Epanọ Whọ Sae rọ Jọ Ohwo Oruọzewọ Evaọ Akpọ nọ Ọ Kare Oruọzewọ

WỌHỌ ofou, ahwo nọ a kare oruọzewọ a da oria kpobi fia. Ahwo a re gu erue, zẹ eware kẹ ahwo ghaghae, tho uji, a rẹ hwa esa nọ a re he, a vẹ jẹ ya oma nọ a tẹ wha amọfa re. Fikinọ ma be rria kugbe ahwo nana, u bi ru ei bẹbẹ re ma jọ ahwo oruọzewọ. Eme o re fi obọ họ k’omai whaha uruemu ewhariọ? Joma ta kpahe eware esa jọ nọ e rẹ sai fi obọ họ kẹ omai. Eware esa na họ ozodhẹ Jihova, emamọ obruoziẹ-iroro, gbe edẹro.

Uvi Ozodhẹ kẹ Jihova

Aizaya ọruẹaro na o kere nọ: “ỌNOWO na họ obruoziẹ mai, ỌNOWO na họ osu mai, ỌNOWO na họ ovie mai.” (Aiz. 33:22) Ma te vuhu udu-esuo Jihova mu u re ru omai wo ozodhẹ kẹe, onana o vẹ lẹliẹ omai whaha ẹzi ewhariọ. Itẹ 16:6 ọ ta nọ: “[Fiki] ozodhẹ ỌNOWO na ohwo ọ rẹ rọ kẹnẹ oma kẹ eyoma.” Ozodhẹ nana orọnikọ fiki uye nọ Ọghẹnẹ ọ te kẹ ohwo ho rekọ fikinọ ma gwọlọ ru eva dha Ọsẹ obọ odhiwu mai hi, ọnọ ọ gwọlọ ewoma mai gaga na.—1 Pita 3:12.

Oware jọ nọ o via u dhesẹ erere nọ o re noi ze otẹrọnọ ohwo o wo ozodhẹ nana. Ricardo avọ aye riẹ, Fernanda, a rehọ ugho nọ u bu te isiso udhusoi akuasoi [₦100,000] no ugho nọ a wo fihọ ebanke.a Fernanda o kele ugho na ha. Nọ a te uwou no, u gbe rai unu nọ a ruẹ enwenọ unuigho ovo na dede nọ a dẹ eware jọ no. Iroro rai e tẹ ta kẹ ae nọ: “Ebanke na ọ hwa ugho k’omai vo.” Evaọ oke ọsosuọ, a jẹ gwọlọ nọ a rẹ rehọ ugho na keme eware buobu e gbẹ riẹ nọ a te raha ugho fihọ. Ricardo ọ ta nọ: “Ma lẹ se Jihova re ọ kẹ omai ẹgba nọ ma re ro zihe ugho na. Fikinọ ma gwọlọ ru ei eva were wọhọ epanọ ọ ta nọ ma ru eva Itẹ 27:11, ma te zihe ugho na.”

Emamọ Obroziẹ-Iroro

Ma re wo emamọ obroziẹ-iroro otẹrọnọ ma bi wuhrẹ Ebaibol jẹ daoma fi eware nọ ma bi wuhrẹ họ iruo. Onana u re ru nọ ẹme Ọghẹnẹ nọ o wo ẹgba na o re ro duobọte iroro gbe udu mai. Onana u re fi obọ họ kẹ omai jọ ahwo oruọzewọ.—Hib. 4:12; 13:18.

Roro kpahe oriruo João. Esa nọ ọ re i bu te isiso idu esa gbe egba isoi [₦700,000]. Ọ tẹ dhẹ siọ esa na ba kpohọ ẹwho ọfa. Nọ ikpe eree e vrẹ no, Isẹri Jihova a tẹ ta usiuwoma kẹ João, ọ tẹ rọ fiki eware nọ o wuhrẹ jẹ iroro inọ o re zihe bru ohwo na re ọ hwa ugho na kẹe. Fikinọ João o wo aye gbe emọ ene yọ o wo emamọ okọ họ, ohwo na ọ tẹ rọwo inọ jọ ọ hae hwa osa na ẹmẹrera k’amara k’amara.

