Ebaibol Na O Re Nwene Uzuazọ Ohwo

ẸVẸ ọyewọ-ọvo jọ evaọ obọ Russia nọ ọ jẹ hae rehọ imu egaga ọ sai ro si obọ no uruemu yena jẹ be rẹrote emọ riẹ ziezi enẹna? Ẹvẹ ọzae jọ evaọ obọ Kyoto, Japan nọ o wo oria nọ ọ jẹ rria ha, ọ sai ro wo uduowha gbe ẹzẹ nọ o ro si obọ no ekpehre iruemu nọ i fi rie họ uvuhu? Eme o fi obọ họ kẹ ọzae obọ Australia jọ nọ o re su imẹlu si obọ no idieda vrẹta? Muẹrohọ ẹme nọ ahwo nana a ta.

“Me wuhrẹ inọ me wo owha-iruo nọ mẹ rẹ rọ rẹrote oma mẹ.”—NELLY BAYMATOVA

IKPE RIẸ: 45

ORẸWHO RIẸ: RUSSIA

IKU RIẸ: Ọ JẸ HAE REHỌ IMU EGAGA

UZUAZỌ MẸ EVAỌ OKE NỌ U KPEMU: Mẹ whẹro evaọ ẹwho Vladikavkaz, okpẹwho-esuo Republic of North Ossetia (nọ a bi se Alania enẹna). Uviuwou mai u fe omojọ. Rekọ dede nọ akpọ o woma kẹ omẹ, me wo evawere evaọ uzuazọ họ. Taure me te ti te ikpe 34, yọ mẹ fa orọo ọsosuọ mẹ jẹ wariẹ rọo jẹ fa orọo avivẹ no. Imu egaga erehọ e reria omẹ obọ te ikpe ikpe soso no, yọ mẹ rọ fiki riẹ kpohọ usiwo isiava no evaọ ẹsipito. Dede nọ me wo emọ ivẹ, me wo uyoyou ovo kẹ ae oke yena ha; yọ me wo emamọ usu kugbe egbẹnyusu hayo uviuwou mẹ hẹ.

Oke nana yọ oni mẹ o zihe ruọ omọvo Isẹri Jihova no, yọ mẹ jẹ hai yo ẹsibuobu nọ ọ rẹ viẹ be lẹ se Jihova inọ o fi obọ họ kẹ omẹ. Mẹ jẹ hai roro nọ: ‘Oni mẹ o bi roro nọ ere eware e lọhọ te! Ẹvẹ Jihova ọ sai ro fi obọ họ kẹ omẹ?’ Mẹ daoma re me si obọ no imu egaga erehọ. Rekọ mẹ sai ru ei hi. Evaọ oke jọ, mẹ gbọ oma mẹ imu egaga erehọ edẹ ivẹ. Kẹsena, mẹ tẹ gwọlọ nọ me re no uwou omojọ, mẹ tẹ la unwido ruọ otafe. Whaọ, uwou-ehru mẹ jọ. Me wiri obọ gbe owọ, mẹ tẹ jẹ nwoma uke. Mẹ sae kpama no ehwa ha amara ọsoso.

Oni mẹ ọ rẹrote omẹ bẹsenọ oma mẹ u ro kpo, yọ ọ jẹ poviẹ omẹ hẹ. O vuhumu inọ iroro mẹ e dọmu oke yena ha yọ uzou mẹ u ri te otọ ziezi hi. Rekọ ọ jẹ hai fi emagazini Awake!a jọ họ abotọ ehwa mẹ. Me se rai kpobi unọjọ utọjọ, mẹ ruẹ nọ i siuru gaga yọ i re wuhrẹ ohwo eware buobu. Mẹ tẹ jiroro nọ mẹ rẹ ta kẹ Isẹri na re a wuhrẹ Ebaibol kugbe omẹ.

