Oware Nọ Ma Wuhrẹ Mi Jesu

Epanọ A Sai ro Wo Evawere

Eme ọ rẹ kẹ evawere?

▪ Evaọ ovuẹ riẹ nọ o viodẹ gaga na, Jesu ọ jọ eme ọsosuọ riẹ ta kpahe evawere. Ọ ta nọ: “Ahwo nọ a wo ẹzi iwhrori, eva e were ae.” (Matiu 5:3) Eme họ otofa ẹme riẹ na? Eme họ ẹzi iwhrori nọ ọ jọ etenẹ fodẹ na?

Re ma sae jọ uzuazọ, o gwọlọ nọ ma rẹ wẹ, da ame, jẹ re emu, yọ ere o rrọ kẹ erao re. Rekọ re ma sae wereva, ma gwọlọ oware jọ—ewo otoriẹ ẹjiroro uzuazọ, onọ u ru omai wo ohẹriẹ no erao. Ọnọ ọ ma omai na ọvo ọ rẹ sai fi obọ họ kẹ omai ru ẹgwọlọ nana gba. Oyejabọ nọ Jesu ọ rọ ta nọ: “Fiki ebrẹdi ọvo ohwo ọ rẹ rọ zọ họ, rekọ fiki kẹme kẹme nọ ọ via no unu Ọghẹnẹ ze.” (Matiu 4:4) Enọ i wo ẹzi iwhrori, koyehọ enọ e rọ omaurokpotọ vuhu ẹgwọlọ abọ-ẹzi rai mu a rẹ wereva keme a sikẹle Jihova, Ọghẹnẹ evawere na, yọ ọ rẹ kẹ ae oware jọ nọ o roja kẹ evawere—ẹruore.—1 Timoti 1: 11.

Ẹvẹ Jesu ọ rọ kẹ ahwo ẹruore?

▪ Jesu ọ ta nọ: “Ahwo nọ a te rọ oma kpotọ eva e were ae, keme arẹ te ria akpọ na.” (Matiu 5:5) Jesu ọ kẹ ahwo-akpọ ẹruore ẹkwoma ahwo nọ e jẹ mọ nọ o siwi gbe enọ i whu nọ ọ kpare ze. O te je whowho ovuẹ ẹruore. Ọ ta nọ: “Ọghẹnẹ o you akpọ na hrọ, ọ jẹ rehọ Ọmọvo riẹ kẹ, re kohwo kohwo nọ ọ rọwo riẹ o gbe vrẹ hẹ rekọ o re wo uzuazọ ebẹdẹ bẹdẹ.” (Jọn 3:16) Ahwo nọ a yoẹme kẹ Ọghẹnẹ a te reawere uzuazọ ebẹdẹ bẹdẹ evaọ otọakpọ. Kọ whọ sae jọ iroro ra ruẹ epanọ o te jọ re whọ rria udevie ahwo omaurokpotọ, yọ whọ te who ho? Agbẹta nọ Ẹme Ọghẹnẹ ọ rọ ta nọ: “Wha ghọghọ eva ẹruore rai.” (Ahwo Rom 12:12) Jesu ọ tẹ jẹ ta kpahe oghẹrẹ nọ ohwo ọ sai ro wo evawere enẹna.

Edhere vẹ Jesu o wuhrẹ nọ ma sai ro wo evawere?

▪ Jesu ọ kẹ uvi ohrẹ kpahe oyerikugbe evaọ udevie ahwo, ọruẹrẹfihotọ orọo, omaurokpotọ, gbe oghẹrẹ nọ u fo nọ ma re rri ekwakwa efe. (Matiu 5:21-32; 6:1-5, 19-34) Elele ohrẹ Jesu u re ru owhẹ wo evawere.

Ọghoruo ọ rẹ kẹ evawere. (Iruẹru Ikọ Na 20:35) Wọhọ oriruo, Jesu ọ ta nọ: “Okenọ who ti ru eha, zizie iyogbere, enọ i wo eka, enọ eko, gbe ituaro, who re ti wo oghale, keme a wo nọ a rẹ sae rọ hwa e kẹ owhẹ hẹ.” (Luk 14:13, 14) Evawere i re te otu nọ e rẹ gwọlọ ru amọfa were eva, orọnikọ otu nọ e rẹ gwọlọ evawere omobọrai hi.

Eme ọ rẹ mae kẹ evawere?

▪ Re a ru ewoma kẹ amọfa o rẹ kẹ ohwo evawere, rekọ ma te bi ru eware kẹ Ọghẹnẹ o rẹ mae kẹ evawere. Onana u vi evawere nọ esẹgbini nọ i you emọ rai a rẹ sai wo no oma emọ rai ze. Ma rẹ sae ruẹ onana evaọ oware nọ o via ẹdẹjọ nọ Jesu o je wuhrẹ ogbotu. “Nọ ọ jẹ ta eme enana, aye jọ ọ tẹ kpare uru riẹ eva otu obuobu na; ọ tẹ ta kẹe nọ, ‘Edhede nọ o yẹ owhẹ o wo oghale, gbe evie nọ who vie!’ Rekọ ọ tẹ ta nọ, ‘I kpoye, enọ i yo ẹme Ọghẹnẹ, a [je] ru ei a wo eghale!’”—Luk 11:27, 28.

Jesu omariẹ o wo evawere evaọ eruo oreva Ọsẹ obọ odhiwu riẹ. Oreva Ọghẹnẹ họ re ahwo a yo kpahe ẹruore uzuazọ ebẹdẹ bẹdẹ. Ẹdẹ jọ nọ Jesu ọ ta usi uwoma ẹruore nana kẹ ohwo jọ no, ọ tẹ ta nọ: “Emu mẹ họ [eruo] oreva Ọnọ O vi omẹ ze.” (Jọn 4:13, 14, 34) Whẹ omara whọ sai wo evawere nọ i re no eruo oware nọ o rẹ were Ọghẹnẹ ze ẹkwoma uzẹme Ebaibol na nọ who re whowho kẹ amọfa.

Whọ tẹ gwọlọ evuẹ efa, rri uzou 1 obe nana, Eme Ebaibol na O Gine Wuhrẹ? onọ Isẹri Jihova a kere.

[Uwoho nọ o rrọ ẹwẹ-obe avọ 16]

Ma re wo uvi evawere ẹkwoma erugba ẹgwọlọ mai orọ ewo otoriẹ ẹjiroro uzuazọ