“Whai Họ Ezọ Mẹ”

“Whai họ ezọ mẹ wha te ru eware nọ mẹ ta kẹ owhai.”—JỌN 15:14.

1, 2. (a) Oghẹrẹ ahwo vẹ egbẹnyusu Jesu a jọ vẹre? (b) Fikieme u je wuzou re ma jọ egbẹnyusu Jesu?

EZAE nọ i lele Jesu keria ubrukpẹ obehru na a yeri oghẹrẹ uzuazọ sa-sa no. Pita avọ Andru yọ inievo ivẹ nọ e jọ ikuori. Matiu ọ jọ omiazọhọ, iruo nọ ahwo Ju a mukpahe. Jemis, Jọn avọ Jesu a gbẹ rro n’otọ ze. O wọhọ nnọ u ri kri hi nọ amọfa wọhọ Nataniẹl, a rọ riẹ Jesu. (Jọn 1:43-50) Rekọ u mu rai kpobi nọ e jọ Ehaa-Ọnyavrẹ yena ẹro inọ Jesu họ Mesaya nọ a ya eyaa riẹ na, Ọmọ Ọghẹnẹ uzuazọ na. (Jọn 6:68, 69) O were rai thesiwa nọ ọ ta kẹ ae nọ: “Me se owhai ezọ, keme eware kpobi nọ mẹ jọ obọ Ọsẹ mẹ yo, eye mẹ jẹ owhai riẹ.”—Jọn 15:15.

² Eme yena nọ Jesu ọ ta kẹ ikọ ezi riẹ na i kie kpahe Ileleikristi kpobi nọ a rọ ẹzi wholo nẹnẹ, i te je kie kpahe egbẹnya rai, “igodẹ efa” na. (Jọn 10:16) Makọ oria nọ ma jọ whẹro, ma rẹ sai wo uvẹ-ọghọ nọ ma rẹ rọ jọ egbẹnyusu Jesu. U wuzou gaga re ma jọ egbẹnyusu riẹ keme onana o rẹ whae ze nọ ma rẹ rọ jọ egbẹnyusu Jihova re. Evaọ uzẹme, o re bẹbẹ re ma sikẹle Jihova ababọ Kristi nọ ma rẹ kaki sikẹle. (Se Jọn 14:6, 21.) Nọ o rrọ ere na, eme ma re ru hrọ re ma sae jọ egbẹnyusu Jesu? Re ma tẹ ta kpahe oyena, joma wuhrẹ kpahe oriruo nọ Jesu o fihọ otọ wọhọ emamọ ogbẹnyusu, gbe epanọ onana u ro kpomahọ ilele riẹ.

Jesu Ọ Jọ Emamọ Ogbẹnyusu

3. Oghẹrẹ vẹ a riẹ Jesu?

³ Solomọn ovie owareghẹ na o kere nọ: “Ọdafe o re wo igbẹnyusu buobu.” (Itẹ 14:20) Oghẹrẹ nọ ahwo-akpọ sebaẹgba a rrọ oye Solomọn ọ nwani dhesẹ na inọ a rẹ gwọlọ mu usu kugbe ohwo fiki oware nọ a te jọ obọ riẹ wo orọnikọ fiki oware nọ a te kẹe he. Jesu ọ jọ ere he. Ọ dhẹ lele ahwo fiki efe hayo ọkwa rai hi. Ginọ uzẹme inọ Jesu o you osu ọmoha jọ nọ o fe, o te je zizie i re ọ jọ olele riẹ. Rekọ Jesu ọ ta kẹ ọzae na inọ ọ zẹ eware riẹ re ọ ghale igho na kẹ iyogbere. (Mak 10:17-22; Luk 18:18, 23) A riẹ Jesu wọhọ ohwo nọ ọ jọ ogbẹnyusu iwhrori na gbe enọ a rri vo, orọnikọ ọrọ otu nọ i fe gbe enọ i wo ekwa ha.—Mat. 11:19.

