Ọghẹnẹ Ọ Gwọlọ nọ A Bru Ọghọ Họ Eyae na Oma

OKENỌ Jesu ọ jọ otọakpọ, o dhesẹ ọkpọ iruemu Ọsẹ obọ odhiwu riẹ gbagba, gbe oghẹrẹ nọ o re ru eware. Ọ ta nọ: “Mẹ be rọ oma obọ mẹ ru oware ovo ho, rekọ epanọ Ọsẹ o wuhrẹ omẹ, mẹ rọ ta eme eware enana . . . Me bi ru eware nọ e be were iẹe kẹse kẹse.” (Jọn 8:28, 29; Ahwo Kọlọsi 1:15) Fikiere, nọ ma te roro kpahe uruemu hayo oghẹrẹ nọ Jesu o ro yerikugbe eyae na, u ti fi obọ họ kẹ omai riẹ oghẹrẹ nọ Ọghẹnẹ o rri eyae na gbe oghẹrẹ nọ ọ gwọlọ nọ ma re yerikugbe ai.

Ikuigbe nọ e rrọ ebe Usiuwoma na i fi obọ họ kẹ egba-eriariẹ buobu ruẹ inọ oghẹrẹ nọ Jesu o yerikugbe eyae u wo ohẹriẹ gaga no oghẹrẹ nọ ahwo oke yena a rri eyae. Ohẹriẹ vẹ o riẹ? Kọ eware nọ o wuhrẹ i bi ru nọ eyae na a bi ro wo ufuoma nẹnẹ re?

Oghẹrẹ nọ Jesu O Yerikugbe Eyae Na

◼ Jesu o rri rai wọhọ ahwo nọ a re lele wezẹ ọvo ho. Isu egagọ ahwo Ju jọ a rehọ e riẹ inọ, re a kuomagbe eyae o rẹ sae kpare isiuru owezẹ. Fikinọ a rehọ eyae na wọhọ ahwo nọ i re fi ezae họ odawọ, a kẹ rai uvẹ re a ta ẹme kẹ ezae evaọ ẹgbede he, hayo re a nya ruọ otafe ababọ ubere nọ a re ro ruru ovao. Rekọ Jesu ọ hrẹ ezae na re a kpọ isiuru rai, jẹ rọ adhẹẹ yerikugbe eyae ukpenọ a rẹ hẹriẹ ae no oma.—Matiu 5:28.

Jesu ọ tẹ jẹ ta inọ: “Kohwo kohwo nọ o siobọno aye riẹ ọ jẹ rehọ ọfa, o brẹnhwae kpahọ iẹ.” (Mak 10:11, 12) Fikiere, Jesu o wuhrẹ oware nọ u wo ohẹriẹ no onọ isu egagọ oke yena a je wuhrẹ inọ ọzae ọ rẹ sae siọ aye riẹ ‘fiki oware kpobi nọ o via.’ (Matiu 19:3, 9) Ahwo Ju buobu a jẹ ẹme Jesu na rehọ họ inọ ọzae ọ rẹ sai bruẹnwae kpahe aye riẹ. Iwuhrẹ Ju a wuhrẹ nọ ọzae o te bruẹnwae, orọnikọ onana u dhesẹ nọ ọ thọ uzi mukpahe aye riẹ hẹ, rekọ aye o te bruẹnwae yọ ọ thọ uzi mukpahe ọzae riẹ. Wọhọ epanọ obe jọ o ta, “Ẹme nọ Jesu ọ ta inọ uzi ovona o gba ọzae avọ aye riẹ, u ru nọ o ro bru ọghọ họ eyae na oma.”

Epanọ uwuhrẹ Jesu na u wo iruo te nẹnẹ: Evaọ ukoko Isẹri Jihova, eyae na a re kuomagbe ezae na evaọ iwuhrẹ ukoko rai. Rekọ a re brudu hu, o tẹ make rọnọ a bi ru eware kugbe, keme ezae Ileleikristi a riẹ oware nọ Ebaibol ọ ta inọ a “lele ekpọkueyae yeri kerọ ini, uvovoeyae kerọ inievo-emetẹ evaọ ẹfuọ kpobi.”—1 Timoti 5:2.

