Ẹzi Ọfuafo Na Ọ Be Kẹ Omai Ẹgba Thihakọ Edawọ Gbe Elọhoma

“Nọ [Ẹzi] Ẹri ọ ruọ [owhai] oma no wha re ti wo ogaga.”—IRUẸRU 1:8.

1, 2. Didi obufihọ Jesu ọ ya eyaa riẹ kẹ ilele riẹ, kọ fikieme a rọ gwọlọ iẹe?

JESU ọ riẹ inọ ilele riẹ a sae te rọ ẹgba obọ rai koko izi kpobi nọ o jie kẹ ae he. Nọ ma te roro epanọ iruo usiuwoma ota na e rro te, epanọ ewegrẹ rai a wo ẹgba te, gbe epanọ ahwo-akpọ a hẹhẹ te, o jọ vevẹ inọ a gwọlọ ogaga nọ o rro thesiwa. Oye jabọ nọ, re Jesu o te ti kpohọ odhiwu, ọ rọ ta kẹ ae nọ: “Nọ [Ẹzi] Ẹri ọ ruọ [owhai] oma no wha re ti wo ogaga nọ wha ti ro se isẹri mẹ eva Jerusalem gbe Judia kpobi te Sameria je rite ọnyaba akpọ na.”—Iruẹru 1:8.

² Eyaa yena i muhọ erugba eva Pẹntikọst 33 C.E. nọ ẹzi ọfuafo ọ kẹ ilele Jesu Kristi ẹgba nọ a rọ ta usiuwoma na nya Jerusalẹm duwu. Uvumọ ọwọsuọ ọ whaha e rae he. (Iruẹru 4:20) Ilele Jesu, te omai te, ma gwọlọ ẹzi Ọghẹnẹ “kẹse kẹse, makọ te urere akpọ na.”—Mat. 28:20.

3. Eme ogaga nọ u no obọ Jihova ze o rẹ sai fi obọ họ kẹ omai ru?

³ Jesu ọ ya eyaa kẹ ilele riẹ inọ ‘a ti wo ogaga nọ Ẹzi Ẹri ọ tẹ ro ai oma no.’ Ẹzi ọfuafo na nọ Jihova Ọghẹnẹ Erumeru na ọ be rọ kẹ idibo riẹ o be kẹ omai ẹgba nọ ma bi ro ru eyaa omaromudhe mai gba, yọ ẹzi nana o bi je fi obọ họ kẹ omai mugba kẹ eware nọ e be gwọlọ gele omai kie.—Se Maeka 3:8; Ahwo Kọlọsi 1:29.

4. Eme ma be te jọ uzoẹme nana wuhrẹ, kọ fikieme?

⁴ Ẹvẹ ogaga nọ ẹzi ọfuafo na ọ kẹ omai u re ro dhesẹ oma via? Nọ ma te wo ẹzi ọfuafo na, oghẹrẹ iruemu vẹ ma re dhesẹ? Nọ ma be daoma gọ Ọghẹnẹ ziezi na, edawọ buobu i bi zere omai—Setan ọ be wha edawọ nana jọ ze, ejọ uyerakpọ nana, efa kọ sebaẹgba mai. Re ma sai thihakọ wọhọ Ileleikristi, kpohọ usiuwoma ẹsikpobi, jẹ yọrọ emamọ usu kugbe Jihova, ma re mugba kẹ edawọ yena. Joma ta kpahe epanọ ẹzi ọfuafo o bi ro fi obọ họ kẹ omai mugba kẹ edawọ je thihakọ elọhoma.

Ọ rẹ k’Omai Ẹgba Fi Edawọ Kparobọ

5. Ẹvẹ olẹ o sae rọ kẹ omai ẹgba?

⁵ Jesu o wuhrẹ ilele riẹ re a lẹ inọ: “Who su omai ruọ ẹdawọ họ, rekọ si omai no [obọ oyoma na].” (Mat. 6:13) Jihova o ti kiuke ku idibo riẹ hẹ enọ e lẹ olẹ nana. Jesu ọ ta oke ofa inọ “Ọsẹ obọ odhiwu rai ọ rẹ rehọ Ẹzi Ẹri kẹ enọ e yare riẹ.” (Luk 11:13) O rrọ oware omosasọ inọ Jihova ọ ya eyaa inọ ọ te kẹ omai ẹzi riẹ re ma sai ru oreva riẹ. Orọnikọ onana u dhesẹ inọ Jihova o ti ru re a siọ omai ba ẹdawọ họ. (1 Kọr. 10:13) Rekọ nọ ma tẹ rẹriẹ ovao ku odawọ, oye họ oke nọ ma rẹ rọ lẹ ziezi.—Mat. 26:42.