4. Fikieme ma sae rọ ta nnọ egbẹnyusu Jesu a gba ha?

⁴ O ginẹ rrọ uzẹme inọ egbẹnyusu Jesu yọ ahwo nọ e gba ha. Okejọ o jariẹ nọ eriwo Pita o rọwo kugbe orọ Ọghẹnẹ hẹ. (Mat. 16:21-23) Jemis avọ Jọn a dhesẹ ẹzi omorro nọ a yare Jesu re ọ kẹ ae ekwa ilogbo evaọ Uvie na. Ayare rai o dha ikọ edekọ na eva, yọ avro kpahe ohwo nọ ọ mae rro o je siotọ. Rekọ avọ odiri, Jesu ọ daoma kpọ iroro egbẹnyusu riẹ vi, ọ vare ku ai hi.—Mat. 20:20-28.

5, 6. (a) Fikieme Jesu ọ rrọ gbẹ jọ ogbẹnyusu kẹ ikọ riẹ buobu? (b) Fikieme Jesu ọ rọ fa usu no Judas?

⁵ Orọnikọ fikinọ Jesu ọ jẹ ruẹ ethobọ rai hi hayo ọ jẹ daezọ họ oye jabọ ọ rọ jọ ogbẹnyusu ezae nana ha. Ukpoye, ọ tẹrovi abọ owoma rai. Wọhọ oriruo, Pita, Jemis, avọ Jọn a kie ruọ owezẹ ukpenọ a re lele Jesu rroro evaọ aso nọ a ro mu ei. Onana o da Jesu. Ghele na, ọ riẹ inọ a wo emamọ eva kpahe iẹe, keme ọ ta nọ: “[Ẹzi] ọ ghinẹ rọwo rekọ uwo o lọhọ.”—Mat. 26:41.

⁶ Wo ohẹriẹ, Jesu ọ fa usu no Judas Iskariọt. Dede nọ Judas o je ru ẹghẹ inọ o you Jesu, Jesu ọ riẹ inọ udu ohwo nana nọ ọ jọ ogbẹnyusu riẹ vẹre na o raha no. Fikinọ Judas o zihe ruọ ogbẹnyusu akpọ na no, o te ru oma riẹ họ ọwegrẹ Ọghẹnẹ. (Jem. 4:4) Fikiere Jesu o te le Judas ruọ otafe taure o te ti kuenu kẹ ikọ 11 edekọ na inọ ae yọ egbẹnyusu riẹ.—Jọn 13:21-35.

7, 8. Ẹvẹ Jesu o ro dhesẹ nọ o you egbẹnyusu riẹ?

⁷ Jesu ọ kpairoro vrẹ iruthọ uvi egbẹnyusu riẹ, ọ tẹ jẹ daoma fi obọ họ kẹ ae. Wọhọ oriruo, ọ lẹ se Ọsẹ riẹ re ọ thọ ae evaọ oke edawọ rai. (Se Jọn 17:11.) Jesu ọ riẹ utho nọ ilele riẹ a rẹ sai ru. (Mak 6:30-32) Yọ dede nọ o jariẹ oja re ọ ta oware nọ o rrọ eva riẹ kẹ ae, ọ jẹ gwọlọ riẹ oware nọ o re rai eva re.—Mat. 16:13-16; 17:24-26.

⁸ Jesu ọ rehọ oke uzuazọ gbe uwhu riẹ wha erere se egbẹnyusu riẹ. Ọ riẹ inọ o ti whu re ọ ruẹse hwa osa ẹtanigbo na re o ru oware nọ uvi-ẹdhoguo Ọsẹ riẹ o gwọlọ. (Mat. 26:27, 28; Hib. 9:22, 28) Rekọ uyoyou nọ Jesu o wo kẹ ahwo-akpọ jabọ nọ o ro whu. Ọ ta nọ: “Ohwo ọvo o wo uyoyou nọ o ro vi ona ha, re ohwo o siobọno uzuazọ riẹ fihọ otọ fiki ezọ riẹ.”—Jọn 15:13.

Eme Ilele na A Ru Fikinọ Jesu Ọ Jọ Ogbẹnyusu Rai?

9, 10. Ẹvẹ ahwo a rehọ ọghoruo Jesu?

⁹ Jesu o je wo uvẹ kẹ ahwo, o you rai, yọ ọ jẹ rehọ umutho nọ o wo fi obọ họ kẹ ae. Fiki onana, ahwo a je bigbae, yọ eva e jẹ were ai re a ru ei ọghọ. (Luk 8:1-3) Oyejabọ Jesu ọ sae rọ ta nọ: ‘Kẹ a rẹ te kẹ owhai onọ a nẹ je nuhu kugbe, onọ u re ti hwẹ fihọ awọ rai. Keme owawọ nọ wha wawo a rẹ wawo kẹ owhai re.’—Luk 6:38.