◼ Jesu ọ rehọ oke wuhrẹ eyae na. Wo ohẹriẹ no isu egagọ ahwo Ju, enọ i ru nọ eyae oke yena a rọ jọ igbori, Jesu o wuhrẹ eyae na jẹ tuduhọ ae awọ re a ta eva rai. Jesu ọ rehọ oke ro wuhrẹ Meri, jẹ rọ ere dhesẹ nọ orọnikọ iruo uwou ọvo aye o re ru hu. (Luk 10:38-42) Mata, oniọvo Meri, o wo erere no iwuhrẹ Jesu ze, keme ọ kẹ Jesu uyo areghẹ evaọ okenọ Lazarọs, oniọvo riẹ o whu.—Jọn 11:21-27.

Jesu o wo isiuru kpahe eware nọ eyae a je roro kpahe. Evaọ oke yena, eyae Ju buobu a je roro nọ oware nọ o rẹ wha evawere se ohwo họ, nọ o te wo uvi ọmọzae, maero nọ ọmọzae na ọ tẹ rrọ ọruẹaro. Evaọ oke jọ nọ aye jọ evaọ ogbotu ọ ta inọ: “Edhede nọ o yẹ owhẹ o wo oghale,” Jesu ọ tẹ rọ uvẹ yena ta kẹe kpahe oware jọ nọ o mai wuzou. (Luk 11:27, 28) Jesu ọ ta kẹ aye na inọ ẹme nọ a re yo kẹ Ọghẹnẹ oye o mai wuzou.—Jọn 8:32.

Epanọ uwuhrẹ Jesu na u wo iruo te nẹnẹ: O rẹ were ekpako ukoko Ileleikristi nẹnẹ re a se eyae na nọ a tẹ kpare obọ re a kpahe fihọ enọ evaọ iwuhrẹ ukoko na. A re rri eyae nọ e kpako no ghaghae, keme eyae itieye na a be rọ ẹkwoma uruemu gbe oriruo rai “wuhrẹ ahwo onọ uwoma.” (Taitọs 2:3) A riẹ re inọ eyae na a bi whowho emamọ usi Uvie Ọghẹnẹ.—Olezi 68:11, NW; rri ẹkpẹti na, “Kọ Pọl Ukọ na Ọ Ta nọ Eyae na A Ta Ẹme He?” evaọ ẹwẹ-obe avọ 9.

◼ Jesu o rri eyae na vo ho. Evaọ oke emọ Izrẹl, a rri emezae ghare vi emetẹ. Obe jọ nọ a kere izi egagọ ahwo Ju fihọ o ta kpahe uruemu yena, inọ: “Jọ eva e were ohwo nọ o yẹ emezae ọvo, rekọ uye u te ohwo nọ o yẹ emetẹ.” Esẹgbini jọ a rri ọmọtẹ wọhọ owha ogbẹgbẹdẹ, keme o jọ owhai-iruo rai re a lele ọmọtẹ na jiroro kpahe ọzae nọ o fo nọ ọ rẹ rehọ, yọ evaọ ẹdẹ nọ a ti su ei kpohọ orọo, ọsẹgboni na a te kẹe eware buobu rọ hẹriẹe uwou. Ghele na, esẹgbini na a rehọ e riẹ inọ ọmọtẹ na ọ te sae rẹrote ai hi nọ a tẹ kpako no.

Jesu o dhesẹ via inọ makọ uzuazọ ọmọtẹ nọ ọ gbẹ rrọ ọmaha u wuzou wọhọ uzuazọ ọmọzae. Jesu ọ kpare ọmọtẹ Jairọs no uwhu ze, wọhọ epanọ ọ kpare ọmọzae aye-uku ẹwho Nein. (Mak 5:35, 41, 42; Luk 7:11-15) Nọ Jesu o siwi aye jọ nọ ẹzi ogbegbe o ru zulẹ evaọ “ikpe kpogberee” no, o te sei “ọmọtẹ Abraham,” ẹme nọ a rẹ kake jọ ikere ahwo Ju ruẹ hẹ. (Luk 13:10-16) Jesu ọ rọ odẹ nana bru ọghọ họ aye na oma, je dhesẹ inọ aye na ọ rrọ ghaghae wọhọ epanọ amọfa a rrọ ghaghae re na, gbe inọ aye na o wo ẹrọwọ.—Luk 19:9; Ahwo Galesha 3:7.