Wo Edẹro

Pọl ukọ na o kere nọ: “Erere ologbo ọ ghinẹ rọ kẹ ohwo nọ o bi lele Ọghẹnẹ otẹrọnọ utho oware nọ o woi o rẹ dae ẹro. . . . Otẹrọnọ ma wo emuore gbe emuẹgọ jọ enana e da omai ẹro.” (1 Tim. 6:6-8) Ohrẹ Ebaibol nana u re fi obọ họ kẹ omai whaha ekie ruọ ẹta ekiọthuọ nọ o foẹro ho hayo enọ a rẹ jọ fe asohẹrioke. (Itẹ 28:20) Ohrẹ Pọl yena u re je fi obọ họ kẹ omai rọ Uvie Ọghẹnẹ karo, avọ imuẹro inọ ọ te k’omai ugogo eware nọ ma gwọlọ.—Mat. 6:25-34.

Rekọ, fiki “eviẹhọ efe,” ma gbe rri oma mu hu, ma rẹ sai kie ruọ ẹta uvo-uthei hayo eware amọfa egwọlọ. (Mat. 13:22) Kareghẹhọ oriruo Ekan. Ọ ruẹ edhere igbunu nọ emọ Izrẹl a rọ fa Ethẹ Jọdan vrẹ. Ghele na, fiki uvo-uthei, o tho isiliva gbe igoru gbe ewu ọghaghae evaọ okpẹwho Jẹriko. Onana u si uwhu kpei. (Jos. 7:1, 20-26) Agbẹta nọ ikpe buobu e vrẹ no, Jesu ọ rọ vẹvẹ unu nọ: “Wha yọrọ oma, re wha si oma rai no uru eware eguọlọ kpobi.”—Luk 12:15.

Jọ Ohwo Oruọzewọ Eva Obọ Iruo

Joma t’ẹme kpahe eware jọ nọ i re ru ei bẹbẹ k’omai re ma jọ ahwo oruọzewọ evaọ eware kpobi. Oruọzewọ o gwọlọ nnọ ma rẹ jọ oria iruo mai tọlọ obọ họ o tẹ make rọnọ ere ahwo kpobi a bi ru. (Tait. 2:9, 10) Jurandir, ọnọ o bi ru iruo egọmeti, ọ rẹ rọ oruọzewọ niyẹrẹ igho nọ ọ raha kpobi nọ o te kperẹ. Rekọ enọ a gbẹ rrọ iruo a re mi vrẹ igho nọ a raha. A bi ru ere keme ọnọ o wuzou rai ọ be kẹ ai uvẹ ru ere. Ọnọ o wuzou rai na ọ tubẹ whọku Jurandir inọ ọ rrọ oruọzewọ keleme, ọ tẹ se iẹe ba evi kpohọ erẹ. U kri hi, egọmeti o te vi ahwo te kiẹ igho nọ a be jọ etẹe raha, a te jiri Jurandir kẹ oruọzewọ riẹ. A tẹ jẹ wọe kpehru evaọ iruo na.

Ọzae jọ nọ o wo uwou-eki ọ ta kẹ André, oniọvo jọ nọ ọ be zẹ eware kẹe inọ ohwo ọ tẹ dẹ oware, jọ ọ rọ edhere jọ ru re ohwo na ọ hwa ugho na isiava. Oniọvo na ọ tẹ lẹ se Jihova re ọ kẹe udu nọ o re ro koko izi Ebaibol. (Ol. 145:18-20) Ọ tẹ jẹ daoma ru ei vẹ kẹ ọga iruo na oware nọ ọ gbẹ te sai ro ru oware nọ ọ ta kẹe na ha, rekọ ọga iruo na ọ gaviezọ kẹe he. Fikiere André o te no iruo na, dede nọ a jẹ hwae igho buobu. Rekọ nọ enwenọ ukpe o vrẹ no, ọga iruo na o te sei zihe ze, jẹ kẹe imuẹro inọ a gbe bi fi ehreki rai iwhayo ho. A tẹ kẹe ọkwa ologbo evaọ iruo na.

Hwa Esa nọ Whọ Re

Pọl ukọ na ọ hrẹ Ileleikristi nọ: “Wha riosa ohwo ọvo ho.” (Rom 13:8) Ma rẹ sai gu unoma inọ ohwo nọ ma riosa riẹ na o wo igho buobu gbe nnọ ugho na u te oware ovo kẹe he. Rekọ Ebaibol ọ vẹvẹ unu inọ: “Oru-umuomu o re momo, yọ ọ rọo hwosa ha.”—Ol. 37:21.