¹⁰ O rrọ uzẹme inọ ahwo jọ a jẹ dhẹ lele Jesu fiki oware nọ a re wo mi ei. Ahwo nana a nya siọ Jesu ba nọ ọ ta ẹme jọ nọ a rri thọ. Ukpenọ a re fievahọ Jesu, a tẹ jọ udu rai ku ei họ nọ ẹme oyoma ọ ta na, a tẹ siẹe ba elele. Wo ohẹriẹ, ikọ na a talamu ei. Eware jọ e via nọ e hae raha usu rai kugbe Jesu, rekọ a dawo uthoma rai re a thae uke ẹsikpobi. (Se Jọn 6:26, 56, 60, 66-68.) Evaọ aso nọ a ro mu ei, Jesu ọ ta eme nọ o ro dhesẹ edẹro kẹ oware nọ egbẹnyusu riẹ a ru inọ: “Whai họ enọ ilele omẹ gbẹ jọ eva ẹdawọ mẹ.”—Luk 22:28.

11, 12. Ẹvẹ Jesu ọ rọ kẹ ilele na imuẹro, kọ didi uruemu a dhesẹ?

¹¹ U kri hi nọ Jesu o jiri ilele riẹ no inọ ae họ enọ e talamu ei, a tẹ dhẹ siẹe ba. Evaọ etoke yena a kuvẹ re ozodhẹ ahwo u gbe uyoyou rai kẹ Kristi h’otọ. Ghele na, Jesu ọ wariẹ rọ vrẹ rai. Nọ o whu jẹ kparoma no, ọ tẹ roma via kẹ ae jẹ kẹ ai imuẹro inọ o you rai. Ofariẹ, o mu iruo ilogbo jọ họ ae obọ—re a ru ilele “ahwo erẹwho kpobi” re a je se isẹi kẹe “rite ọnyaba akpọ na.” (Mat. 28:19; Iruẹru 1:8) Eme ilele na a ru?

¹² Ilele na a rehọ udu rai kpobi dhe iruo ewhowho usi Uvie na. Avọ obufihọ ẹzi ọfuafo Jihova, ovuẹ rai o tẹ te nya Jerusalẹm kpobi duwu. (Iruẹru 5:27-29) A jẹ ta usiuwoma na dede nọ uzuazọ rai o jọ awa. Nọ a ta usiuwoma na te oware wọhọ ikpe 30 no, Pọl ukọ na o kere nọ a whowho emamọ usi na “kẹ enọ a ma kpobi evaọ akpọ na” no. (Kọl. 1:23) O rrọ vevẹ inọ ilele nana a rri usu rai kugbe Jesu ghare gaga.

13. Oghẹrẹ vẹ iwuhrẹ Jesu i kpomahọ ilele riẹ?

¹³ Enọ i zihe ruọ ilele Jesu a fi iwuhrẹ riẹ họ iruo evaọ uzuazọ rai. Ibuobu rai a nwene uruemu rai. Taure a te ti kurẹriẹ, ejọ rai a wo uruemu ezae-duezae, ibruẹnwae, egbidi, hayo iji. (1 Kọr. 6:9-11) Efa a nwene ekpehre ẹro nọ a jẹ hai ro rri ahwo erẹwho efa. (Iruẹru 10:25-28) Ghele na, a yoẹme kẹ Jesu. A siobọno uruemu anwae rai, a tẹ whẹ uruemu okpokpọ họ. (Ẹf. 4:20-24) A tẹ te riẹ “iroro Kristi,” a tẹ jẹ raro kele uruemu riẹ.—1 Kọr. 2:16.

