ebaibol na ha. Pọl ọ ta kpahe ahwo Ju oke riẹ jọ inọ: “Mẹ rọ isẹri ese nọ a ghine wo ajọwha Ọghẹnẹ, rekọ u ri vẹ te he.”—Ahwo Rom 10:2.

Ahwo Ju ikpe-udhusoi ọsosuọ yena jọ a jẹ gwọlọ rọwo kugbe ugogo uzẹme jọ nọ Ikereakere Hibru na i rovie via vevẹ hẹ: uzẹme kpahe ohwo nọ ọ te jọ Mesaya na. Eware kpobi nọ a jọ Ikereakere na ruẹaro rai kpahe Mesaya na e jọ oma Jesu obọ Nazarẹt na rugba. Ghele na, eriwo obọrai nọ a kru n’otọ ze u ru nọ ibuobu ahwo orẹwho obọriẹ a gbẹ sai wo otoriẹ orugba Ẹme Ọghẹnẹ hẹ.

Eme ma rẹ sai wuhrẹ no oyena ze? O roja inọ ma re se Ebaibol na wọhọ ahwo nọ a ginẹ gwọlọ wuhrẹ. Nọ ohwo ọ tẹ talamu eriwo jọ nọ o wo n’otọ ze o rẹ sai ru nọ o gbe ro wo otọriẹ Ebaibol na ha.

Wọhọ oriruo, profẹsọ jọ ọrọ ogha-uwuhrẹ egagọ evaọ obọ North Carolina, U.S.A., o dhesẹ Ebaibol na wọhọ “obe ohwo-akpọ gheghe, nọ a rọ eriwo ohwo-akpọ kere, nọ eria buobu evaọ eva riẹ e rọwokugbe ohwohwo ho, onọ o kẹ ọkpọvio ọgbagba ọvuọvo kpahe uzuazọ uyero ho.” Nọ ohwo o te bi se Ebaibol na avọ eriwo na inọ “obe ohwo-akpọ gheghe,” kọ u gbe ru nọ o ti ro rri ohrẹ riẹ vo hayo gbolaro kẹ eware nọ o rri nọ i kiehọ iẹe oma ha?

Evaọ abọdekọ riẹ, Ebaibol na e ta udu họ omai awọ inọ ma rọ oma totọ sei. Ebaibol na e ta kpahe ahwo Bẹria evaọ oke Pọl ukọ na inọ: “Evaọ oghọghọ a rọ rehọ ẹme na, yọ a riwẹ ikerakere na kẹse kẹse, sọ epanọ a ta kẹ ae na ere eghinẹ rọ.” (Iruẹru Ikọ Na 17:11) Wọhọ ahwo yena, o sae gwọlọ nọ who siobọno iroro avro kpobi nọ e rẹ sai ru nọ who gbe wo otoriẹ Ebaibol na ha. Se Ẹme Ọghẹnẹ wọhọ ohwo nọ ọ ginẹ gwọlọ wuhrẹ, avọ ọwhọ nọ whọ rẹ rọ gwọlọ wo otoriẹ ovuẹ isiuru nọ o riẹe.