6. Bovẹ Jesu ọ rehọ iyo nọ ọ kẹ Setan no ze?

⁶ Nọ Ẹdhọ ọ dawo Jesu, Jesu ọ rehọ ikereakere kẹe uyo. Jesu ọ kareghẹhọ ikere na vevẹ nọ ọ ta nọ: “A kere nọ . . . A kere re nọ . . . Setan, nyawa: keme a kere nọ, ‘Whọ rẹ gọ Ọnowo na Ọghẹnẹ ra, iruo riẹ eye evo who re ruẹ.’” Uyoyou nọ Jesu o wo kẹ Jihova gbe ikere na o lẹliẹ e riẹ siọ eware nọ Ẹdhọ ọ rọ dawo iẹe. (Mat. 4:1-10) Nọ Jesu ọ wọso Ẹdhọ unuẹse buobu no, Ẹdhọ ọ tẹ nya se iẹe ba.

7. Ẹvẹ Ebaibol na i re ro fi obọ họ k’omai mugba kẹ edawọ?

⁷ Nọ o rọnọ Jesu ọ rẹroso ikere na re ọ sai mugba kẹ edawọ Ẹdhọ na, o mae tubẹ r’oja k’omai re ma ru epọvo na. Evaọ uzẹme, re ohwo ọ sai mugba kẹ Ẹdhọ gbe enọ e rrọ abọ riẹ, ọ rẹ daoma re ọ riẹ kpahe izi Ọghẹnẹ, o ve je koko ai vọvọ. Ahwo buobu nọ a bi wuhrẹ Ebaibol a wo ovuhumuo kẹ ereghẹ gbe ẹrẹreokie Ọghẹnẹ no, yọ onana o wọ rai bi koko izi Ọghẹnẹ. Evaọ uzẹme, “ẹme Ọghẹnẹ” o wo ẹgba nọ o re ro duobọte ‘eva gbe iroro’ ohwo. (Hib. 4:12) Epanọ ohwo o se Ebaibol na je roro kpahe eme riẹ te, ere o re wo otoriẹ “uzẹme” na te. (Dan. 9:13) Nọ o rrọ ere na, u fo re ma hai roro kpahe ikere nọ e ta kpahe eware jọ nọ ma bi ru thọ.

8. Idhere vẹ Jihova ọ sae rọ kẹ omai ẹzi ọfuafo?

⁸ Jesu o mugba kẹ edawọ keme, u te no ikere na nọ ọ riẹ ziezi no, ‘ẹzi ọfuafo na ọ vọ’ riẹ oma. (Luk 4:1) Re ma sai wo ẹgba nọ ma re ro ru epọvo na, ma re si kẹle Jihova ẹkwoma eroruiruo idhere sa-sa nọ Jihova ọ be rọ k’omai ẹzi ọfuafo na. (Jem. 4:7, 8) Idhere nana jọ họ, uwuhrẹ Ebaibol, olẹ, gbe omakugbe inievo na. Inievo buobu a te je muẹrohọ inọ oma nọ a rẹ rọ kẹ iruẹru abọ-ẹzi vọvọ o rẹ kẹ ae erere keme u re fi obọ họ kẹ ae tẹrovi eware abọ-ẹzi.

9, 10. (a) Eware vẹ e mae rrọ edawọ kẹ ahwo evaọ oria ra? (b) Ẹvẹ eroro-didi gbe olẹ e rẹ rọ k’owhẹ ẹgba fi edawọ kparobọ, makọ oke nọ who wo elọhoma?