EPANỌ EBAIBOL NA O RO NWENE UZUAZỌ MẸ: Oware jọ nọ Ebaibol na i wuhrẹ omẹ họ, osegboja owha-iruo. Ukpenọ mẹ rẹ keria kẹ oni mẹ re ọ rẹrote omẹ, me wuhrẹ inọ me wo owha-iruo ẹruorote oma mẹ gbe emọ mẹ evaọ abọ ugho. Nọ o rọnọ me yeri uzuazọ onujomẹ ikpe buobu no na, o jọ bẹbẹ re mẹ sai kru iruo dhobọ.

Ohrẹ nọ o rrọ obe Iziewariẹ 6:5-7 u fi obọ họ kẹ omẹ gaga re, onọ o ta udu họ esẹgbini awọ re a wuhrẹ emọ rai edhere Ọghẹnẹ. Me vuhumu inọ me ti guọvunu kẹ Ọghẹnẹ evaọ oghẹrẹ nọ mẹ rọ yọrọ emọ ivẹ mẹ. Oyena u ru nọ me ro mu oke họ ẹraha kugbe ai je dhesẹ uyoyou kẹ ae ziezi.

O da omẹ ẹro fia inọ Jihova o ru nọ me ro wuhrẹ uzẹme na kpahe ọyomariẹ. Fikiere, mẹ tẹ rọ oma mudhe kẹe jẹ họ-ame wọhọ omọvo Isẹri Jihova.

IRERE NỌ ME WO NO: Fikinọ me wuhrẹ epanọ mẹ rẹ rọ nyẹ ofu mẹ, u ru usu mẹ kugbe oni mẹ woma ziezi no. U ru oyerikugbe mẹ avọ emọ mẹ kiehọ ziezi no re.

Fikinọ enẹna me mukpahe eware nọ Ọghẹnẹ ọ ta nọ i yoma, ebẹbẹ buobu nọ ekpehre uzuazọ nọ me je yeri vẹre o wha ze i n’otọ no. Enẹna, me bi wo evawere gaga nọ me bi fi obọ họ kẹ amọfa wuhrẹ kpahe Ọghẹnẹ oyoyou mai na, Jihova.

“Mẹ sae ta nọ elele ehri-izi Ebaibol u gine siwi omẹ.”—MINORU TAKEDA

IKPE RIẸ: 54

ORẸWHO RIẸ: JAPAN

IKU RIẸ: Ọ JẸ HAE WEZẸ IYẸRẸ

UZUAZỌ MẸ EVAỌ OKE NỌ U KPEMU: Ẹwho Yamaguchi mẹ jọ whẹro, yọ ọsẹ mẹ gbe oni-ode mẹ me je lele rria. Mẹ riẹ oni nọ o yẹ omẹ dẹẹ hẹ. Nọ mẹ jọ ikpe 19, oni-ode mẹ o te whu, mẹ avọ ọsẹ mẹ ọvo ma tẹ gbẹ jọ. Mẹ jọ iruo emu-othere evaọ ekọmpene jọ, yọ ọsẹ mẹ ọ jẹ jọ etẹe ru iruo re. Oke iruo mai imava u wo ohẹriẹ, fikiere ma jẹ ruẹ ohwohwo tere he keme ọjọ o bi zihe yọ ọjọ ọ be nya. Mẹ jẹ hai ru iruo kri vrẹ oke nọ u fo nọ me re ro kuhọ, je kuomagbe egbẹnyusu mẹ da idi.

Nọ oke o be nyaharo na, iruo na e tẹ te vẹso omẹ. Mẹ jẹ hai lele ọga iruo mẹ whọ, mẹ tẹ jẹ ruabọhọ idieda vi epaọ ọsosuọ. Ukuhọ riẹ, nọ mẹ joma te ikpe ọgba no, me te no uwou kpohọ obọfa. Nọ ugho nọ o jọ omẹ obọ u re no, me te je ru iruo evaọ uwou edhọ-ifio. Me mu usu kugbe ọmọtẹ jọ, ma tẹ ruọ orọo. Rekọ ma hẹriẹ nọ ma rria kugbe ikpe ivẹ gbe ubro ọvo no.