Kọ ẹvẹ otẹrọnọ oware idudhe o via k’omai nọ ma gbẹ sae hwa osa nọ ma re he? (Ọtausi. 9:11) Francisco o momo igho nọ i bu te enwenọ isiso idu isoi [₦1,000,000] mi Alfredo re ọ rọ dẹ uwou. Rekọ fikinọ ekọ e raha ku Francisco, ọ gbẹ sae hwa igho na zihe evaọ ẹdẹ nọ o fihọ họ. Ọ tẹ nya bru Alfredo re ọ ta ẹme na kẹe, Alfredo ọ tẹ rọwo re Francisco ọ hwa ugho na zihe kẹe ẹrera.

Whọ Viẹ Amọfa Họ Họ

Kareghẹhọ ekpehre oriruo Ananias avọ Safira, ọzae avọ aye nọ a jọ ukoko Ileleikristi ikpe-udhusoi ọsosuọ. Nọ a zẹ otọ jọ, a tẹ rọ abọjọ ugho na se ikọ na be ta nọ ugho na kpobi oye. A gwọlọ dhesẹ oma kẹ amọfa inọ a re ru ọghọ gaga. Rekọ Pita ukọ na ọ rehọ ẹgba ẹzi Ọghẹnẹ rovie eviẹhọ rai na via, Jihova o te kpe aimava.—Iruẹru 5:1-11.

Wo ohẹriẹ no Ananias avọ Safira, ahwo nọ a kere Ebaibol na a jọ ahwo oruọzewọ. Mosis o kere kpahe epanọ o ro muofu nọ o whaha e riẹ ẹruọ Ẹkwotọ Eyaa na. (Ik. 20:7-13) Epọvo na re, Jona ọvo ọ rọ obọ riẹ kere oware uyoma nọ o ru taure o te ti whowho ovuẹ Ọghẹnẹ kẹ ahwo Ninẹve gbe uruemu uyoma nọ o dhesẹ nọ o whowho ovuẹ na kẹ ae no.—Jona 1:1-3; 4:1-3.

Re ohwo ọ ta uzẹme o tẹ make rọnọ u ti mi ei oware jọ raha, o gwọlọ aruọwha, wọhọ epanọ o jọ obọ isukulu via kẹ Nathalia nọ ọ rrọ ikpe 14. Nọ o rri obe nọ o ro kere ẹdawọ, o te muẹrohọ nnọ iticha rai o kpe igudu họ onọ jọ nọ u kpe rie. Nathalia ọ tẹ ta kẹ iticha na, dede nọ ọ riẹ nnọ u ti ru unu nọ o wo kpotọ. Ọ ta nọ: “Ọsẹgboni mẹ a wuhrẹ omẹ inọ re mẹ sai ru Jihova eva were, mẹ rẹ jọ ohwo oruọzewọ. O hae jọnọ mẹ ko ẹme na dhere, obroziẹ-iroro mẹ o hai ti kpokpo omẹ.” Uruemu oruọzewọ nọ Nathalia o dhesẹ na o were iticha na gaga.

Uruemu Oruọzewọ O rẹ Wha Orro se Jihova

Ọmọtẹ ikpe 17 jọ nọ a re se Giselle ọ ruẹ ẹmẹkpa nọ ebe gbe ugho nọ u bu te isiso udhegbezeza [₦5,200] o rrọ eva. O te ru re iticha riẹ o fi obọ họ kẹe zihe ẹmẹkpa na se ohwo nọ o wo rie. Nọ amara ọvo ọ vrẹ no, ethabọ ọnọ o wuzou isukulu na o te se ileta jọ kẹ eklase na soso bi jiri Giselle rọkẹ oruọzewọ riẹ, o te je jiri uviuwou gbe egagọ riẹ. “Iruo iwoma” riẹ e wha orro se Jihova.—Mat. 5:14-16.

O gwọlọ omodawọ re ma yeri uzuazọ oruọzewọ nọ ma be rria udevie ahwo nọ i “you oma-obọrai, je you igho, [bi] heri-oheri avọ oma-ovia gbe ekaela” na. (2 Tim. 3:2) Rekọ ozodhẹ Jihova, emamọ obroziẹ-iroro, gbe edẹro i re fi obọ họ k’omai yeri uzuazọ oruọzewọ evaọ akpọ nana nọ ọ kare oruọzewọ na. Ma re je wo usu okpekpe kugbe Jihova, ọnọ ‘o kiẹrẹe je you eware nọ i kiẹrẹe’ na.—Ol. 11:7.

[Oruvẹ-obotọ]

[Iwoho nọ e rrọ ẹwẹ-obe avọ 7]

Ozodhẹ kẹ Jihova u re ru omai yeri uzuazọ oruọzewọ

[Uwoho nọ o rrọ ẹwẹ-obe avọ 8]

Uruemu oruọzewọ mai o rẹ wha orro se Jihova