⁹ Edawọ vẹ who bi lele muabọ? Kọ oma o be hae wọ owhẹ ẹsejọ re whọ rọ oma lẹliẹ ohwo nọ ọ rrọ ọrivẹ-orọo ra ha? Otẹrọnọ whọ re rọo ho, kọ o jọ isiuru ra no ẹdẹjọ re whọ nyusu orọo kugbe ohwo nọ ọ rrọ ukoko ho? Ẹsejọ nọ Oleleikristi o te bi riwi etẹlivisiọno hayo be rọ Itanẹte ru iruo, odawọ re o rri oware jọ nọ u woma ha o sae roma via. Otẹrọnọ oyena o via k’owhẹ no, eme who ru? U fo re who roro kpahe epanọ owojẹ othọthọ jọ u re ro su kpohọ ofa, u ve ru owhẹ kie ruọ umuomu ulogbo. (Jem. 1:14, 15) Dai roro kpahe epanọ o te da Jihova, ukoko na, gbe uviuwou ra te otẹrọnọ who ru oware uyoma. Evaọ abọdekọ riẹ, otẹrọnọ ma be daoma koko izi Ọghẹnẹ, ma ti wo eva efuafo. (Se Olezi 119:37; Itẹ 22:3.) Oke kpobi nọ whọ rẹriẹ ovao ku edawọ, daoma lẹ kẹ ẹgba nọ whọ sai ro fi edawọ na kparobọ.

¹⁰ Oware ofa o riẹ nọ ma rẹ kareghẹhọ kpahe edawọ Ẹdhọ. Setan o bru Jesu ze okenọ Jesu ọ se emuọriọ ba edẹ 40 no evaọ obọ udhude. Ababọ avro, Ẹdhọ o roro nọ oke yena o mai kiehọ nọ ọ rẹ rọ dawo Jesu. (Luk 4:13) Setan ọ rẹ salọ oke nọ o mai kiehọ nọ ọ rẹ rọ dawo omai re. Fikiere, o r’oja re ma jọ gaga evaọ abọ-ẹzi. Okenọ Setan o muẹrohọ inọ oma o lọhọ omai evaọ abọ-ẹzi ọ rẹ mae rọ dawo omai. Fikiere oke kpobi nọ ma wo elọhoma, joma lẹ Jihova kẹ obufihọ gbe ẹzi ọfuafo riẹ.—2 Kọr. 12:8-10.

Ọ rẹ k’Omai Ẹgba Thihakọ Elọhoma

11, 12. (a) Fikieme ahwo buobu a bi ro wo elọhoma nẹnẹ? (b) Eme ọ rẹ sae kẹ omai ẹgba fi elọhoma kparobọ?

¹¹ Fikinọ ma gba ha, ma re wo elọhoma ẹsejọ. O mae rrọ ere nẹnẹ keme etoke nọ ma be rria ọ vọ avọ uye. Ma rẹriẹ ovao ku oke nọ o mae ga evaọ ikuigbe ohwo-akpọ. (2 Tim. 3:1-5) Nọ Amagẹdọn ọ be kẹle na, ebẹbẹ i bi vihọ. Fikiere, u re gbe omai unu hu inọ o rrọ bẹbẹ kẹ ahwo jọ re a ko uviuwou rai. Ejọ e be fiunu keme a gbẹ riẹ onọ a re ru hu. Otẹrọnọ ere o rrọ kẹ owhẹ, ẹvẹ whọ sai ro thihakọ?

¹² Kareghẹhọ, Jesu ọ kẹ ilele riẹ imuẹro inọ ọ te kẹ ae ofiobọhọ, koyehọ ẹzi ọfuafo Ọghẹnẹ. (Se Jọn 14:16, 17.) Ẹzi na họ ẹgba nọ ọ mae ga evaọ ehrugbakpọ na. Jihova ọ rẹ sae rọ ẹkwoma ẹzi na k’omai ẹgba nọ ma sai ro thihakọ ebẹbẹ kpobi nọ ma rẹriẹ ovao ku. (Ẹf. 3:20) Pọl ukọ na ọ ta nọ ẹzi ọfuafo na o ti fi obọ họ kẹ omai wo “ogaga ulogbo nọ othesiwa,” o tẹ make rọnọ “a bi kpokpo mai eva kabọ kabọ.” (2 Kọr. 4:7, 8) Jihova ọ ya eyaa ha inọ o ti si ebẹbẹ kpobi no nẹnẹ, rekọ ọ kẹ omai imuẹro inọ ọ te rọ ẹkwoma ẹzi ọfuafo na kẹ omai ẹgba thihakọ rai.—Fil. 4:13.

