Diẹse A Sae jọ Duku Uvi Evawere?

AHWO buobu a roro nọ a rẹ jọ eware efe nọ a wo buobu ruẹ evawere. Kọ ẹvẹ who roro? Nọ o rọ uzẹme nọ eware efe i re fiba evawere mai na, e rẹ kẹ imuẹro evawere he; hayo kọ efe ọ rẹ bọ ẹrọwọ ohwo ga hayo nyate ẹgwọlọ ẹzi hi.

Evaọ Ovuẹ obọ Ugbehru riẹ, Jesu Kristi ọ ta nọ: ‘Ahwo nọ a wo ẹgwọlọ ẹzi, eva e were ae, keme ae a wo uvie odhiwu.’ (Matiu 5:3) Jesu ọ tẹ jẹ ta nọ: “Wha yọrọ oma, re wha si oma rai no uru eware eguọlọ kpobi; keme uzuazọ ohwo o rọ udevie ekuakua eyero obuobu riẹ hẹ.”—Luk 12:15.

Ahwo buobu a rẹ gwọlọ evawere ẹkwoma ọfariẹ-ogbe gbe “iruo uwo” efa. (Ahwo Galesha 5:19-21) Ghele, re a roma kẹ isiuru iwo o rẹ wha uvi evawere nọ o rẹ tọ ze he. Evaọ uzẹme, ahwo nọ i bi ru eware itieye na a rẹ reuku Uvie Ọghẹnẹ hẹ.—1 Ahwo Kọrint 6:9, 10.

Amọfa a rẹ tẹro vi oma rai evaọ ẹgwọlọ evawere ẹkwoma ewoma obọ rai nọ a rẹ gwọlọ. Evu-ebe gbe iwou-eki ebe e vọ avọ ebe nọ a re ro fiobọhọ kẹ omobọ ohwo, rekọ ebe eyena e re wha evawere okrẹkri se ahwo ho. Fikiere diẹse ma sae jọ duku uvi evawere?

Re ma ghine wo evawere, ma re vuhu ẹgwọlọ ẹzi nọ a ro kugbe yẹ omai hrọ. Jesu ọ ta nọ: ‘Ahwo nọ a wo ẹgwọlọ ẹzi, eva e were ae.’ Dede, u re wo iruo ọvuọvo k’omai hi otẹrọnọ ma rẹ riẹ ẹgwọlọ ọnana rekọ ma re ru oware ovo kpahe iẹe he. Re a dhesiẹe: Eme o rẹ via kẹ ohwo nọ ọ dhẹ ogbohrẹ no nọ ọ se nọ ọ rẹ da ame? Kọ onana o gbẹ whae ze nọ oma riẹ o jẹ kare ame jẹ wha ebẹbẹ efa ze? Epọvo na re, otẹrọnọ ma gbolo aro kẹ ẹkuọ ẹgwọlọ ẹzi mai, u re kri hi re ma te lo no evaọ ẹzi. Onana o rẹ whae ze nọ ma je ku oghọghọ gbe evawere fiẹ.

Jesu o vuhu ẹgwọlọ ẹzi riẹ mu vevẹ, ọ jẹ hai wuhrẹ je roro kpahe Ẹme Ọghẹnẹ ẹsikpobi. Ọ jẹ sae ruẹ je se abọ jọ no Ikereakere Efuafo na ze lọlọhọ, o te je wuhrẹ amọfa re a ru erei. (Luk 4:16-21; wawo Ahwo Ẹfẹsọs 4:20, 21.) Jesu ọ tẹ jẹ rehọ eruo oreva Ọsẹ obọ odhiwu riẹ ro dhesẹ emuore. Eruo oreva Ọghẹnẹ o wha evawere buobu sei.—Jọn 4:34.

Ẹhẹ, a rẹ sai wo uvi evawere ẹkwoma ekoko ekwakwa efe he; hayo kọ evawere o rẹ nyaze nọ ma tẹ be rria kẹ isiuru uwo ho. Ubiudu evawere uzẹme u re no ze, onọ u wo ehri họ uvi ẹrọwọ gbe emamọ usu kugbe Jihova Ọghẹnẹ. Nwani fo, Devidi ọnọ ọ so ilezi na ọ tẹ so nọ: “Eva e were ahwo nọ Jihova ọ rọ Ọghẹnẹ rai.”—Olezi 144:15b, NW.

[Picture on page 29]

Ẹrọwọ gbe emamọ usu kugbe Ọghẹnẹ o rẹ wha evawere uzẹme se owhẹ