Ọkora ọ tẹ te ruọ omẹ oma, mẹ gbẹ riẹ onọ me re ru hu, mẹ tẹ te riesa vọ uzou. Re ahwo nọ mẹ re esa rai na a siọ omẹ ba eye, mẹ tẹ dhẹ zihe kpobọ ẹwho mẹ nyai lele ọsẹ mẹ rria omoke jọ, rekọ ọrue nọ me gu kẹe o raha usu mai imava. Mẹ wọ igho riẹ jẹ rehọ ae fi edhọ nọ me je ro wo ugho kuọ oma mẹ. Ukuhọ riẹ, me te kie ruọ uvuhu, mẹ tẹ jẹ rọ oma da oria nọ itreni e rẹ kpahe. Me te kpohọ ẹwho Hakata, no etẹe kpohọ Himeji, je no etẹe kpohọ okpẹwho Kyoto uwhremu na. Iyẹrẹ mẹ jẹ hae wezẹ ikpe buobu.

EPANỌ EBAIBOL NA O RO NWENE UZUAZỌ MẸ: Evaọ 1999, nọ mẹ jọ oria arozaha jọ kẹle Ethẹ Kamogawa evaọ Kyoto, eyae ivẹ jọ i te bru omẹ ze. Ọjọ rai ọ tẹ nọ omẹ nọ, “Kọ o te were owhẹ re who wuhrẹ Ebaibol na?” Me te yo kẹe nọ Ee. Inievo Ileleikristi nọ e kpako ziezi evaọ abọ-ẹzi evaọ ukoko na a wuhrẹ Ebaibol na kugbe omẹ je fi obọ họ kẹ omẹ ruẹ epanọ u wuzou te re a fi ehri-izi riẹ họ iruo. A jiroro kẹ omẹ inọ mẹ daoma gwọlọ iruo gbe uwou nọ mẹ rẹ rria. Re me ru ae eva were, me te kpohọ eria sa-sa nọ a jọ dawo omẹ kẹ iruo, rekọ evaọ oke ọsosuọ, mẹ jẹ daoma ziezi hi. Rekọ uwhremu na, mẹ tẹ lẹ Ọghẹnẹ kẹ obufihọ riẹ je fi ẹgba họ iruo egwọlọ na, ukuhọ riẹ, mẹ tẹ te ruẹ iruo.

Olẹ u fi obọ họ kẹ omẹ re evaọ odawọ ulogbo jọ nọ mẹ rẹriẹ ovao ku. Ahwo nọ mẹ re esa rai nọ mẹ dhẹ seba vẹre na a duku omẹ, a tẹ ta nọ mẹ rẹ hwa esa na hrọ. Onana o kẹ omẹ idhọvẹ gaga. Kẹsena mẹ tẹ te jọ isase Ebaibol ikẹdẹ kẹdẹ mẹ se ẹme nọ ọ rrọ Aizaya 41:10. Ọghẹnẹ ọ jọ etẹe ya eyaa kẹ idibo riẹ nọ i wo ẹrọwọ inọ: “Me ti fiobọhọ kẹ owhẹ.” Eyaa yena e kẹ omẹ ẹgba gbe uduotahawọ. Me kru obọ ga evaọ iruo, mẹ tẹ te hwa esa nọ mẹ re. Evaọ ukpe 2000, me te ti te kẹ ame-ọhọ wọhọ omọvo Isẹri Jihova.

IRERE NỌ ME WO NO: Oware nọ me wuhrẹ evaọ Ebaibol na u ru nọ mẹ rọ daoma ruẹrẹ usu mẹ họ kugbe ọsẹ mẹ, ọ tẹ rọ vrẹ omẹ kẹ eware nọ me ru rie evaọ oke nọ u kpemu. Eva e were riẹ gaga inọ me bi yeri uzuazọ lele ehri-izi Ebaibol enẹna. Mẹ sae ta nọ elele ehri-izi Ebaibol u gine siwi omẹ.