13. (a) Ẹvẹ ẹzi ọfuafo ọ rọ kẹ oniọvo jọ ẹgba thihakọ ẹbẹbẹ? (b) Kọ whọ riẹ oghẹrẹ oriruo otiọye jọ?

¹³ Roro kpahe oriruo Stephanie, ọkobaro jọ nọ ọ rrọ ikpe 19. Okenọ ọ jọ ikpe 12, okie o kie rie, yọ o wo ọta evaọ ẹvori. Anwọ oke yena ze, o kpohọ obẹrọ isiava no, o kpohọ usiwo efa sa-sa no, yọ okie ọ wariẹ kiei isiava efa nọ o wha riẹ ze nọ ofẹ ẹkpẹlobọ oma riẹ u bi ro ru iruo ziezi hi, yọ ọ be ruẹ ude ziezi hi. Stephanie o je ru iruo egaga ha re ọ ruẹsi wo ẹgba kẹ eware nọ e mai wuzou kẹe, wọhọ iwuhrẹ gbe usiuwoma ota. Ghele na, ọ ruẹ inọ Jihova ọ kẹ riẹ ẹgba, onọ u bi fi obọ họ kẹe thihakọ evaọ idhere buobu. Ikuigbe inievo mai nọ a kere fihọ ebe ukoko na i fi obọ họ kẹe nọ ọ tẹ rrọ ọkora. Inievo na a fi obọ họ kẹe ẹkwoma ileta nọ a jẹ hai kere sei, gbe ẹme nọ a rẹ ta kugbei taure ewuhrẹ o te ti muhọ gbe nọ ewuhrẹ o te kuhọ no. Ahwo nọ ọ ta usiuwoma kẹ a jẹ hai kpohọ uwou riẹ re o wuhrẹ obe kugbe ai. Fiki enana kpobi, Stephanie o yere Jihova. Oria Ebaibol nọ o mae were iẹe họ Olezi 41:3, yọ u mu rie ẹro inọ ikere yena e jọ oma riẹ rugba.

14. Nọ ma te wo elọhoma, eme ma rẹ whaha, ko fikieme?

¹⁴ Nọ ma te wo elọhoma hayo rẹriẹ ovao ku ẹbẹbẹ jọ, joma roro vievie he inọ ma rẹ sai fi ẹbẹbẹ na kparobọ ẹkwoma eware abọ-ẹzi nọ ma re siobọno. Oye o mai yoma. Fikieme? Fikinọ eware wọhọ uwuhrẹ Ebaibol omobọ mai gbe orọ uviuwou, usiuwoma ota, gbe iwuhrẹ enya yọ idhere nọ ma re ro wo ẹzi ọfuafo na. Eware abọ-ẹzi e rẹ sasa omai oma. (Se Matiu 11:28, 29.) Ẹsejọ inievo mai a rẹ ziọ iwuhrẹ avọ idhọvẹ nọ e vọ rai oma, rekọ nọ iwuhrẹ i te kuhọ no, udu u ve kie ai vi.

15. (a) Kọ Jihova ọ ya eyaa inọ Ileleikristi a te kare ebẹbẹ? Rehọ Ebaibol ru ei vẹ. (b) Eme Ọghẹnẹ ọ ya eyaa riẹ k’omai, kọ onọ vẹ ma sae nọ?

¹⁵ Orọnikọ ma be ta nọ Ileleikristi a kare ebẹbẹ hẹ. O gwọlọ omodawọ re ohwo ọ jọ uvi Oleleikristi. (Mat. 16:24-26; Luk 13:24) Ghele na, Jihova ọ rẹ sae rọ ẹkwoma ẹzi ọfuafo na kẹ ọnọ oma o rrọ no ẹgba. Aizaya ọruẹaro na ọ ta nọ: “A te tua eri enọ e be hẹrẹ ỌNOWO na, a ti wo ibekpe wọhọ erọ ugo, a te dhẹ ohrẹ oma o rẹ rọ ae he, a te nyaonya aro o re bi ae he.” (Aiz. 40:29-31) Nọ o rrọ ere na, ma rẹ sae nọ inọ, Eme ọ rẹ lẹliẹ otujọ moyẹlẹ abọ-ẹzi?