Usu Kugbe Kristi Nẹnẹ

14. Eme Jesu ọ ya eyaa nọ o ti ru evaọ etoke “urere akpọ” nana?

¹⁴ Ileleikristi buobu erọ ikpe-udhusoi ọsosuọ na a rọ ẹro ruẹ Jesu taure o te ti whu hayo nọ ọ kparoma no. Rekọ ma rẹro ruẹ Jesu hu. Kọ ẹvẹ ma sae rọ jọ egbẹnyusu Kristi? Edhere jọ họ ma rẹ kezọ kẹ uthubro nọ u bi no obọ utu ọrigbo nọ o wo ẹrọwọ avọ areghẹ na ze, koyehọ inievo Jesu nọ a rọ ẹzi wholo nọ e gbẹ rrọ otọakpọ. Jesu ọ ya eyaa inọ evaọ etoke “urere akpọ” nana, ọ te rehọ ọrigbo nana mu re ọ rẹrote “eware riẹ kpobi.” (Mat. 24:3, 45-47) Nẹnẹ, ibuobu enọ e be gwọlọ jọ egbẹnyusu Kristi a rrọ usu enọ a rọ ẹzi wholo ho. Ẹvẹ owọ nọ a be jẹ kpahe uthubro nọ u bi no obọ utu ọrigbo na ze u re kpomahọ usu rai kugbe Kristi?

15. Eme u re dhesẹ sọ ohwo yọ ogodẹ hayo ẹwe?

¹⁵ Se Matiu 25:31-40. Jesu o se utu ọrigbo ẹrọwọ na inievo riẹ. Evaọ ọtadhesẹ riẹ kpahe oke nọ a te hẹriẹ igodẹ no ewe na, Jesu ọ ta vevẹ inọ oware nọ ma ru kẹ inievo riẹ yọ ọye omariẹ ma ru rie kẹ. Evaọ uzẹme, ọ ta inọ oware nọ u ti dhesẹ sọ ohwo yọ ogodẹ hayo ẹwe họ oghẹrẹ uruemu nọ o dhesẹ kẹ ‘imoni riẹ nọ e make kawo.’ Fikiere, ugogo edhere nọ enọ i wo ẹruore otọakpọ a re ro dhesẹ inọ a gwọlọ jọ egbẹnyusu Kristi họ a re fi obọ họ kẹ utu ọrigbo ẹrọwọ na.

16, 17. Ẹvẹ ma re ro dhesẹ inọ ma rrọ egbẹnyusu inievo Kristi?

¹⁶ Otẹrọnọ who bi rẹro nọ whọ te rria Uvie Ọghẹnẹ, ẹvẹ whọ sai ro dhesẹ inọ whẹ yọ ogbẹnyusu inievo Kristi? Joma ta ẹme kpahe idhere esa ọvo. Orọ ọsosuọ, obọ nọ who re wo ziezi evaọ iruo usiuwoma ota na. Kristi o jie uzi kẹ inievo riẹ inọ a whowho emamọ usi na nya akpọ na kpobi wariẹ. (Mat. 24:14) Rekọ ababọ obufihọ igodẹ efa na o rẹ jọ bẹbẹ re inievo Kristi nọ i kiọkọ otọakpọ na nẹnẹ a ru iruo nana. Evaọ uzẹme, oke kpobi nọ itu igodẹ efa na a tẹ be ta usiuwoma, yọ a bi fi obọ họ kẹ inievo Kristi ru iruo nọ a kẹ rai na gba. Wọhọ Kristi, utu ọrigbo nọ o wo ẹrọwọ avọ areghẹ na a wo edẹro gaga kẹ obufihọ igodẹ efa na.

¹⁷ Edhere avivẹ nọ utu igodẹ efa na a re ro fi obọ họ kẹ inievo Kristi họ ugho nọ a rẹ rọ tha iruo usiuwoma ota na uke. Jesu ọ tuduhọ ilele riẹ awọ re a rehọ ‘efe rai nọ i kiẹrẹe he ru ezọ kẹ oma rai.’ (Luk 16:9) Orọnikọ ma rẹ rehọ ugho dẹ Jesu hayo Jihova rehọ re ma jọ egbẹnyusu rai hi. Ukpoye, ma tẹ be rehọ eyero mai tha iruo na uke, yọ ma bi dhesẹ inọ ma gine you rai, orọnikọ ẹkwoma ẹmeunu ọvo ho rekọ “eva eruo gbe eva uzẹme.” (1 Jọn 3:16-18) Ma rẹ kẹ uke-otha utioye na ẹkwoma usiuwoma ota, ugho nọ ma rẹ zọhọ kẹ ebabọ gbe ẹruorote eria egagọ mai gbe iruo akpọ-soso na. Ugho nọ ma zọhọ o tẹ make kawo hayo bu, okẹ unevaze mai o be da Jihova avọ Jesu ẹro.—2 Kọr. 9:7.