Epanọ uwuhrẹ Jesu na u wo iruo te nẹnẹ: Ohare ahwo Asia jọ u dhesẹ nọ re a wuhrẹ ọmọtẹ o rẹ kẹ erere ọvo ho; o ta nọ: “Re a yọrọ ọmọtẹ o wọhọ ohwo nọ o bi ku ame họ ọgbọ omọfa.” U fo ho re esẹgbini nọ e rrọ Ileleikristi a wo ọkpọ iroro yena, ukpoye a rẹ rẹrote emọ rai kpobi, te emezae te emetẹ. O gwọlọ nọ esẹgbini Ileleikristi a re vi emezae gbe emetẹ rai kpohọ umutho isukulu nọ i fo, jẹ rẹrote aikpobi evaọ abọ usiwo-imu.

◼ Jesu o fi eva họ eyae na. Evaọ ekọto ahwo Ju, a se isẹri aye gbe oware ovo ho, a rri rai wọhọ erọ ọrigbo. Ogbiku jọ nọ a re se Josephus, ọnọ ọ rria evaọ ikpe-udhusoi ọsosuọ, ọ ta nọ: “Ajọ ohwo ọvo ọ rehọ isẹri nọ aye o se he, keme a rrọ ahwo nọ a re fi eva họ họ.”

Wo ohẹriẹ no eriwo yena, u no Jesu eva ze re ọ kake romavia kẹ eyae evaọ oke nọ ọ kpare oma no, jẹ ta kẹ ae re a nyae vuẹ ilele riẹ. (Matiu 28:1, 8-10) Dede nọ eyae nana a jariẹ evaọ oke nọ a kare Jesu gbe oke nọ a kiei, o jọ bẹbẹ kẹ ikọ na re a rọwo ẹme eyae na. (Matiu 27:55, 56, 61; Luk 24:10, 11) Eyae na nọ Jesu ọ kake romavia kẹ na u dhesẹ nọ o rri rai te ahwo nọ a rẹ sai se isẹri, wọhọ epanọ ilele edekọ riẹ a je ru na.—Iruẹru Ikọ Na 1:8, 14.

Epanọ uwuhrẹ Jesu na u wo iruo te nẹnẹ: Evaọ ikoko Isẹri Jihova, ezae nọ a ro mu re a rẹrote ewha-iruo a re bru ọghọ họ eyae na oma ẹkwoma ẹme eyae na nọ a re roro kpahe. Ezae Ileleikristi a re “tete” hayo bru ọghọ họ eyae rai oma nọ a tẹ be gaviezọ kẹ ae.—1 Pita 3:7; Emuhọ 21:12.

Ehri-Izi Ebaibol I re Fiba Evawere Eyae Na

Nọ ezae a tẹ be raro kele Kristi, u re ru nọ ezae a rẹ rọ kẹ eyae adhẹẹ nọ o te rai, je ru nọ eyae na a re ro wo ufuoma nọ Ọghẹnẹ ọ gwọlọ nọ a wo. (Emuhọ 1:27, 28) Ukpenọ ezae Ileleikristi a re roro nọ a woma vi eyae rai, u fo nọ a re fi ehri-izi Ebaibol họ iruo, onọ u re fiba evawere eyae na.—Ahwo Ẹfẹsọs 5:28, 29.