16. Eme ma rẹ sai ru rọ whaha eware jọ nọ e rẹ wha elọhoma ze?

¹⁶ Ebaibol e tuduhọ omai awọ re ma muẹrohọ eware nọ e mae r’oja. (Fil. 1:10) Pọl ukọ na ọ rehọ uzuazọ Oleleikristi dhesẹ ohrẹ-odhẹ uthethabọ nọ o kere nọ: “Wha joma siọ owreze ba . . . , re ma rehọ oriori dhẹ ohrẹ nọ a fihọ kẹ omai na.” (Hib. 12:1) Otofa ẹme riẹ na họ ma rẹ siọ ilale ifofe ba, enọ i re ru oma lọhọ omai. O sae jọnọ eware nọ otujọ a bi le i bi bu hrọ. Fikiere otẹrọnọ oma o be hae lọhọ owhẹ ẹsikpobi, u fo re who roro kpahe epanọ whọ be raha oke te kẹ iruo ra, epanọ who bi kpohọ erẹ kiti te kẹ omawere, gbe epanọ whọ be raha oke te kẹ eware aruọzaha. Areghẹ gbe omaurokpotọ i re fi obọ họ kẹ omai riẹ ọnyaba mai je siobọno eware nọ e r’oja ha.

17. Eme ọ be lẹliẹ oma lọhọ otujọ, rekọ didi imuẹro Jihova ọ kẹ omai?

¹⁷ O sae jẹ jọnọ oma o be lọhọ otujọ evaọ udevie mai keme uyerakpọ nana u ri kuhọ họ wọhọ epanọ a rẹro riẹ. (Itẹ 13:12) Ohwo nọ o wo irẹro itieye kpobi ọ rẹ sai wo uduotahawọ no eme nọ e rrọ Habakuk 2:3 ze, inọ: “Eruaruẹ na e be hẹrẹ oke rai, o re ti ru ei vẹrẹ—ọrue ọ riẹ hẹ, o tẹ rọ nọ u bi lehie, hẹrẹ iẹe; ọ rẹ seba ẹtha ha, ọ te raha oke he.” Jihova ọ kẹ omai imuẹro inọ urere uyerakpọ omuomu nana o te ze evaọ ẹruoke.

18. (a) Eyaa vẹ e be kẹ owhẹ ẹgba? (b) Eme ma te jọ uzoẹme nọ o rrọ aro na wuhrẹ?

¹⁸ Evaọ uzẹme, idibo Jihova kpobi a bi rẹro okenọ elọhoma e gbẹ te jọ họ, okenọ ahwo-akpọ kpobi a ti ro wo ‘ogaga ọmoha.’ (Job 33:25) Makọ enẹna, ẹzi ọfuafo na ọ rẹ sae kẹ omai ẹgba nọ ma re ro ru iruo Ọghẹnẹ. (2 Kọr. 4:16; Ẹf. 3:16) Whọ kuvẹ hẹ re elọhoma e lẹliẹ owhẹ ku eghale ebẹdẹ bẹdẹ fiẹ. Edawọ kpobi nọ i te owhẹ, makọ enọ elọhoma e wha ze, e rẹ te vrẹ, o gbẹ rrọ obọnana ha kiyọ evaọ akpọ ọkpokpọ Ọghẹnẹ. Evaọ uzoẹme nọ o rrọ aro na, ma te ta kpahe epanọ ẹzi ọfuafo na ọ sae rọ kẹ Ileleikristi ẹgba thihakọ ukpokpoma, fi otunyẹ ọhwa kparobọ, je thihakọ idabolo efa sa-sa.

Ẹvẹ Whọ te k’Uyo?

• Ẹvẹ isase Ebaibol e rẹ rọ kẹ omai ẹgba?

• Ẹvẹ olẹ gbe eroro-didi e rẹ rọ kẹ omai ẹgba?

• Ẹvẹ whọ sae rọ whaha eware nọ e rẹ sae wha elọhoma ze?

[Uwoho nọ o rrọ ẹwẹ-obe avọ 24]

Iwuhrẹ Ileleikristi e rẹ sae kẹ omai ẹgba abọ-ẹzi