18. Fikieme ma re ro yoẹme kẹ ohrẹ nọ ekpako ukoko a be kẹ omai?

¹⁸ Edhere avesa nọ mai kpobi ma re ro dhesẹ inọ ma rrọ egbẹnyusu Kristi họ ma te bi yoẹme kẹ ekpako ukoko. Kristi họ ọnọ ọ rehọ ezae nana mu ẹkwoma ẹzi ọfuafo. (Ẹf. 5:23) Pọl ukọ na o kere nọ: “Wha yo ẹme e nọ i bi su owhai re wha rehọ oma kpotọ kẹ ae.” (Hib. 13:17) Ẹsejọ o rẹ jọ bẹbẹ kẹ omai re ma yoẹme kẹ ọkpọvio nọ ekpako na a kẹ omai no Ebaibol ze. Ẹsejọhọ ma riẹ ethobọ rai, yọ onana o sae lẹliẹ omai rri ohrẹ rai vo. Ghele na, Kristi, Ọnowuzou ukoko na ọ be rehọ ezae nana nọ e gba ha na ru iruo. Fikiere, owọ nọ ma be jẹ kpahe ọkpọvio nọ a be k’omai u re kpomahọ usu mai kugbe Kristi. Ma tẹ be kpairoro vrẹ ethobọ rai jẹ rọ evawere lele ọkpọvio rai, yọ ma bi dhesẹ nọ ma you Kristi.

Oria nọ Ma Sai Jo Duku Uvi Egbẹnyusu

19, 20. Oghẹrẹ ahwo vẹ ma rẹ sae jọ ukoko na duku, kọ eme ma be te ta kpahe?

¹⁹ U te no esẹro na nọ Jesu ọ be rọ rẹrote omai no, ọ be jẹ rehọ ini gbe inievo nọ e rrọ ukoko na sẹro mai re. (Se Mak 10:29, 30.) Okenọ who kurẹriẹ ze ukoko Jihova obọ, eme imoni ra a ru? Ẹsejọhọ a tuduhọ owhẹ awọ re who sikẹle Ọghẹnẹ gbe Kristi. Rekọ Jesu ọ vẹvẹ unu inọ ẹsejọ “ahwo uwou obọ ohwo a rẹ te jọ ewegrẹ riẹ.” (Mat. 10:36) O rrọ omosasọ gaga re ma riẹ inọ evaọ ukoko na, ma rẹ sae ruẹ enọ i re sikẹle omai vi inievo eva mai.—Itẹ 18:24.

²⁰ Wọhọ epanọ uyere nọ Pọl o kere evaọ ekuhọ ileta riẹ se ahwo Rom u dhesẹ na, o wo egbẹnyusu ekpekpe buobu. (Rom 16:8-16) Jọn ukọ na o ku ileta avesa riẹ họ inọ: “Yere egbẹrioma na omomọvo.” (3 Jọn 15) O rrọ vevẹ inọ ọye omariẹ o mu emamọ egbẹnyusu buobu re. Ẹvẹ ma sae rọ raro kele Jesu gbe ilele ọsosuọ riẹ re ma wo emamọ usu kugbe inievo mai? Uzoẹme nọ o rrọ aro na o te kẹ uyo onọ nana.

Ẹvẹ Whọ te k’Uyo?

• Oriruo vẹ Jesu o fihọ otọ evaọ emamọ ogbẹnyusu nọ ọ jọ?

• Eme ilele na a ru fikinọ Jesu ọ jọ ogbẹnyusu rai?

• Ẹvẹ ma sai ro dhesẹ nọ mai yọ egbẹnyusu Kristi?

[Uwoho nọ o rrọ ẹwẹ-obe avọ 14]

Jesu ọ jẹ gwọlọ riẹ oware nọ o rrọ egbẹnyusu riẹ eva

[Uwoho nọ o rrọ ẹwẹ-obe avọ 16]

Ẹvẹ ma sai ro dhesẹ nọ ma gwọlọ jọ egbẹnyusu Kristi?