U te no ere no, mẹ be sai ru iruo nọ mẹ be rọ rẹrote oma mẹ enẹna. (Ahwo Ẹfẹsọs 4:28; 2 Ahwo Tẹsalonika 3:12) Mẹ jọ ukoko Ileleikristi na ruẹ uvi egbẹnyusu no re. (Mak 10:29, 30) Me yere Jihova gaga, oware nọ o wuhrẹ omẹ no o da omẹ ẹro fia.

“O jọ lọlọhọ kẹ omẹ hẹ re me ru inwene nọ o gwọlọ.”—DAVID HUDSON

IKPE RIẸ: 72

ORẸWHO RIẸ: AUSTRALIA

IKU RIẸ: ỌGBA-IDI

UZUAZỌ MẸ EVAỌ OKE NỌ U KPEMU: Mẹ ọ jọ ọmọ avọ ikpegbọvo nọ ọsẹgboni mẹ, Willie avọ Lucy, a yẹ. Uviuwou mai o jẹ rria iwhre jọ nọ a re se Aurukun nọ o rrọ ofẹ ẹkpẹlobọ ovatha-ọre ubrotọ Queensland. A fa iwhre Aurukun nana họ akotọ Ethẹ Archer nọ okegbe riẹ o woma gaga, nọ o kẹle abade. Ọsẹgboni mai a wuhrẹ omai emọ na iruo okuori gbe ibẹfi nọ ma rẹ rọ rẹrote oma mai. Evaọ oke yena, uzi egọmeti o kẹ uvẹ hẹ re mai emotọ ma rọ obọ te ugho, yọ u wo ugogo oria nọ a fihọ nọ ma rẹ rria.

Ọsẹgboni mẹ a dawo utho ẹgba rai kpobi ro wuhrẹ omẹ emamọ uruemu je wuhrẹ omai emọ na kpobi adhẹẹ ọrọkẹ ekpako-soso evaọ ẹwho na, gbe ọghọruo. U ru nọ ma rọ rehọ ekpako-soso kpobi wọhọ ini gbe esẹ gbe inievo-ọsẹ gbe inievo-oni mai.

Ọsẹ mẹ o whu nọ mẹ jọ ikpe ihrẹ, uviuwou mai o tẹ kwa kpohọ okegbe nọ a jẹ jọ ru iruẹru egagọ evaọ ẹwho Mapoon, nọ o rehọ oware wọhọ emaele udhone gbikpe thabọ no ẹwho Aurukun evaọ ofẹ ẹkpẹlobọ ovatha-ọre. Nọ me te ikpe ikpegbivẹ no, me te mu epanọ a rẹ rọ rehọ enyenya gbe imẹlu ru iruo họ ewuhrẹ, yọ bẹsenọ mẹ rọ joma te ikpe udhuvẹ gbikpe, me su imẹlu evaọ eria sa-sa nọ a jẹ rẹrote imẹlu. O jọ uzuazọ ugbeyero. Mẹ jẹ hae da idi vroma ẹsibuobu. Oyena o wha idhọvẹ buobu gbe ọbẹwẹ se omẹ.

Ẹdẹjọ nọ mẹ da idi bẹ no evaọ ehọtẹle jọ, me te je kpo geli geli bẹsenọ mẹ rọ ruọ aro omoto jọ nọ ọ jẹ họrọ ze. Evaọ ikpe ivẹ nọ i lele i rie a fi omẹ họ oria usiwo nọ a jẹ jọ wholo omẹ oma—umuo oke yena ze, me te no iruo imẹlu isuo.