Nọ a mu Ebaibol na họ ewuhrẹ kugbe aye nọ a re se Yelena, ọzae riẹ o te je gboja kẹe. A yọrọ ọzae na evaọ ẹkwotọ nọ a rẹ jọ lahiẹ eyae gbe onọ ọzae o re jo mu ọmọtẹ nọ ọ gwọlọ rọo rehọ. Yelena ọ ta nọ: “Oware nọ me wuhrẹ no Ebaibol na ze o kẹ omẹ ọbọga. U mu omẹ ẹro nọ ohwo jọ ọ riẹ nọ o you omẹ gaga, jẹ be daezọ mẹ. U te je mu omẹ ẹro re inọ otẹrọnọ ọzae mẹ ọ rẹ rọwo nọ a wuhrẹ Ebaibol na kugbei, uruemu riẹ kpahe omẹ o sai nwene.” Oware nọ aye na o je rẹro riẹ u rugba nọ ọzae riẹ ọ rọwo nọ a wuhrẹ Ebaibol na kugbei. Ọzae na ọ họ-ame uwhremu na je zihe ruọ omọvo Isẹri Jihova. Yelena ọ ta nọ: “A tẹ te riẹe fihọ ohwo odhedhẹ. Ma wuhrẹ epanọ ma rẹ rọvrẹ ohwohwo no eva ze.” Aye na o ku rie họ uwhremu na inọ: “Ehri-izi Ebaibol nọ ma fihọ iruo i fi obọ họ kẹ ọzae mẹ you omẹ, yọ me wo ufuoma no evaọ orọo mẹ.”—Ahwo Kọlọsi 3:13, 18, 19.

Orọnikọ Yelena ọvo oware utioye o via kẹ no ho. Eyae buobu nọ e rrọ Ileleikristi a be were eva fikinọ te ai te ezae rai a be daoma fi ehri-izi Ebaibol họ iruo evaọ orọo rai. A bi wo omosasọ no omakugbe ibe Ileleikristi rai ze.—Jọn 13:34, 35.

Ezae gbe eyae nọ e rrọ Ileleikristi a riẹ inọ a gba ha, gbe inọ a rrọ usu emama Ọghẹnẹ nọ e rrọ igbo egbogbo. Rekọ, a tẹ be daoma wo usu okpekpe kugbe Jihova, Ọghẹnẹ oyoyou mai na, a ti si ai “no igbo egbogbo,” jẹ reawere “uvẹ oruaro emọ Ọghẹnẹ.” Onana yọ emamọ irẹro rọkẹ ezae gbe eyae nọ i fi eva họ Ọghẹnẹ.—Ahwo Rom 8:20, 21.

[Ẹkpẹti nọ o rrọ ẹwẹ-obe avọ 9]

Kọ Pọl Ukọ na Ọ Ta nọ Eyae na A Ta Ẹme He?

Pọl ukọ na o kere nọ: ‘Eyae na e rẹ fọ tou eva ukoko na.’ (1 Ahwo Kọrint 14:34) Eme họ otofa ẹme riẹ na? Kọ o bi rri eyae na vo inọ a riẹ oware ovo ho? Ijo. Evaọ uzẹme, Pọl ọ tubẹ ta ẹsibuobu kpahe emamọ edhere nọ eyae jọ a jẹ hai ro wuhrẹ ahwo. (2 Timoti 1:5; Taitọs 2:3-5) Evaọ ileta nọ Pọl o kere se Ileleikristi nọ e jọ obọ Kọrint, ọ hrẹ eyae na gbe amọfa nọ i wo okẹ evẹravẹrẹ gbe aroọruẹ inọ a “fibo” nọ omọfa evaọ ukoko na ọ tẹ be ta ẹme.a (1 Ahwo Kọrint 14:26-30, 33) O wọhọ nọ oma o jẹ hae kpakpa eyae jọ nọ i kurẹriẹ ruọ ukoko na obọ re a bru ẹme dhe oruẹme na unu fikinọ a gwọlọ nọ enọ nọ i kiekpahe eware nọ a rọwo na, wọhọ epanọ uruemu ahwo oke yena o jọ. Re onana o seba ẹvia, Pọl ọ tẹ ta nọ jọ eyae na a “nọ ezae rai eva obọ uwou.”—1 Ahwo Kọrint 14:35.

[Oruvẹ-obotọ]

[Uwoho nọ o rrọ ẹwẹ-obe avọ 10]

Jesu o bru ọghọ họ Meri Magdalini oma nọ ọ ta kẹe nọ ọ nyae vuẹ ikọ riẹ inọ ọ kparoma no

[Uwoho nọ o rrọ ẹwẹ-obe avọ 11]

Ahwo nọ i bi fi ehri-izi Ebaibol họ iruo a re rri eyae ghaghae je bru ọghọ họ ae oma