EPANỌ EBAIBOL NA O RO NWENE UZUAZỌ MẸ: Okenọ mẹ rọ jọ oria usiwo na, ogbẹnyusu ọmọtẹ mẹ jọ ọ tẹ rehọ emagazini Uwou-Eroro gbe Awake! jọ se omẹ re me se. Rekọ fikinọ me kpohọ isukulu tere he, mẹ riẹ obe ese ziezi hi. Kẹsena, ọzae jọ nọ ọ kpako te ikpe udhone gbe esa o te bru omẹ ze ẹdẹjọ nọ uvo o jọ gaga. Mẹ vuẹ riẹ nọ ọ ruọ uwou, mẹ tẹ kẹe ame odhedhẹ da. Ọ tẹ kẹ omẹ obe jọ nọ a kere no Ebaibol na ze jẹ nọ omẹ sọ o te were omẹ re o zihe ze te kiẹ eware nọ e rrọ eva riẹ riwi kugbe omẹ. Uwhremu na, o te mu Ebaibol na họ ewuhrẹ kugbe omẹ ẹsikpobi. Mẹ tẹ ruẹ vuhumu inọ re mẹ sai ru Ọghẹnẹ eva were, o gwọlọ nọ me re ru inwene jọ evaọ uruemu gbe uzuazọ mẹ.

O lọhọ kẹ omẹ hẹ re me ru inwene yena. Dede na, fikinọ oni mẹ o wuhrẹ omẹ inọ mẹ hae rehọ ọghọ kẹ ekpako soso, me wo adhẹẹ odidi kẹ ọkpọkuọzae nọ o wuhrẹ Ebaibol kugbe omẹ na gbe uzẹme Ebaibol nọ o wuhrẹ omẹ. Dede na, mẹ jẹ kake jowọ omauromudhe kẹ Ọghẹnẹ hẹ. Me je roro inọ u fo re mẹ riẹ eware kpobi nọ e rrọ Ebaibol na taure mẹ tẹ te rọ oma mudhe.

Uwhremu na, ibe oruiruo mẹ jọ o te fi obọ họ kẹ omẹ kpọ eriwo mẹ vi kpahe ẹme omauromudhe na. Ibe oruiruo mẹ na yọ omọvo Isẹri Jihova, ọ ta kẹ omẹ nọ me se ẹme uduotahawọ nọ o rrọ obe Ahwo Kọlọsi 1:9, 10. Oria Ebaibol nana o ta nọ u fo re ma hae ‘nya họ aro evaọ eriariẹ Ọghẹnẹ.’ Osẹri na o fi obọ họ kẹ omẹ vuhumu inọ me ti wuhrẹ eware ekpokpọ ẹsikpobi, fikiere u wo ẹjiroro ọvo nọ me re ro si enẹ hemu hu inọ eriariẹ mẹ i tulo ho.

Nọ me mu oma họ ekugbe Isẹri Jihova evaọ iwuhrẹ ukoko rai no, eware nọ mẹ ruẹ i duobọte omẹ udu. Mẹ ruẹ ahwo uyẹ sa-sa nọ e be gọ Ọghẹnẹ evaọ okugbe ọvo. Okugbe yena o kẹ omẹ imuẹro egaga inọ me duku egagọ uzẹme no, u te ru nọ mẹ rọ họ-ame wọhọ omọvo Isẹri Jihova evaọ ukpe 1985.

IRERE NỌ ME WO NO: Enẹna, mẹ riẹ obe ese ziezi no, yọ mẹ be raha euwa buobu koka koka ro fi obọ họ kẹ amọfa wuhrẹ epanọ a re ro se Ebaibol na jẹ rehọ iẹe wuhrẹ omarai. Ofariẹ, Isẹri Jihova a je wuhrẹ Ebaibol kugbe ogbẹnyusu ọmọtẹ mẹ nọ ọ kẹ omẹ emagazini Uwou-Eroro gbe Awake! se na, ọ tẹ te họ-ame, yọ enẹna o zihe ruọ aye oyoyou mẹ no. Obọ nọ mai imava ma bi fihọ kẹ emotọ ẹwho na wuhrẹ kpahe Jihova Ọghẹnẹ o be kẹ omai uvi evawere.

[Oruvẹ-obotọ]

[Ẹme nọ a fi ẹgba họ nọ ọ rrọ ẹwẹ-obe avọ 21]

Obọ nọ mẹ avọ aye mẹ ma bi fihọ kẹ emotọ ẹwho na wuhrẹ kpahe Ọghẹnẹ o be kẹ omai uvi evawere